Tan dini Gado leki wán man
Tan dini Gado leki wán man
„Mi sa meki den pipel taki wan soifri tongo, so taki den alamala kan kari a nen fu Yehovah, so taki den kan dini en leki wán man.”—SEFANYA 3:9.
1. Fa Sefanya 3:9 e kon tru?
SMA e taki sowan 6000 tongo now na heri grontapu. Boiti den tongo disi, difrenti tra tongo de tu di sma fu spesrutu kontren e taki. Ma awansi sma e taki Arabiatongo noso Yapantongo, toku a de so taki Gado du wan kefalek wondru sani. A meki taki libisma fu ala sortu kondre man leri sabi èn man taki a wan-enkri tru tongo. A sani disi na wan kontru fu wan pramisi di Gado meki nanga mofo fu a profeiti Sefanya: „Mi [Yehovah Gado] sa meki den pipel taki wan soifri tongo [disi trutru wani taki „wan krin mofo”], so taki den alamala kan kari a nen fu Yehovah, so taki den kan dini en leki wán man.”—Sefanya 3:9.
2. San na a „soifri tongo”, èn san na a bakapisi fu di sma e taki a tongo dati?
2 A „soifri tongo” na a waarheid fu Gado di de fu feni na ini en Wortu, Bijbel. A de funamku a tru tori di abi fu du nanga Gado Kownukondre di sa santa a nen fu Yehovah, a sa tyari kon na krin taki na En abi a reti fu tiri, èn a sa tyari blesi kon sosrefi gi libisma (Mateyus 6:9, 10). Sma fu difrenti kondre nanga ras e taki a soifri tongo disi, di de a wan-enkri tongo na grontapu di e sori krin fa fu anbegi Gado na a yoisti fasi. Fu di den e taki a tongo disi, meki den man dini Yehovah „leki wán man”. Sobun, den e dini en na ini wánfasi, noso „nanga wan ati”.—Da Bijbel na ini Sranantongo.
Pratifasi no musu de na mindri a pipel fu Gado
3. San e meki taki wi man dini Yehovah na ini wánfasi?
3 Wi leki Kresten e prisiri fu di wi man wroko makandra, aladi wi e taki difrenti tongo. Aladi wi e preiki a bun nyunsu fu a Kownukondre na ini furu tongo, toku wi e dini Gado na ini wánfasi (Psalm 133:1). Wi man du dati fu di wi e taki a wan-enkri soifri tongo fu gi Yehovah glori, èn wi e taki a tongo dati awansi pe wi e libi na grontapu.
4. Fu san ede pratifasi no musu de na mindri a pipel fu Gado?
4 Pratifasi no musu de na mindri a pipel fu Gado. Na apostel Petrus ben poti krakti tapu a tori disi di a ben e preiki na a oso fu a Heiden legre ofsiri Kornelius, na ini 36 G.T. A ben taki: ’Now mi sabi seiker taki Gado no lobi a wan sma moro a trawan, ma na ini ibri nâsi a sma di e frede en èn di e du san de regtfardiki, bun na en ai’ (Tori fu den Apostel 10:34, 35). Fu di dati de so, meki pratifasi no musu de na ini a Kresten gemeente, sma no musu bumui nanga spesrutu grupu fu sma nomo, èn den no musu lobi spesrutu sma moro leki trawan.
