A kisi blesi fu di a horidoro

Furu reti-ati sma wani taki den lobiwan fu den e kon leri sabi san Gado abi na prakseri, so taki den kan abi wan koloku libi. Te wan sma e gi ensrefi abra na Gado, dan a kan de so taki tra sma, yonguwan nanga owruwan sosrefi, yepi en fu teki a koni bosroiti disi, fu di den sma disi ben tyari densrefi na wan bun fasi. Na so a ben de nanga Jearim, wan meisje fu 15 yari di ben tan na ini Meksikow. Tapu wan Spesrutu Dei Konmakandra fu Yehovah Kotoigi a ben gi den brada a brifi disi:

„Mi wani taigi unu taki mi e prisiri èn taki mi e firi koloku. Meki mi fruteri unu fu san ede dati de so. Tina-aiti yari pasa, di mi no ben gebore ete, dan mi papa nanga mi mama kon leri sabi a waarheid. Mi mama go na fesi, èn bakaten mi nanga mi brada go na fesi tu. Wi alamala ben begi Yehovah so taki mi papa ben o go waka tu tapu a pasi fu libi. Tina-aiti yari pasa, èn tide na wan tumusi prenspari dei gi wi. Mi papa o teki dopu. Mi e taki Yehovah tangi fu di a no tyari wan kaba kon na a seti fu sani, bifo a momenti disi doro di wi ben wakti so langa. Grantangi Yehovah!”

Na ini den yari di pasa, a famiri fu a yongu meisje disi ben poti prakseri trutru na den gronprakseri di de fu feni ini a rai di Gado e gi wi na ini 1 Petrus 3:1, 2. Drape skrifi: „Un wefi, saka unsrefi na un eigi masra ondro, so taki efu sonwan fu den no e gi yesi na a wortu, dan a fasi fa den wefi fu den e tyari densrefi kan wini den sondro wan wortu, fu di den si fa unu ben tyari unsrefi na wan krin fasi makandra nanga bigi lespeki.” Iya a yongu meisje Jearim trutru ben du san den wortu fu Deuteronomium 5:16 e taki: „Gi grani na yu papa èn na yu mama, neleki fa Yehovah yu Gado komanderi yu fu du.” Jearim nanga en famiri kisi furu blesi trutru fu di den ben du san den gronprakseri disi e taki, èn fu di den ben wakti tapu Yehovah nanga pasensi.