Fa wi kan gebroiki den dei fu wi na wan fasi di Yehovah feni bun?

Wan Amerkan uma di ben e skrifi buku, Lydia H. Sigourney, ben libi fu 1791 te go miti 1865. A ben erken o warti ten de, taki a ben agersi dati nanga gowtu èn nanga diamanti. Ten di lasi gowe noiti e kon baka.

A GERSI leki libi syatu èn leki a e pasa gowe esi-esi. Fu di a psalm skrifiman David ben denki dipi fu a syatu libi di wi abi, meki a ben begi: „Leri mi, O Yehovah, fu sabi a kaba fu mi èn leri mi fu sabi o langa mi e libi, so taki mi kan kon sabi taki mi de fu wan syatu pisi ten nomo. Luku! Yu meki den dei fu mi kon syatu èn den yari fu mi libi de leki noti na ini yu ai.” David ben e broko en ede fu di a ben wani libi na wan fasi di e plisi Gado. A ben sori disi nanga den sani di a ben e taki èn nanga den sani di a ben e du. A ben agri taki a abi Yehovah fanowdu trutru, di a ben taki: „A howpu fu mi de na tapu yu” (Psalm 39:4, 5, 7). Yehovah ben arki David. A trutru ben luku den sani di David ben du èn a blesi en akruderi den sani di a du.

A kan pasa taki, fu di wi abi so furu sani fu du ibri momenti fu a dei, meki a gersi leki wi no abi ten srefisrefi. Disi kan tyari furu broko-ede kon, spesrutu efu wi abi so furu fu du èn so pikinso ten nomo fu du den. Wi e broko wi ede neleki David, fu libi na wan fasi di Gado e feni bun? Trutru, wi kan de seiker taki Yehovah e luku èn e ondrosuku ibriwan fu wi. Sowan 3600 yari pasa dan Yob, wan man di ben e frede Gado, ben agri taki Yehovah ben e si den sani di a ben e du èn ben e ondrosuku ala den du fu en. Aladi Yob no ben fruwakti wan piki, toku a aksi: „Te A e aksi frantwortu, san mi kan piki En?” (Yob 31:4-6, 14) Wi kan gebroiki den dei fu wi na wan fasi di Gado feni bun efu wi e poti yeye afersi na a fosi presi, efu wi e gi yesi na den komando fu en èn efu wi e gebroiki a ten di wi abi na wan koni fasi. Meki wi go poti moro prakseri na den sani disi.

Poti yeye afersi na a fosi presi na ini wi libi

Den Buku fu Bijbel di skrifi nanga yepi fu santa yeye e gi wi deki-ati fu poti yeye afersi na a fosi presi te den e taki: „Sorgu taki unu sabi bun san na den moro prenspari sani.” San na den prenspari sani disi? A piki abi fu du nanga ’soifri sabi èn nanga ala koni fu man si sani krin’ (Filipisma 1:9, 10). Fu kisi sabi fu den prakseri fu Yehovah wani taki dati wi musu gebroiki wi ten na wan koni fasi. Ma te wi e du furu muiti fu poti yeye afersi na a fosi presi, dan wi kan de seiker taki wi sa abi wan libi di sa gi wi furu prisiri.

Na apostel Paulus e memre wi fu „tan ondrosuku fu kon sabi san e plisi Masra”. Na ondrosuku disi wani taki dati wi musu ondrosuku fu san ede wi e du sani èn san na den lostu fu wi ati. Na apostel e taki moro fara: „Tan si krin san na a wani fu Yehovah” (Efeisesma 5:10, 17). Sobun, san e plisi Yehovah? Wan odo fu Bijbel e taki: „Koni na a moro prenspari sani. Kisi koni; èn nanga ala sani di yu e kisi, kisi frustan. Abi furu warderi gi en, èn a sa hei yu” (Odo 4:7, 8). Yehovah e prisiri nanga a sma di e suku a koni fu  Gado èn di e sori a koni disi na ini den du fu en (Odo 23:15). A moi fu a koni disi na taki sma no man puru en fu wi, noso sma no man pori en. Fu taki en leti, a e tron leki wan waktiman gi wi èn a e kibri wi gi ’a takru pasi èn gi den sma di e taki takru sani’.—Odo 2:10-15.

