Tan na ai, moro leki iniwan ten na fesi!
Tan na ai, moro leki iniwan ten na fesi!
„Meki wi [no] sribi go doro soleki fa den trawan e du, ma meki wi tan na ai èn hori wisrefi.”—1 TESALONIKASMA 5:6.
1, 2. (a) Sortu foto Pompeyi nanga Herculaneum ben de? (b) Na sortu warskow furu sma fu Pompeyi nanga Herculaneum no ben gi yesi? San ben de a bakapisi fu dati?
NA INI a fosi yarihondro fu wi Gewoon Teri, Pompeyi nanga Herculaneum ben de tu foto fu a Rome tirimakti di ben e drai heri bun. Den foto disi ben de krosibei fu a bergi Vesuvius. Den gudu sma fu Rome ben lobi fu go koiri na den tu foto dati. Den komedi-oso na den foto dati ben kan hori moro leki wan dusun sma. Na ini Pompeyi yu ben abi wan bigi preigron pe pikinmoro ala den sma fu a foto ben kan sidon na ini. Sma di diki owruten sani puru na gron na ini a kontren fu Pompeyi ben teri sowan 118 presi pe sma ben kan go dringi sopi. Na sonwan fu den presi disi, sma ben e go fu dòbel noso fu go huru. Leki fa son skedrei nanga tra sani di sma feni e sori, dan hurudu nanga a gridi lostu fu kon gudu ben de sani di ben lai srefisrefi na ini a kontren dati.
2 Tapu 24 augustus 79 G.T., dan a bergi Vesuvius bigin spiti faya. Sma di e ondrosuku den sortu bergi disi e taki dati a fosi leisi di Vesuvius spiti faya nanga tra sani kon na tapu, dan wan sortu lekti ston makandra nanga asisi ben panya na tapu ala den tu foto. Ma neleki fa a sori dan sani no ben de so takru taki sma no ben man lowe gowe. Te yu luku en bun, dan furu sma ben du dati tu. Ma tra sma di no ben teki a warskow, noso di no ben poti prakseri na den sani di ben e pasa, ben bosroiti fu tan leti drape. Ne na mindrineti bun furu faya gas, nanga faya tokotoko moksi nanga difrenti sortu ston, ben saka kon fu a bergi neleki wan liba. Nanga furu babari den sani disi saka go na ini Herculaneum, èn dati ben kiri ala sma di ben de na ini a foto ete. Na a fruku mamanten fu a tra dei, wan srefi sortu sani pasa nanga Pompeyi, èn ala sma di ben de drape ben dede tu. Disi na wan tumusi sari sani di e sori san e pasa te sma no e gi yesi na marki di de leki wan warskow!
A kaba fu a Dyu seti fu sani
3. Na sortu fasi a pori fu Yerusalem e kruderi nanga a di fu Pompeyi nanga Herculaneum?
3 A rampu di ben miti Pompeyi nanga Herculaneum no ben moi kwetikweti. Ma toku a pori di Yerusalem ben kisi neigi yari na fesi ben moro takru leki dati srefi, aladi den sani di pasa na ini Yerusalem ben de a wroko fu libisma. Sma taki dati „fu ala den okasi na ini a historia pe sma ben lontu wan foto fu teki en abra, dan a fasi fa den ben teki a foto disi abra, ben de a moro ogriwan”. Soleki fa sma e taki, dan moro leki wan milyun Dyu dede na a okasi dati. Ma neleki fa a ben de nanga a rampu di ben pasa na Pompeyi nanga Herculaneum, dan a pori fu Yerusalem no feni presi sondro taki sma ben kisi warskow fosi.
4. Sortu profeititori Yesus ben taki leki wan marki gi den Dyu fu warskow den taki a kaba fu a Dyu seti fu sani ben de krosibei? Fa a profeititori dati kon tru fu a fosi leisi na ini a fosi yarihondro?