5. Fu san ede a no bun te wi e gi trawan deki-ati fu bumui soso nanga spesrutu sma na ini a gemeente?
5 Di wan studenti fu wan heiskoro ben go na a Kownukondre zaal, dan a taki: „Furu tron, den kerki e hari sma kon di de fu wan spesrutu ras, noso di abi wan spesrutu kulturu. . . . Ala den Yehovah Kotoigi ben e sidon makandra; den no ben e sidon na ini spesrutu grupu.” Ma wan tu sma na ini a gemeente Korente fu owruten ben e bumui soso nanga spesrutu sma na ini a gemeente. Leki bakapisi fu dati kesekese ben opo kon, èn a sani disi ben e gens a tiri fu Gado en santa yeye, fu di a yeye dati e tyari wánfasi nanga vrede kon (Galasiasma 5:22). Efu wi ben o gi trawan deki-ati fu bumui soso nanga spesrutu sma na ini a gemeente, dan wi ben o gens a tiri fu a yeye fu Gado. Fu dati ede, meki wi hori na prakseri san na apostel Paulus ben taigi den Korentesma: „Mi e frumane unu brada, na ini a nen fu wi Masra Yesus Krestes, taki un alamala musu taki na ini wánfasi nanga makandra, èn taki nowan prati musu de na un mindri, ma taki unu de makandra na ini wánfasi soleki fa a fiti, nanga a srefi denki èn nanga a srefi fasi fu prakseri” (1 Korentesma 1:10). Na ini a brifi di Paulus ben skrifi gi den Efeisesma, a ben poti krakti sosrefi tapu a wánfasi di den ben musu abi.—Efeisesma 4:1-6, 16.
6, 7. Sortu rai Yakobus ben gi den sma di ben lobi spesrutu sma moro leki trawan, èn fa wi kan gebroiki a rai fu en?
6 Kresten musu sori ala ten taki den lobi ala sma a srefi (Romesma 2:11). Fu di son sma na ini a gemeente fu a fosi yarihondro ben lobi gudusma moro leki tra sma, meki a disipel Yakobus ben skrifi: „Mi brada, efu unu abi bribi na ini Masra Yesus Krestes di de wi glori, dan unu no kan gi grani na a wan sma moro leki a trawan, a no so? Bika efu wan sma e kon na wan konmakandra fu unu nanga gowtu linga na en finga nanga moi krosi, ma wan pôtiman di weri doti krosi e kon na inisei tu, ma toku unu e gi moro grani na a wan di weri a moi krosi èn unu e taki: „Sidon dyaso tapu wan moi presi”, èn unu e taigi a pôtiwan: „Tan tanapu drape”, noso: „Go sidon drape na sei a bangi pe mi e poti mi futu”, a no de so dan taki unu e si a wan grupu moro hei leki a trawan, èn taki unu tron krutuman di e teki takru bosroiti?”—Yakobus 2:1-4.
7 Te gudusma di no ben de na bribi ben kon na a Kresten konmakandra nanga gowtu linga èn moi krosi, èn te pôtisma di no ben de na bribi ben kon drape tu nanga doti krosi, dan den gudusma ben e kisi spesrutu grani. Son Kresten ben e gi gudusma okasi fu sidon „tapu wan moi presi”, aladi den ben e taigi den pôtisma fu tanapu noso fu sidon na gron na den futu fu wan sma. Ma fu di Gado lobi ala sma a srefi, meki a ben gi a frulusu-ofrandi fu Yesus gi ala sma, awinsi den pôti noso gudu (Yob 34:19; 2 Korentesma 5:14). Sobun, efu wi wani du san Yehovah feni bun, èn efu wi wani dini en leki wán man, dan wi no musu lobi spesrutu sma moro leki trawan, èn wi no musu ’prèise sma soso fu man kisi wini fu dati’.—Yudas 4, 16.
No de sma di e krutukrutu
8. San ben pasa fu di den Israelsma ben e krutukrutu?
8 Fu man tan abi wánfasi èn fu man tan kisi a bun-ati fu Gado, dan wi musu gi yesi na a rai fu Paulus: „Tan du ala sani sondro fu krutukrutu” (Filipisma 2:14, 15). Den getrow Israelsma di ben kisi frulusu komoto na ini Egepte ben e krutu Moses nanga Aron, èn fu di den ben du dati, meki den ben krutu Yehovah Gado srefi. Leki bakapisi fu dati, ala den mansma di ben abi 20 yari èn di ben de moro owru leki dati, no go na ini a Pramisi Kondre, ma den alamala dede na ini den 40 yari di Israel ben de na ini a gran sabana. Soso Yosua nanga Kaleb nanga den Leifisma di ben de getrow, kisi na okasi dati (Numeri 14:2, 3, 26-30; 1 Korentesma 10:10). Den sma ben pai wan bigi paiman trutru fu di den ben e krutukrutu!
