Nyan na a tafra fu wan kapten
Nyan na a tafra fu wan kapten
A KAN de wan prisiri fu nyan na a tafra fu wan kapten tapu wan sipi te yu abi ala sortu sma drape, te switi nyanyan de, èn te switi takimakandra de. Ma wan takimakandra di ben hori na a tafra fu Kapten Robert G. Smith, fu wan sipi fu a White Star Line, ben sori tapu wan tra fesa-nyanyan, namku wan yeye fesa-nyanyan.—Yesaya 25:6.
Na ini a yari 1894, di Robert ben abi 24 yari, dan a ben wroko leki kapten tapu a sipi Kinclune of Dundee fu go nanga sipi na heri grontapu a fosi leisi. Bakaten, Robert ben de kapten fu tra sipi fu White Star, dati na sipi soleki Cedric, a sipi Cevic nanga a sipi Runic. * Wan ten Robert ben wroko leki kapten tapu wan sipi di ben go fu New York, abra na Atlantisch Se, go na Liverpool, Ingrisikondre. Na a ten dati, dan a kapten disi ben abi wan sma na en tafra fu nyan makandra nanga en. A sma dati ben de Chales Taze Russell. A takimakandra dati di Robert ben abi nanga Russell ben meki taki a ben wani sabi moro fu a Bijbel boskopu. Fu yepi en, so taki a ben kan leri moro fu Bijbel, dan Russell ben gi en wan tu buku di den e kari Studies in the Scriptures. Robert ben breiti fu kisi den buku disi.
Russel ben tan skrifi brifi gi Robert. Dati ben meki taki Robert ben wani sabi moro fu a Bijbel boskopu. Robert ben fruteri en wefi den nyun sani di a ben leri. A no ben teki langa moro di ala tu tron fayafaya Bijbel Ondrosukuman, soleki fa den ben kari Yehovah Kotoigi na a ten dati. Bakaten, Robert ben abi a grani fu hori lezing. Na ini Brisbane, na ini Australia, Robert ben hori wan lezing fu a tori „A switismeri oli fu Gilead”. A ben sori fa Gado Wortu abi wan boskopu di de leki wan „dresi gi ala den pen di grontapu e tyari tapu sma”. Di a ben de na ini Ingrisikondre baka, dan en wefi nanga den yongu pikin fu en, ben yepi en fu meki tra sma si a „Photo-Drama der Schepping”. Drape sma ben kan luku den atosigi, èn na a srefi ten den ben kan yere a sten fu Russell e taki fu san sma ben si tapu den atosigi disi.
Robert ben gi den pikin fu en a gudu disi fu Kownukondre waarheid di ensrefi ben kisi wanten. Nownowde, teleki a di fu feifi bakapikin baka Robert, sowan 18 famiriman fu en e prati a bun nyunsu nanga trawan. Den de nanga tangi na ati gi a nyanyan di ben nyan na a tafra fu a Kapten.
Na ala presi fu grontapu Yehovah Kotoigi e prati buku èn den e du wan Bijbel leriwroko sosrefi. Nanga yepi fu den sani disi den e leri sma na ala presi a Bijbel boskopu di ben hari a prakseri fu Kapten Smith. Yusrefi kan kon sabi san ben hari a prakseri fu a kapten disi na a tafra fu en.
[Futuwortu]
^ paragraaf 3 Wan tra srefi sortu sipi, ben de a Titanic. Na a ten di a sipi disi sungu na ini wan kefalek bigi rampu tapu se, dan a ben abi leki kapten E. J. Smith (a kapten dati no de wan famiri fu Robert Smith).
[Prenki na tapu bladzijde 8]
Robert G. Smith
[Prenki na tapu bladzijde 8]
Charles T. Russell