Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Fa a e sori fu de wan yepi te yu e gebroiki yu frustan fu man wai pasi gi problema? (Odo 1:4)

Te wi e gebroiki wi frustan, dan wi sa sabi soifri sortu sani kan pori a banti di wi abi nanga Gado. Wi sa sabi sosrefi san na a yoisti sani fu du fu man wai pasi gi tesi, fu eksempre te wi e kisi fu du nanga seks hurudu na wrokope. A e yepi wi fu si taki den Kresten brada nanga sisa fu wi no de volmaakti. Disi sa meki taki wi no sa de gaw fu du wan sani baka nanga den wan di e afrontu wi. Te yu e gebroiki yu frustan dan dati e yepi yu tu fu wai pasi gi a libi di sma e libi soso fu kon gudu. A sani disi kan meki taki yu no e poti so furu prakseri moro na a tru anbegi.—15/8, bladzijde 21-24.

• Fa wan sma kan abi winimarki fu di a de wan bun birtisma?

Tu fasi fa yu kan de wan bun birtisma na fu kweki a lobi fu gi sani na trawan èn fu warderi den sani di yu e kisi. A kan abi winimarki fu de wan bun birtisma te problema e opo kon. Yehovah Kotoigi e meki muiti fu de bun birtisma fu di den e gi sma a warskow taki heri esi Gado sa tyari wan kaba kon na ogridu.—1/9, bladzijde 4-7.

• Soleki fa a Bijbel e sori, dan suma na den trutru santawan, èn fa den sa yepi a libisma famiri?

Ala den fosi Kresten ben de trutru santawan. Nowan libisma organisâsi ben fruklari den santa, ma na Gado ben fruklari den santa (Romesma 1:7). Te den santawan kisi wan opobaka fu libi na ini hemel, dan makandra nanga Krestes den sa blesi den getrow wan di de na grontapu (Efeisesma 1:18-21).—15/9, bladzijde 5-7.

• San Kresten kan leri te den e luku a fasi fa den sma fu Grikikondre fu owruten ben e hori sportwega?

Na ini den sani di den apostel Petrus nanga Paulus skrifi, den ben gebroiki agersitori di abi fu du nanga den sportwega fu owruten (1 Korentesma 9:26; 1 Timoteyus 4:7; 2 Timoteyus 2:5; 1 Petrus 5:10). A ben de prenspari gi wan sportman fu owruten fu abi wan bun leriman, fu dwengi ensrefi, èn fu meki tranga muiti fu doro spesrutu marki. Wan Kresten na ini a ten disi musu du a srefi muiti efu a wani doro spesrutu yeye marki.—1/10, bladzijde 28-31.

• San na den problema nanga den blesi fu kweki pikin na ini wan tra kondre?

Furu pikin e leri wan nyun tongo moro esi leki den papa nanga mama. Den papa nanga mama kan feni en muilek fu frustan den firi fu den pikin noso fu frustan fu san ede den e du spesrutu sani. Kande a de wan muilek sani tu gi den pikin fu frustan den Bijbel leri na ini a tongo di a papa nanga mama fu den e taki. Ma a banti na ini a famiri kan kon moro tranga, te papa nanga mama e leri a tongo di den e taki, na den pikin fu den. Na so wan fasi den pikin sa sabi tu tongo èn den sa sabi difrenti gwenti.—15/10, bladzijde 22-26.

• Fu san ede a de prenspari fu leri fu aksi pardon?

Te wan sma e aksi pardon nanga en heri ati, dan dati furu tron e yepi fu meki taki tu sma di ben kisi trobi e meki en bun baka. Bijbel e sori wi sortu bun wan sma kan du te a e aksi pardon (1 Samuel 25:2-35; Tori fu den Apostel 23:1-5). Furu tron te tu sma no man feni en nanga makandra, dan a kan taki ala tu sma abi fowtu. Fu dati ede a de fanowdu taki ala tu sma e suku fu meki en bun baka nanga makandra èn e aksi makandra pardon.—1/11, bladzijde 4-7.

• Fu san ede dòbel no bun, srefi efu na gi pikinso moni nomo?

Bijbel e krutu dòbel fu di wan sma di e dòbel e prakseri ensrefi nomo, a e kisi a takru gwenti fu strei nanga trawan fu di a wani wini nomonomo, èn a e kisi bigi-ai (1 Korentesma 6:9, 10). Furu sma di no man tapu fu dòbel, ben bigin nanga a sani dati di den ben de pikin ete, fu di den ben bigin dòbel nanga pikinso moni nomo.—1/11, bladzijde 31.

• Furu buku fu Bijbel ben skrifi na ini Grikitongo. Fu san ede a ben de fanowdu dan, fu vertaal Bijbel na ini Grikitongo èn sortu bakapisi disi ben abi?

A disiten Grikitongo e difrenti furu fu a Grikitongo di sma ben gebroiki na ini a Griki Septuagintavertaling fu den Hebrew Buku fu Bijbel, èn sosrefi fu a Grikitongo fu den Kresten Griki Buku fu Bijbel. Na ini den yarihondro di pasa, wan tu sma ben pruberi fu vertaal wan pisi noso a heri Bijbel na ini a Grikitongo di sma ben gwenti fu taki na a pisi ten dati. Na ini a ten disi, moro leki 30 difrenti bijbelvertaling de fu a heri Bijbel noso fu wan pisi fu Bijbel. Moro furu fu den Grikisma man fu leisi den vertaling disi. Wan fu den Griki bijbelvertaling di de prenspari na a Nieuwe-Wereldvertaling van de Heilige Schrift (Nyun-Grontapuvertaling fu den Santa Buku fu Bijbel), di tyari kon na doro na ini 1997.—15/11, bladzijde 26-29.

• Fu san ede Kresten no abi fu pai a di fu tin pisi fu a moni fu den na kerki?

A marki fu a Wet di Israel fu owruten ben kisi, fu gi a di fu tin pisi fu den gudu fu den, ben de fu yepi a lo fu Leifi èn fu sorgu gi den wan di de na nowtu (Lefitikus 27:30; Deuteronomium 14:28, 29). A dede fu Yesus, di de leki wan srakti-ofrandi, ben tyari wan kaba kon na a Wet èn na a komando fu teki a di fu tin pisi fu den gudu fu sma (Efeisesma 2:13-15). Na ini a fosi Kresten gemeente a ben de so, taki ibri Kresten ben gi omeni a ben wani èn soleki fa a ben bosroiti na ini en ati (2 Korentesma 9:5, 7).—1/12, bladzijde 4-6.

• Te wi e leisi Openbaring 20:8, dan disi wani taki dati Satan o kori bun furu sma na a lasti tesi?

A tekst e taki dati den wan di Satan sa kori „de leki a santi fu a se”. Na ini Bijbel, dan furu tron a sani disi wani taki wan nomru di wi no sabi, èn a no e sori taki a de wan bun bigi nomru. A siri fu Abraham, di ben o de „leki den ai-santi di de na sekanti”, e sori fu de 144.000 sma (Genesis 22:17; Openbaring 14:1-4).—1/12, bladzijde 29.