Feni prisiri te yu e studeri a Wortu fu Gado

„Fu tru, mi sa denki dipi fu ala yu wroko, mi sa prakseri furu fu den sani di yu e du.”​—PSALM 77:12.

1, 2. (a) Fu san ede meki wi musu teki ten fu denki dipi fu sani? (b) San a wani taki fu „denki dipi” èn fu „prakseri bun” fu wan sani?

LEKI disipel fu Yesus Krestes, a matifasi fu wi nanga Gado musu de a moro prenspari sani na ini wi libi. A musu prenspari gi wi sosrefi fu tan luku fu san ede wi e dini Gado. Toku a de so na ini a ten disi, taki furu sma abi so furu fu du na ini na aladei libi taki den no e teki ten fu denki dipi fu sani. Den e prakseri soso san den kan du fu kon gudu. Den e denki nomo sortu sani den wani bai, sosrefi den wani meki prisiri nomo sondro fu prakseri san den e du. Fa wi kan sorgu taki wi no e libi nomo fu feti baka soso sani? We, ibri dei wi e teki wi ten fu du prenspari sani soleki nyan nanga sribi. Na a srefi fasi wi musu teki ten ibri dei fu denki dipi fu den wroko fu Yehovah, sosrefi fu den sani di a e du.—Deuteronomium 8:3; Mateyus 4:4.

² Oiti yu e teki ten spesrutu fu denki dipi fu wan sani? San a wani taki fu teki ten fu denki dipi fu wan sani? Fu denki dipi fu wan sani, wani taki fu poti ala yu prakseri tapu wán spesrutu sani nomo. A wani taki dati yu e denki fu a sani, noso taki yu e prakseri bun fu en. Prakseri bun fu wan sani wani taki dati yu e denki seryusu fu wan tori, aladi yu e du muiti fu kon frustan en finifini. San disi wani taki gi wi?

3. San e meki taki wan sma e go na fesi na yeye fasi?

³ Wan prenspari sani, na taki a musu memre wi na san na apostel Paulus ben skrifi gi en getrow mati Timoteyus: „Go doro fu meki muiti fu leisi na publiki, fu frumane, fu gi leri teleki mi kon. . . . Prakseri bun fu den sani disi, teki den krinkrin na ini yu, so taki ala sma kan si taki yu e go na fesi.” Iya, a ben de wan prenspari sani taki Timoteyus ben musu go na fesi. Na ini a pisi tori disi Paulus e sori krin taki wan sma musu prakseri bun fu yeye afersi efu a wani go na fesi. Na so a de tu na ini a ten disi. Efu wi wani prisiri trutru fu di wi e go na fesi na yeye fasi, dan wi musu „prakseri bun” fu sani di abi fu du nanga a Wortu fu Gado, iya, wi musu „teki den [sani disi] krinkrin na ini” wi.—1 Timoteyus 4:13-15.

4. Sortu yepisani yu kan gebroiki di kan yepi yu fu prakseri bun fu a Wortu fu Yehovah?

⁴ Yusrefi sa abi fu luku san na a yoisti ten gi yu fu denki dipi fu sani, aladi yu e hori a fasi fa sani seti na ini yu osofamiri na prakseri tu. Furu sma e teki den fruku mamanten yuru fu leisi a pikin buku Ondrosuku den Buku fu Bijbel ala dei. Den e gebroiki a ten dati tu fu prakseri bun fu wán spesrutu bijbeltekst. Fu taki en leti, sowan 20.000 friwani wrokoman di e dini na ini den Bethel-oso na heri grontapu e bigin a dei fu den nanga wan 15 miniti takimakandra fu a deitekst. Aladi a de so ibri mamanten taki soso wan tu sma fu a Bethelfamiri e kisi na okasi fu taki wan tu sani fu a deitekst, toku den trawan di de drape e prakseri bun fu san den e yere. Tra Kotoigi e prakseri bun fu a Wortu fu Yehovah te den de na pasi fu go na wroko. Den e arki den cassette lolo fu Bijbel nanga den di fu den Waktitoren nanga Ontwaakt! tijdschrift di de fu kisi na ini son tongo. Furu umasma di e wroko na oso e drai den cassette disi aladi den e du den osowroko. Te yu luku en bun, dan den e du soifri san a  psalm skrifiman Asaf ben du. A ben skrifi: „Mi sa memre den wroko fu Yah; bika mi sa memre den tumusi moi wroko di yu du sensi owruten. Fu tru, mi sa denki dipi fu ala yu wroko, mi sa prakseri furu fu den sani di yu e du.”—Psalm 77:11, 12.

