Den sani di Yosua ben memre

„MOSES mi futuboi dede,” Yehovah ben taki, „èn opo now, koti a Yordanliba disi abra, yu nanga a heri pipel disi, fu go na ini a kondre di mi e gi den” (Yosua 1:2). Dati ben de wan hebi wroko di Yosua ben kisi! A ben de a futuboi fu Moses pikinmoro 40 yari kaba. Now a ben musu teki a presi fu en masra èn a ben musu tyari den manpikin fu Israel di ben trangayesi furu tron, go na ini a Pramisi Kondre.

Aladi Yosua ben e denki fu den sani di ben o miti en, dan kande a ben e prakseri esi-esi tu fu den tesi di ben miti en, èn fu den wan di a ben pasa kaba. A no de fu taki dati den sani di Yosua ben memre ben de wan trutru yepi gi en na a ten dati, èn trutru den kan de wan yepi tu gi Kresten na ini a ten disi.

Wan srafu tron wan legre fesiman

Yosua ben memre den someni yari di a ben de na ini katibo (Exodus 1:13, 14; 2:23). Wi no sabi soifri san a ben ondrofeni na a ten dati fu di Bijbel no e taki finifini fu den tori dati. Kande Yosua ben leri fu orga sani bun di a ben dini na ini Egepte, èn kande a ben yepi fu orga sani so taki den Hebrewsma nanga a ’bigi grupu fu freimde sma’ ben kan gowe libi Egepte.—Exodus 12:38.

Yosua ben de fu wan famiri fu a lo fu Efraim. En granpapa Elisama ben de na edeman fu a lo, èn soleki fa a e sori, dan a ben de a fesiman fu 108.100 fetiman fu wan fu den dri-lo grupu fu Israel (Numeri 1:4, 10, 16; 2:18-24; 1 Kroniki 7:20, 26, 27). Ma di den Amaleksma go feti nanga den Israelsma syatu baka di den ben gowe libi Egepte, dan Moses aksi Yosua fu orga wan grupu fu mansma fu go feti nanga a pipel dati (Exodus 17:8, 9a). Fu san ede a ben aksi Yosua, èn fu san ede a no ben aksi en granpapa noso en papa? Kande na fu di Yosua ben de wan edeman fu  a prenspari lo fu Efraim. Boiti dati, furu sma ben sabi en leki wan sma di ben sabi orga sani bun, èn a ben de sosrefi wan sma di a heri pipel ben e frutrow trutru. Den sani disi ben e sori taki Yosua ben de a moro bun fesiman fu orga den fetiman, èn fu dati ede Moses aksi en fu du a wroko disi.

Awinsi fa a no fa, di Moses poti Yosua leki fesiman, dan a du soifri san Moses ben taigi en fu du. Aladi Israel no ben sabi srefisrefi fa fu feti, toku Yosua ben sabi seiker taki Gado ben o yepi den. Sobun di Moses taigi en: „tamara mi e go tanapu na a moro hei pisi fu a pikin bergi, nanga a tiki fu a tru Gado na ini mi anu”, dan dati ben gi Yosua na overtoigi taki Gado ben o de nanga den. Yosua ben musu fu memre taki no so langa pasa, Yehovah ben pori a moro bigi srudati makti fu a ten dati. A tra dei, di Moses opo en anu èn hori den hei te sondongo, dan nowan feanti ben man kakafutu gi Israel, èn den wini den Amaleksma. Baka dati Yehovah gi Moses a komando fu skrifi na ini wan buku èn fu ’poti bun na ini den yesi fu Yosua’ a komando fu En: „Mi sa meki taki nowan enkri sma na ondro den hemel sa memre Amalek kwetikweti” (Exodus 17:9b-14). Iya, Yehovah ben o du soifri soleki fa a ben taki.

A ben de a futuboi fu Moses

A sani di den ben ondrofeni nanga Amalek ben meki taki a matifasi fu Yosua nanga Moses ben kon moro tranga. Yosua ben abi a grani fu de a futuboi fu Moses, „fu sensi a ben de wan yonkuman” teleki Moses dede, èn dati ben de sowan 40 yari langa.—Numeri 11:28.