9. San Miryam ben ondrofeni fu di a ben e krutukrutu?
9 A sani disi e sori san kan pasa te wan heri pipel e krutukrutu. Ma fa a de te spesrutu sma e krutukrutu? We, Moses en sisa, Miryam, èn sosrefi en brada Aron, ben e krutukrutu: „Yehovah taki nanga yepi fu Moses wawan? A no taki nanga yepi fu wi tu?” A tori e taki moro fara: „Yehovah ben e arki” (Numeri 12:1, 2). San ben de a bakapisi? Soleki fa a sori, dan Miryam na a sma di ben bigin kragi, èn fu dati ede Gado ben meki a kisi syen. Fa Gado ben du dati? Gado ben naki en nanga gwasi, èn a ben musu tan seibi dei dorosei fu a kampu teleki a ben krin baka.—Numeri 12:9-15.
10, 11. San na a bakapisi te sma no e dwengi densrefi fu no krutukrutu? Gi wan eksempre.
10 Te wan sma e krutukrutu, dan dati no wani taki nomo dati a sma e kragi fu wan ogridu. Sma di abi a gwenti fu krutukrutu e broko den ede tumusi nanga den eigi firi, noso nanga den eigi posisi. Den sma disi e meki trawan poti prakseri na den, na presi fu Gado. Efu wan sma no e meki muiti fu dwengi ensrefi fu no krutukrutu, dan a sani disi kan meki taki kesekese e opo kon na mindri den brada nanga sisa fu a gemeente, èn den no sa man dini Yehovah leki wán man. Disi de so fu di sma di e krutukrutu gwenti fu tyari den kragi fu den go na trawan, fu di den e howpu taki trawan sa agri taki den abi leti fu kragi.
11 Fu eksempre, kande wan sma e krutu a fasi fa wan spesrutu owruman e hori den lezing fu en na ini a gemeente, noso a fasi fa a e du en wroko. Efu wi e arki a kragiman, dan wi kan bigin denki soleki fa en e denki. Den sani di na owruman e du no ben trobi wi fosi, ma now di wi arki a kragiman, dan wi e bigin si fowtu na a owruman. Te fu kaba wi sa feni taki na owruman no e du nowan sani bun, èn wisrefi ben kan bigin kragi fu den sani di a e du. A no fiti fu tyari wisrefi na so wan fasi na ini wan gemeente fu Yehovah en pipel.
12. San kan pasa nanga a banti di wi abi nanga Gado te wi e krutukrutu?
12 Te wi e krutu den mansma di abi a frantwortu fu sorgu gi na ipi fu Gado, dan dati kan abi leki bakapisi taki wi e taigi den man dati hati sani. Te wi e krutu den, noso te wi e fruteri takru sani fu den soso fu gi den porinen, dan dati kan pori a banti di wi abi nanga Yehovah (Exodus 22:28). Sma di e tan go doro fu taigi trawan hati sani, no sa kisi a Kownukondre fu Gado (1 Korentesma 5:11; 6:10). A disipel Yudas ben skrifi fu sma di ben abi a gwenti fu krutukrutu èn di „no [ben] abi lespeki gi den wan di kisi makti fu tiri èn den [ben] e taki ogri fu den wan di kisi glori”, namku, den man di abi frantwortu na ini a gemeente (Yudas 8). Den sma dati di ben e krutukrutu no ben bun na ini Gado ai, èn wi e du bun fu no teki a takru eksempre fu den.