A yoisti fasi fu si sani e tyari wini kon

5. Fu san ede meki a musu de wan prenspari sani gi wi fu studeri?

⁵ Na ini a nyunmodo ten fu wi pe sma e poti furu prakseri na sani soleki telefisi, video, nanga computer, dan furu sma no e leisi so furu moro. Ma disi no musu pasa nanga Yehovah Kotoigi. Fu taki en leti, te wi e leisi Bijbel, dan dati na a fasi fa wi e kisi leri fu Yehovah di kan hori wi na libi. Wan tu dusun yari pasa, dan Yosua ben teki a wroko fu Moses abra fu tiri a pipel fu Israel. Ensrefi ben abi fu leisi a Wortu fu Gado efu a ben wani kisi blesi fu Yehovah (Yosua 1:8; Psalm 1:1, 2). Na ini a ten disi wi musu du a srefi sani tu. Kande son sma abi problema fu man leisi bun noso kande trawan feni taki a e teki tumusi furu ten fu leisi wan sani, fu di den no kisi bun skoroleri. Sobun, san kan yepi wi fu kisi na angri fu leisi Gado Wortu? San kan gi wi a lostu fu studeri? A piki de fu feni na ini den wortu fu Kownu Salomo di skrifi na Odo 2:1-6. Grantangi, leisi den vers disi na ini yu Bijbel. Baka dati wi sa taki moro fini fu den.

6. Fa wi musu si a sabi fu Gado?

⁶ Na a fosi presi, wi e kisi a deki-ati disi: „Mi manpikin, efu yu e teki mi wortu èn e kibri den komando fu mi leki wan gudu na yu, fu yu poti prakseri nanga yu yesi na koni, so taki yu kan beni yu ati go na a koni fu man si sani krin; . . . ” (Odo 2:1, 2). San den wortu disi e leri wi? Den e leri wi taki ibriwan fu wi abi a frantwortu fu studeri a Wortu fu Gado. Poti prakseri na den wortu disi, „efu yu e teki mi wortu”. A tekst disi e taki „efu”, fu di a no ala sma wani leisi noso studeri a Wortu fu Gado. Efu wi wani firi prisiri te wi e studeri Gado Wortu, dan wi musu de klariklari fu gi yesi na san Yehovah e taki. Wi musu si den wortu fu En leki wan gudu di wi no wani lasi. Noiti wi no musu gi pasi taki wi abi so furu fu du, noso taki sani e puru wi prakseri na sowan fasi, taki wi e bigin kisi wan mi-no-ke-fasi gi a Wortu fu Gado, noso taki wi go tweifri srefi na a Wortu fu en.—Romesma 3:3, 4.

7. Fu san ede wi musu de na den konmakandra so furu leki wi man, fu poti prakseri na den?

⁷ San wi e du te den brada e fruklari a Wortu fu Gado tapu wi gemeente konmakandra? Wi e „poti prakseri” trutru? A de so taki wi e arki bun? (Efeisesma 4:20, 21) Wi e ’beni wi ati’ trutru fu kan kisi a koni fu man si sani krin? Kande a takiman no abi so furu ondrofeni, ma te a e taki fu a Wortu fu Gado, dan a fiti taki wi arki en nanga ala wi prakseri. A no de fu taki dati wi musu de na den Kresten konmakandra so furu leki wi man, fu poti prakseri na a koni fu Yehovah (Odo 18:1). Prakseri fa wan sma fu owruten ben o firi efu a no ben de na a konmakandra na ini a tapusei kamra na ini Yerusalem tapu a Pinksterfesa fu 33 G.T.! Aladi den konmakandra fu wi a no presi pe den sortu wondru sani disi e pasa, toku a de so dati wi e taki drape fu Bijbel, wi moro prenspari leribuku. Dati meki ibri konmakandra kan de wan blesi gi wi efu wi e poti prakseri na en, aladi wi e leisi na ini wi Bijbel makandra nanga a takiman.—Tori fu den Apostel 2:1-4; Hebrewsma 10:24, 25.

