A fasi fa Yesus gebore èn fu san ede a gebore

„A NO KAN!” Na dati furu sma di no de Kresten ben o taki te den ben o yere a tori di e taki fu a geborte fu Yesus. Den sma disi feni taki buweisi no de taki wan nyunwenke ben kan kon de nanga bere èn taki a ben kan kisi wan manpikin sondro taki a ben abi seks nanga wan man. Fa yu feni a tori dati?

Na ini 1984, a koranti The Times fu a foto London, tyari wan brifi kon na doro di ben taki fu a tori disi, èn na ini a brifi dati ben skrifi: „A no bun fu gebroiki sabidensi fu sori taki wondru no kan pasa. Te wan sma no e bribi taki wondru kan pasa, dan dati na wan sani di a sma e bribi nomo, èn a de so tu te wan sma e bribi taki wondru kan pasa trutru.” Tinafo professor fu sabidensi di ben de fu heiskoro na ini Ingrisikondre, ben poti den nen na ondrosei fu a brifi disi. Den professor disi ben taki: „Wi e bribi taki den tori di e taki fu a nyunwenke di ben kisi wan pikin, den wondru fu den Evangelietori, èn na opobaka fu Krestes, na sani di ben pasa trutru fositen.”

Toku wi kan frustan taki wan sma sa fruwondru te a e kon yere fu a fosi leisi taki Yesus ben gebore fu wan nyunwenke. Yesus en eigi mama di ben de wan nyunwenke, ben fruwondru di na engel fu Gado taigi en: „Luku! Yu sa de nanga bere èn yu sa kisi wan manpikin, èn yu musu kari en Yesus.” Fu di Maria ben skreki, dan a aksi na engel: „Fa disi sa pasa, fu di mi no abi seks demakandra nanga wan man?” Ne na engel fruklari taki Gado ben o meki a wondru disi pasa nanga yepi fu En santa yeye, èn na engel ben taki moro fara: „Gado man du ala san a taki” (Lukas 1:31, 34-37). A no de fu taki dati a Sma di meki libisma na so wan wondru fasi taki den kan meki pikin, ben kan meki tu taki wan krin nyunwenke ben kon de nanga bere èn taki a ben tron a mama fu Yesus. Efu Gado meki na universum èn sosrefi ala den soifri wet di e tiri na universum disi, dan a ben kan gebroiki wan eksi fu Maria en eksi-saka tu fu meki wan libisma Manpikin di ben de sondro sondu.

Fu san ede a ben de fanowdu

A man Yosef di ben de getrow na Gado, ben meki mofo kaba fu trow nanga Maria bifo na uma disi ben kon de nanga bere. Na engel fu Gado taigi Yosef na ini wan dren, san meki taki na uma di a ben meki mofo nanga en fu trow, ben de nanga bere aladi a ben de wan nyunwenke ete. Na engel ben taki: „No frede fu tyari Maria yu wefi go na oso, bika a bere di a kisi, a kisi nanga yepi fu santa yeye. A sa kisi wan manpikin, èn yu musu kari en Yesus, bika a sa frulusu en pipel fu den sondu fu den” (Mateyus 1:20, 21). Na ini Hebrewtongo, a nen Yesus wani taki „Yehovah na frulusu”. A nen disi e memre wi taki wi musu kisi frulusu fu sondu èn fu dede, èn a e memre wi sosrefi fu den sani  di Yehovah Gado seti fu tyari a frulusu dati kon nanga yepi fu Yesus.

Fu di a fosi man, Adam, ben sondu, meki ala den bakapikin fu en gebore leki sondu sma, èn dati meki den abi a gwenti fu pasa den wet fu Gado (Romesma 5:12). Fa den bakapikin fu Adam ben kan kisi frulusu fu sondu fu man tron volmaakti sma? A libi fu wan tra volmaakti sma di ben abi a srefi waarde leki a di fu Adam ben musu tyari leki ofrandi fu man pai gi a sondu di Adam ben du. Na so fasi Gado ben kan seti sani baka akruderi en eigi retidu. Fu dati ede Yehovah meki taki a volmaakti man, Yesus, kon gebore na wan wondru fasi, èn fu dati ede sosrefi meki Yesus gi pasi taki den feanti fu en kiri en (Yohanes 10:17, 18; 1 Timoteyus 2:5, 6). Baka di Yesus ben kisi wan opobaka fu go libi na hemel, dan a ben kan taki nanga ala overtoigi: „Mi ben tron wan dedewan, ma luku! Mi e libi fu têgo èn fu ala ten, èn mi abi den sroto fu dede èn fu Hades [a grebi pe ala libisma e go].” —Openbaring 1:18.

