San kan yepi wi fu gebroiki a wortu fu waarheid na wan reti fasi?

WAN sma di e skrifi sani na ini koranti, ben abi a wroko fu luku komediprei èn fu taki wan sani fu den. Wan leisi a ben go luku wan spesrutu sortu komediprei. A no ben lobi a komediprei disi, èn bakaten a skrifi: „Efu yu wani si wan komediprei di no moi, di soi, dan disi na a komediprei di yu musu go luku.” Bakaten, den sma di ben orga a komediprei disi, ben tyari wan sani kon na doro fu hari sma fu go luku a prei disi. Ne den ben gebroiki den wortu fu a sma disi di ben skrifi na ini koranti. Den ben gebroiki den wortu: „Disi na a komediprei di yu musu go luku”! A sani disi ben de soifri leki san a sma fu a koranti ben taki, ma den ben puru den tra wortu di a sma ben taki, èn na so wan fasi den ben taki wan heri tra sani leki san a sma disi ben abi na prakseri fu taki.

Na eksempre disi e sori o prenspari a de fu hori na prakseri sosrefi san na den tra sani di wan sma taki noso skrifi. Te wan sma e puru wortu fu san wan sma taki, ma a no hori den tra wortu na prakseri tu, dan dati kan bruya a tori. Dati na soifri san Satan du di a ben gebroiki den Buku fu Bijbel fu kori Yesus, a ben bruya a tori fu di a gebroiki soso den wortu di ensrefi ben wani gebroiki (Mateyus 4:1-11). Na a tra sei, efu wan sma e gebroiki wan tu wortu fu wan tori, ma a e hori na prakseri san na den tra sani di taki tu noso di skrifi tu, dan dati kan yepi wi fu frustan a sani dati moro soifri. Fu dati ede, te wi e ondrosuku wan bijbeltekst, dan ala ten a de wan koni sani fu luku den tra vers lontu a tekst disi, so taki wi kan frustan moro soifri san a skrifiman ben wani taki.

Gebroiki a Wortu fu Gado na wan reti fasi

Efu wi e luku tu san wan sma skrifi noso taki, bifo noso baka a sani dati, dan furu tron a abi krakti tapu san a sma dati ben wani taki nanga a sani di a taki noso skrifi. Te wi e leisi wan tekst, dan a de tumusi prenspari fu luku san skrifi bifo noso baka a tekst dati. Dati de spesrutu so te wi e luku san Paulus ben skrifi gi Timoteyus, di a skrifi: „Du ala san yu man fu sori yusrefi leki wan sma di Gado feni bun, wan wrokoman di no abi fu syen fu noti èn di e gebroiki a wortu fu waarheid na wan reti fasi”  (2 Timoteyus 2:15). Efu wi wani gebroiki Gado Wortu na wan reti fasi, dan wi musu frustan en bun. Baka dati wi musu fruteri trawan soifri san skrifi drape. Efu wi e lespeki Yehovah leki a Gran Skrifiman fu Bijbel, dan dati sa pusu wi fu pruberi fu du a sani disi. Efu wi e poti prakseri na den vers di skrifi lontu wan spesrutu tekst, dan dati kan de wan prenspari sani fu yepi wi nanga disi.

Den sani di meki taki Paulus ben skrifi a di fu Tu brifi gi Timoteyus

Fu eksempre, meki wi ondrosuku a di fu Tu brifi gi Timoteyus, soleki fa dati skrifi na ini Bijbel. * Fu bigin ondrosuku a brifi disi, dan wi kan aksi wisrefi difrenti sani. Suma ben skrifi a brifi disi gi Timoteyus? O ten a ben skrifi en? San ben de a situwâsi? Baka dati wi kan aksi wisrefi: Fa a ben de nanga a sma di nen „Timoteyus” di kari na a bigin fu a brifi disi? Fu san ede a ben abi a brifi disi fanowdu? Efu wi man feni den piki tapu den aksi disi, dan dati sa meki wi kisi bun furu warderi gi a brifi disi, èn dati sa meki wi si tu fa wi kan nyan bun fu a brifi disi noyaso.