8, 9. (a) Fa wi musu studeri? (b) Na sortu fasi wi kan agersi a frustan di wi musu frustan sani fu Gado nanga a waarde fu gowtu?

⁸ Luku san a koni kownu e taki moro fara: „Efu, boiti dati, yu e bari kari fu a frustan srefi èn e opo yu sten srefi fu kisi a koni fu man si sani krin, . . . ”(Odo 2:3). Sortu fasi fu si sani den wortu disi e tyari kon na krin gi wi? We, a de krin taki den e leri wi fu abi na angri fu kon frustan a Wortu fu Yehovah! Te yu luku en bun, dan a tekst disi e sori taki wi musu de klariklari fu studeri a Wortu fu Gado fu kisi a koni fu man si sani krin, so taki wi kan kon sabi san na a wani fu Yehovah. A no de fu taki dati wi musu du tranga muiti fu man studeri. Den wortu fu Salomo di e kon now èn pe a e gebroiki wan agersitori sosrefi, e poti wi prakseri na a pisi tori disi.—Efeisesma 5:15-17.

⁹ A e taki moro fara: „Efu yu e tan suku en [frustan] leki solfru, èn efu yu e tan suku en leki gudu di kibri, . . . ” (Odo 2:4). Disi e memre wi na den tranga muiti di sma du na ini den yarihondro di pasa fu diki den sokari warti sani soleki gowtu nanga solfru. Sma kiri makandra fu gowtu ede. Trawan wroko den heri libi langa fu kan feni gowtu. Ma gowtu na trutru so wan kefalek warti sani? We, kon meki wi taki dati yu lasi na ini wan drei sabana.  Dreiwatra e kiri yu. San yu ben o wani na a momenti dati: wan moi pisi gowtu noso watra? We, yu sabi a piki. Toku wi e si o tranga libisma wroko fu feni gowtu, aladi a waarde fu a gowtu e kenki doronomo fu di na libisma srefi e taki o furu waarde a gowtu musu abi! * A no de fu taki dati wi musu abi moro faya srefi fu suku koni, nanga a koni fu man si sani krin, neleki fa wi musu du muiti fu kon frustan sani fu Gado, èn sosrefi fu a wani fu en. Ma sortu wini wi sa kisi te wi e ondrosuku sani na so wan fasi?—Psalm 19:7-10; Odo 3:13-18.

10. San wi o feni efu wi studeri a Wortu fu Gado?

¹⁰ Salomo e taki moro fara: „Dan fosi yu sa frustan a frede gi Yehovah, èn yu sa feni a sabi fu Gado srefi” (Odo 2:5). Dati na wan sani di e fruwondru wi srefisrefi! Wi leki sondu libisma kan „feni a sabi fu [Yehovah] Gado”, a Moro Hei Masra fu hemel nanga grontapu (Psalm 73:28; Tori fu den Apostel 4:24). Furu yarihondro langa den filosofiaman nanga den sokari koniman fu grontapu, du muiti fu kon frustan den afersi di abi fu du nanga a libi na grontapu nanga den sani na ini hemel. Ma toku den no ben man feni „a sabi fu Gado srefi”. Fu san ede? Aladi a sabi disi ben de fu feni someni dusun yari langa kaba na ini Gado Wortu, Bijbel, toku den sabiman disi no wani teki en. Den e si den tori fu Bijbel leki tori di makriki tumusi fu frustan. Fu dati ede den no wani teki den sani di skrifi na ini Bijbel, san e meki taki den no man frustan den tu.—1 Korentesma 1:18-21.

11. San na wan tu fasi fa wi kan kisi wini te wi e studeri?

¹¹ Meki wi luku ete wan sani di Salomo e taki fu en, di e gi wi deki-ati fu studeri: „Yehovah srefi e gi koni; fu en mofo sabi nanga koni fu man si sani krin e komoto” (Odo 2:6). Yehovah de klariklari fu gi bogobogo koni, sabi, nanga a koni fu man si sani krin, na iniwan sma di wani suku den. Fu tru, wi musu warderi na okasi di wi abi fu studeri a Wortu fu Gado. A no de fu taki dati wi sa abi fu du muiti fu studeri, iya, wi sa abi fu leri wisrefi fu du dati. A de fanowdu sosrefi fu poti tra sani na wan sei fu man feni ten fu studeri. Te yu luku en bun, dan wi musu breiti taki ibriwan fu wi na ini a ten disi kan abi en eigi Bijbel, na presi taki wi musu skrifi Bijbel abra gi wisrefi neleki fa sma fu owruten ben du dati!—Deuteronomium 17:18, 19.