Fu dati ede a de wan koni sani fu luku bun taki wi no e bigin si yeye afersi leki sani di no de so prenspari! Wi musu kweki wan fasi fu denki di e sori warderi gi den sani di Yehovah taki èn wi musu kweki a yoisti sortu frede gi En (Odo 23:17, 18). Aladi wi kan kweki den fasi disi na iniwan ten na ini wi libi, toku a moro bun ten fu du disi èn fu poti Bijbel gronprakseri na ini wi libi, de na ini wi yongu yari. „Memre now yu Gran Mekiman na ini den dei fu yu yongu yari”, na so a koni Kownu Salomo e taki.—Preikiman 12:1.

A moro bun fasi fa wi kan kweki dipi warderi gi Yehovah na fu begi ibri dei. David ben sabi o prenspari a de fu fruteri Yehovah den dipi firi fu en, bika a ben begi: „Grantangi, yere a begi fu mi, O Yehovah èn arki mi grantangi te mi e bari kari yu fu yepi mi. Grantangi, no tan pî te mi ai e lon watra” (Psalm 39:12). Wi abi so wan dipi firi gi Yehovah taki son leisi wi e krei srefi? Fu tru, o moro wi e taki nanga Yehovah fu den moro dipi firi fu wi ati èn o moro wi e denki dipi fu a Wortu fu En, o moro krosibei a e kon na wi.—Yakobus 4:8.

Leri fu gi yesi

Moses, wan tra man di ben abi bribi, ben si taki a ben abi Gado fanowdu. Neleki David, Moses ben si dati a libi lai nanga problema. Dati meki a ben aksi Gado fu sori en ’fa fu teri den dei fu en na so wan fasi taki a ben kan kisi wan ati di koni’ (Psalm 90:10-12). Wi kan kisi wan ati di koni soso te wi e leri den wet fu Yehovah èn te wi e libi akruderi den gronprakseri fu En. Moses ben sabi disi èn ibri tron baka, a ben meki muiti fu meki a nâsi Israel hori a prenspari tru tori dati na prakseri. A ben du disi fu di a ben tan fruteri den a wet nanga den gronprakseri fu Gado fosi den ben teki a Pramisi Kondre abra. Ibriwan kownu di Yehovah ben sa poti bakaten fu tiri Israel ben musu skrifi wan kopi fu a Wet gi ensrefi èn a ben musu leisi na ini en ala den dei fu en libi. Fu san ede? So taki a ben kan leri fu frede Gado. Disi ben de wan tesi fu luku efu a kownu ben o gi yesi. Disi ben o kibri en fu a no firi moro hei leki den brada fu en èn a ben o meki a tiri moro langa leki kownu (Deuteronomium 17:18-20). Yehovah ben pramisi disi ete wan tron di a ben taigi Salomo, a manpikin fu David, taki: „Efu yu sa waka na tapu den pasi fu mi, fu di yu e hori den wet nanga den komando fu mi, neleki fa yu papa David ben waka, dan mi sa meki den dei fu yu kon moro langa tu.”—1 Kownu 3:10-14.

A de wan seryusu sani fu gi yesi na Gado. Efu wi ben o si son pisi fu den wet nanga komando fu Yehovah leki sani di no de so prenspari, dan seiker Yehovah ben sa si so wan fasi fu denki wantewante (Odo 15:3). Fu di wi sabi disi, dan wi musu tan hori den moi tirilin fu Yehovah hei, srefi efu a no de so makriki fu du dati sontron. Satan e du ala san a man fu „tapu pasi gi wi” te wi e pruberi fu hori den wet nanga den komando fu Gado.—1 Tesalonikasma 2:18.

