Aksi fu leisiman

A de akruderi Bijbel gronprakseri te wan Kresten e poti en anu na tapu a Bijbel èn e sweri fu fruteri san de tru te a de na fesi krutu?

Ini a tori disi ibri wan sma musu teki en eigi bosroiti (Galasiasma 6:5). Ma Bijbel no e taki dati wan sma no musu sweri fu fruteri san de tru na fesi krutu.

Sweri na wan sani di sma e du so langa kaba. Ini owruten, fu eksempre, den Grikisma ben e opo den anu go na hemel noso den ben e fasi wan altari aladi den ben e sweri. Ini a ten fu Rome, te wan sma ben e sweri, dan a ben e hori wan ston na ini en anu èn a ben e taki: „Efu mi e bedrigi sma fu espresi, aladi a gado Yupiter e kibri a foto nanga a fortresi, dan meki [a gado] Yupiter trowe mi gowe fu ala den bun sani di mi abi na ini mi libi, neleki fa mi e trowe a ston disi gowe.”—Cyclopedia of Biblical, Theological, nanga Ecclesiastical Literature, di John McClintock and James Strong skrifi, Pisi VII, bladzijde 260.

Den tori disi ben e sori taki a libisma famiri e sabi taki wan bigi makti de di e luku san den e du èn taki den musu gi en frantwortu. Sensi owruten den tru anbegiman fu Yehovah ben sabi taki Yehovah ben sabi san den e taki èn sosrefi san den e du (Odo 5:21; 15:3). Den ben sweri na fesi Gado, fu taki en so, den ben e si en leki a Sma di si taki den ben sweri. Leki eksempre, wi e si taki Boas, David, Salomo, nanga Yeremia ben du dati (Rut 3:13; 2 Samuel 3:35; 1 Kownu 2:23, 24; Yeremia 38:16). Anbegiman fu a tru Gado ben meki trawan sweri gi den. Dati ben de so na ini a tori fu Abraham nanga a di fu Yesus Krestes.—Genesis 21:22-24; Mateyus 26:63, 64.

Son leisi wan sma di ben e sweri na fesi Yehovah ben e meki wan sani nanga en anu aladi a ben e sweri. Abram (Abraham) ben taigi a kownu fu Sodom: „Mi e opo mi anu ini wan sweri go na Yehovah, a Moro Hei Gado, a Sma di meki hemel nanga grontapu” (Genesis 14:22). Wan engel di ben e taki nanga a profeiti Danièl „bigin fu opo en reti-anu èn en kruktu-anu go na hemel èn a sweri na a Sma di e libi te ten di no skotu” (Danièl 12:7). Na wan agersi fasi Bijbel e taki srefi dati Gado e opo en anu fu sweri.—Deuteronomium 32:40; Yesaya 62:8.

Bijbel no e taki dati sma no musu sweri. Ma wan Kresten no abi fu sweri soso fu sori taki den sani di a taki de tru. Yesus ben taki: „Meki un wortu Iya wani taki Iya, èn un No, wani taki No” (Mateyus 5:33-37). A disipel Yakobus ben taki wan srefi sortu sani. Di a taki „no sweri moro” a ben warkow fu no sweri gi lawlaw sani (Yakobus 5:12). No Yesus, no Yakobus ben taki dati a no bun fu sweri fu fruteri san tru na fesi krutu.

Ma san musu pasa efu sma aksi wan Kresten na fesi krutu fu sweri fu sori taki den sani di a e fruklari de tru? A kan feni taki a kan sweri fu sori taki san a e fruklari de tru. Na a tra sei, a kan kisi na okasi fu gi wan seryusu fruklari fu sori taki a no e lei.—Galasiasma 1:20.

Te a de wan seti fu a krutu-oso fu opo yu anu, noso fu poti yu anu na tapu Bijbel te yu e sweri, dan wan Kresten kan teki a bosroiti fu du dati. A kan hori den eksempre fu Bijbel na prakseri di e sori fa sma ben sweri aladi den ben meki sani nanga den anu. San de moro prenspari gi wan Kresten na dati a e hori na prakseri taki a e sweri na fesi Gado fu fruteri san tru. Disi de moro prenspari leki den sani di a e du nanga en anu te a e sweri. So wan sweri na wan seryusu sani. Efu wan Kresten e firi taki a kan èn a musu gi piki na tapu wan aksi di wan sma poti gi en, dan a musu hori na prakseri taki a sweri fu fruteri san de tru, èn a no de fu taki dati wan Kresten wani taki san tru ala ten.