Fu di Yesus abi den agersi sroto fu dede èn fu Hades, meki a e opo a pasi gi sondu libisma fu kisi baka san Adam ben lasi. Yesus ben fruklari: „Mi na a opobaka nanga a libi. A sma di e poti bribi na mi, sa kon na libi, awinsi a dede; èn ibriwan sma di e libi èn e poti bribi na mi, no sa dede noiti kwetikweti” (Yohanes 11:25, 26). Dati na trutru wan tumusi moi pramisi! Ma toku wan moro prenspari sani de di meki taki Yesus ben musu gebore leki libisma.

A moro prenspari sani di meki taki Yesus ben musu gebore

Di Maria kon de nanga bere fu Yesus, dan dati no ben wani taki dati Yesus ben kon na libi na a ten dati. „Mi komoto na hemel”, a ben taki krinkrin (Yohanes 6:38). Yesus ben libi na ini hemel makandra nanga en Tata fu sensi di Gado bigin meki den sani na hemel èn na grontapu. Fu taki en leti, Bijbel e taki fu en leki „a bigin fu den sani di Gado meki” (Openbaring 3:14). Di Yesus ben de na hemel, dan a si fa wan ogri-ati engel ben opo ensrefi teige Gado èn fa a ben meki den fosi libisma drai baka gi a tiri fu Gado. Dati ben de a moro prenspari sani di meki taki Yesus ben de klariklari fu gebore leki wan volmaakti Manpikin fu Gado na grontapu. San meki taki a ben wani du dati?

Yesus ben wani buweisi taki en hemel Tata ben abi a reti fu tiri hemel nanga grontapu. Fu di Yesus ben de getrow na Gado fu sensi a ben gebore teleki a dede na grontapu, meki a ben man sori taki a ben e agri krinkrin nanga a fasi fa Yehovah ben tiri den mekisani fu En. Bifo Yesus dede na den anu fu den feanti fu Gado, dan a taki krin fu san ede a ben de klariklari fu gi en libi leki ofrandi. A ben taki dati a ben o du dati fu meki grontapu sabi taki a ben lobi a Tata (Yohanes 14:31). Efu den fosi tu libisma, Adam nanga Efa, ben kweki so wan lobi, dan den ben o man sori taki den ben tan getrow na ondro a tesi di trutru no ben de so hebi leki a wan di Yesus ben kisi.—Genesis 2:15-17.

A getrowfasi fu Yesus ben tyari kon na krin sosrefi  taki na ogri-ati engel, Satan, ben de wan leiman. Satan ben fruteri ogri-ati lei fu Gado èn fu libisma, fu di a ben taki na fesi ala den engel na ini hemel: „Alasani disi wan soema abi a sa gi foe hori hemsrefi na libi” (Yob 2:1, 4, Da Bijbel na ini Sranantongo). Satan no ben abi leti di a taki dati ala libisma ben o trangayesi Gado fu man kibri den libi.

Den afersi disi di ben tyari kon na fesi, ben e krutu a reti di Gado abi fu tiri. Fu man seti den afersi disi, dan Yesus ben de klariklari fu gebore leki libisma èn a sori taki a ben tan getrow te na dede.

Sobun, a moro prenspari sani di meki taki Yesus ben gebore na grontapu, ben de soleki fa ensrefi ben taki, so taki a ben „kan gi kotoigi fu a waarheid” (Yohanes 18:37). A ben du dati fu di a sori nanga yepi fu den sani di a taki èn di a du, taki a tiri fu Gado regtfardiki dorodoro, èn taki sma di e saka densrefi na ondro a tiri disi sa de koloku fu têgo. Yesus ben fruklari sosrefi taki a ben kon na grontapu leki libisma fu gi a libi fu en leki „wan lusu-paiman gi furu sma”, èn dati ben opo a pasi gi sondu libisma fu kisi volmaakti èn têgo libi (Markus 10:45). Fu meki taki libisma ben kan frustan den prenspari tori disi, dan a ben de fanowdu taki sma skrifi a tori di e taki fu a fasi fa Yesus gebore poti tapu papira. Boiti dati, den sani di pasa na a ten di Yesus gebore e leri wi tra prenspari sani, soleki fa na artikel di e kon sa sori.

[Prenki na tapu bladzijde 4]

Fa den bakapikin fu Adam ben kan kisi frulusu fu sondu?