Ondrofenitori

Wi bosroiti fu tan na ini a kondre pe wi go dini leki zendeling

SOLEKI FA DICK WALDRON FRUTERI

A ben de wan sonde bakadina na ini september 1953. No so langa pasa, wi ben doro na ini Zuid-West Afrika (now a de Namibia). Wi no ben de wan wiki ete na ini a kondre, èn wi ben seti sani kaba fu hori wan publiki konmakandra na ini a mamafoto, Windhoek. San meki taki wi komopo fu Australia kon te na a Afrikan kondre disi? Mi nanga mi wefi, makandra nanga dri tra yongu uma, ben kon leki zendeling na ini a kondre disi fu preiki a bun nyunsu fu Gado Kownukondre.—Mateyus 24:14.

MI LIBI bigin na ini a prenspari yari 1914, na ini wan farawe presi fu grontapu, namku na ini Australia. Na a ten di bigi ekonomia problema ben miti heri grontapu, dan mi ben de wan tini ete, èn mi ben abi a frantwortu tu fu yepi fu sorgu na osofamiri. Wroko no ben de fu feni, ma mi ben feni wan fasi fu onti busi-konikoni, wan meti di ben lai na ini Australia. Sobun, wan prenspari fasi fa mi ben e yepi fu tyari nyanyan kon na oso, ben de fu sorgu taki konikoni meti ben de fu nyan ala ten.

Na a ten di a di fu tu grontapufeti broko na ini 1939, dan mi feni wan wroko na ini den tram nanga den bus na ini a foto Melbourne. Sowan 700 man ben e du a wroko dati. Fu di den alamala ben e wroko tra yuru, meki ibri leisi mi ben e miti wan tra sma di ben e rei a bus noso a tram. Furu tron mi ben aksi den: „Sortu bribi yu abi?”, èn mi ben meki den fruteri mi san den ben e bribi. A wan-enkri sma di ben man piki mi na wan bun fasi ben de wan Kotoigi fu Yehovah. A fruteri mi fu a Bijbel boskopu di e taki fu wan paradijs grontapu, pe sma di e frede Gado sa libi fu têgo.—Psalm 37:29.

Na a srefi ten, mi mama ben kon miti nanga Yehovah Kotoigi tu. Furu tron, te mi ben komopo  na wroko lati neti, dan wan preti nyanyan ben e wakti mi na oso, makandra nanga a Vertroosting tijdschrift (now a nen Ontwaakt!). Den sani di mi ben leisi ben e hari mi prakseri. Baka wan pisi ten, mi si taki disi ben de a tru bribi, èn mi ben go na a gemeente doronomo. Te fu kaba, mi teki dopu na ini mei 1940.

Wan pionier-oso ben de na ini Melbourne, èn sowan 25 furuten preikiman fu Yehovah Kotoigi ben e tan na ini na oso dati. Mi go tan nanga den. Ibri dei mi ben e arki den moi sani di den ben ondrofeni na ini a preikiwroko, èn den sani dati meki taki mi ben wani tron wan pionier tu. Te fu kaba, mi aksi efu mi ben kan kisi na okasi fu du a pionierwroko. Mi kisi na okasi dati, èn te fu kaba mi kisi kari fu go dini na a bijkantoro fu Yehovah Kotoigi na ini Australia. Na so mi tron wan memre fu a Bethelfamiri.

Mi ben musu go na strafu-oso èn a wroko ben tapu

Wan fu den wroko di mi ben abi na Bethel ben de fu sa udu. Wi ben e koti udu fu meki krofaya, èn a krofaya disi ben de fu meki gas. Wi ben e gebroiki a gas disi gi den wagi fu a bijkantoro, fu di na orloku di ben de na a ten dati ben meki taki nofo gasoline no ben de. Wi ben de nanga 12 sma na ini a wrokopresi dati, èn wi alamala ben kisi kari fu go na ini a legre. Wan syatu pisi ten baka dati, wi ben musu koti strafu siksi mun langa fu di wi ben weigri fu du srudatiwroko, soleki fa Bijbel ben leri wi (Yesaya 2:4). Wi ben musu go na wan strafuman-kampu. Sortu wroko den ben gi wi fu du? Yu no o bribi en, ma wi ben musu koti udu, a srefi sani di wi ben leri fu du na Bethel!

