Suma ben de „den dri koni man”?

Te yu e luku den prenki di abi fu du nanga a geborte fu Yesus, dan furu tron yu e si dri man na ini langa krosi makandra nanga den kameili fu den. Den man disi doro na wan pen pe a beibi Yesus e didon na ini wan nyanyan-baki. Sma e kari den man disi di e weri moi langa krosi den dri koni man. San Bijbel e taki fu den man disi?

Soleki fa Bijbel e sori, dan den so-kari koni man disi ben komoto „fu owstusei”, èn na drape den ben kon yere taki Yesus ben gebore (Mateyus 2:1, 2, 9). A ben musu fu teki den man disi wan langa pisi ten bifo den ben doro na ini Yudea. Di den kon feni Yesus te fu kaba, dan a no ben de wan watrawatra pikin moro di ben de na ini wan pen. Na presi fu dati, di den man feni Maria nanga „a yongu pikin”, dan den ben e libi na ini wan oso.—Mateyus 2:11.

Bijbel e kari den man disi towfruman noso „astrologiaman”, èn a no e taki omeni fu den man disi ben de. A buku The Oxfort Companion to the Bible e fruklari: „Wi kan si taki towfruwroko nanga astrologia abi fu du nanga makandra, te wi e luku fa den man disi ben poti ala den prakseri na a stari di ben tyari den go na Betlehem.” Bijbel e sori krin taki nowan enkri sortu towfruwroko no bun, èn dati de so tu nanga a gwenti di den Babilonsma ben abi fu luku den stari, fu kon sabi san ben o pasa.—Deuteronomium 18:10-12; Yesaya 47:13.

A sani di den man disi ben kon sabi no ben abi bun bakapisi. A meki taki na ogri-ati Kownu Herodes kisi ati-bron fu di a ben dyarusu. Disi ben abi leki bakapisi taki Yosef, Maria, nanga Yesus ben musu lowe go na Egepte. Boiti dati, Herodes meki sma kiri ala den manpikin na ini Betlehem „bigin fu tu yari go na ondro”. Den sani di Herodes ben kon yere fu den astrologiaman ben meki taki a ben kon sabi soifri o ten Yesus ben gebore (Mateyus 2:16). Furu problema ben kon fu di den man disi ben de na ini Betlehem. Fu dati ede wi kan taki nanga leti dati a stari di den ben si ben kon fu Gado feanti, Satan Didibri, di ben wani kiri Yesus. Wi kan taki a srefi sani tu fu a boskopu di den ben kisi, èn di ben taki fu „a sma di gebore leki kownu fu den Dyu”.—Mateyus 2:1, 2.