Den e memre den Kotoigi fu Yehovah di sma ben kiri

NA tapu 7 maart 2002, wan monumenti ben poti na ini a foto Körmend na westsei fu a kondre Hongaria. A monumenti disi ben poti fu memre dri Kotoigi fu Yehovah di den Nazi ben kiri na ini 1945.

Den anga a monumenti na a skotu fu a presi pe den ben kiri den Kotoigi na publiki. Now, na edekantoro fu brandweer de na Hunyadistrati, na a presi pe den sani disi ben pasa. A monumenti disi ben poti fu memre den „Kresten di sma ben kiri na ini maart 1945, fu di den ben weigri fu go na ini a legre bika den ben hori densrefi na Bijbel gronprakseri. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Yehovah Kotoigi.”

Den ben kiri den Kotoigi disi tu mun bifo a di fu Tu Grontapufeti ben kon na wan kaba. Fu san ede den ben kiri den? Wan koranti na ini Hongaria di nen Vas Népe e taki: „Baka di Hitler ben teki a makti abra na ini Doisrikondre, dan den no ben frufolgu èn pina den Dyu wawan ma den ben du den sani disi nanga den getrow Kotoigi fu Yehovah sosrefi. Efu den Kotoigi ben weigri fu drai baka gi a bribi fu den, dan den ben poti den na ini strafuman kampu èn ben kiri den. . . . Na ini maart 1945 ogridu ben lai na a westsei pisi fu Hongaria. . . . Wan fu den ogri sani di ben pasa, na a seni di den seni Kotoigi fu Yehovah nanga tranga go na tra kontren èn a kiri di den kiri den.”

A programa ben prati na ini tu pisi. A fosi pisi fu a programa ben hori na ini a komedi-oso fu Batthyány Castle. Wan tu fu den takiman drape ben de Professor Szabolcs Szita, edeman fu a kantoro na ini Budapest di e ondrosuku ogri-ati sani di ben pasa na ini a di fu Tu Grontapufeti. Tra sma ben de drape tu soleki László Donáth wan memre fu na Asamblei di de na ini a Komte di e sorgu gi den reti fu libisma, mofinawan, nanga kerki afersi. Wan man di ben si fa den ben kiri den Kotoigi èn di de historia skrifiman fu a foto dati now, ben de drape sosrefi. Na a di fu tu pisi fu a programa, den moro leki 500 sma di ben de drape, ben waka go na a presi pe distriktkomsarsi József Honfi fu Körmend ben puru a duku fu a monumenti so taki sma ben kan si en.

Na ini a lasti brifi di a Kotoigi Ján Žondor (János Zsondor) ben skrifi bifo den ben kiri en, a ben gi den Kresten brada nanga sisa fu en a deki-ati fu no sari. A ben skrifi na ini a brifi: „Mi e memre den wortu fu Yohanes ete di de fu feni na ini Openbaring 2:10: ’Buweisi taki unu de getrow, srefi te na dede.’ . . . Taigi mi famiri nanga mati èn den brada na ini a gemeente fu no sari, fu di mi no sa dede leki wan ogriman, ma mi sa dede gi a waarheid.”

[Prenki na tapu bladzijde 32]

Bertalan Szabó

[Prenki na tapu bladzijde 32]

Antal Hőnisch

[Prenki na tapu bladzijde 32]

Ján Žondor