4 Yesus Krestes ben taki na fesi taki Yerusalem ben o kisi pori. A ben taki sosrefi san ben o pasa fosi a pori dati ben o kon. A ben taki fu orloku, a mankeri di nyanyan ben o mankeri, gronseki, nanga kruktudu di ben o de pasa marki. Na ini a ten dati yu ben o abi falsi profeiti tu. Ma toku a bun nyunsu fu a Kownukondre fu Gado ben o preiki na heri grontapu (Mateyus 24:4-7, 11-14). Aladi den wortu fu Yesus ben o abi wan moro bigi kontru na ini a ten disi, toku den ben kon tru sosrefi na ini a ten dati. A historia e sori wi taki wan bigi angriten ben kon de na ini Yudea (Tori fu den Apostel 11:28). A Dyu historia skrifiman Josephus ben taki dati wan gronseki ben de na ini a kontren fu Yerusalem, leti bifo a foto kisi pori. Di a kaba fu a Dyu seti fu sani ben e kon krosibei, dan ibri tron baka yu ben abi sma di ben e meki opruru, èn difrenti politiek grupu fu den Dyu di ben e libi na ini a foto ben e feti nanga makandra tu. A ben e pasa sosrefi taki sma ben e kiri bun furu sma na ini difrenti foto pe Dyu ben e tan makandra nanga sma di no ben de Dyu. Toku a bun nyunsu ben e preiki „gi ala sma na ondro hemel”.—Kolosesma 1:23.
5, 6. (a) Sortu profeiti wortu fu Yesus ben kon tru na ini 66 G.T.? (b) Fu san ede so furu sma dede di Yerusalem fadon te fu kaba na ini 70 G.T.?
5 Te fu kaba, den Dyu ben opo densrefi kontrari a Rome tirimakti na ini a yari 66 G.T. Di Cestius Gallus ben kon nanga wan legre fu lontu Yerusalem, dan den bakaman fu Yesus ben e memre den wortu fu en: „Te unu e si taki legre kampu lontu Yerusalem, sabi dan taki a pori fu en kon krosibei. Dan meki den wan di de na Yudea, bigin lon gowe na den bergi, èn meki den wan di de na en mindri, hari gowe fu drape, èn meki den wan di de na den boiti presi, no go na en ini” (Lukas 21:20, 21). A ten ben doro fu komoto na ini Yerusalem. Ma fa? Na wan momenti di sma no ben fruwakti, Gallus nanga a legre fu en ben hari gowe. Dati ben gi den Kresten di ben de na ini Yerusalem nanga Yudea na okasi fu gi yesi na den wortu fu Yesus fu lowe go na den bergi.—Mateyus 24:15, 16.
6 Fo yari baka dati, na a ten fu a Paskafesa, dan den legre fu Rome ben drai kon baka na ondro a tiri fu a Legre-edeman Titus, di ben wani tapu na opruru fu den Dyu nomonomo. Baka di a legre fu en ben lontu Yerusalem, dan den bow „wan skotu fu postu nanga srapu ede”, so taki nowan sma ben man lowe komoto na ini a foto (Lukas 19:43, 44). Aladi sma ben sabi taki wan feti ben kan broko, toku Dyu fu ala sei na ini a Gran Kownukondre Rome ben hari go na Yerusalem gi a Paskafesa. Now den no ben man go na nowan sei. Soleki fa Josephus e taki, dan bun furu fu den sma di dede na a ten di a legre fu Rome ben lontu a foto, ben de sma fu a grupu disi fu den fisitiman. * Di Yerusalem fadon te fu kaba, moro leki wan di fu seibi pisi fu ala den Dyu na ini a Gran Kownukondre Rome ben lasi den libi. A pori fu Yerusalem nanga en tempel, ben de a kaba fu a fasi fa a Dyu libimakandra ben seti nanga a fasi fu anbegi fu den di ben akruderi a Wet fu Moses. *—Markus 13:1, 2.
7. Fu san ede Kresten di ben gi yesi ben man libi pasa a pori fu Yerusalem?
7 Na ini 70 G.T. den Dyu Kresten ben kan lasi den libi noso den ben kan tron srafu neleki ala tra sma di ben de na ini Yerusalem. Ma neleki fa a historia e sori, dan den ben gi yesi na a warskow di Yesus ben gi den sowan 37 yari na fesi. Den ben gowe libi a foto, èn den no ben drai go baka na en ini.