A wroko dati ben wani taki dati a ben o kisi spesrutu grani nanga frantwortu. Fu eksempre, di Moses, Aron, den manpikin fu Aron, èn sosrefi 70 fu den owru man fu Israel ben kren go na tapu a Sinaibergi, èn di den si wan fisyun fu a glori fu Yehovah, dan a ben kan de so taki Yosua ben de nanga den. Fu di a ben de a futuboi fu Moses, meki a kren go moro hei na tapu a bergi makandra nanga en, èn soleki fa a e sori, dan a meki Moses wawan go krosibei fu a wolku di ben e sori taki Yehovah ben de drape. Iya, soleki fa a sori, dan Yosua tan na tapu a bergi 40 dei nanga 40 neti. A tan wakti na wan getrowfasi teleki en masra ben kon baka, bika di Moses ben e saka komoto fu a bergi nanga den plata ston fu a Tin Komando, dan Yosua ben de drape fu miti en.—Exodus 24:1, 2, 9-18; 32:15-17.

Baka di Israel ben du afkodrei nanga yepi fu a gowtu pikin kaw, dan Yosua tan dini Moses na a tenti fu konmakandra di ben de dorosei fu a kampu. Drape Yehovah taki nanga Moses fesi na fesi. Ma di Moses drai go baka na a kampu, dan Yosua „no ben e komoto na mindrisei fu a tenti”. Kande a ben musu de drape fu sorgu taki den Israelsma di no ben krin no ben e pasa go na ini a tenti. Yosua trutru ben si dati leki wan seryusu frantwortu!—Exodus 33:7, 11.

 A matifasi di Yosua ben abi nanga Moses, ben musu fu tranga a bribi fu en srefisrefi, èn soleki fa a historia skrifiman Josephus e taki, dan Moses ben de 35 yari moro owru leki en. Sma kari a matifasi fu den „a banti di wan lepi sma abi nanga wan yongu sma, di wan leriman abi nanga a wan di e kisi leri”. Fu di den ben abi so wan banti nanga makandra, meki Yosua ben tron „wan man di no ben frede fu teki bosroiti èn sma ben man frutrow na en tapu”. Wi no abi profeiti leki Moses na wi mindri na ini a ten disi, ma den gemeente fu a pipel fu Yehovah abi owruwan tu di trutru e gi sma krakti nanga deki-ati fu di den abi furu ondrofeni èn sosrefi wan bun yeyefasi. Yu abi warderi gi den trutru? Èn yu e kisi wini fu a demakandra nanga den?

A ben de wan spion na ini Kanan

Wan tumusi prenspari sani ben pasa na ini a libi fu Yosua syatu baka di Israel ben kisi a Wet. A ben musu teki presi gi a lo fu en fu go leki spion na ini a Pramisi Kondre. Wi alamala sabi a tori disi. Ala den 12 spion ben agri taki a kondre ben de trutru „wan kondre di ben lai merki nanga oni”, soifri soleki fa Yehovah ben pramisi. Ma tin fu den di no ben abi bribi, ben e frede taki Israel no ben o man teki a kondre abra fu den sma di ben e tan na ini a kondre dati. Yosua nanga Kaleb wawan ben gi a pipel deki-ati fu no opo densrefi teige Yehovah soso fu di den ben frede nomo, bika Yehovah ben o de nanga den trutru. Fu di den tu mansma disi ben du dati, dan a heri konmakandra bigin krutu den, èn den ben wani fringi ston na den tapu fu kiri den. Kande den ben o du dati trutru efu Yehovah no ben kon na mindri, fu di a sori en glori. Fu di den no ben abi bribi, meki Gado gi a komando taki nowan sma fu Israel di ben de 20 yari noso moro owru leki dati ben o tan na libi fu go na ini Kanan. Fu den wan disi, soso Yosua, Kaleb nanga den Leifisma ben tan na libi.—Numeri 13:1–16, 25-29; 14:6-10, 26-30.