Den fosi vers fu a brifi disi e sori taki na apostel Paulus ben skrifi a brifi disi gi Timoteyus. Tra vers e sori taki di Paulus ben skrifi a brifi disi, dan a ben e pina na strafu-oso fu di a preiki a bun nyunsu. Fu di furu sma ben gowe libi en, meki Paulus ben firi sosrefi taki en ten ben doro fu dede (2 Timoteyus 1:15, 16; 2:8-10; 4:6-8). Fu dati ede, a musu de so taki Paulus ben skrifi a brifi fu en di a ben de na strafu-oso na Rome, a di fu tu leisi. Soleki fa a sori, dan dati ben de na ini a yari 65 G.T. Heri esi baka dati, a kan taki Nero ben gi Paulus dedestrafu.

Disi na wan tu sani di abi fu du nanga a di fu Tu brifi gi Timoteyus. Toku, a bun fu luku taki Paulus no ben skrifi Timoteyus fu kragi fu den problema di ben miti en. Na presi fu dati, a ben warskow Timoteyus gi den tranga ten di ben de na en fesi, èn Paulus ben gi en mati deki-ati fu no meki tra sani hari en prakseri, ma fu tan „kisi krakti”, èn fu tan leri trawan den sani di Paulus ben taigi en. Fu den sei, dan den sma disi ben o kon koni nofo fu yepi trawan baka (2 Timoteyus 2:1-7). Fu tru, wan moi eksempre fu wan sma di no ben prakseri ensrefi nomo, ma di ben hori trawan na prakseri, srefi na ini muilek ten! Dati na moi rai sosrefi gi wi noyaso!

Paulus ben kari Timoteyus, „wan lobi pikin” (2 Timoteyus 1:2). Furu tron den Kresten Griki Buku fu Bijbel e sori taki a yonkuman disi ben de wan getrow mati fu Paulus (Tori fu den Apostel 16:1-5; Romesma 16:21; 1 Korentesma 4:17). Di Paulus ben skrifi a brifi disi gi Timoteyus, dan a gersi leki Timoteyus no ben doro 40 yari ete, èn fu dati ede sma ben kan kari en wan yonkuman ete (1 Timoteyus 4:12). Ma toku sma ben sabi en heri bun leki wan man di ben de getrow, fu di ’a ben wroko leki wan srafu makandra nanga Paulus’ kande sowan 14 yari kaba (Filipisma 2:19-22). Aladi Timoteyus ben yongu ete, toku Paulus ben gi en a frantwortu fu gi tra owruman rai fu den no „haritaki nanga makandra fu wortu”, ma fu poti ala den prakseri na prenspari sani, soleki bribi èn horidoro (2 Timoteyus 2:14). Timoteyus ben kisi a frantwortu fu poti owruman èn sosrefi dinari ini a diniwroko, na wroko na ini den gemeente (1 Timoteyus 5:22). Ma toku, a kan taki ensrefi no ben firi taki a koni nofo fu man du den sortu wroko disi bun.—2 Timoteyus 1:6, 7.

A yongu owruman ben kisi fu du nanga wan tu seryusu problema di a ben musu lusu. Wan fu den problema dati ben de taki tu man, Himeneyus nanga Fileitus, ben e meki „taki son sma lasi bribi”, fu di den ben e leri sma taki ’na opobaka pasa kaba’ (2 Timoteyus 2:17, 18). Soleki fa a sori, dan den ben bribi taki a wan-enkri opobaka di sma o kisi ben o de na yeye fasi èn taki Kresten ben kisi na opobaka dati kaba. Kande den ben teki den wortu di Paulus ben taki di a taigi den Kresten dati den ben dede na ini den sondu, ma taki den ben kon na libi baka nanga yepi fu Gado en yeye. Ma den no ben kari den tra sani di Paulus ben taki tu (Efeisesma 2:1-6). Paulus ben warskow taki den sortu krakti disi fu sma di fadon komoto na bribi, ben o kon moro tranga srefi. A ben skrifi: „Wan ten o kon taki den no sa frudrage a bun leri [moro], . . . den no sa wani arki a waarheid, ma den o arki leitori” (2 Timoteyus 4:3, 4). A warskow disi di Paulus ben gi na fesi kaba, ben sori taki a  ben prenspari srefisrefi taki Timoteyus ben musu bigin gi yesi na a rai fu na apostel.

