„Tan na ai”!
„Tan na ai”!
„San mi e taigi unu, mi e taigi ala sma: Tan na ai.”—Markus 13:37.
1, 2. (a) San wan man ben leri fu a fasi fa a musu kibri den gudu fu en? (b) Fa na agersitori di Yesus ben fruteri fu wan fufuruman, e leri wi fu tan na ai?
WAN man di nen Juan ben e kibri ala den warti sani fu en na ini oso. A ben e poti den na ondro en bedi fu di a ben prakseri taki dati ben de a moro bun presi fu kibri den. Ma wan neti di en nanga en wefi ben e sribi, dan wan fufuruman kon na ini a sribikamra. Soleki fa a sori, dan a fufuruman ben sabi soifri pe a ben musu luku fu man feni den gudu. Sondro fu meki babari a puru ala den warti sani di ben de na ondro a bedi. A puru a moni di Juan ben poti na ini wan la fu a tafra na sei en bedi. A tra mamanten Juan ben si taki fufuruman tyari ala den gudu gowe. A noiti no sa frigiti a tumusi hati sani disi di a ben leri: Wan man di e sribi no man hori wakti fu kibri den gudu fu en.
2 Na so a de tu nanga yeye afersi. Efu wi fadon na sribi na yeye fasi, dan wi no man sorgu taki wi no lasi wi howpu nanga bribi. Fu dati ede Paulus e gi a rai: „Meki wi no sribi soleki fa den tra sma e sribi, ma meki wi tan na ai èn meki wi hori wisrefi” (1 Tesalonikasma 5:6). Fu sori o prenspari a de fu tan na ai, dan Yesus ben gebroiki na eksempre fu wan fufuruman. A ben taki fu den sani di ben o pasa bifo a ben o kon leki Krutuman. Baka dati a warskow: „Fu dati ede, tan na ai bika unu no sabi sortu dei un Masra o kon. Ma wán sani unu musu sabi, taki efu a masra fu na oso ben sabi sortu yuru a fufuruman ben o kon, dan a ben o tan na ai èn a no ben o meki sma broko kon na ini en oso. Dati meki unu musu de srekasreka tu, bika a Manpikin fu libisma o kon na wan yuru di unu no ben prakseri” (Mateyus 24:42-44). Wan fufuruman no e fruteri wan sma na fesi o ten a o kon fufuru. A e howpu taki a kan doro na wan momenti di nowan sma e fruwakti en. Na so Yesus ben taki tu dati a kaba fu a seti fu sani disi sa kon na ’wan yuru di wi no fruwakti’.
„Tan na ai, tanapu kánkan na ini a bribi”
3. Fa Yesus ben sori o prenspari a de fu tan na ai, di a ben fruteri na agersitori fu srafu di e wakti a masra fu den di musu drai kon baka fu wan trowfesa?
3 Soleki fa na Evangelie fu Lukas e tyari kon na fesi, dan Yesus ben teki Kresten gersi nanga srafu di e wakti a masra fu den, di musu drai kon baka fu wan trowfesa. Den no musu fadon na sribi, ma den musu tan na ai fu man gi en wan switi kon te a doro na oso. Na a srefi fasi Yesus ben taki: „A Manpikin fu libisma e kon na wan yuru di unu no denki” (Lukas 12:40). Son sma di e dini Yehovah someni yari kaba, kan frigiti na ini sortu ten wi e libi. Kande den e bigin prakseri srefi taki a kaba no e kon ete. Ma den sortu denki dati ben kan puru wi prakseri na yeye afersi. Den ben kan meki taki wi go poti prakseri na gudu nomo; a sani disi kan hari wi prakseri na so wan fasi taki wi kan fadon na sribi na yeye fasi.—Lukas 8:14; 21:34, 35.
4. Sortu overtoigi sa yepi wi fu tan na ai? Fa Yesus ben sori dati?
4 Ete wan sani de di wi kan leri fu na agersitori fu Yesus. Aladi den srafu no ben sabi a yuru di a masra fu den ben o kon, toku a sori leki den ben sabi a neti di a ben o kon. A no de fu taki dati a ben sa moro hebi gi den fu tan na ai a heri neti, efu den ben sabi taki a masra fu den ben kan kon na wan tra neti tu. Ma nôno, den ben sabi a neti di a ben o kon. Dati ben gi den a deki-ati fu tan na ai. Na wan srefi sortu fasi, den profeititori fu Bijbel e sori krin taki wi e libi na ini a ten fu a kaba; ma den no e fruteri wi san na a dei noso a yuru di a kaba o kon (Mateyus 24:36). Fu di wi e bribi taki a kaba e kon, meki dati e yepi wi fu tan na ai. Ma efu wi abi na overtoigi taki a dei fu Yehovah de krosibei trutru, dan dati e gi wi moro deki-ati fu tan na ai.—Sefania 1:14.
