„Yu abi leti, a libi switi trutru!”

YU WANI sabi san na a trutru marki fu a libi? Magdalena, di abi 18 yari, na wan fu den Yehovah Kotoigi di e libi na ini a foto Szczecin, na ini Polen. Magdalena ben yepi Katarzyna, wan pikin fu en klas na middelbaar skoro, fu kon sabi san na a trutru marki fu a libi. Katarzyna no ben e bribi na ini Gado kwetikweti. Ma di Magdalena taki nanga en fu Bijbel, dan a sori taki a ben wani sabi moro trutru.

Aladi Katarzyna ben lobi den sani di Magdalena ben fruteri en fu Bijbel, toku a no ben agri nanga ala sani. Wan leisi di Katarzyna ben e taki nanga Magdalena fu tru mati, dan a taigi en: „Yu abi a Bijbel, yu sabi akruderi sortu gronprakseri yu musu libi èn pe yu kan feni mati. Ma fa a de nanga den wan di no de klariklari ete fu libi akruderi den gronprakseri disi?”

Katarzyna kisi wan tra denki fu den sani disi, di a go na a foto Londen, na ini Ingrisikondre. A go na a bijkantoro fu Yehovah Kotoigi di ben de na ini a foto dati, èn a switifasi di den sma drape sori gi en naki en ati trutru. Den ben opo doro gi en, èn den trutru ben wani arki san a ben abi fu taki. Aladi den sani disi na pikinpikin sani, toku a ben lobi en taki sma ben du den sani dati gi en.

Di a nyun skoroyari bigin na ini september 2001, dan Katarzyna bosroiti fu studeri Bijbel doronomo. A e kisi moro nanga moro warderi gi Bijbel gronprakseri èn a bigin du den sani di a e leri. No so langa pasa a taigi Magdalena wan sani di a no ben fruteri nowan tra sma. A ben taki: „Mi e firi leki mi e bigin nanga wan nyun libi.” Katarzyna libi sosrefi wan syatu boskopu gi Magdalena na tapu en cellulair telefon, èn a boskopu dati ben taki: „Mi e taigi yu tangi trutru fu di yu studeri nanga mi tide! Yu abi leti, a libi switi trutru! A e gi prisiri srefisrefi fu sabi suma wi kan taki tangi gi dati.”