13. Fu san ede sma abi leti son leisi fu kragi?
13 Ma son leisi Gado feni taki sma abi leti fu kragi. Gado no ben tapu en yesi gi den sma di ben e ’kragi’ fu Sodom nanga Gomora, ma a ben pori den ogri foto dati (Genesis 18:20, 21; 19:24, 25). Na ini Yerusalem, wan syatu pisi ten baka a Pinksterfesa fu 33 G.T., dan „den Dyu di ben e taki Grikitongo ben krutukrutu nanga den Dyu di ben e taki Hebrewtongo, bika den ben frigiti den weduwe fu den te den ben prati nyanyan ala dei”. Leki bakapisi fu dati, „den twarfu apostel” poti sani kon reti baka fu di den poti „seibi man . . . di ben abi wan bun nen”, „fu luku a prenspari afersi” di ben abi fu du nanga a nyanyan di ben musu prati (Tori fu den Apostel 6:1-6). Owruman na ini a ten disi no musu ’tapu den yesi’ gi den wan di abi leti fu kragi (Odo 21:13). Na presi taki den owruman e krutu den Kresten brada nanga sisa fu den, dan den musu taki sani di e gi den deki-ati èn di e tranga a bribi fu den.—1 Korentesma 8:1.
14. Efu wi no wani de sma di e krutukrutu, dan sortu fasi wi musu abi?
14 Wi alamala musu luku bun fu no krutukrutu, bika te wan sma abi a gwenti fu kragi, dan dati kan pori a yeyefasi fu en. A sani disi ben o bruya a wánfasi fu wi. Na presi fu dati, meki wi gi a santa yeye okasi ala ten fu wroko na wi tapu, so taki wi kan abi lobi gi makandra (Galasiasma 5:22). Te wi e hori wisrefi na ’a wet fu a kownu di e taki dati wi musu sori lobi’, dan dati sa yepi wi fu tan dini Yehovah leki wán man.—Yakobus 2:8; 1 Korentesma 13:4-8; 1 Petrus 4:8.
Luku bun fu no fruteri ogri-ati lei fu trawan
15. Fa yu ben o fruklari san na a difrenti na mindri a konkru di wan sma e konkru èn a fruteri di wan sma e fruteri ogri-ati lei fu wan trawan?
15 Fu di wan sma di e krutukrutu kan tron wan konkruman te fu kaba, meki wi musu luku bun san wi e taki. Wan sma di e konkru, e taki sma tori fu di a no abi noti fu du. Ma te wan konkruman e fruteri ogri-ati lei fu wan tra sma, dan a e du dati fu di a wani pori a sma en nen. A sani disi na wan ogri-ati sani èn Gado no feni en bun. Dati meki Gado ben taigi den Israelsma: „Yu no musu waka lontu fu panya ogri-ati lei na mindri yu pipel.”—Lefitikus 19:16.
16. San Paulus ben taki fu wan tu konkruman, èn sortu krakti a rai fu en musu abi na wi tapu?
16 Fu di wan sma di gwenti fu taki sma tori ben kan bigin fruteri ogri-ati lei fu trawan, meki Paulus ben piri-ai gi wan tu konkruman. Baka di a ben taki fu weduwe di ben de wan bun yepi gi a gemeente, dan a taki fu weduwe di ben ’lesi èn di ben waka e go na sma oso; ma boiti taki den ben lesi, den tron konkruman tu èn den ben e bumui nanga tra sma tori, fu di den ben e taki fu sani di den no ben musu taki’ (1 Timoteyus 5:11-15). Te wan Kresten uma e si taki a abi a takru gwenti fu taki na wan fasi di kan meki taki a e bigin fruteri ogri-ati lei fu trawan, dan a musu gi yesi na a rai fu Paulus ’fu de seryusu, èn fu no fruteri ogri-ati lei’ (1 Timoteyus 3:11). A no de fu taki dati Kresten mansma sosrefi musu luku bun taki den no e taki sani di kan pori a nen fu trawan.—Odo 10:19.