Waka na wan fasi di warti gi Yehovah

12. Nanga sortu marki wi musu suku fu kisi a sabi fu Gado?

¹² Fu san ede wi musu wani studeri? Wi musu  studeri fu di wi wani sori taki wi bun moro trawan? Fu sori taki wi na sma di abi moro koni leki trawan? Wi e studeri soso fu kan tron sma di abi furu sabi fu Bijbel? Nôno. Wi wani studeri Bijbel fu man tron Kresten di e libi soifri akruderi san wi leri. Wi wani de sma di de klariklari ala ten fu yepi trawan, wi wani de sma sosrefi di e gi trawan deki-ati neleki fa Krestes ben du dati (Mateyus 11:28-30). Na apostel Paulus ben warskow: „Sabi e meki sma kisi heimemre, ma lobi e tranga sma” (1 Korentesma 8:1). Fu dati ede wi musu abi a srefi sakafasi di Moses ben abi di a ben taigi Yehovah: „Mi e begi yu, meki mi kon sabi den pasi fu yu, so taki mi kan kon sabi yu, fu yu kan feni mi bun” (Exodus 33:13). Iya, wi musu wani kisi sabi so taki wi kan du san Gado wani. Wi no musu wani kisi sabi nomo fu meki tra sma si o furu sabi wi abi. Wi wani de warti futuboi fu Gado di abi sakafasi. Fa wi kan doro a marki dati?

13. San de fanowdu fu meki wan sma tron wan warti futuboi fu Gado?

¹³ Paulus ben sori Timoteyus san a ben musu du fu plisi Gado. A ben taki: „Du ala san yu man fu sori yusrefi na Gado leki wan sma di a feni bun, leki wan wrokoman di no abi fu syen fu noti, di e gebroiki a wortu fu a waarheid na wan reti fasi” (2 Timoteyus 2:15). Den wortu „gebroiki . . . na wan reti fasi” abi fu du nanga wan Griki wortu di ben wani taki, „fu koti wan sani langalanga” noso „fu koti wan sani reti” (Kingdom Interlinear). Soleki fa son sabiman e taki, dan dati de a srefi leki te wan sma di e meki krosi e koti wan pisi krosi nanga yepi fu wan eksempre di a abi, noso leki te wan gronman e diki pikin gotro nanga wan plugu. A prenspari sani na taki, a bakapisi no musu kron, ma a musu de reti. A pisi tori disi e sori wi taki efu Timoteyus ben wani de wan warti futuboi fu Gado, di Gado ben feni bun, dan a ben abi fu ’du ala san a ben man’ fu sorgu taki den sani di a ben e leri sma ben tru, noso a ben musu sorgu taki a fasi fa a ben e tyari ensrefi, ben e kruderi nanga a wortu fu waarheid.—1 Timoteyus 4:16.

14. Na sortu fasi den sani di wi e studeri musu abi krakti tapu san wi e taki noso du?

¹⁴ Paulus ben tyari a srefi sani disi kon na fesi di a ben gi den Kresten brada na ini Kolose deki-ati fu „waka na wan fasi di warti gi Yehovah, fu plisi en dorodoro”. Den ben o plisi Yehovah te den ben o „tyari froktu ini ibri bun wroko èn [te den ben o] tan gro ini a soifri sabi fu Gado” (Kolosesma 1:10). Dyaso Paulus e taki dati wan sma di wani fu libi na wan fasi di warti gi Yehovah, musu „tyari froktu ini ibri bun wroko èn [taki a musu] tan gro ini a soifri sabi fu Gado”. Sobun, san prenspari gi Yehovah a no soso a fasi fa wi e si a sabi fu en, ma sosrefi o tranga wi e hori wisrefi na a Wortu fu En na ini san wi e du noso na ini den sani di wi e taki (Romesma 2:21, 22). Dati wani taki dati efu wi wani taki Gado musu prisiri nanga wi, dan den sani di wi e studeri musu abi krakti tapu a fasi fa wi e denki, ma sosrefi tapu a fasi fa wi e tyari wisrefi.