A no a heri pipel ben si den bigi wondru di Yehovah ben du na ini Egepte? Ma san ben meki taki Yosua ben abi bribi taki Gado ben o yepi den aladi moro furu fu den trawan ben e tweifri? Yosua ben musu fu memre krinkrin ala den sani di Yehovah ben pramisi èn ben du, èn a ben prakseri dipi fu den sani disi. Wan tu yari na baka a ben man taki dati ’nowan wortu fu ala den bun wortu di Yehovah ben taigi Israel ben tan sondro fu kon tru. Den alamala ben kon tru’ (Yosua 23:14). Dati meki Yosua ben abi a tranga bribi taki ala den pramisi di Yehovah ben meki gi a ten di ben de na den fesi, ben o kon tru sosrefi (Hebrewsma 11:6). A sani disi musu meki wan sma aksi ensrefi: ’Fa a de nanga mi? A muiti di mi e du fu studeri èn fu prakseri dipi fu den pramisi fu Yehovah, gi mi na overtoigi taki mi kan frutrow tapu den pramisi disi? Mi e bribi taki Gado man kibri mi makandra nanga en pipel na a ten fu a bigi banawtu?’

Boiti taki Yosua ben abi bribi, a ben sori sosrefi taki a ben abi deki-ati fu du san reti. En nanga Kaleb wawan ben teki a sei fu Yehovah, èn a heri konmakandra ben wani fringi ston na den tapu fu kiri den. Fa yu ben o firi? Yu ben o frede? Yosua no ben frede. En nanga Kaleb ben taki nanga wan fasti overtoigi san den ben bribi. A kan taki wi sa musu du a srefi sani tu wan dei fu sori taki wi de getrow na Yehovah.

A tori fu den spion e fruteri wi sosrefi taki a nen fu Yosua ben kenki. A nen di a ben abi fosi ben de Hosea, san wani taki „Frulusu”. Ma Moses ben poti ete wan pisi gi a nen disi, èn a pisi disi abi fu du nanga a nen fu Gado. Sobun, Moses kari en Yehosua, noso Yosua, san wani taki ’Yehovah Na Frulusu’. Na ini a Septuaginta a nen fu en vertaal leki „Yesus” (Numeri 13:8, 16). Akruderi a bigi nen dati, Yosua meki bekènti sondro frede, taki Yehovah na frulusu. A nen fu Yosua no ben kenki somarso. A nen ben sori taki Moses ben abi bigi warderi gi fasi fa Yosua ben de, èn a ben fiti a grani di Yosua ben o kisi fu tyari a nyun geslakti fu den Israelsma go na ini a Pramisi Kondre.

Aladi den Israelsma ben e waka na ini a sabana 40 hebi yari, dan den wan di ben trangayesi Yehovah ben e dede wan fru wan. Wi no sabi fa sani ben e waka nanga Yosua na a ten dati. Ma a ten dati ben musu fu leri en furu sani. A kan taki a ben si nanga en eigi ai fa Gado ben krutu Korak, Datan, nanga Abiram, èn sosrefi den bakaman fu den fu di den ben opo densrefi teige En. A ben si  sosrefi fa Yehovah ben krutu den wan di ben teki prati na a falsi anbegi fu a Bâal fu Peor. A no de fu taki dati Yosua ben sari srefisrefi di a kon sabi dati Moses no ben o go na ini a pramisi kondre tu, fu di a no ben gi glori na Yehovah na den watra fu Meriba.—Numeri 16:1-50; 20:9-13; 25:1-9.

A ben kisi a wroko fu Moses

Di a yuru ben doro gi Moses fu dede, dan a aksi Gado fu poti wan sma fu teki a presi fu en, so taki Israel no ben o tron „leki skapu sondro skapuman”. San Yehovah piki en? Yosua, „wan man di ben abi yeye na ini en”, ben musu poti na wroko na fesi a heri konmakandra. Den ben musu arki en. Dati trutru ben de wan bigi grani! Yehovah ben si a bribi fu Yosua èn a ben si san Yosua ben man du sosrefi. A ben de a moro bun sma fu tron a fesiman fu Israel (Numeri 27:15-20). Ma Moses ben sabi taki bun bigi tyalensi ben o miti Yosua. Dati meki Moses ben gi a sma di ben o teki en presi a deki-ati fu de „sondro frede èn [fu] de tranga”, bika Yehovah ben o de nanga en ala ten.—Deuteronomium 31:7, 8.