Warskow di den apostel ben gi na a yoisti ten
8. San Petrus ben si taki Kresten ben musu du? Sortu wortu fu Yesus a ben kan abi na prakseri?
8 Tide na a dei, wan moro bigi pori de na pasi e kon, wan pori di sa tyari wan kaba kon na a heri disiten seti fu sani. Siksi yari bifo a pori fu Yerusalem, na apostel Petrus ben gi Kresten prenspari rai na a yoisti ten. A ben taigi den fu tan na ai! Petrus ben e si taki a ben de fanowdu gi Kresten fu „man denki krin”, so taki den no ben o wisiwasi ’a komando fu Masra’ (2 Petrus 3:1, 2). Di Petrus gi Kresten deki-ati fu tan na ai, dan a sori taki a ben abi den wortu na prakseri di a ben yere Yesus taigi den apostel fu En, wan tu dei bifo a dede: „Tan luku, tan na ai, bika unu no sabi o ten a fasti ten de.”—Markus 13:33.
9. (a) Sortu takru fasi fu denki son sma ben o kweki? (b) Fu san ede wan sma musu luku bun fu no tweifri?
9 Na ini a ten disi, son sma e aksi na wan spotu fasi: „Pe a denoya disi fu en de di den ben pramisi?” (2 Petrus 3:3, 4) A sori leki den sma dati e feni taki noiti sani no e kenki trutru, ma taki ala sani e tan soifri leki fa den ben de ala ten kaba fu sensi a ten di grontapu meki. Te sma e prakseri na a fasi dati, dan dati kan poti den na ini bigi problema. Te wi e tweifri, dan dati kan meki wi frigiti na ini sortu ten wi e libi, san kan meki wi gi wisrefi abra na wi eigi takru lostu nomo (Lukas 21:34). Boiti dati, dan Petrus e sori taki den sortu spotuman disi e frigiti a Frudu di ben de na ini Noa ten, di ben pori a heri grontapu seti fu sani fu a ten dati. Iya, na a ten dati grontapu ben kenki trutru!—Genesis 6:13, 17; 2 Petrus 3:5, 6.
10. Sortu deki-ati Petrus e gi den wan di e firi kande taki den no man wakti moro?
10 Petrus e yepi den wan di e leisi a brifi fu en fu kon abi pasensi fu di a e memre den fu san ede a de so, taki furu tron Gado no e du wan sani wantewante. Na a fosi presi Petrus e taki: „Gi Yehovah, wán dei de leki dusun yari èn dusun yari leki wán dei” (2 Petrus 3:8). Fu di Yehovah e libi fu têgo, meki a kan teki en ten fu krutu wan afersi na a yoisti fasi, so taki a kan bosroiti san na a moro bun ten fu du wan sani. Dan Petrus e sori taki Yehovah ben sa wani taki ala libisma na heri grontapu sori taki den abi berow. A pasensi fu Gado e meki taki furu sma kisi frulusu, wan sani di no ben o de so efu Gado ben du wan sani tumusi esi (1 Timoteyus 2:3, 4; 2 Petrus 3:9). Ma toku a no de so taki a pasensi fu Yehovah o meki taki a no sa du wan sani noiti. Petrus e taki dati „a dei fu Yehovah o kon neleki fa wan fufuruman e kon”.—2 Petrus 3:10.
11. San o yepi wi fu tan na ai na yeye fasi? Na sortu fasi wi kan taki dati disi sa meki a dei fu Yehovah doro ’moro gaw’?
11 Petrus e agersi a tori disi na wan tumusi moi fasi. A no makriki fu kisi wan fufuruman, ma wan waktiman di e tan na ai heri neti, sa man si wan fufuruman moro gaw leki te a ben o dyonko ten na ten. Fa wan waktiman kan tan na ai? A moro makriki gi wan waktiman fu tan na ai te a e waka lontu, leki te a ben sa sidon na wan presi a heri neti langa. Na so a de tu nanga wi leki Kresten. Te wi tan abi furu fu du na ini a diniwroko fu Gado, dan dati sa yepi wi fu tan na ai. Fu dati ede Petrus ben gi wi deki-ati fu tan du muiti fu ’tyari wisrefi na wan santa fasi èn fu du sani di e sori taki wi e dini Gado na wan getrow fasi’ (2 Petrus 3:11). Te wi e du den sortu sani dati, dan dati o yepi wi fu tan hori ’a denoya fu a dei fu Yehovah bun na prakseri’. A Griki wortu di vertaal dyaso nanga ’hori bun na prakseri’ kan vertaal sosrefi nanga „fu meki wan sani go moro gaw” (2 Petrus 3:12). A tru taki wi no man kenki a fasi fa Gado seti sani noso a ten di Gado poti fu du wan sani. A dei fu en o kon na a yuru di ensrefi poti. Ma a pisi ten bigin nanga now te go miti a dei dati, o pasa moro gaw efu wi abi furu fu du na ini a diniwroko fu Gado.—1 Korentesma 15:58.
