Aksi fu leisiman

Wi de fruplekti ala ten fu du san wi pramisi Gado?

Bijbel e sori taki te wan sma e pramisi Gado wan sani, dan dati na wan seryusu tori. A sma ben kan pramisi Gado taki a sa tyari wan ofrandi, taki a sa teki wan spesrutu wroko na en tapu, noso taki a no sa abi noti fu du nanga spesrutu sani, aladi a no abi fu de so taki wet e krutu den sani dati. Bijbel e taki fu sma di ben pramisi Gado taki den ben o du wan sani gi En, efu Gado fosi ben du wani sani gi den. Fu gi wan eksempre, Hana, a mama fu a profeiti Samuel, „ben meki wan pramisi èn a ben taki: ’O Yehovah fu den legre, efu . . . yu sa luku a kwinsi di yu uma-srafu e kisi èn memre mi trutru, èn yu no sa frigiti yu uma-srafu èn trutru sa gi yu uma-srafu wan manpikin, dan mi sa gi en na Yehovah ala den dei fu en libi, èn nowan sebinefi sa kon na tapu en ede’” (1 Samuel 1:11). Bijbel e taki dati wan pramisi na wan bosroiti di wan sma e teki fu ensrefi. Wi de fruplekti fu du san wi pramisi Gado?

„Ibri leisi te yu e pramisi Gado wan sani”, na so Kownu Salomo fu Israel fu owruten e taki, „dan no draidrai fu du san yu pramisi.” A e taki moro fara: „San yu pramisi fu du, du en. A moro bun taki yu no e pramisi noti, na presi taki yu meki wan pramisi èn yu no e hori yusrefi na a pramisi dati” (Preikiman 5:4, 5). A Wet di Gado ben meki Moses gi a pipel fu Israel e taki: „Te yu e pramisi Yehovah yu Gado wan sani, dan yu no musu draidrai fu du a sani dati, fu di Yehovah yu Gado sondro tweifri sa fruwakti dati fu yu, èn fu yu sei dati ben o de wan sondu trutru” (Deuteronomium 23:21). A de krin taki, te wi e pramisi Gado wan sani, dan dati na wan seryusu sani. Wi musu abi bun reide fu san ede wi e pramisi Gado wan sani èn a sma di e meki a pramisi dati no musu tweifri srefisrefi efu a sa man du san a ben pramisi. Efu dati de so, dan a moro bun taki a no e pramisi Gado nowan enkri sani. Ma te wan sma pramisi Gado wan sani kaba, dan a sma dati de fruplekti ala ten fu du san a pramisi?

Fa a de te wan sma pramisi wan trawan taki a o du wan sani, ma bakaten a sma e kon si taki a sani di a ben pramisi fu du no e kruderi nanga a wani fu Gado? Kon meki wi taki dati a sani di a ben pramisi fu du ben o abi leki bakapisi taki a ben o moksi hurudu nanga a tru anbegi? (Deuteronomium 23:18) A de krin fu si taki a sma dati no de fruplekti fu hori ensrefi na so wan pramisi. Boiti dati, a ben de so taki te wan uma di ben de na ondro a Wet fu Moses ben meki wan pramisi, dan en papa noso en masra ben kan sorgu taki a no ben abi fu hori ensrefi na a pramisi disi moro.—Numeri 30:3-15.

Poti prakseri sosrefi na a tori fu wan man di pramisi Gado taki a no sa trow, ma now a e si taki a sani disi na wan problema gi en. A pramisi di a meki kon de leki wan bigi tesi gi en, fu di a no makriki gi en fu hori ensrefi na den markitiki fu Gado. A man disi musu meki muiti ete fu hori ensrefi na a pramisi di a meki? A no ben o moro bun te a man disi e broko a pramisi di a ben meki, so taki a no e du hurudu, èn na presi fu dati a e suku a sari-ati fu Gado èn e begi En pardon fu di a no ben man hori ensrefi na a pramisi dati? Ensrefi musu bosroiti san na a moro bun sani gi en fu du. Nowan tra sma kan teki a bosroiti gi en.

Ma fa a de efu wan sma pramisi Gado wan sani, ma bakaten a e si taki a ben meki a pramisi sondro fu denki? A musu pruberi ete fu du san a ben pramisi? A no ben makriki gi Yefta fu du san a ben pramisi Gado, ma toku a du san a konsensi fu en ben taigi en fu du (Krutuman 11:30-40). Te wan sma no e du san a pramisi Gado, dan dati kan meki taki Gado sa kisi „atibron”, èn taki  a sa pori ala sani di a sma dati du (Preikiman 5:6). Te wi no e si en leki wan prenspari sani fu du san wi pramisi Gado, dan a sani disi ben kan meki taki Gado no sa feni wi bun moro.

Yesus Krestes ben taki: „Ma te unu taki Iya, dan meki a tan Iya; te unu taki Nôno, dan meki a tan Nôno; bika ala tra sani di yu e taki ete, e kon fu na ogriwan” (Mateyus 5:37). Wan Kresten no musu sorgu nomo taki a e du san a pramisi Gado, ma a musu sorgu sosrefi taki a de getrow ini ala sani di a e pramisi wan trawan, awansi na Gado noso libisma. Ma fa a de te a e kon si taki a kruderi di meki nanga wan sma ben sori fu de wan bun sani na ini a bigin, ma di a luku en moro fini, dan a si taki a kruderi dati no bun kwetikweti? A no musu denki lekti fu den sani disi. Ma te a e taki na wan opregti fasi nanga a tra sma, dan kande a sma dati sa bosroiti fu fri en fu a plekti dati.—Psalm 15:4; Odo 6:2, 3.

Te a abi fu du nanga den pramisi di wi e meki èn sosrefi nanga ala tra sani, dan san na a moro prenspari sani di wi musu hori na prakseri? Meki wi du muiti ala ten fu tan abi wan bun banti nanga Yehovah Gado.

[Prenki na tapu bladzijde 30, 31]

Hana no ben draidrai fu du san a ben pramisi

[Prenki na tapu bladzijde 30, 31]

Aladi a ben muilek gi Yefta fu du san a ben pramisi Gado, toku a du en