Gado srefi ben gi Yosua a srefi deki-ati dati èn a ben taki moro fara: „Sorgu taki yu e du akruderi a heri wet di Moses mi futuboi ben komanderi yu. No drai komoto fu en, no drai go na yu reti-anusei noso na yu kruktu-anusei, so taki yu kan handri na wan koni fasi ala presi pe yu e go. A wetbuku disi no musu komoto na yu mofo, èn yu musu leisi na ini en nanga wan safri sten dei nanga neti, so taki yu kan handri soifri akruderi ala sani di skrifi na ini; bika na so sani sa waka bun nanga yu èn na so fasi yu sa handri nanga koni. A no mi komanderi yu? Abi deki-ati èn de tranga. No skreki noso frede, bika Yehovah, yu Gado, de nanga yu awansi pe yu e go.”—Yosua 1:7-9.

Nanga den wortu fu Yehovah na prakseri èn nanga na ondrofeni di a ben kisi kaba, Yosua no ben e tweifri srefisrefi. A ben abi a dyaranti taki den ben o man teki a kondre abra. A no de fu taki dati furu problema ben o kon, èn a fosi tyalensi di ben miti en no ben makriki srefisrefi. A ben musu koti a Yordanliba abra na fruduten. Ma Yehovah srefi ben taigi en: „Opo, koti a Yordanliba disi abra.” Sobun, nowan enkri problema ben bigi tumusi gi den.—Yosua 1:2.

Den sani di ben pasa a wan baka a trawan na ini a libi fu Yosua e sori taki noiti a ben frigiti den pramisi fu Yehovah. Dati ben de pramisi soleki a wini di den ben o wini Yerikow, a wini di den ben o tan wini den feanti fu den a wan baka a trawan, èn sosrefi a prati di a kondre ben o prati na mindri den. Na a kabapisi fu en libi, di Yehovah ben gi Israel rostu fu den feanti fu den, dan Yosua kari a pipel kon makandra fu fruteri den baka fa Yehovah ben handri nanga den èn fu gi den deki-ati fu dini En nanga den heri ati. Leki bakapisi fu dati, Israel meki a frubontu di den ben meki nanga Yehovah kon nyun baka, èn den du dati na wan seryusu fasi. Sobun, wi kan de seiker taki, fu di den ben teki na eksempre fu a fesiman fu den, meki „Israel tan dini Yehovah ala den dei fu Yosua”.—Yosua 24:16, 31.

Yosua de leki wan tumusi bun eksempre gi wi. Bun furu tesi e miti Kresten na ini a ten disi. Efu wi wani taki Yehovah e tan feni wi bun, èn efu te fu kaba, wi wani kisi den sani di a pramisi wi, dan a de tumusi prenspari fu kakafutu gi den tesi disi. Yosua ben abi bun bakapisi fu di a ben abi wan tranga bribi. A tru taki wi no si den bigi wondru fu Gado neleki fa Yosua ben si den, ma efu iniwan sma ben o tweifri na san ben pasa, dan a Bijbel buku di abi a nen fu Yosua e fruteri wi fa Yosua ben si nanga en eigi ai taki ala sani di Yehovah taki e kon tru. Neleki Yosua, wi e kisi a dyaranti taki wi sa kisi koni èn taki sani sa waka bun gi wi te wi e leisi Gado Wortu ala dei èn te wi e meki muiti fu libi akruderi dati.

A de so taki a fasi fa son Kresten e tyari densrefi e hati wi son leisi? Prakseri fa Yosua ben horidoro. Aladi Yehovah no ben krutu en, toku a ben musu waka 40 yari langa na ini a sabana nanga kompe di no ben abi bribi. Yu e feni en wan muilek sani fu opo taki gi san yu e bribi? Memre san Yosua nanga Kaleb ben du. Fu di den ben abi bribi èn fu di den ben gi yesi, meki den kisi kefalek moi blesi. Iya, Yosua ben bribi trutru taki Yehovah ben o meki ala den pramisi fu en kon tru. Meki a de so tu nanga wi.—Yosua 23:14.

[Prenki na tapu bladzijde 10]

A matifasi di Yosua ben abi nanga Moses ben tranga a bribi fu en

[Prenki na tapu bladzijde 10]

Yosua nanga Kaleb ben frutrow tapu a krakti fu Yehovah

[Prenki na tapu bladzijde 10]

A fasi fa Yosua ben handri leki fesiman ben gi a pipel deki-ati fu tan krosibei fu Yehovah