5. Fa wi kan gi yesi na a kari di Paulus gi wi fu „tan na ai”?
5 Na ini wan brifi di Paulus ben seni gi a gemeente na Korente, a ben gi a deki-ati disi: „Tan na ai, tanapu kánkan na ini a bribi” (1 Korentesma 16:13). Iya, efu wi wani tan na ai, dan wi musu tanapu kánkan na ini a Kresten bribi. Fa wi kan tan na ai? Fu di wi e kon kisi moro soifri sabi fu a Wortu fu Gado (2 Timoteyus 3:14, 15). Wi bribi e kon moro tranga te wi abi a bun gwenti fu studeri èn fu de doronomo na den konmakandra. Iya, wan prenspari sani di abi fu du nanga a bribi fu wi, na taki wi musu hori a dei fu Yehovah bun na prakseri. Sobun, te wi e luku den buweisi ten na ten di de fu feni na ini Bijbel, di e sori taki wi e libi na a kaba pisi fu a seti fu sani disi, dan dati sa yepi wi fu no frigiti den prenspari tru tori di abi fu du nanga a kaba di e kon. * A bun tu efu wi poti prakseri na den sani di e pasa na grontapu, leki wan kontru fu Bijbel profeititori. Wan brada na ini Doisrikondre ben skrifi: „Ibritron te mi e luku nyunsu, te mi e si den orloku, den gronseki, na ogridu, nanga a fasi fa sma e doti grontapu, dan dati e meki mi frustan krinkrin o krosibei a kaba de trutru.”
6. Nanga yepi fu sortu agersitori Yesus ben sori wi taki son leisi wi e firi taki wi wani sribi na yeye fasi, baka wan pisi ten?
6 Na ini Markus kapitel 13, wi e feni ete wan tori di Yesus ben fruteri fu gi wi leki bakaman fu en a deki-ati fu tan na ai. Soleki fa a kapitel disi e taki, Yesus e agersi a situwâsi fu den nanga a di fu wan waktiman di de na a doro e wakti a masra fu en, di musu drai kon baka fu wan langa waka di a ben teki go na wan tra kondre. A waktiman disi no ben sabi a yuru di en masra ben o kon na oso. A ben abi fu tan na ai nomo. Yesus ben sori go na fo difrenti pisi ten fu a neti di a masra ben kan kon na oso. A di fu fo pisi ten fu a neti, ben de fu dri yuru mamanten te go miti a ten di son e opo. Na a lasti pisi ten dati fu a neti, a no de fu taki dati a waktiman ben firi taki a wani sribi. Dati meki sma e taki dati srudati feni taki a moro bun yuru fu kisi wan feanti sondro fu a fruwakti yu, na a pisi ten bifo dei broko. Na so a de tu taki a kan de wan bigi tyalensi gi wi fu tan na ai na a kaba pisi fu den lasti dei disi, te a heri grontapu lontu wi e sribi bun dipi na yeye fasi (Romesma 13:11, 12). Dati meki na difrenti okasi na ini na agersitori fu en, Yesus gi sma a deki-ati: „Tan luku, tan na ai, . . . Fu dati ede, tan na ai . . . San mi e taigi unu, mi e taigi ala sma: Tan na ai.”—Markus 13:32-37.
7. Sortu bigi problema wi kan kisi? Sortu deki-ati Bijbel e gi wi furu tron fu dati ede?
7 Na furu okasi na ini a diniwroko fu en, ma sosrefi baka di a kisi wan opobaka, Yesus gi sma deki-ati fu de na ai. Te yu luku en bun, dan pikinmoro ibri leisi te den Buku fu Bijbel e taki fu a kaba fu a seti fu sani disi, dan wi e leisi wan warskow fu tan na ai * (Lukas 12:38, 40; Openbaring 3:2; 16:14-16). A de krin taki wan sma kan kisi bigi problema efu a firi taki a wani sribi na yeye fasi. Wi alamala abi den warskow dati fanowdu!—1 Korentesma 10:12; 1 Tesalonikasma 5:2, 6.