Wi ben du a wroko fu wi so bun, taki a basi fu a strafu-oso sorgu taki wi ben man kisi wan Bijbel nanga den Bijbel publikâsi fu wi, aladi wan komando ben gi taki wi no ben musu kisi den sani dati. Na ini a pisi ten disi mi leri wan bun sani di abi fu du nanga a fasi fa wi musu libi nanga trawan. Di mi ben e wroko na Bethel, dan mi no ben man feni en srefisrefi nanga wan fu den brada drape. A ben de heri tra fasi leki fa mi ben de. We, suma yu denki den poti nanga mi na ini a srefi strafu-oso kamra? Iya, a srefi brada dati. Now wi ben abi ala ten fu kon leri sabi makandra, èn a bakapisi fu dati ben de taki wi tron bun mati fu makandra, èn dati tan so.

Baka wan pisi ten, a wroko fu Yehovah Kotoigi ben tapu na ini Australia. Lanti ben teki ala moni fu den, èn den brada na Bethel ben abi pikinso moni nomo. Wan leisi, wan fu den brada kon na mi èn a taigi mi: „Dick, mi wani go preiki pikinso na foto, ma mi no abi susu. Mi abi soso den wroko-buta fu mi.” Mi ben breiti taki mi ben man yepi en, èn a go na foto nanga den susu fu mi.

Bakaten wi yere taki den ben sroto a brada disi fu di a ben e du preikiwroko. Mi no ben man hori misrefi fu skrifi en wan syatu brifi: „Mi e sari fu san pasa nanga yu. Ma mi breiti taki mi no ben de na ini yu presi.” Ma wan syatu pisi ten baka dati misrefi ben musu go na strafu-oso baka fu di mi ben weigri fu du srudatiwroko. Baka di den lusu mi, dan mi kisi a wroko fu luku a presi pe den ben e prani sani èn ben e kweki meti gi a Bethelfamiri. Na a ten dati, wi ben wini wan krutu-afersi, èn Yehovah Kotoigi ben man du a wroko fu den baka.

Mi trow nanga wan uma di ben lobi a preikiwroko

Na ini a pisi ten di mi ben e wroko na a gron fu a bijkantoro, dan mi bigin poti seryusu prakseri na trowlibi. Wan pisi ten baka dati mi kon lobi wan yongu pionier sisa, Coralie Clogan. A granmama fu Coralie ben de a fosi sma na ini en famiri di ben wani sabi moro fu a Bijbel boskopu. Bifo a dede, dan a ben taigi Vera, a mama fu Coralie: „Kweki den pikin fu yu fu lobi Gado èn fu dini en, èn wan dei wi sa miti na ini a Paradijs grontapu.” Bakaten, di wan pionier brada kon na Vera en oso fu pristeri a buku Millions Now Living Will Never Die (Milyunmilyun sma di e libi now noiti sa dede), dan den wortu dati yepi en fu frustan sani moro krin. A pikin buku dati ben overtoigi Vera taki Gado ben wani taki libisma ben musu tan na tapu wan paradijs grontapu (Openbaring 21:4). A ben teki dopu syatu baka 1930, èn soleki fa en mama ben taigi en, na so a ben yepi den dri umapikin fu en, namku Lucy, Jean, nanga Coralie, fu kisi lobi gi Gado. Ma a papa fu  Coralie ben gens a bribi fu en osofamiri srefisrefi, soleki fa Yesus ben warskow taki dati ben kan pasa na ini osofamiri.—Mateyus 10:34-36.