15. Fa wi kan kibri wi frustan nanga wi prakseri, aladi wi e dwengi den tu?

¹⁵ Na ini a ten disi Satan e suku nomonomo fu pori wi yeye fasi, fu di a e suku fasi fu bruya noso pori wi frustan (Romesma 7:14-25). Fu dati ede wi musu kibri wi frustan, sosrefi wi musu luku bun san wi e prakseri, so taki wi kan sori taki wi wani taki Yehovah Gado feni wi bun. A fetisani di wi abi na „a sabi fu Gado” di kan yepi wi fu ’dwengi ibri libisma prakseri fu meki a kon de na ondro a tiri fu Krestes’. Dati meki a de tumusi prenspari gi wi fu du muiti fu studeri Bijbel ibri dei, fu di wi wani puru ala den prakseri di abi fu du nanga den lostu fu a skin èn di kan pori wi frustan.—2 Korentesma 10:5.

 Yepisani di kan yepi wi fu kisi frustan

16. Fa wi kan kisi wini gi wisrefi te Yehovah e gi wi leri?

¹⁶ Den sani di Yehovah e leri wi e tyari wini kon gi wi na yeye fasi, ma sosrefi na skin sei. Den sani di a e leri wi a no sani di soi, a no de leki den kerkileri di sma musu bribi nomo, ma di den no man gebroiki na ini na aladei libi. Fu dati ede wi e leisi: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka” (Yesaya 48:17). Fa Yehovah e yepi wi fu waka na wan fasi di e tyari wini kon gi wi? A moro prenspari yepisani di wi abi na a Wortu fu en, a Santa Bijbel, pe den prakseri fu en skrifi na ini. Disi na a moro prenspari leribuku fu wi. Ibri tron baka wi e go na a buku dati fu kisi yepi. Fu dati ede a bun fu abi a gwenti fu opo wi Bijbel so taki wi kan leisi na ini en te wi de na den Kresten konmakandra. A tori fu na eunuch fu Etiopia, di wi kan leisi fu en na ini Tori fu den Apostel kapitel 8, e sori krin sortu wini wi sa kisi te wi e du dati.

17. San pasa ini a tori fu na eunuch fu Etiopia? San a pisi tori dati e sori wi?

¹⁷ Na eunuch fu Etiopia ben de wan man di ben teki a Dyu bribi. Na eunuch disi ben e bribi na ini Gado trutru èn a ben e studeri den Buku fu Bijbel tu. A ben e sidon na ini en asiwagi aladi a ben e leisi wan pisi na ini Yesaya, di Filipus lon na sei na asiwagi fu aksi en: „Yu e frustan trutru san yu e leisi?” San na eunuch ben piki? „’Fu tru, fa mi ben sa man frustan, efu nowan sma e leri mi?’ Èn a begi Filipus nanga ala sakafasi fu kon na tapu a wagi èn fu kon sidon na en sei.” Dan, nanga yepi fu santa yeye, Filipus ben man yepi en fu frustan a profeititori fu Yesaya (Tori fu den Apostel 8:27-35). San disi e sori? A e sori wi taki a no nofo fu leisi Bijbel gi wisrefi nomo. Yehovah e gebroiki en yeye fu tiri a getrow èn koni srafu grupu, fu yepi wi fu kon frustan a Wortu fu en na a yoisti ten. Fa dati e pasa?—Mateyus 24:45-47; Lukas 12:42.

18. Fa a getrow èn koni srafu grupu e yepi wi?

¹⁸ Aladi Yesus ben kari a srafu grupu disi „getrow èn koni”, toku Yesus no ben taki dati den no ben o man meki fowtu. Wi no musu frigiti taki a grupu disi fu getrow salfu brada na wan grupu fu Kresten di no de volmaakti. Aladi den wani du ala sani na wan bun fasi, toku den kan meki fowtu son leisi, neleki fa son man na ini a fosi yarihondro ben e meki fowtu (Tori fu den Apostel 10:9-15; Galasiasma 2:8, 11-14). Ma toku den wani du sani na a yoisti fasi. Iya, Yehovah e gebroiki den tu fu gi wi yepisani fu studeri Bijbel, fu tranga wi bribi na ini a Wortu fu Gado èn na ini den pramisi fu en. A moro prenspari yepisani di a srafu grupu gi wi fu yepi wi fu studeri, na a Nieuwe-Wereldvertaling van de Heilige Schrift (Nyun-Grontapuvertaling fu den Santa Buku fu Bijbel). Na a momenti disi a heri Bijbel noso pisi fu en, de fu kisi na ini 42 tongo. Te nanga now, sowan 114 milyun fu a Bijbel disi meki difrenti leisi kaba. Fa wi kan gebroiki en na wan yoisti fasi te wi e studeri?—2 Timoteyus 3:14-17.