No krutu sma moro!
17, 18. (a) San Yesus ben taki fu a krutu di wi e krutu wi brada? (b) Fa wi kan gebroiki a rai di Yesus ben gi wi fu no krutu trawan?
17 Srefi te wi no e fruteri ogri-ati lei fu nowan sma, toku a kan de fanowdu taki wi e du ala san wi man fu no krutu trawan. Yesus ben sori taki a no bun kwetikweti fu krutu trawan. A ben taki: „Unu no musu krutu sma moro, so taki trawan no krutu unu; bika na a fasi fa unu e krutu trawan, na a fasi dati den sa krutu unu; na a fasi fa unu e marki trawan, na a fasi dati den sa marki unu. Dan fu san ede yu e luku a splentri na ini yu brada ai, ma yu no e si a postu na ini yu eigi ai? Noso fa yu kan taigi yu brada: ’Kon meki mi puru a splentri na ini yu ai’, aladi wan postu de na ini yu eigi ai? Hoigriman! Puru a postu na ini yu eigi ai fosi, dan yu sa si krin fa fu puru a splentri na ini yu brada ai.”—Mateyus 7:1-5.
18 Wi no musu denki taki wi sa man puru a „splentri” na ini wi brada ai te wisrefi no man krutu sani krin fu di wi abi wan agersi „postu” na ini wi eigi ai. Fu taki en leti, te wi e frustan krinkrin omeni sari-ati Gado abi nanga sma, dan wi no sa suku fu krutu den brada nanga sisa fu wi. Noiti wi no sa man sabi den so bun leki fa wi hemel Tata sabi den. Fu dati ede wi no musu fruwondru taki Yesus ben warskow wi taki wi ’no musu krutu sma moro, so taki trawan no krutu wi’! Te wi e agri taki wisrefi abi swakifasi, dan dati sa yepi wi fu no krutu sma na wan fasi di Gado no feni bun.
Den swaki, ma den warti fu kisi grani
19. Fa wi musu si den Kresten brada nanga sisa fu wi?
19 Efu wi abi a fasti bosroiti fu dini Gado na ini wánfasi nanga den brada nanga sisa fu wi, dan wi no sa sorgu nomo taki wi no e krutu den. Wi sa du ala muiti sosrefi fu gi den grani (Romesma 12:10). Fu taki en leti, wi no sa suku wi eigi bun, ma wi sa suku fu du san bun gi den, èn wi sa prisiri fu dini den nanga sakafasi (Yohanes 13:12-17; 1 Korentesma 10:24). Fa wi kan tan sori a moi fasi dati? Wi sa man du dati te wi e hori na prakseri taki ibri bribiman warti gi Yehovah èn taki wi abi makandra fanowdu, neleki fa ibri pisi fu a libisma skin abi den tra pisi fu a skin fanowdu.—1 Korentesma 12:14-27.
20, 21. San den wortu fu 2 Timoteyus 2:20, 21 wani taki gi wi?
20 Fu taki en leti, Kresten de leki swaki prapi di abi wan tumusi moi gudu na ini, namku a tumusi moi grani fu du a preikiwroko (2 Korentesma 4:7). Efu wi wani du a santa wroko disi na wan fasi di e gi Yehovah glori, dan wi musu sorgu taki ala ten wi abi wan bun nen na en èn na en Manpikin. Soso te wi e tan tyari wisrefi na wan yoisti fasi èn te wi e anbegi Gado soleki fa a wani, dan wi kan tan wan prapi di A sa man gebroiki bun. Paulus ben skrifi fu a tori disi: „Na ini wan bigi oso, yu no abi prapi wawan fu gowtu nanga solfru, ma sosrefi prapi fu udu nanga tokotoko, èn sonwan de gi wan warti marki, ma trawan gi wan marki di no warti. Efu fu dati ede wan sma tan farawe fu den lastiwan, dan a sa de wan prapi gi wan warti marki, di kon santa, di en eiginari man gebroiki, srekasreka gi ibri bun wroko.”—2 Timoteyus 2:20, 21.
