„Fayafaya Kownukondre preikiman” e kon makandra nanga prisiri

SANI no e waka bun na grontapu fu di sma no e tyari densrefi na wan fasi di fiti, èn fu di problema de na ekonomia sei èn sosrefi na politiek sei. Ma aladi a bruya disi de na grontapu, toku Yehovah Kotoigi kon makandra na den „Fayafaya Kownukondre preikiman” Distrikt Kongres di ben hori dri dei langa sondro wan enkri problema. Den konmakandra disi ben hori na heri grontapu, bigin nanga mei 2002.

Fu tru, den kongres disi ben de tumusi prisiri okasi. Meki wi luku a programa syatu baka, fu si sortu leri fu Bijbel wi ben kisi di gi wi deki-ati.

A fosi dei e poti krakti tapu a faya di Yesus ben abi

A thema fu a fosi dei fu a kongres ben de „Wi musu de fayafaya neleki wi masra Yesus” (Yohanes 2:17). A lezing „Wi e prisiri fu kon makandra leki Kownukondre preikiman”, ben gi den wan di ben de drape wan switi kari fu abi wan prati na ini a prisiri di den kongres fu Gado pipel e tyari kon ala ten (Deuteronomium 16:15). Baka a lezing disi yu ben abi wan tu interview nanga fayafaya preikiman fu a bun nyunsu.

A lezing „Feni furu prisiri na ini Yehovah” ben taki finifini fu ibri vers di skrifi na ini a pisi fu Psalm 37:1-11. Wi ben kisi a rai fu no „atibron” nanga ogrisma te a e gersi leki sani e go bun nanga den. Aladi ogrisma kan taki leitori fu wi, toku, te fu kaba Yehovah sa sori krin suma na a getrow pipel fu en trutru. A lezing „Sori taki unu de nanga tangi na ati” ben taki fu a fasi fa wi kan sori Gado taki wi de nanga tangi na ati gi den sani di a e du gi wi. Ala Kresten musu gi Yehovah „wan srakti-ofrandi fu prèise” (Hebrewsma 13:15). A no de fu taki, dati a warderi di wi abi gi en èn a fasi fa wi libi tan, sa meki wi gebroiki so furu ten leki wi man fu du diniwroko gi Yehovah.

A thema taki ben nen „Kownukondre preikiman e kisi deki-ati fu wroko fayafaya”. A ben sori taki Yesus na a moro bun eksempre fu wan sma di de fayafaya. Baka di a hemel Kownukondre ben seti na ini 1914, dan tru Kresten ben musu preiki a bun nyunsu dati nanga faya. A takiman ben taki fu a kongres na Cedar Point, Ohio, na ini Amerkankondre, èn a ben memre wi fu a prenspari kari di ben gi drape fu „Preiki a Kownu nanga en Kownukondre!” Bakaten, a faya di den getrow futuboi fu Gado ben abi, pusu den fu meki den tumusi moi tru tori fu a Kownukondre bekènti na ala den kondre fu grontapu.

A lezing „No frede bika wi sabi taki Yehovah de nanga wi” ben hori na a bakadina fu a fosi dei. A lezing disi ben sori taki Satan wani du ogri spesrutu nanga a pipel fu Gado. Ma te wi e luku den furu eksempre na ini Bijbel èn na ini a ten disi, fu sma di ben abi bribi, dan wi e kisi deki-ati fu kakafutu gi den tesi disi sondro fu frede, awinsi wi e kisi gens.—Yesaya 41:10.

Baka a lezing disi dan wan symposium ben hori di ben abi dri pisi. A thema fu a symposium disi ben de „A profeititori fu Mika e gi wi krakti fu waka na ini a nen fu Yehovah”. A fosi takiman ben  agersi a ten fu wi nanga a ten fu Mika, fu di sma no ben e libi na wan fasi di fiti, den ben fadon komoto fu a tru anbegi, èn den ben e feti nomo fu kon gudu. A ben taki: „Wi sa abi wan trutru howpu gi a ten di e kon te wi e kweki wan ati di e gi yesi èn te wi e sorgu taki wi e tyari wisrefi na wan santa fasi. Wi sa abi a howpu dati tu te wi e du furu sani di e sori taki wi e dini Gado na wan getrow fasi. Boiti dati, wi no musu frigiti noiti taki a dei fu Yehovah sa kon trutru.”—2 Petrus 3:11, 12.