A de tumusi prenspari fu gi yesi na a Bijbel rai fu kon makandra fu anbegi èn fu abi Kresten demakandra (Deuteronomium 31:12, 13; Hebrewsma 10:24, 25). A de wan bun sani efu wi aksi wisrefi: ’Mi abi a fasti bosroiti di de fanowdu fu du san de prenspari trutru?’ Efu wi e poti a demakandra fu wi nanga wi brada na wan sei èn efu wi no e poti prakseri na den sani di wi e leri na den Kresten konmakandra, soso fu di wi e pruberi fu abi seikerfasi na moni sei, dan disi o meki a banti fu wi nanga Yehovah kon swaki. Na  apostel Paulus ben skrifi: „Meki a fasi fa [unu] e libi de fri fu a lobi fu moni, èn de tevrede nanga den sani fu now. Bika [Yehovah] taki: ’Mi no sa gowe libi yu kwetikweti, èn noiti mi no sa drai mi baka gi yu’” (Hebrewsma 13:5). Efu wi de klariklari fu gi yesi na den komando fu Yehovah dan disi e sori taki wi abi ala frutrow dati a sa sorgu gi wi.

Yesus ben leri fu gi yesi èn a kisi wini fu dati. Wi kan du dati tu (Hebrewsma 5:8). O moro wi e meki muiti fu gi yesi, o moro makriki a o de gi wi fu du so, srefi na ini den moro pikin sani. A tru taki sma no e sori switifasi gi wi èn son leisi e handri grofu nanga wi fu di wi e hori wi soifri retifasi. Disi kan pasa, spesrutu na wrokopresi, na skoro noso na ini wan osofamiri pe no ala sma na Kotoigi. Ma wi e kisi trowstu fu a pramisi di den Israelsma ben kisi, taki efu den ben ’lobi Yehovah, fu di den ben o arki en sten èn fu di den ben o tan hori na en, dan a ben o de a libi fu den èn a langa fu den dei fu den’ (Deuteronomium 30:20). Wi e kisi a srefi pramisi disi.

Gebroiki ten na wan koni fasi

Efu wi e gebroiki a ten fu wi na wan koni fasi, dan disi sa yepi wi tu fu gebroiki den dei fu wi na wan fasi di Yehovah feni bun. Tra fasi leki moni di yu kan kibri, ten na wan sani di wi musu gebroiki noso a e lasi gowe. Ala yuru di e lasi gowe, no e kon baka noiti moro. Fu di alaten wi abi moro fu du leki san wi man du, dan wi musu aksi wisrefi efu wi e gebroiki wi ten na so wan fasi taki wi kan doro den marki di wi poti na ini wi libi. Wan tumusi prenspari marki di ala Kresten musu poti na fu teki prati doronomo na a Kownukondre preikiwroko èn na a wroko fu meki disipel.—Mateyus 24:14; 28:19, 20.

A wan enkri fasi fa wi o gebroiki ten na wan koni fasi na te wi sabi o warti ten de. Fu dati ede, Efeisesma 5:16 e gi wi a deki ati fu ’bai a yoisti ten gi wisrefi’, èn  disi abi fu du nanga a poti di wi e poti sani di no de so prenspari na wan sei. Dati wani taki dati wi no musu gebroiki so furu ten gi den sani dati. Te wi e luku telefisi tumusi furu noso e suku sani tapu Internet, e leisi grontapu buku di no e tyari wini kon, noso te wi abi prisiriten pasa marki, dan dati kan meki taki wi e weri srefisrefi. Boiti dati, a feti di wi e feti fu kisi furu materia gudu kan nyan a ten di wi abi fanowdu fu kisi wan ati di koni.