Dri apostel di no ben man tan na ai
8. San dri fu den apostel fu Yesus ben du di a ben aksi den fu tan na ai makandra nanga en na ini a dyari fu Getsemane?
8 Te wi wani tan na ai, dan dati e aksi moro fu wi leki a wani di wi no wani sribi nomo, soleki fa na eksempre fu Petrus, Yakobus nanga Yohanes e sori. Den man disi ben de dri man di ben lobi Gado. Den ben horibaka gi Yesus na ini ala sani, sosrefi den ben lobi en srefisrefi. Toku den no ben man tan na ai na a neti fu 14 Nisan, 33 G.T. Di den komoto na a tapusei kamra pe den ben hori a Paskafesa, dan den dri apostel disi ben go nanga Yesus na a dyari fu Getsemane. Drape Yesus ben taigi den: „Mi e sari trutru, srefi te fu dede. Tan dya èn un musu tan na ai nanga mi” (Mateyus 26:38). Dri leisi Yesus ben begi fayafaya na en hemel Tata. Dri leisi a drai go baka fu luku den mati fu en. Ma ala den dri leisi dati a ben si taki den ben e sribi.—Mateyus 26:40, 43, 45.
9. San ben e meki kande taki sribi ben e kiri den apostel?
9 Fu san ede den man disi di ben horibaka gi Yesus na wan getrow fasi, no ben man du san Yesus ben e aksi fu den na a neti dati? We, a skin fu den ben weri. A ben lati kaba. Soleki fa a sori, dan mindrineti ben pasa kaba. A no de fu taki dati „sribi ben [e] kiri den” (Mateyus 26:43). Toku Yesus ben taki: „Un musu tan na ai èn begi doronomo, so taki unu no sa kisi tesi. A tru taki a yeye wani, ma a skin swaki.”—Mateyus 26:41.
10, 11. (a) San ben yepi Yesus fu tan na ai na ini a dyari fu Getsemane, aladi a ben weri so? (b) San wi kan leri fu a sani di pasa nanga den dri apostel, di Yesus ben aksi den fu tan na ai?
10 A no de fu taki dati Yesus srefi ben weri tu na a prenspari neti dati. Ma na presi fu fadon na sribi, a ben begi fayafaya na den tumusi prenspari lasti momenti dati, di a ben fri ete. Wan tu dei na fesi, a ben gi den bakaman fu en deki-ati fu begi, di a ben taigi den: „Fu dati ede, tan na ai èn begi ala ten taki unu man lowe komoto gi ala den sani di musu pasa, èn taki unu kan tanapu na fesi a Manpikin fu libisma” (Lukas 21:36; Efeisesma 6:18). Efu wi gi yesi na a rai di Yesus ben gi, aladi wi e teki a bun eksempre fu en ini a tori fu begi, dan den fayafaya begi fu wi na Yehovah di komoto na ini wi ati sa yepi wi fu tan na ai na yeye fasi.
11 A no de fu taki dati Yesus ben frustan bun taki heri esi sma ben o tyari en go sroto èn taki den ben o kiri en. Ma den disipel fu en no ben man frustan dati ete. Den tesi fu en ben o doro wan heimarki te a ben o dede na wan ogri-ati fasi baka di sma ben o anga en na a pina-udu. Yesus ben warskow den apostel fu en gi den sani disi, ma den no ben e frustan san a ben taigi den. Dati meki den ben fadon na sribi, aladi a ben tan na ai fu begi (Markus 14:27-31; Lukas 22:15-18). Wi de neleki den apostel dati, fu di wi skin swaki tu. Wi sabi sosrefi taki sani de di wi no sabi ete. Ma efu wi ben sa frigiti o prenspari a ten de pe wi e libi na ini, dan wi kan fadon na sribi na yeye fasi. Wi sa man tan na ai soso te wi poti prakseri trutru na den sani di e pasa lontu wi.
Dri prenspari fasi di wan sma musu abi
12. Sortu dri fasi di Paulus e kari, de tranga fanowdu efu wi wani tan na ai?
12 San kan yepi wi fu hori bun na praskeri na ini sortu ten wi e libi? Wi si kaba o prenspari a de fu begi. Wi si sosrefi taki wi musu tan hori a dei fu Yehovah bun na prakseri. Ma boiti dati, Paulus e kari dri prenspari fasi di wi musu abi. A taki: „Ma wi di de fu a dei, meki wi hori wisrefi èn meki wi abi bribi nanga lobi, neleki te wi ben sa weri wan sani di e tapu a borsu; meki wi abi a howpu tu taki wi o kisi frulusu” (1 Tesalonikasma 5:8). Meki wi luku syatu o prenspari a de fu abi bribi, howpu nanga lobi te wi wani tan na ai na yeye fasi.