A brifi disi warti gi wi na ini a ten disi

Fu den sani di wi ben taki fu den didyonsro, wi kan si fu san ede Paulus ben skrifi a brifi disi gi Timoteyus: (1) A ben sabi taki heri esi a ben o dede, èn a ben suku fu sreka Timoteyus gi a ten di en, Paulus, no ben o de na libi moro fu horibaka gi Timoteyus. (2) A ben wani sreka Timoteyus so taki a ben kan kibri den gemeente di ben de ondro a tiri fu en, gi den leri fu sma di fadon komoto na bribi èn sosrefi gi tra ogri krakti. (3) A ben wani gi Timoteyus deki-ati fu a tan abi furu fu du na ini a diniwroko fu Yehovah, èn fu frutrow tapu a soifri sabi di a ben abi fu den Buku fu Bijbel so taki a ben kan tanapu kánkan teige falsi leri.

Efu wi e frustan fu san ede Paulus ben skrifi a di fu Tu brifi disi gi Timoteyus, dan dati e meki taki a brifi disi wani taki moro gi wi. Na ini a ten disi wi abi sma sosrefi di fadon komoto na bribi neleki Himeneyus nanga Fileitus. Den wan disi wani hori densrefi tu na san densrefi e denki èn den ben sa wani fu pori a bribi fu wi. Boiti dati, dan den „muilek ten di tranga fu pasa” de kaba, neleki fa Paulus ben taki na fesi tu. Furu sma ondrofeni taki a tru san Paulus ben warskow, di a taki: „Sma sa frufolgu ala den wan di wani dini Gado fayafaya èn di de wán nanga Krestes Yesus” (2 Timoteyus 3:1, 12). Fa wi kan tanapu kánkan? Neleki Timoteyus, wi musu teki rai fu sma di dini Yehovah furu yari kaba. Te wi e studeri, e begi, èn e tan abi demakandra nanga tra Kresten, dan wi kan „tan kon moro tranga” nanga yepi fu a bun-ati di Yehovah e gi wi. Boiti dati, wi sabi taki a soifri sabi abi krakti. Dati meki wi kan teki a rai di Paulus e gi: „Teki leki eksempre den bun sani [di mi ben taigi yu] èn hori yusrefi na dati.”—2 Timoteyus 1:13.

’Na eksempre fu bun sani di taki’

San na den ’bun sani di taki’ soleki fa Paulus ben sori? A ben gebroiki den wortu dati fu sori go na a tru Kresten leri. Na ini en fosi brifi gi Timoteyus, dan Paulus ben tyari kon na krin taki ’den bun sani di taki’, te yu luku en bun, na ’den sani fu wi Masra Yesus Krestes’ (1 Timoteyus 6:3). Te wan sma e teki den bun sani disi di taki, dan a e kisi wan krin denki, a e kon lobi trawan, èn a e hori trawan na prakseri. Fu di a diniwroko fu Yesus nanga den sani di a ben e leri sma, ben de soifri leki ala tra sani di Bijbel e leri wi, meki ’den bun sani di taki’ kan sori go na ala sani di Bijbel e leri wi.

Gi Timoteyus, èn sosrefi gi ala Kresten owruman, den bun sani di taki na wortu di de leki „wan tumusi bun panti” di den musu kibri bun (2 Timoteyus 1:13, 14). Timoteyus ben musu „preiki a wortu”, èn a ben musu „du disi leki wan sani di musu du wantewante na ini bun ten, na ini muilek ten”, sosrefi a ben musu „frumane sma, warskow den èn gi den deki-ati, nanga furu langa pasensi èn nanga a koni fu gi sma leri” (2 Timoteyus 4:2). Te wi e frustan taki den leri fu sma di fadon komoto na bribi ben panya go na ala sei na ini a ten fu Timoteyus, dan wi e frustan sosrefi fu san ede Paulus ben poti krakti na tapu taki a de tumusi prenspari fu leri sma den bun sani di taki. Wi e frustan tu taki Timoteyus ben musu kibri na ipi, fu di a ’ben o frumane sma, a ben o warskow den, èn ben o gi deki-ati’ nanga langa pasensi, èn na so fasi a ben o sori taki a abi moi fasi fu gi leri.