A di fu tu takiman fu a symposium ben taki fu a krutu di Mika ben krutu den fesiman fu Yuda. Den ben e kwinsi den pôti sma di no ben man yepi densrefi. Ma Mika ben taki na fesi tu, taki a tru anbegi ben o wini (Mika 4:1-5). Fu di wi e kisi krakti fu a santa yeye fu Yehovah, meki wi abi a fasti bosroiti fu preiki a boskopu disi di e gi krakti. Ma sortu fasi fu denki wi musu abi te siki noso tra sani e meki taki wi no man du so furu? A di fu dri takiman ben taki: „Den markitiki fu Yehovah bun, èn wi man doro den”. A ben go doro fu taki fu difrenti pisi fu Mika 6:8, pe wi e leisi: „San MASRA aksi joe foe doe, boiti [fu du retidu, NWT], en foe lobi [switifasi, NWT], en foe waka [bescheiden, NWT] nanga joe Gado?” (Da Bijbel na ini Sranantongo)

Fu di a takru fasi fa sma na ini grontapu e libi kan abi krakti tapu Kresten, meki wi ala ben kisi wini fu a lezing „Tan tyari yusrefi na wan krin fasi fu kibri yu ati”. Fu eksempre, wan krin fasi fu libi sa yepi wi fu abi wan koloku trowlibi. Fu di wi na Kresten, meki wi no musu prakseri noiti fu du hurudu.—1 Korentesma 6:18.

A lezing „Luku bun nanga bedrigifasi” ben sori taki wi e du bun fu si iniwan sortu leitori di sma di fadon komoto fu a bribi e fruteri leki sani di kan kiri wi (Kolosesma 2:8). Wi no musu kori wisrefi tu fu denki taki wi kan satisferi den sondu lostu fu wi, sondro fu kisi takru bakapisi.

„Anbegi a wan-enkri tru Gado”, ben de a nen fu a lasti lezing fu a fosi dei. Fu di a situwâsi fu grontapu e kon moro takru dei fu dei, dan trutru a e gi wi deki-ati fu sabi taki heri esi Yehovah sa tyari wan regtfardiki nyun grontapu kon! Suma sa libi na ini a grontapu dati? Soso den wan di e dini Yehovah. Fu yepi wi, wi  pikin, nanga den bijbelstudie fu wi fu doro a marki disi, dan a takiman ben pristeri a nyun buku Aanbid de enige ware God (Anbegi a wan-enkri tru Gado). Wi ben prisiri trutru fu kisi a buku disi!

A di fu tu dei e poti prakseri na a faya di wi musu abi fu du san bun

A di fu tu dei fu a kongres ben abi leki thema „De fayafaya fu du san bun” (1 Petrus 3:13). A fosi takiman ben taki fu a deitekst. A ben sori taki te wi e si en leki wan prenspari sani fu luku a deitekst ibri dei, dan dati e meki wi kisi moro faya.

Baka dati, wan symposium ben hori di ben abi leki nen „Kownukondre preikiman di e gi glori na a diniwroko fu den”. A fosi pisi ben poti krakti na tapu taki wi musu gebroiki a Wortu fu Gado na wan reti fasi (2 Timoteyus 2:15). Te wi e gebroiki Bijbel na wan reti fasi, dan dati sa meki taki a sa ’abi krakti’ tapu a libi fu sma (Hebrewsma 4:12). Wi musu poti a prakseri fu sma na san Bijbel e taki èn wi musu gebroiki Bijbel tu fu taki-go-taki-kon nanga den na wan fasi di e overtoigi den. Na a di fu tu pisi fu a symposium wi ben kisi deki-ati fu tan go doronomo na sma di wani kon sabi moro (1 Korentesma 3:6). Wi musu sreka wisrefi bun, wi no musu frede, èn wi no musu wakti tumusi langa fu go baka na den sma disi. Na a di fu dri pisi, wi ben kisi a rai fu si ibri sma di wi e miti, leki wan sma di kan tron wan disipel. A pisi disi ben sori sosrefi taki te wi e pristeri sma wan bijbelstudie na a fosi leisi te wi e miti den, dan wi kan kisi a prisiri fu yepi den sma disi fu tron disipel.