13. Fa bribi e yepi wi fu tan na ai?
13 Wi musu abi a tranga bribi taki Yehovah de trutru. Wi musu bribi sosrefi taki „a e tron a sma di e pai den wan di e suku en seryusu” (Hebrewsma 11:6). A profeititori fu Yesus di ben abi fu du nanga a ten fu a kaba, ben abi en fosi kontru na ini a fosi yarihondro. A kontru fu a profeititori disi e tranga a bribi fu wi na ini a moro bigi kontru fu en, na ini wi ten. A bribi fu wi e meki taki wi e tan fruwakti a dei fu Yehovah, aladi wi e hori na prakseri taki „[a fisyun fu a profeititori] sa kon tru sondro fu misi. A no sa kon lati.”—Habakuk 2:3.
14. Na sortu fasi a howpu di wi abi prenspari fu man tan na ai?
14 A tranga howpu fu wi de leki wan „ankra gi a sili” di e meki taki wi man horidoro te wi abi problema, srefi efu wi abi fu wakti teleki den pramisi fu Gado kon tru (Hebrewsma 6:18, 19). Margaret, wan salfu sisa di pasa 90 yari, ben dopu sowan 70 yari pasa. A sisa dati e taki: „Di mi masra ben e dede fu kanker na ini 1963, dan mi ben firi leki a ben o bun efu a kaba ben kan kon esi-esi. Ma now mi e si taki na a momenti dati mi ben e prakseri misrefi nomo. Na a ten dati wi no ben abi nowan prakseri srefi o furu wroko ben o du ete na grontapu, na ini a ten di ben de na wi fesi. Srefi na ini a ten disi, furu presi de pe a preikiwroko bigin no so langa ete. Sobun, mi breiti taki Yehovah ben hori pasensi.” Na apostel Paulus e gi wi a dyaranti: „Horidoro e meki taki Gado feni wi bun, te Gado feni wi bun, dan dati e meki wi kisi howpu, èn a howpu no e meki wi lasi-ati.”—Romesma 5:3-5.
15. Fa lobi o gi wi deki-ati fu go doro, awinsi a sori leki wi e wakti langa ten kaba?
15 Kresten lobi na wan tumusi moi fasi fu di a abi fu du nanga ala sani di wi e du. Wi e dini Yehovah bikasi wi lobi en, awinsi wi no sabi o ten a sa du san a abi na prakseri. A lobi di wi abi gi tra sma e gi wi deki-ati fu preiki a bun nyunsu fu a Kownukondre, awinsi o langa Gado wani taki wi musu go doro nanga dati, iya, awinsi omeni leisi wi abi fu drai go baka na den srefi oso. Soleki fa Paulus ben skrifi, dan „bribi, howpu, lobi, [e] tan abra; ma a moro bigiwan fu den na lobi” (1 Korentesma 13:13). Lobi e meki taki wi e tan go doro, a e yepi wi fu tan na ai. „[Lobi] e howpu ala sani, e teki ala sani. Lobi no e misi noiti.”—1 Korentesma 13:7, 8.
„Tan hori tranga na san yu abi”
16. Sortu fasi wi musu suku fu kon abi, na presi fu go du wi diniwroko moro safri?
16 Wi e libi na ini tumusi prenspari ten, pe den sani di e pasa na grontapu e memre wi doronomo taki wi e libi na ini a kaba pisi fu den lasti dei (2 Timoteyus 3:1-5). Now a no a ten fu go du wi diniwroko moro safri, ma disi na a ten di wi musu ’tan hori tranga na san wi abi’ (Openbaring 3:11). Te wi „de na ai ini a tori fu begi”, te wi du muiti fu kisi bribi, howpu, nanga lobi, dan dati sa meki taki wi sa de srekasreka gi iniwan tesi di o miti wi (1 Petrus 4:7). Wi abi furu fu du na ini a wroko fu Masra. Te wi e tan du muiti fu dini Gado na wan getrow fasi, dan dati sa yepi wi fu tan na ai.—2 Petrus 3:11.
17. (a) Fu san ede wi no musu lasi-ati fu di den sani di wi e howpu na tapu no kon tru ete? (Luku a faki na bladzijde 21.) (b) Fa wi kan de leki Yehovah? Sortu blesi den wan di e du a muiti dati, sa kisi?