Gi suma Timoteyus ben musu preiki a wortu? Den vers lontu a tekst dati e sori taki Timoteyus leki wan owruman ben sa musu preiki a wortu na ini a Kresten gemeente. Timoteyus ben musu hori na prakseri taki gensman ben de di abi krakti na tapu sma. Fu dati ede Timoteyus ben musu hori ensrefi na den bun sani di a ben leri fu a Wortu fu Gado èn a ben musu meki dati fayafaya bekènti; a no ben musu preiki den leri fu libisma, noso san ensrefi ben denki, noso soso sani di tra sma e denki. A tru taki disi ben kan meki taki son sma di ben  abi wan fowtu denki ben kan gens en (2 Timoteyus 1:6-8; 2:1-3, 23-26; 3:14, 15). Toku, efu Timoteyus ben o teki a rai fu Paulus, dan a ben o tan neleki wan skotu gi sma di fadon komoto na bribi, neleki fa Paulus srefi ben de dati.—Tori fu den Apostel 20:25-32.

A de so taki den wortu fu Paulus fu preiki a wortu, abi fu du sosrefi nanga a preiki di wi e preiki gi tra sma boiti a gemeente? Iya, soleki fa den tra vers lontu a tekst e sori, dan dati de so. Paulus e taki moro fara: „Ma no meki den sani disi bruya yu, nyan pina, du a wroko fu wan sma di musu preiki a bun nyunsu, du a diniwroko fu yu dorodoro” (2 Timoteyus 4:5). A wroko fu preiki a bun nyunsu fu frulusu gi sma di no de na bribi, na a moro prenspari wroko di Kresten musu du (Mateyus 24:14; 28:19, 20). Èn neleki fa a wortu fu Gado e preiki na ini a gemeente srefi na ini „muilek ten”, na so wi e horidoro fu preiki a wortu gi tra sma di no de na ini a gemeente, srefi te a situwâsi muilek srefisrefi.—1 Tesalonikasma 1:6.

Ala sani di wi e preiki èn di wi e leri tra sma, komoto fu a Wortu fu Gado di A meki sma skrifi nanga yepi fu en santa yeye. Wi e poti ala wi frutrow na ini Bijbel. Paulus ben taigi Timoteyus: „Na Gado srefi ben meki sma skrifi ala den Santa Buku; den bun fu gi leri, fu frumane wi, fu poti sani kon reti, fu kweki wi na wan regtfardiki fasi” (2 Timoteyus 3:16). Furu tron wi e gebroiki den wortu disi na wan reti fasi fu sori trawan taki Bijbel na a Wortu fu Gado trutru. Ma fu san ede Paulus ben skrifi den wortu disi dan?

Paulus ben taki nanga wan owruman, wan man di ben abi a frantwortu fu ’frumane sma, fu poti sani kon reti, fu kweki trawan na wan regtfardiki fasi’ na ini a gemeente. Fu dati ede, Paulus ben memre Timoteyus fu frutrow tapu a koni fu a Wortu di Gado meki sma skrifi, a Wortu di Timoteyus ben kisi fu leri sensi en pikin-nengreten. Neleki Timoteyus, dan sontron, owruman musu frumane sma di meki wan fowtu. Te den owruman e du disi, dan ala ten den musu frutrow tapu Bijbel. Boiti dati, fu di na Gado srefi ben meki sma skrifi ala den Santa Buku, dan dati meki ala frumane di e komoto fu den Santa Buku disi, na frumane di e komoto fu Gado trutru. Efu wan sma no e teki den frumane di e komoto fu Bijbel, dan a no e teki rai di e kon fu libisma nomo, ma a no e teki rai di e komoto fu Yehovah srefi.

Fu tru a di fu Tu brifi fu Timoteyus lai nanga furu koni fu Gado! Èn fu tru, wi e frustan a brifi disi moro bun tu te wi e luku san den tra pisi fu a brifi abi fu du nanga a pisi di wi e luku! Na ini na artikel disi wi luku syatu nomo san na wan tu kefalek moi sani di wi kan feni na ini a brifi disi. Ma san wi luku de nofo fu sori taki a de wan yepi fu no luku wan vers noso wan pisi nomo fu den sani di wi e leisi na ini Bijbel, ma fu luku den tra vers noso den tra pisi tu di abi fu du nanga a vers noso a pisi dati. Te wi e du so, dan disi sa yepi wi fu sorgu taki ala ten wi e „gebroiki a wortu fu waarheid na wan reti fasi”.

[Futuwortu]

[Prenki na tapu bladzijde 27]

Paulus ben wani srefisrefi fu gi Timoteyus nofo koni fu a kan kibri den gemeente

[Prenki na tapu bladzijde 30]

Paulus ben memre Timoteyus fu frutrow tapu a koni fu a Wortu di komoto fu Gado