Aksi fu leisiman

Omeni leisi na ini wan yari a Memrefesa fu a dede fu Krestes musu hori?

Paulus ben e poti prakseri na a seti fu a Memrefesa fu a dede fu Yesus, di a skrifi: „Bikasi alatem [ibri leisi, NWT], te oen njam vo disi brede, en te oen dringi vo disi beker, oen moe taki vo da dede vo Masra, tee hem srefi sa kom baka” (1 Korentesma 11:25, 26, Njoe Testament nanga dem Psalm). Son sma feni taki den musu memre a dede fu Krestes furu tron noso furu leisi. Dati meki den e du dati moro leki wán leisi wan yari. Na dati Paulus ben wani taki di a ben skrifi den wortu disi?

Pikinmoro 2000 yari pasa sensi Yesus seti a Memrefesa fu en dede. Sobun, efu a Memrefesa e hori wán leisi wan yari srefi, dan dati wani taki dati a hori furu leisi kaba sensi 33 G.T. Ma, den tekst krosibei fu 1 Korentesma 11:25, 26, e sori taki Paulus no ben e taki fu omeni leisi a Memrefesa musu hori, ma a ben e taki fu a fasi fa a Memrefesa musu hori. Na ini a Grikitongo fu fositen, Paulus no ben gebroiki a wortu pol·laʹkis, di wani taki „furu leisi” noso „furu tron”. Na presi fu dati, a gebroiki a wortu ho·saʹkis, di wani taki „ibri leisi te”, èn wan tra fasi fu taki dati na „ala leisi te”. Sobun, den wortu fu Paulus ben wani taki: ’Ala leisi te yu e du disi, dan yu e tan meki a dede fu Masra bekènti.’ *

Omeni leisi a Memrefesa fu a dede fu Yesus musu hori dan? A e fiti fu hori en wán leisi wan yari nomo. Fu taki en leti, a fesa disi e hori fu memre a dede fu wan sma, èn furu tron den sortu fesa disi e hori wán leisi wan yari. Boiti dati, Yesus ben dede tapu a dei fu a Dyu Paskafesa, di den ben e hori wán leisi wan yari. Dati meki a ben fiti di Paulus ben taki fu Yesus leki „Krestes di de a Paska fu wi”, fu di na ofrandi dede fu en ben opo a pasi gi a yeye Israel, so taki den ben kan kisi libi. Na a srefi fasi, a fosi Paska srakti-ofrandi ben hori den fosi geborewan fu den Israelsma na libi na ini Egepte, èn na ofrandi disi ben opo a pasi gi a pipel dati fu komoto na ini katibo (1 Korentesma 5:7; Galasiasma 6:16). Fu di a Memrefesa fu a dede fu Yesus èn na alayari Dyu Paskafesa abi furu fu du nanga makandra, meki dati na wan tra buweisi taki a Memrefesa fu a dede fu Yesus musu hori wán leisi nomo na ini wan yari.

Boiti dati, Paulus ben sori taki a dede fu Yesus abi furu fu du nanga wan tra Dyu fesa, namku, a Verzoendei. Na ini Hebrewsma 9:25, 26, wi e leisi: „A no e fiti tu, taki [Yesus] musu gi ensrefi furu tron leki ofrandi, neleki fa a granpriester trutru e go na ini a santa presi, yari go yari kon [tapu a Verzoendei] nanga brudu di no de fu ensrefi. . . . Ma now a ben sori ensrefi wán leisi fu ala ten, na a kaba fu den seti fu sani, fu puru sondu nanga yepi fu a srakti-ofrandi fu ensrefi.” Fu di na ofrandi fu Yesus kon na ini a presi fu a Verzoendei-ofrandi, meki a fiti taki a Memrefesa fu a dede fu Yesus e hori wán leisi wan yari. Bijbel no e sori taki Kresten musu hori a Memrefesa fu a dede fu Krestes moro leki wán leisi wan yari.

Akruderi a sani disi, a historia skrifiman John Laurence von Mosheim e taki dati den Kresten di ben libi na ini Pikin Asia na ini a di fu tu yarihondro, ben gwenti fu hori a Memrefesa fu a dede fu Yesus „tapu a di fu tinafo dei fu a fosi mun tapu a Dyu kalender [Nisan]”. A ben de furu yari baka dati, di a tron wan gwenti na ini a Krestendom fu hori a Memrefesa moro leki wán leisi wan yari.

[Futuwortu]