12. Fa ibriwan fu wi kan kisi wini fu a pasensi fu Yehovah?
12 Sobun, iniwan sma di e feni taki a dei fu Yehovah e tan langa fu kon, e kisi a deki-ati fu poti prakseri na a rai di Paulus e gi wi fu wakti nanga pasensi tapu a fasti ten di Yehovah poti. Iya, ibri dei di wi de na libi fu di Gado e hori pasensi nanga wi, na wan dei di wi kan gebroiki na wan koni fasi. Fu eksempre, wi kan tan kweki prenspari fasi di wan Kresten musu abi, ma sosrefi wi kan prati a bun nyunsu nanga moro furu sma, wan sani di wi no ben o man du efu wi no ben kisi moro ten. Efu wi tan na ai, dan na a kaba fu a seti fu sani disi, Yehovah sa si wi leki sma di de „sondro flaka èn sondro fowtu èn na ini vrede” (2 Petrus 3:14, 15). Dati sa de wan bigi blesi trutru!
13. San Paulus ben taigi den Kresten na ini Tesalonika di prenspari sosrefi gi wi na ini a ten disi?
13 Na ini a fosi brifi fu Paulus gi den Kresten na ini Tesalonika, dan a e taki tu dati a prenspari fu tan na ai. A e gi den a rai: „Meki wi [no] sribi go doro soleki fa den trawan e du, ma meki wi tan na ai èn hori wisrefi” (1 Tesalonikasma 5:2, 6). Tide na a dei, a de wan tumusi prenspari sani, spesrutu fu di a kaba fu a heri seti fu sani disi de na pasi e kon! Anbegiman fu Yehovah e libi na ini wan grontapu pe furu sma no wani poti prakseri na yeye afersi, èn dati kan abi krakti tapu den anbegiman dati. Fu dati ede Paulus e gi a rai: „Meki wi tan hori wisrefi èn tan weri bribi nanga lobi leki wan isri bosroko fu kibri wi èn meki wi weri a howpu fu frulusu leki wan fetimusu” (1 Tesalonikasma 5:8). Efu wi tan studeri a Wortu fu Gado, aladi wi tan abi demakandra nanga den brada nanga sisa fu wi na den konmakandra, dan dati sa yepi wi fu teki a rai di Paulus e gi wi fu tan hori na prakseri na ini sortu prenspari ten wi e libi.—Mateyus 16:1-3.
Milyunmilyun sma e tan na ai
14. Sortu nomru e sori taki sma de na ini a ten disi di e teki a rai fu Petrus fu tan na ai?
14 Fa a de na ini a ten disi? Furu sma de di e gi yesi na a rai di Bijbel e gi fu tan na ai? Iya. Na ini a dienstyari 2002, wi ben doro wan heimarki fu 6.304.645 preikiman. Te yu teki a nomru disi gersi nanga a di fu a yari 2001, dan a nomru fu preikiman gro nanga 3,1 procent. Den preikiman disi sori taki den de na ai na yeye fasi fu di den gebroiki sowan 1.202.381.302 yuru fu taki nanga tra sma fu a Kownukondre fu Gado. Gi den preikiman disi a sortu wroko disi no ben de wan soso sani di den ben du nomo te den ben abi pikinso ten. A ben de wan prenspari pisi fu den libi. A fasi fa den sma disi e denki fu a preikiwroko di den e du, e kon moi na fesi na ini na eksempre fu Eduardo nanga Noemi fu El Salvador.
15. Sortu ondrofenitori fu El Salvador e sori taki furu sma de, di e tan na ai na yeye fasi?
15 Wan tu yari pasa, Eduardo nanga Noemi ben poti prakseri na den wortu disi fu Paulus: „A komediprei fu a grontapu disi e kenki” (1 Korentesma 7:31). Baka di den kenki a fasi fa den ben e libi, so taki den no ben sa abi tumusi furu tra frantwortu, dan den go na ini a furuten pionier diniwroko. Sensi a ten dati, den kisi blesi na furu difrenti fasi. Den ben kisi a grani srefi fu du a kringwroko nanga a distriktwroko. Aladi den ben kisi seryusu problema sontron, toku Eduardo nanga Noemi sabi taki den teki a yoisti bosroiti, di den libi a switi libi di den ben abi fu go na ini a furuten diniwroko. Furu fu den 29.269 preikiman nanga den 2454 pionier na ini El Salvador sori taki den abi a srefi fasi disi fu di den e gi densrefi krinkrin na ini a diniwroko. Fu dati ede a nomru fu preikiman na ini a kondre dati gro nanga 2 procent na ini a yari di pasa.