17 „Yehovah na mi porsi”, na so Yeremia ben skrifi, „dati meki mi sa sori taki mi e wakti en. Yehovah bun gi a sma di e howpu na en tapu. A bun sosrefi gi a sili di e tan suku en. A bun taki wan sma musu wakti, iya sondro fu taki wan sani, tapu a frulusu di e kon fu Yehovah” (Kragisingi 3:24-26). Son wan fu wi no wakti so langa ete. Trawan wakti someni yari kaba fu si a frulusu fu Yehovah. Ma toku a pisi ten disi di wi e wakti, syatu srefisrefi te yu teki dati gersi nanga a têgo libi di de na wi fesi! (2 Korentesma 4:16-18) Aladi wi e wakti tapu a reti ten fu Yehovah, wi kan kweki prenspari Kresten fasi. Wi kan yepi trawan sosrefi fu kisi wini fu a pasensi fu Yehovah, so taki den kan teki a tru anbegi. Fu dati ede, meki wi alamala tan na ai. Meki wi sori a srefi pasensi di Yehovah e sori, aladi wi de nanga tangi na ati gi a howpu di a gi wi. Meki a de so tu taki wi tan hori steifi na a howpu di wi abi fu kisi têgo libi, aladi wi e tan na ai na wan getrow fasi. Efu wi du dati, dan den profeiti wortu disi sa kon tru gi wi sosrefi: „[Yehovah] sa hei yu so taki yu kan kisi grontapu. Te den sa koti na ogriwan puru, dan yu sa si disi.”—Psalm 37:34.
[Futuwortu]
^ paragraaf 5 Kande a ben o bun fu luku syatu baka san na den siksi buweisi di wi abi taki wi e libi now na ini „den lasti dei”. Den buweisi disi de fu feni na bladzijde 12-13 fu A Waktitoren fu 15 yanuari 2000.—2 Timoteyus 3:1.
^ paragraaf 7 Di W. E. Vine, wan skrifiman fu wortubuku, ben fruklari a Griki wortu di sma vertaal nanga „tan na ai”, dan a ben sori taki a Griki wortu disi wani taki trutru ’fu lon na baka sribi fu meki a lowe gowe’. A Griki wortu dati „no wani taki nomo taki wan sma no musu sribi, ma a wani taki dati a sma e tan na ai fu di a e fruwakti wan sani di musu pasa .”
San yu ben sa piki?
• Fa wi kan meki na overtoigi di wi abi taki a kaba fu a seti fu sani disi de krosibei, kon moro tranga?
• San wi kan leri fu na eksempre fu Petrus, Yakobus, nanga Yohanes?
• Sortu dri fasi wi musu abi di sa yepi wi fu tan na ai na yeye fasi?
• Fu san ede disi na a ten fu ’tan hori tranga na san wi abi’?
[Aksi fu a tori disi]
[Faki/Prenki na tapu bladzijde 21]
’Koloku fu a sma di e tan fruwakti en.’—Danièl 12:12
Pruberi fu si disi na yu fesi. Wan waktiman e prakseri taki wan fufuruman o broko kon na ini a presi pe a e hori wakti. Te neti doro, dan a waktiman dati e arki nanga ala en prakseri fu luku efu a o yere wan pikin babari di kan sori taki a fufuruman kon. Someni yuru baka makandra a e span ensrefi fu si efu a o yere noso si wan sani. A makriki fu si fa a babari fu winti di e wai na mindri wan tu bon, noso fu wan pusipusi di naki wan sani trowe, kan kori a man disi fu prakseri taki a yere a fufuruman.—Lukas 12:39, 40.
Wan srefi sortu sani kan pasa nanga den wan di e „wakti fayafaya tapu a tyari di wi Masra Yesus Krestes musu tyari kon na krin” (1 Korentesma 1:7). Den apostel ben e prakseri taki Yesus ben o seti ’a kownukondre gi Israel baka’, na a ten di a ben o kisi wan opobaka (Tori fu den Apostel 1:6). Furu yari baka dati, a ben de fanowdu fu memre den Kresten na ini Tesalonika taki a denoya fu Yesus ben de wan sani di ben musu kon ete (2 Tesalonikasma 2:3, 8). Toku den fosi bakaman fu Yesus no ben e meki taki falsi fruwakti di ben abi fu du nanga a dei fu Yehovah, ben meki taki den gowe libi a pasi di ben e tyari den go na têgo libi.—Mateyus 7:13.
Na ini a ten disi, a no musu de so taki wi no de na ai moro fu di a kaba no kon ete. Wi no musu lasi-ati fu di a kaba no e kon na a ten di wi ben fruwakti. Wan waktiman di de na ai kan meki sani kori en, ma toku a bun efu a tan na ai! Dati na en wroko. Na so a de tu nanga tru Kresten.
[Prenki na tapu bladzijde 18]
Yu e bribi trutru taki a dei fu Yehovah de krosibei?
[Prenki na tapu bladzijde 19]
Den konmakandra, begi, nanga a bun gwenti fu studeri, kan yepi wi fu tan na ai
[Prenki na tapu bladzijde 22]
Meki wi abi pasensi neleki Margaret fu di wi e du ala san wi man fu tan na ai