A Clogan famiri ben sabi prei poku heri bun; ala den pikin ben e prei wan tra sani. Coralie ben e prei a finyoro, èn na ini 1939 di a ben abi 15 yari, a kisi wan diploma fu di a ben de wan koni pokuman. Di a di fu Tu Grontapufeti broko, dan dati meki taki Coralie bigin prakseri seryusu fu a tamara fu en. A ten ben doro gi en fu bosroiti san a ben o du nanga en libi. Na a wan sei, a ben kan tron wan bigi pokuman. A ben kisi a kari kaba fu go prei na ini wan bigi grupu di nen a Melbourn Symphony Orchestra. Na a tra sei, a ben kan gebroiki en ten fu du a bigi Kownukondre preikiwroko. Baka di Coralie ben prakseri seryusu fu den sani disi, dan en nanga en tu sisa teki dopu na ini 1940 èn den sreka sani fu go na ini a furuten preikiwroko.

Wan syatu pisi ten baka di Coralie ben bosroiti fu go na ini a furuten diniwroko, dan wan brada, Lloyd Barry, go taki nanga en. A brada disi ben abi bigi frantwortu na a bijkantoro fu Australia, èn bakaten a ben e dini leki wan memre fu a Tiri Skin fu Yehovah Kotoigi. Dyonsrode a ben hori wan lezing na ini Melbourne, èn a taigi Coralie: „Mi e go na Bethel baka. Yu no wani drai go baka nanga mi fu tron wan memre fu a Bethelfamiri?” Coralie teki a kari wantewante.

Coralie nanga den tra sisa fu a Bethelfamiri ben wroko bun tranga fu meki Bijbel publikâsi gi den brada nanga sisa na ini Australia. Disi ben de na a ten di a preikiwroko ben tapu na ini den yari di orloku ben de. Fu taki en leti, den sisa disi ben meki bun furu fu den buku, aladi Brada Malcolm Vale ben teki fesi na ini a wroko disi. Den ben meki den buku The New World (A nyun grontapu) nanga Children (Pikin-nengre), èn nowan enkri leisi den ben misi fu meki wan Waktitoren na ini den moro leki tu yari di a preikiwroko ben tapu.

Sowan 15 leisi den ben musu go meki den buku na wan tra presi, soso fu man wai pasi gi skowtu. Wan leisi, den ben e meki Bijbel publikâsi na ini wan kamra ondrosei fu wan gebow, aladi den ben e du neleki den ben e meki tra sortu buku. Te sma ben kon fu ondrosuku a presi, dan a sisa di ben e wroko na tapusei ben kan pusu wan knop, èn te a ben du dati, dan wan bel ben de fu yere na ini na ondrosei-kamra. Na so fasi, den sisa ben kan kibri den buku nanga tra sani bifo skowtu ben kan bigin ondrosuku sani.

Wan leisi di sma ben kon ondrosuku a presi, dan wan tu fu den sisa skreki di den si taki wan Waktitoren ben didon moi na tapu a tafra pe ala sma ben kan si en. A skowtu kon, a poti a tas fu en leti na tapu A Waktitoren, èn a go ondrosuku a presi. Di a no feni noti, a teki en tas, dan a waka gowe!

Di a preikiwroko ben man du baka, èn di den brada ben kisi den gudu fu a bijkantoro baka, dan furu fu den kisi na okasi fu go dini leki spesrutu pionier. Na a ten dati Coralie gi en nen fu go dini na ini a foto Glen Innes. Mi go drape tu baka di wi trow tapu 1 yanuari 1948. Di wi gowe libi a presi dati, dan wan gemeente ben seti drape, èn sani ben e waka bun srefisrefi nanga a gemeente disi.

A tra foto pe wi ben musu go preiki ben de Rockhampton, ma wi no ben man feni nowan tanpresi drape. Fu dati ede wi seti wan tenti na tapu wan pisi gron fu wan sma di ben wani sabi moro fu Bijbel. A tenti dati ben de wi tanpresi neigi mun langa. A ben kan de wi tanpresi moro langa, ma di alenten kon, dan wan bigi sibibusi priti a heri tenti na pisipisi, èn hebi alen wasi en gowe. *

 Wi e go dini na ini wan tra kondre

Di wi ben de na ini Rockhampton, dan wi kisi wan kari fu go na a di fu 19 klas fu a Waktitoren Bijbelskoro Gilead. Na so a du kon, taki baka di wi klari a skoro na ini 1952, den seni wi go na a kondre di ben nen Zuid-West Afrika na a ten dati.