16. Sortu fasi fu denki wan yongu brada na ini Ivoorkust ben sori?
16 Na ini Ivoorkust, wan yongu Kresten man sori a srefi fasi disi di a ben skrifi wan brifi go na a bijkantoro na ini a kondre dati. A ben skrifi: „Mi na wan dinari ini a diniwroko. Ma mi no kan taigi den brada nanga sisa fu go pionier, efu misrefi no de wan bun eksempre. Dati meki mi libi a bun wroko di mi ben abi fu go du wan wroko gi misrefi, san e gi mi moro ten fu du a preikiwroko.” A yonkuman disi ben tron wan fu den 983 pionier di e dini na ini Ivoorkust, wan kondre di ben abi 6701 preikiman a yari di pasa, wan gro fu 5 procent.
17. Fa wan yongu Kotoigi na ini Belgia ben sori taki a no ben meki a krutu di sma e krutu trawan, tapu skreki gi en?
17 A frudrage di sma no e frudrage sani fu trawan, a krutu di sma e krutu trawan, nanga a desko di sma e desko makandra, e tan tyari problema kon gi den 24.961 Kownukondre preikiman na ini Belgia. Toku den de fayafaya, aladi den no e meki sma tapu skreki gi den. Na ini wan les na skoro di ben sori fa sma musu tyari densrefi na ini a libimakandra, wan yongu Kotoigi fu 16 yari ben yere fa den ben e taki fu Kotoigi. Den ben kari Yehovah Kotoigi wan sokari kerki grupu di abi fromu denki. Dati meki a ben aksi primisi fu fruteri fa Yehovah Kotoigi e denki trutru. Nanga yepi fu a video Jehovah’s Getuigen – De organisatie achter de naam nanga a brochure Jehovah’s Getuigen — Wie zijn zij?, a yongu uma disi ben man fruteri suma Yehovah Kotoigi de trutru. Den trawan na ini a klas ben warderi den sani di a ben tyari kon na fesi. A wiki na baka den studenti ben musu meki wan repetisi, èn ala den aksi fu a repetisi dati ben abi fu du nanga a Kresten bribi fu Yehovah Kotoigi.
18. San e sori krin taki ekonomia problema no man puru a prakseri fu preikiman na ini Argentinia nanga na ini Mosambik, fu du a diniwroko fu Yehovah?
18 Furu Kresten e kisi bigi problema na ini den lasti dei disi. Toku den e pruberi fu no meki den sani disi puru den prakseri fu a diniwroko fu den. Wi sabi taki a kondre Argentinia ben abi bigi ekonomia problema, toku a ben abi wan heimarki fu 126.709 Kotoigi na ini a yari di pasa. Furu sma di e libi na ini Mosambik na pôti sma. Toku, sowan 37.563 sma ben teki prati na ini a preikiwroko drape. Disi na wan gro fu 4 procent. Gi furu sma na ini Albania a libi tranga srefisrefi. Toku a kondre ben doro wan heimarki fu 2708 preikiman, wan gro fu 12 procent. A de krin taki problema no e tapu a yeye fu Yehovah te den futuboi fu en e poti Kownukondre afersi na a fosi presi.—Mateyus 6:33.
19. (a) San e sori taki furu sma de ete di yu kan teki gersi nanga skapu èn di e angri fu kon sabi den tru tori fu Bijbel? (b) San na wan tu tra moi sani fu na alayari raportu di e sori taki den futuboi fu Yehovah e tan na ai na yeye fasi? (Luku a raportu fu den difrenti kondre na tapu bladzijde 12-15.)