Sma di lobi fu gebroiki den ten bun, e taki: „Yu no kan gebroiki yu ten na wan bun fasi sondro fu poti wan bun marki na yu fesi.” Den taki fu fo penti na san yu kan hori yusrefi te yu o poti marki ini yu libi: yu musu sabi soifri san na a marki disi, yu musu meki wan schema fu man doro a marki disi, a musu de wan marki di yu man fu doro èn yu musu poti wan spesrutu ten fu doro a marki disi.

Wan marki di e tyari wini kon na fu leisi a Bijbel moro bun. A fosi sani di wi musu du na fu sabi soifri san na a marki namku, fu leisi a heri Bijbel. Baka dati wi musu meki wan schema. Efu wi e du disi, dan wi kan si fa wi e go na fesi. Den marki di wi e poti musu gi wi deki-ati fu go na fesi èn den musu meki wi gro na yeye fasi. Wi musu man doro den marki disi sosrefi. Hori na prakseri taki yu musu du san yu man èn yu musu luku omeni ten yu o abi fanowdu fu du dati. Son sma abi moro ten fanowdu leki trawan, fu doro wan marki. Te fu kaba, wi musu poti wan spesrutu ten gi a marki di wi wani doro. Te wi e poti wan spesrutu dei fu doro a marki fu wi, dan dati kan gi wi deki-ati fu doro a marki dati trutru.

Ala memre fu a Bethelfamiri na heri grontapu, di e dini na a edekantoro fu Yehovah Kotoigi noso na wan fu den bijkantoro na heri grontapu, abi a spesrutu marki fu leisi a heri Bijbel na ini a fosi yari te den de na Bethel. Den sabi dati a leisi fu Bijbel e tyari wini kon, a sa meki den gro na yeye fasi èn den sa kisi wan moro krosibei banti nanga Yehovah, di e leri den fu kisi wini gi densrefi (Yesaya 48:17). Wi kan poti a marki sosrefi fu leisi a Bijbel doronomo?

Winimarki te wi e gebroiki den dei fu wi na wan fasi di Yehovah feni bun

Wi e kisi furu blesi te wi e poti yeye afersi na a fosi presi. Wan sani, na taki a e yepi wi fu abi moro prisiri na ini san wi e du èn e a yepi wi fu si san na a trutru marki fu a libi. Te wi e fruteri Yehovah doronomo na ini begi san de na tapu wi ati dan dati e tyari wi kon moro krosibei na en. A begi di wi e begi wawan, e sori kaba taki wi e frutrow na tapu en. Te wi e leisi Bijbel ibri dei èn sosrefi den Bijbel publikâsi di „a getrow èn koni srafu” gi wi, dan dati e sori taki wi wani arki Gado te a e taki nanga wi (Mateyus 24:45-47). Disi e yepi wi fu kisi wan ati di koni so taki wi kan teki bun bosroiti na ini wi libi.—Psalm 1:1-3.

Wi e prisiri srefisrefi fu gi yesi na den komando fu Yehovah, bika den no de wan hebi gi wi (1 Yohanes 5:3). A matifasi fu wi nanga Yehovah e kon moro tranga te wi e meki muiti ibri dei fu gebroiki den dei fu wi na wan fasi di a e feni bun. Wi kan yepi wi Kresten brada nanga sisa na yeye fasi sosrefi. Yehovah e prisiri te wi e du den sani disi (Odo 27:11). Èn wan moro bigi paiman no de leki te wi sabi taki Yehovah e feni wi bun now èn fu têgo!

[Prenki na tapu bladzijde 21]

Kresten e si yeye afersi leki seryusu sani

[Prenki na tapu bladzijde 22]

Yu e gebroiki yu ten na wan koni fasi?

[Prenki na tapu bladzijde 23]

Wi e meki a matifasi fu wi nanga Yehovah kon moro tranga te wi e meki muiti fu gebroiki den dei fu wi na wan fasi di a e feni bun