Den kerki tiriman fu Krestenhèit no ben draidrai fu sori fa den ben denki fu a zendelingwroko fu wi. Ibri sonde, siksi wiki langa, den ben warskow den sma na ini a kerki fu den, taki den ben musu luku bun nanga wi. Den ben taigi den sma taki den no ben musu taki nanga wi, èn den no ben musu gi wi primisi fu leisi sani gi den na ini a Bijbel, bika dati ben o bruya den. Na ini wan fu den kontren, wi ben libi wan tu publikâsi gi den sma, ma a domri ben de na wi baka e waka oso fu oso fu teki ala den buku disi na den sma. Wan leisi di wi ben abi wan takimakandra na ini a kantoro fu a domri, dan wi si taki a ben abi wan lo fu den buku fu wi.

A no ben de langa baka dati di den tiriman fu a kontren dati bigin broko den ede tu nanga a wroko fu wi. A no de fu taki, dati na fu di den kerki fesiman ben e sutu faya gi den, meki den ben denki taki wi ben e wroko makandra nanga den Komunist. Dati meki den tyari wi go na skowtu-oso fu teki den fingamarki fu wi, èn den dwengi wan tu fu den sma di wi ben preiki gi, fu piki wan lo aksi. Aladi wi ben kisi so furu gens, toku moro nanga moro sma ben e kon na den konmakandra fu wi.

Sensi a bigin di wi kon tan dyaso, wi ben angri fu tyari a Bijbel boskopu go na a Ovambo pipel, a Herero pipel, nanga a Nama pipel. Ma disi no ben makriki. Na a ten dati, Zuid-West Afrika ben de ondro a tirimakti fu Zuid Afrika di ben poti wan wet taki weti sma nanga blaka sma no ben musu moksi nanga makandra. Wi ben de weti sma, èn fu dati ede wi no ben man go preiki na ini kontren pe blaka sma ben e tan te wi no ben kisi primisi fu lanti. Ibri leisi baka wi ben aksi primisi, ma den tiriman no ben wani gi wi primisi kwetikweti.

Baka di wi ben e dini tu yari kaba na ini a kondre disi, dan wan sani pasa di wi no ben fruwakti. Coralie ben kon de nanga bere. Na ini oktober 1955, na umapikin fu wi, Charlotte, gebore. Aladi wi no ben kan dini moro leki zendeling, toku mi ben man feni wan afudei-wroko, so taki mi ben man dini leki pionier fu wan pisi ten.

Wi kisi piki tapu den begi fu wi

Na ini 1960 wan tra tyalensi miti wi. Coralie ben kisi wan brifi di ben taki dati en mama ben siki so te, taki efu Coralie no ben kon na oso, dan kande a no ben o si en mama noiti moro. Sobun, wi seti sani fu gowe libi Zuid-West Afrika èn fu froisi go baka na Australia. Ne wan sani kon pasa. A srefi wiki dati di wi ben o gowe, dan  mi kisi wan papira fu den tiriman fu a kontren, èn a papira dati ben sori taki wi ben kisi primisi fu go na ini a foto Katutura pe soso blaka sma ben e tan. San wi ben o du now? Wi ben o gi den a papira baka, baka di wi ben feti seibi yari langa fu kisi en? Wi ben kan denki makriki taki trawan ben kan go doro nanga a wroko di wi ben bigin. Ma a no de so taki disi ben de wan blesi fu Yehovah? A no ben de wan piki tapu den begi fu wi?

Mi teki wan bosroiti wantewante. Mi ben o tan na baka, fu di mi ben frede taki wi no ben o abi primisi moro fu tan na ini a kondre fu ala ten efu wi alamala ben o go na Australia. A dei baka dati, mi seti sani fu no gowe moro, ma mi seni Coralie nanga Charlotte go na Australia fu teki wan langa fakansi.