19 Ibri mun fu a yari di pasa sowan 5.309.289 bijbelstudie hori na heri grontapu. Dati e sori taki furu sma di yu kan teki gersi nanga skapu, e angri ete fu den tru tori fu Bijbel. Wan nyun heimarki fu 15.597.746 sma ben de na a Memrefesa. Ma furu fu den no e dini Yehovah trutru ete. Wi howpu taki den sma disi tan gro na ini lobi, iya, lobi gi Yehovah nanga den brada nanga sisa na heri grontapu. A moi fu si taki a „bigi ipi” fu den „tra skapu” e tan meki froktu na ini a diniwroko fu a Mekiman fu den, wan diniwroko di den e du „na ini a tempel fu en dei nanga neti”, makandra nanga den salfu brada fu den.—Openbaring 7:9, 15; Yohanes 10:16.
Wi kan leri wan sani fu Lot
20. San wi e leri fu na eksempre fu Lot nanga a wefi fu en?
20 A no de fu taki dati srefi getrow anbegiman fu Gado kan frigiti fu wan pisi ten, na ini sortu prenspari ten den e libi. Prakseri Lot, a brada pikin fu Abraham. Tu engel fu Gado di ben kon fisiti en, ben taigi en taki Gado ben de fu pori Sodom nanga Gomora. A nyunsu dati no ben e fruwondru Lot, di „ben de [na] ini bigi banawtu fu di den sma di ben pasa a wet, ben tyari densrefi na wan lusu fasi” (2 Petrus 2:7). Toku a de so taki Lot „ben tan draidrai”, di den tu engel ben kon fu puru en na ini Sodom. Pikinmoro den engel ben abi fu srepi Lot nanga en osofamiri komoto na ini a foto. Baka dati, dan a wefi fu Lot no ben gi yesi na a warskow fu den engel fu no drai luku na en baka. A mi-no-ke-fasi fu en ben meki taki a lasi en libi (Genesis 19:14-17, 26). Yesus ben gi leki warskow: „Un memre a wefi fu Lot.”—Lukas 17:32.
21. Fu san ede a de tumusi prenspari fu tan de na ai, moro leki iniwan ten na fesi?
21 A rampu di pasa na Pompeyi nanga Herculaneum, den sani di pasa na a pisi ten di Yerusalem kisi pori, na eksempre fu a Frudu fu a ten fu Noa nanga na eksempre fu Lot; ala den sani disi e sori krin o prenspari a de fu gi yesi te wi e kisi warskow fu wan sani di o pasa. Leki futuboi fu Yehovah wi man si a marki fu a ten fu a kaba (Mateyus 24:3). Wi gowe libi falsi anbegi (Openbaring 18:4). Wi musu de neleki den Kresten fu a fosi yarihondro fu di wi „e hori a denoya fu a dei fu Yehovah bun na prakseri” (2 Petrus 3:12). Iya, leki Kresten wi musu tan na ai, moro leki iniwan ten na fesi! San wi kan du? Sortu fasi wi musu kon abi fu kan tan na ai? Na artikel di wi sa go luku now, o taki fu den pisi tori disi.
[Futuwortu]
^ paragraaf 6 Soleki fa a sori, dan a foto Yerusalem fu a fosi yarihondro, no ben kan abi moro leki 120.000 sma di ben e libi na ini. Eusebius ben teri taki ala nanga ala sowan 300.000 sma fu a kontren fu Yudea ben teki waka go na Yerusalem fu go na a Paskafesa fu 70 G.T. A musu de taki den tra sma di lasi den libi, ben de sma fu tra pisi fu a Gran Kownukondre.
^ paragraaf 6 A no de fu taki dati fu a sei fu Yehovah a nyun frubontu ben kon na presi fu a Wet fu Moses na ini 33 G.T.—Efeisesma 2:15.
San yu ben sa piki?
• San ben pasa di ben meki taki den Dyu Kresten ben kan lowe gi a pori di Yerusalem ben o kisi?
• Fa a rai di Petrus nanga Paulus skrifi na ini den brifi fu den, e yepi wi fu tan na ai?
• Suma na ini a ten disi e sori taki den de na ai trutru?
• San wi e leri fu a tori fu Lot nanga a wefi fu en?
[Aksi fu a tori disi]
[Raportu na tapu bladzijde 12-15]
2002 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)
[Prenki na tapu bladzijde 9]
Na ini 66 G.T., den Kresten na ini Yerusalem ben gi yesi na a warskow fu Yesus
[Prenki na tapu bladzijde 10]
Te wan Kresten e tan wroko tranga, dan dati sa yepi en fu tan na ai