21 Sma di no e tyari densrefi soleki fa Gado wani, na ’prapi gi wan marki di no warti’. Ma te wi e libi akruderi den markitiki fu Gado, dan wi sa de ’prapi gi wan warti marki, di kon santa, noso di poti aparti gi a diniwroko fu Yehovah, èn di de srekasreka gi ibri bun wroko’. Fu dati ede a bun fu aksi wisrefi: ’Mi na wan „prapi gi wan warti marki”? Mi abi wan bun krakti tapu den Kresten brada nanga sisa fu mi? Mi e wroko makandra nanga den brada nanga sisa na ini a gemeente?’
Tan dini Gado leki wán man
22. Nanga san wi kan agersi a Kresten gemeente?
22 A Kresten gemeente seti neleki wan osofamiri. Te ala sma na ini wan osofamiri e anbegi Yehovah, dan den e sori lobi gi makandra, den e yepi makandra, èn den de koloku. Den sma na ini wan osofamiri kan abi difrenti fasi nanga maniri, ma toku ibriwan fu den warti. Na so a de tu na ini a gemeente. Aladi wi alamala e difrenti fu makandra, èn aladi wi no de volmaakti, toku Gado hari wi kon na en nanga yepi fu Krestes (Yohanes 6:44; 14:6). Yehovah nanga Yesus lobi wi, èn neleki wan osofamiri di abi wánfasi, a de fanowdu trutru taki wi e sori lobi gi makandra.—1 Yohanes 4:7-11.
23. San wi musu hori na prakseri èn sortu fasti bosroiti wi musu abi?
23 A Kresten gemeente di de leki wan osofamiri, na wan presi sosrefi pe wi kan fruwakti fu si sma di e sori loyaalfasi. Na apostel Paulus ben skrifi: „Fu dati ede mi wani taki na ibri presi den man musu tan begi; te den e du dati den musu opo loyaal anu, èn den no musu atibron, noso haritaki nanga sma” (1 Timoteyus 2:8). Na so fasi Paulus ben sori taki a begi di sma e begi „na ibri presi” pe Kresten e kon makandra, na wan sani di abi fu du nanga loyaalfasi. Soso den man di de loyaal musu begi gi a gemeente. A no de fu taki dati Gado e fruwakti fu wi alamala taki wi de loyaal na en, èn na makandra sosrefi (Preikiman 12:13, 14). Fu dati ede, meki wi abi a fasti bosroiti fu wroko makandra na ini wánfasi, neleki fa den pisi fu a libisma skin e du dati. Meki wi dini Gado na ini wánfasi sosrefi leki memre fu a Kresten famiri di e anbegi Yehovah. Wan funamku sani di wi musu hori na prakseri, na taki wi abi makandra fanowdu, èn taki Yehovah sa feni wi bun èn a sa blesi wi te wi e tan dini en leki wán man.
San yu ben sa piki?
• San e meki taki a pipel fu Yehovah man dini en leki wán man?
• Fu san ede Kresten e luku bun fu no tyari pratifasi kon?
• Fu san ede a no bun fu krutukrutu?
• Fu san ede wi musu gi grani na Kresten brada nanga sisa?
[Aksi fu a tori disi]
[Prenki na tapu bladzijde 15]
Petrus ben frustan taki ’Gado no lobi a wan sma moro leki a trawan’
[Prenki na tapu bladzijde 16]
Yu sabi fu san ede Gado ben meki Miryam kisi syen?
[Prenki na tapu bladzijde 18]
Loyaal Kresten e prisiri fu dini Yehovah leki wán man