A lezing di ben hori baka dati ben abi leki nen „Fu san ede wi musu begi  doronomo?” Bijbel e gi Kresten a rai fu suku yepi na Gado na ini ala afersi fu den libi. Wi musu meki ten fu taki nanga Gado na ini begi te wi de wi wawan. Boiti dati, wi musu horidoro na ini begi, bika Yehovah kan meki wi begi en wan heri pisi ten fosi wi e si taki a piki a begi fu wi.—Yakobus 4:8.

A lezing „Takimakandra fu yeye afersi e tranga wi” ben gi wi deki-ati fu gebroiki a presenti di wi kisi fu man taki, fu tyari wini gi wisrefi èn gi trawan tu (Filipisma 4:8). Trowpatna nanga pikin musu taki nanga makandra fu yeye afersi ibri dei. Fu man du dati, dan osofamiri musu pruberi fu nyan makandra ibri dei, awinsi na wán leisi wan dei nomo. Na so den sa man abi takimakandra di e gi deki-ati.

A mamanten programa ben kon na wan kaba nanga wan lezing di ben naki wi ati. A lezing disi ben nen „A fasi fa sma e kisi frulusu te den e gi densrefi abra na Gado èn e teki dopu”. Den wan di ben o teki dopu ben kisi sabi, den ben sori taki den abi bribi, den ben abi berow, den ben drai baka gi ogridu, èn den ben gi densrefi abra na Gado. A takiman ben sori taki baka te den ben dopu, dan den ben musu tan gro na yeye fasi, den ben musu tan hori a faya di den ben abi, èn den ben musu tan tyari densrefi na wan fasi di fiti.—Filipisma 2:15, 16.

A bakadina dati, a lezing „De bescheiden èn hori yu ai soifri” ben tyari tu prenspari penti kon na fesi. Fu de bescheiden wani taki dati wi musu sabi heri bun san wi man du èn san wi no man du, èn wi musu sabi tu taki wi musu gi Gado frantwortu fu a fasi fa wi e libi. Te wi de bescheiden dan disi sa yepi wi fu hori wi ai „soifri”, san wani taki dati wi e poti ala wi prakseri tapu a Kownukondre fu Gado, na presi taki wi e poti prakseri na materia sani. Te wi e du disi, dan wi no abi fu broko wi ede, bika Yehovah sa gi wi san wi abi fanowdu.—Mateyus 6:22-24, 33, 34.

A tra takiman ben sori fu san ede wi musu „Frutrow dorodoro tapu Yehovah na ini banawtu ten”. Fa fu du nanga sani soleki den swakifasi fu wi, problema na moni sei noso problema nanga a gosontu fu wi? Meki wi aksi Yehovah fu gi wi koni di sa yepi wi, èn meki wi aksi tra sma sosrefi fu yepi wi. Na presi taki wi e bruya noso e lasi-ati, wi musu tranga wi bribi na ini Gado fu di wi e leisi a Wortu fu en.—Romesma 8:35-39.

A lasti symposium fu a kongres ben abi leki thema „Difrenti tesi di e miti wi e sori o tranga a bribi fu wi de”. A fosi pisi ben memre wi taki ala tru Kresten e kisi fu du nanga frufolgu. Te wi e kisi frufolgu, dan dati de leki wan kotoigi, a e tranga a bribi fu wi, èn a e gi wi okasi fu sori taki wi de getrow na Gado. Aladi wi no o poti wi libi na ini kefar fu soso, toku wi noiti no ben o wai pasi gi frufolgu na  wan fasi di no e kruderi nanga Bijbel.—1 Petrus 3:16.

