Tranga yu anu

NA INI Bijbel, a wortu anu de fu feni moro leki 1800 tron. Na ini a Hebrewtongo a wortu anu gebroiki na difrenti fasi. Fu eksempre, wan krin anu e sori go na wan sma di de sondro fowtu (2 Samuel 22:21; Psalm 24:3, 4). Fu opo yu anu wani taki dati yu lobi fu gi sani na trawan (Deuteronomium 15:11; Psalm 145:16). Te wan sma e poti en sili na ini en eigi anu dan dati wani taki dati a sma e poti en libi na ini kefar (1 Samuel 19:5). Fu saka yu anu wani taki dati wan sma lasi-ati noso e firi brokosaka (2 Kroniki 15:7). Fu tranga na anu fu wan sma wani taki fu gi wan sma tranga nanga krakti fu man du wan sani.—1 Samuel 23:16.

Na ini a ten disi a de tumusi prenspari fu tranga wi anu. Wi e libi na ini „muilek ten di tranga fu pasa” (2 Timoteyus 3:1). Te wi lasi-ati, dan leki libisma wi abi a gwenti fu lasi howpu, noso a de neleki wi e saka wi anu fu di wi no abi krakti moro. A de wan aladei sani fu si tini di gowe libi skoro, masra di gowe libi den osofamiri, èn mama di gowe libi den pikin. Leki Kresten wi musu tranga wi anu fu man horidoro te tesi miti wi na ini a diniwroko fu Gado (Mateyus 24:13). Te wi sa du disi dan wi sa prisiri na ati fu Yehovah.—Odo 27:11.

A fasi fa wi anu e kisi tranga

Soleki fa a Hebrew tekst e sori, dan na ini den dei fu Esra den Dyu ben musu tranga den anu so taki den ben kan kaba a bow fu a tempel fu Yehovah na ini Yerusalem. Fa den anu ben kon tranga? „Den ben hori a fesa fu den brede sondro srudeki, nanga prisiri seibi dei langa; bika Yehovah ben meki taki den prisiri, èn a ben drai na ati fu a kownu fu Asiria go na den fu tranga den anu fu den ini a wroko fu na oso fu a tru Gado, a Gado fu Israel” (Esra 6:22). A ben de krin fu si taki nanga yepi fu a krakti fu Yehovah, „a kownu fu Asiria” ben meki Gado en pipel drai go baka. Èn Yehovah ben gi En pipel tranga, fu man kaba a bow fu a tempel.

Bakaten, Nehemia ben tranga den anu fu den kompe Dyu na ini a ten fu en, fu man bow den skotu fu Yerusalem baka. Wi e leisi drape: „Na so mi ben taigi den fu na anu fu mi Gado, fa a ben bun na mi tapu, èn sosrefi fu den wortu di a kownu ben taigi mi. Tapu disi den ben taki: ’Meki wi opo, èn wi musu bow.’ Na so den ben tranga den anu fu du a bun wroko.” Nanga anu di ben kon tranga, Nehemia nanga den kompe Dyu fu en ben man bow den skotu fu Yerusalem baka na ini 52 dei nomo!—Nehemia 2:18; 6:9, 15.

Na a srefi fasi Yehovah e tranga wi anu fu man preiki a bun nyunsu fu a Kownukondre (Mateyus 24:14). A e du disi fu di A ’e gi unu ala sani di bun so taki wi man du en wani’ (Hebrewsma 13:21). A e gi unu den moro bun wrokosani. Wi abi a Bijbel, Bijbel publikâsi, tijdschrift, brochure, traktaat, cassette nanga videocassette di wi e gebroiki fu miti sma na heri  grontapu. Fu taki en leti, den publikâsi fu wi de fu kisi na ini moro leki 380 tongo. Boiti dati, nanga yepi fu Gemeente Konmakandra, Kring Konmakandra, Spesrutu Dei Konmakandra nanga Kongres, Yehovah e leri wi fa fu gebroiki den moi yepisani disi na ini wi diniwroko.

Aladi Yehovah e tranga wi anu na someni fasi, a e fruwakti sosrefi taki wi musu meki muiti fu wi sei. Memre san a profeiti Elisa ben taigi Kownu Yoas, di ben suku yepi na Elisa fu feti teige den Siriasma di ben broko kon na ini a kondre. Elisa ben taigi a kownu fu teki wan tu peiri èn fu naki na tapu a gron. A Bijbel tori e taki: „A ben naki dri tron èn a ben tapu. Èn a man fu a tru Gado ben atibron nanga en, dati meki a ben taki: ’Yu ben musu naki feifi noso siksi tron! Dan yu ben o wini Asiria krinkrin, ma now yu sa wini Asiria dri tron nomo.’” (2 Kownu 13:18, 19). Fu di Yoas no ben du fayafaya san Gado ben taki, meki a no ben wini den Siriasma krinkrin.

A srefi gronprakseri de gi wi tu, efu wi wani du den sani di Yehovah taigi wi fu du. Na presi fu broko wi ede nanga den problema di de na wi pasi noso fa a diniwroko di wi kisi fu du muilek, wi musu du en nanga faya èn nanga wi heri ati. Wi musu tranga wi anu èn poti wi frutrow tapu Yehovah fu gi wi yepi.—Yesaya 35:3, 4.

Yehovah sa tranga wi anu

Yehovah no sa draidrai fu yepi wi èn fu tranga wi anu so taki wi man du en wani. A no de fu taki dati Gado no sa du wondru èn a no sa du ala sani gi wi. A e fruwakti taki wi fu wi sei, e du san wi musu du — soleki leisi Bijbel ala dei, sreka wisrefi èn go na den konmakandra doronomo, teki prati na a diniwroko someni leki a kan, èn begi En doronomo. Efu wi fu wi sei e du a diniwroko getrow èn nanga faya aladi wi abi na okasi ete, dan Yehovah sa gi wi a krakti fu du san A e fruwakti fu wi.—Filipisma 4:13.

Poti prakseri na wan kefal fu wan Kresten di lasi en wefi nanga en mama na ini dede na ini a srefi yari. A ben de nanga bigi sari ete di wan prati ben kon na mindri a manpikin fu en nanga a wefi fu en. Boiti dati, na uma disi ben drai baka gi a Kresten bribi. „Mi leri taki wi no man frukisi sortu tesi wi o kisi. Wi no kan taki o ten wi sa kisi tesi noso o furu tesi wi sa kisi”, na so a brada disi e taki. Fa a brada disi e kisi tranga fu man horidoro? „Begi nanga stuka ben de wan trutru yepi fu man pasa den muilek ten disi. Mi ben kisi furu trowstu fu den brada nanga sisa di ben horibaka gi mi. Spesrutu, mi ben kon si taki a de trutru prenspari taki mi nanga Yehovah kweki wan bun banti nanga makandra, fosi muilek situwâsi kon.”

Awansi sortu ondrofeni yu kisi na ini yu libi, abi a fasti bosroiti fu frutrow dorodoro tapu Yehovah èn fu meki bun gebroiki fu ala den seti di A poti gi wi fu tranga wi anu. Dan yu sa man pristeri a moro bun diniwroko na Yehovah èn na so wan fasi yu kan tyari prèise nanga grani tapu en warti nen.—Hebrewsma 13:15.

[Prenki na tapu bladzijde 31]

Fu di Yoas no ben du fayafaya san Gado ben taki, meki a no ben wini den Siriasma krinkrin