Na ini a pisi ten di den ben gowe, dan mi bigin preiki gi den sma na ini a foto pe soso blaka sma ben e tan. Bun furu sma ben arki a boskopu. Di Coralie nanga Charlotte drai kon baka, dan furu sma fu a foto dati ben e kon na den konmakandra fu wi.

Na a pisi ten disi mi ben abi wan owru wagi di mi ben man gebroiki fu tyari sma go na den konmakandra. Mi ben rei fo noso feifi tron ibri leisi te wi ben abi konmakandra, èn mi ben e tyari seibi, aiti, noso neigi sma ibri tron. Te a lasti sma ben komoto na ini a wagi, dan Coralie ben gwenti fu dreigi mi nanga na aksi: „Omeni sma yu abi ete na ondro a sturu?”

Fu man abi moro bun bakapisi na ini preikiwroko, dan wi ben abi publikâsi fanowdu na ini a tongo di den sma fu a kondre ben e taki. Sobun, mi ben abi na okasi fu seti sani so, taki a traktaat Life in a New World (Libi na ini wan nyun grontapu) ben o poti abra na ini fo tongo di sma ben e taki na ini a kontren. Den fo tongo dati ben de: Hererotongo, Namatongo, Ndongatongo, nanga Kwanyamatongo. Den sma di ben e poti a traktaat abra na ini den tongo dati, ben de sma di ben kisi skoroleri èn den ben e studeri Bijbel nanga wi, ma toku mi ben musu sidon nanga den fu sorgu taki ibri sani ben poti abra na a yoisti fasi. Namatongo na wan tongo di no abi furu wortu. Fu eksempre, mi ben pruberi fu fruklari a prakseri disi: „Na ini a bigin, Adam ben de wan volmaakti sma.” A vertaler krabu en ede, èn a taigi mi taki a no ben sabi moro fa den ben e taki „volmaakti” na ini Namatongo. „Mi abi en”, a taigi mi te fu kaba. „Na ini a bigin, Adam ben de leki wan lepi apra.”

Wi de koloku na ini a kondre pe wi go dini

Sowan 49 yari pasa sensi wi kon na a kondre disi di nen Namibia now. A no de fanowdu moro fu aksi lanti primisi te wi wani go preiki na ini kontren pe blaka sma e tan. Namibia abi wan tirimakti now di e gi ala sortu sma den srefi reti. Now, wi abi fo bigi gemeente na ini a foto Windhoek, èn den e kon makandra na ini moi Kownukondre zaal.

Wi ben gwenti fu prakseri den wortu di wi ben yere na Gilead: „Teki a bosroiti fu tan na ini a kondre pe yu e go dini.” Te wi e luku a fasi fa Yehovah meki sani waka, dan wi abi na overtoigi taki a wani wi fu tan na ini a kondre disi. Wi kon lobi den brada nanga sisa, di abi someni difrenti moi kulturu. Wi lafu nanga den di den ben e prisiri, èn wi krei nanga den di den ben e sari. Sonwan fu den nyun sma di wi ben e tyari go na den konmakandra na ini wi wagi di ben lai kaba nanga sma, na stonfutu now na ini den gemeente fu den. Di wi doro na ini a bigi kondre disi na ini 1953, dan den preikiman fu a bun nyunsu no ben doro tin sma ete. Now a pikin grupu dati gro kon tron moro leki 1200 sma. Soleki fa Yehovah pramisi, dan a sorgu taki den sani ’di wi prani, èn di wi gi watra’, gro bun.—1 Korentesma 3:6.

Te mi nanga Coralie e prakseri baka fu den furu yari fu diniwroko, fosi na ini Australia èn now na ini Namibia, dan wi e firi koloku trutru. Wi e howpu èn wi e begi taki Yehovah sa tan gi wi a krakti fu du en wani now èn fu têgo.

[Futuwortu]

[Prenki na tapu bladzijde 26, 27]

Wi e froisi fu go dini na ini a foto Rockhampton, na Australia

[Prenki na tapu bladzijde 27]

Wi de na a lanpresi fu go na Gileadskoro

[Prenki na tapu bladzijde 28]

A e gi wi furu prisiri fu preiki na ini Namibia