19. San na wan tu moi yepisani di de na ini a Nieuwe-Wereldvertaling van de Heilige Schrift — met studieverwijzingen, di kan yepi wi te wi e studeri?

¹⁹ Teki a Nieuwe-Wereldvertaling van de Heilige Schrift — met studieverwijzingen leki eksempre. A meki nanga faki pe tekst skrifi di e sori yu go na tra pisi fu Bijbel di e yepi yu fu kon frustan moro bun  san wan spesrutu tekst di yu leisi wani taki. Na ondrosei fu den bladzijde pisi de di wi e kari futuwortu, di e fruklari son tekst noso wortu moro fini. Na bakasei a abi wan lijst nanga difrenti wortu di yu kan feni na ini Bijbel (Index van bijbelwoorden) nanga wan lijst fu den futuwortu (Index van voetnootwoorden). A abi wan pisi sosrefi na bakasei di nen Appendix pe yu kan leisi moro fini fu 43 difrenti tori. A abi wan tu karta, ma sosrefi prenki fu a fasi fa difrenti kontren di Bijbel e taki fu den, ben tan na a ten dati. Na a bigin fu a Bijbel yu kan feni den biginwortu (Inleiding), di e fruteri fu a wroko di sma ben du fu ondrosuku furu sani di ben de fanowdu fu meki a tumusi aparti bijbelvertaling disi. Efu a de fu kisi na ini wan tongo di yu man frustan, dan du muiti fu kon sabi ala den yepisani di de na ini a Bijbel disi. Gebroiki den tu. Awinsi fa no fa, Bijbel na a fosi sani di wi abi fanowdu na ini a programa di wi seti fu studeri. Iya, a Nieuwe-Wereldvertaling na wan bijbelvertaling di e poti krakti tapu a nen fu Gado na wan yoisti fasi aladi a e poti krakti tapu a Kownukondre tiri fu Gado tu.—Psalm 149:1-9; Danièl 2:44; Mateyus 6:9, 10.

20. Tapu sortu aksi di abi fu du nanga a fasi fa wi e studeri, wi musu kisi piki now?

²⁰ Now wi ben kan aksi wisrefi: ’Sortu yepi wi abi fanowdu moro fara fu kon frustan Bijbel? Fa wi kan meki ten fu studeri? Fa wi kan studeri na wan fasi di e tyari moro wini kon gi wi? Sortu krakti a fasi fa wi e studeri musu abi tapu trawan?’ Na artikel di e kon sa taki fu den prenspari tori disi, di abi fu du nanga a go di wi e go na fesi leki Kresten.

[Futuwortu]

Yu e memre disi ete?

• San a wani taki fu teki ten fu „denki dipi” fu wan sani noso fu „prakseri bun” fu en?

• Fa wi musu si a studeri di wi musu studeri a Wortu fu Gado?

• San musu de a sani di e meki taki wi wani studeri a Wortu fu Gado?

• Sortu yepisani wi abi fu kon frustan Bijbel moro bun?

[Aksi fu a tori disi]

[Prenki na tapu bladzijde 15]

Den memre fu a Bethelfamiri e si en leki wan sani di e gi den krakti na yeye fasi, fu bigin a dei fu den nanga a luku di den e luku wan bijbeltekst

[Prenki na tapu bladzijde 15]

Wi kan gebroiki wi ten bun te wi e arki cassette lolo di abi fu du nanga Bijbel tori, aladi wi de na pasi e go na wan presi

[Prenki na tapu bladzijde 16]

Sma wroko tranga èn bun langa fu man feni gowtu. Omeni muiti yu e du fu studeri a Wortu fu Gado?

[Sma di abi a reti fu a prenki]

Courtesy of California State Parks, 2002

[Prenki na tapu bladzijde 17]

Bijbel na wan gudu di kan yepi wi fu kisi têgo libi