Presi fu anbegi—Wi abi den fanowdu?

’A fesidyari fu a kerki, èn sosrefi den strati na en lontu lai nanga dusundusun pelgrim. Den pelgrim disi e komoto fu difrenti presi fu a kondre èn den e weri krosi nanga ala sortu kloru. Sosrefi grupu fu Ingi de dyaso, èn den e dansi tapu a poku fu dron, na a fasi fa den e bribi taki den fositen tata fu den ben e dansi. Getrow kerkisma de dyaso tu, èn nanga skin-ati den e meki muiti fu kroipi tapu den kindi na mindri den ipi-ipi sma, fu go na a santa presi.’

NA DATI a koranti El Economista ben taki fu wan bigi ipi sma na ini december 2001. Na a ten dati, sowan dri milyun sma ben go na a kerki na ini Meksikow City, fu sori taki den ben bribi na ini a Nyunwenke fu Guadalupe. Tra kerki gebow, soleki a St. Peter’s Basilica (wan bun bigi kerki) na ini Rome, e hari ipi-ipi sma tu.

Furu sma di wani anbegi Gado abi bigi lespeki gi kerki gebow. „Gi mi, kerki ben de wan presi pe mi ben kan de krosibei fu Gado”, na so Maria fu Brasyonkondre e taki. „Mi ben si en leki wan santa presi. Mi ben e bribi taki mi sili ben o kon krin te mi ben e go na kerki, èn taki mi ben e du wan sondu efu mi no ben e go na kerki ibri sonde, noso efu mi no ben e go fu taki fu den sondu fu mi ibri sonde sosrefi.” Wan uma fu Meksikow di nen Consuelo, e fruteri: „Mi trutru ben lobi a kerki; Kerki ben de wan trutru prenspari presi gi mi. Te mi ben de drape, dan mi ben e firi neleki mi ben de na ini hemel.”

Aladi son sma feni taki kerki gebow musu de, toku tra sma e tweifri efu a de fanowdu trutru taki sma e anbegi Gado na ini den sortu gebow disi. Peter Sibert, wan Lomsu priester na ini Ingrisikondre, ben e taki fu a pikin grupu fu sma nomo di e go na kerki na ini a ten disi. A ben taki: „[Sma] e hori densrefi soso na den sani di den lobi, te a abi fu du nanga a bribi fu den. Furu owru sma na Lomsusma, èn den e hori densrefi na a bribi fu den. Ma den yonguwan no e libi akruderi a bribi fu den.” A koranti fu a foto London, namku a Daily Telegraph fu 20 november 1998, ben skrifi: „Fu sensi 1979, sowan 1500 kerki  tapu na ini Ingrisikondre, aladi sowan 495 nyun kerki nomo opo, èn 150 ben bow baka.”

Na ini 1997, a koranti Süddeutsche Zeitung fu a foto Munich, na Doisrikondre, ben skrifi: „Kerki gebow kon tron kino-oso nanga oso pe sma kan tan na ini: Bribiman no e go moro na den kerki disi, sma e gebroiki presi fu anbegi gi heri tra sani. . . . Wan sani di e pasa doronomo kaba na ini Bakrakondre èn na ini Ingrisikondre, e pasa now na ini Doisrikondre.” A koranti ben skrifi moro fara: „Sowan 30 te go miti 40 kerki seri na ini Doisrikondre na ini den lasti yari disi, èn a sani disi trutru e fruwondru sma.”

Sma abi kerki gebow trutru fanowdu fu man anbegi Gado? Bijbel e taki dati sma musu anbegi Gado na ini bigi kerki noso na ini kerki di lai nanga wan lo pranpran? Na ini sortu gebow sma gwenti fu anbegi a tru èn libi Gado? San den gebow disi e leri wi te wi aksi wisrefi efu sma abi presi fu anbegi fanowdu? San den e leri wi sosrefi te wi e aksi wisrefi san sma musu du na ini den gebow disi?