Den e yepi sma fu tyari densrefi na wan fasi di fiti

Den sma di ben e arki a programa fu Radio Mosambik na a kaba fu a yari 2001, ben yere a boskopu disi:

„A presidenti fu a Republiek ben go na a bijkantoro fu Yehovah Kotoigi ini Maputo (wan foto ini Mosambik). A gi den Kotoigi fu Yehovah deki-ati fu go doro fayafaya fu leri osofamiri fa fu tyari densrefi na wan fasi di fiti, èn fu hori programa di de fu yepi bigisma fu kon leri sabi leisi nanga skrifi. Sowan 10.000 sma kisi wini kaba fu den programa disi. Soleki fa Presidenti Chissano taki, dan den sortu programa disi na warti programa di e tyari furu wini kon gi a libimakandra, fu di den e yepi den sma na ini a kondre dati di no man leisi nanga skrifi ete.”

A boskopu ben abi wan pisi sosrefi fu a taki di a presidenti ben hori: „A e gi wi deki-ati fu si taki furu sma wani yepi trawan fu kon leri sabi leisi nanga skrifi. A sani disi e sori wi taki aladei sma sa yepi wi nanga den someni sma di no man leisi nanga skrifi. Fu dati ede, mi wani gi den Kotoigi fu Yehovah deki-ati fu go doro fayafaya nanga den programa di den e hori fu yepi sma fu kon leri sabi leisi nanga skrifi, awinsi na ini sortu tongo den e du dati. San de moro prenspari, na taki sma man leisi èn skrifi èn taki den man taki moro makriki nanga makandra. Boiti dati, na ini a ten di e kon sma sa man du moro fu yepi trawan fu kisi leri.”

Yehovah Kotoigi na ini Mosambik e leri sma leisi èn skrifi na 850 difrenti presi na ini a heri kondre, so taki sma kan leisi Gado wortu densrefi. Boiti dati, den e hori sowan 50.000 oso-bijbelstudie ibri wiki, sondro taki den e aksi pai gi dati. Ala den sani disi abi fu du nanga a Bijbel leri programa di e hori na heri grontapu na ini 235 kondre (Mateyus 24:14). Yu sosrefi kan kisi winimarki fu a programa disi. Efu yu wani yu kan kontakti Yehovah Kotoigi ini a birti fu yu.