Gi teleki yusrefi no abi noti moro

„YU KAN kari mi wan begiman, ma mi no e hati mi ede nanga dati. Mi e begi sma moni gi Yesus.” A sani disi di wan Protestant domri ben taki e meki wi frustan krin taki sma abi difrenti denki fu a moni di sma musu gi fu horibaka gi a kerki fu den. A gersi leki den kerki di abi furu bribiman no sa man drai te den no e kisi bun furu moni fu sma. Den kerki disi musu pai den wrokoman fu den, den musu bow nyun tempel, noso nyun kerki di den musu ondrow, èn den musu abi moni fu man pai gi a preikiwroko di den e du. Fa den sa feni a moni di den abi fanowdu?

Furu kerki e pai gi den sani disi nanga yepi fu a di fu tin pisi di den bakaman fu den e gi den fu a moni di den e meki ala mun. Soleki fa na evangelie preikiman Norman Robertson e taki, dan „Gado e meki sma gi kerki a di fu tin pisi fu a moni di den e meki ala mun, so taki A kan pai gi den sani di a kownukondre fu En na grontapu abi fanowdu. Na so Gado e seti den moni afersi fu a kerki, so taki sma kan preiki na Evangelie.” Na evangelie preikiman disi e si en leki wan prenspari sani fu memre den bakaman fu en fu a frantwortu di den abi fu gi a kerki moni, èn fu dati ede a e taki nanga ala overtoigi: ’Wan sma no e gi kerki a di fu tin pisi fu na alamun moni fu en fu di a man du dati. Wan sma e du dati fu di a wani gi yesi na Gado. Te wan sma no e gi kerki a moni dati, dan a e sori krin taki a no e hori ensrefi na den komando fu Gado. A sma dati e fufuru moni fu Gado fu gebroiki en gi ensrefi.’—A buku Tithing—God’s Financial Plan.

Kande yu e agri taki Kresten musu gi moni fu horibaka gi na anbegi fu den. Ma yu feni en wan fruferi sani te a kerki fu yu e tan begi yu moni, noso yu feni sosrefi taki a sani dati no fiti? Wan kerki leriman fu Brasyonkondre, namku Inácio Strieder, e krutu den kerki fu di a feni taki den e gebroiki a di fu tin pisi di sma e gi den fu na alamun moni fu den, fu „seti den problema di a kerki srefi abi”. A leriman disi feni sosrefi taki den sortu sani disi di den kerki e du „no de akruderi wet, den no fiti, èn den no e kruderi kwetikweti nanga san Bijbel e taki”. A e taki dati a bakapisi fu a sani disi de taki „sma di no abi wroko, weduwe, sma di e tan na ini pôti birti, èn sosrefi den wan di no man si taki san den kerki e du no bun, e denki taki Gado drai baka gi den. Den e denki sosrefi taki den de fruplekti fu gi ’a domri’ so furu taki den eigi osofamiri e tan nanga angri.”

Yu ben kan aksi yusrefi: ’Den kerki di e dwengi sma fu gi den a di fu tin pisi fu na alamun moni fu den, e du san skrifi na ini Bijbel? Noso a de so, taki wan tu kerki e meki sma kisi frede gi Gado, soso fu man puru moni na den anu? Fu taki en leti, a de so taki Gado e fruwakti fu wi taki wi e gi teleki wisrefi no abi noti moro?’