Aksi fu leisiman

Wi kan taki dati Satan o kori bun furu sma na a lasti tesi te wi e leisi Openbaring 20:8?

Openbaring 20:8 e fruteri fu a lasti feti di Satan o feti nanga den sma di e libi na grontapu na a kaba fu a dusun-yari tiri fu a Mesias Kownukondre. A vers e taki fu Satan: „A sa go fu kori den nâsi na den fo uku fu grontapu, Gog nanga Magog, fu tyari den kon na wan gi a feti. A nomru fu den de leki a santi fu a se.”

Aladi ala sortu nyun fasi nanga kefalek wrokosani de fu teri sani, toku sma no man teri ’a santi fu a se’. Fu dati ede wi kan taki dati den wortu disi abi fu du nanga wan nomru di wi no sabi. Ma a de wan nomru di bigi so te taki yu no man teri en, noso a de wan bigi nomru nomo di wi no sabi?

Na ini Bijbel, den wortu ’leki a santi fu a se’ gebroiki na difrenti fasi. Fu gi wan eksempre, na ini Genesis 41:49 wi e leisi: „Yosef ben tan tyari bun furu karu kon na wan, leki a santi fu a se, teleki den tapu fu teri en, fu di a ben de pasa marki.” Na ini a tekst disi, den wortu e sori taki a karu ben furu so te taki den no ben man teri en. Yehovah ben taki sosrefi: „Neleki den legre fu den hemel di den no man teri, èn neleki a santi fu a se no de fu marki, na so mi sa meki a siri fu mi knegti David, kon moro furu.” Neleki fa wi no man teri den stari fu hemel èn a santi fu a se kwetikweti, na so Yehovah trutru sa du san a ben pramisi David. — Yeremia 33:22.

Furu tron den wortu „ a santi fu a se” abi fu du nanga wan sani di de bun furu, noso nanga wan sani di bigi srefisrefi. Den Israelsma na Gilgal ben bruya srefisrefi fu a Filistijn legre di ben kon makandra na Mikmas, èn a legre disi ben de „so furu leki den ai-santi di de na sekanti” (1 Samuel 13:5, 6; Krutubakra 7:12). Èn „Gado ben tan gi Salomo bun furu koni nanga frustan èn bradi ati, neleki a santi di e didon na a syorosei” (1 Kownu 4:29). Aladi den eksempre disi e sori taki wan sani ben de bun furu, toku a sani dati ben skotu.

„A santi fu a se” kan abi fu du sosrefi nanga wan nomru di wi no sabi, èn a no abi fu de wan bun bigi nomru srefi. Yehovah ben taigi Abraham: „Fu tru mi sa meki yu siri kon furu leki den stari na hemel èn leki den ai-santi di de na sekanti” (Genesis 22:17). Di Yehovah ben pramisi a granpikin fu Abraham, Yakob, a srefi sani disi ete wan tron, dan a gebroiki den wortu „a santi fu grontapu”, aladi Yakob ben taki fu „den ai-santi fu sekanti” (Genesis 28:14; 32:12). Soleki fa a sori, dan boiti Yesus Krestes, a nomru fu a ’siri’ fu Abraham ben de 144.000, èn Yesus ben kari a siri dati a „pikin ipi”.—Lukas 12:32; Galasiasma 3:16, 29; Openbaring 7:4; 14:1, 3.

San wi e leri fu den eksempre disi? Wi e leri taki a no ala ten den wortu ’leki a santi fu a se’ e taki fu wan nomru di bigi so te taki yu no man teri en; èn a no ala ten den e taki fu wan bun bigi sani tu. Furu tron den e taki fu wan nomru di wi no sabi, ma di skotu. Fu dati ede, wi kan bribi taki a tranga-ede grupu fu sma di sa hori baka gi Satan ini a lasti feti fu en teige a pipel fu Gado, no sa de wan bun bigi grupu fu sma di yu no sa man teri, ma a grupu fu sma dati sa bigi nofo fu tapu skreki gi den. Ma wi no sabi ete san na a nomru dati.