A di fu tu takiman fu a symposium disi ben gi piki tapu aksi di abi fu du nanga a teki di Kresten no e teki sei na ini grontapu afersi. Den fosi Kresten no ben e gens orloku, ma den ben sabi taki na a fosi presi den musu de getrow na Gado. Na ini a ten disi sosrefi, Yehovah Kotoigi e hori densrefi soifri na a gronprakseri: „Unu no de wan pisi fu grontapu” (Yohanes 15:19). Fu di wi kan kisi tesi esi-esi fu teki sei na ini grontapu afersi, meki osofamiri musu meki ten fu poti prakseri na san Bijbel e taki fu a tori disi. Soleki fa a di fu dri lezing fu a symposium ben e sori, dan Satan no e suku spesrutu fu kiri wi, ma a e suku fu kwinsi wi so taki wi no sa de getrow moro. Te wi e horidoro na wan getrow fasi te sma e spotu wi, te wi e kisi kwinsi fu du hurudu, te wi e firi brokosaka, èn te wi e siki, dan wi e prèise Yehovah.

Wi ben kisi a switi kari fu „Tron wan mati fu Yehovah”, èn disi ben de a nen fu a lasti lezing fu a di fu tu dei. Te wi e kon sabi den moro prenspari fasi fu Yehovah, dan disi e hari wi kon moro krosibei na en. A e gebroiki en krakti di no abi skotu fu kibri a pipel fu en, spesrutu na yeye fasi. A retidu fu en no takru, ma a e meki taki a e gi ibriwan sma di e libi na wan regtfardiki fasi na okasi fu kisi têgo libi. A koni fu Gado de krin fu si na ini a fasi fa a gebroiki libisma di no de volmaakti fu skrifi a Bijbel. A moro moi fasi di a abi na a lobi fu en, di ben meki taki a seti sani so taki libisma kan kisi frulusu nanga yepi fu Yesus Krestes (Yohanes 3:16). Na a kaba fu a lezing, a takiman ben pristeri a tumusi moi nyun buku Nader dicht tot Jehovah (Kon krosibei na Gado).

A di fu dri dei e poti prakseri na a faya di wi musu abi fu du bun wroko

A thema fu a di fu dri dei fu a kongres ben de „Wan pipel di de fayafaya fu du bun wroko” (Titus 2:14). A mamanten ben bigin heri moi nanga wan osofamiri di ben e luku a deitekst makandra.  Baka dati yu ben abi a lezing „Yu e frutrow dorodoro tapu Yehovah?” Den nâsi no e frutrow tapu a yoisti sma noso sani, fu di den e frutrow tapu den eigi koni nanga krakti. Ma tra fasi leki den nâsi, den futuboi fu Yehovah e frutrow na en tapu aladi rampu e miti den, èn den e du dati sondro fu frede èn nanga prisiri sosrefi.—Psalm 46:1-3, 7-11.

A pisi di ben abi leki nen „Yongu sma—Sreka sani gi a ten di de na un fesi makandra nanga Yehovah en organisâsi” ben poti prakseri na a aksi disi: Fa wan yongu sma kan kisi wan libi di e tyari bun furu winimarki kon gi en? A no sa kisi disi te a e feti fu abi furu moni, furu gudu, èn wan bigi nen noso wan hei posisi na ini a libimakandra. Na wan lobi-ati fasi wi Mekiman e gi yonguwan a deki-ati fu memre en aladi den yongu ete. A takiman ben interview wan tu brada nanga sisa di ben gi densrefi na ini a Kresten diniwroko di den ben yongu, èn wi ben kan si fa den ben e prisiri. A ben bun srefisrefi fu kisi a nyun traktaat, Yonguwan—San unu o du nanga un libi? A traktaat disi ben meki fu yepi yongu Kotoigi fu sreka sani gi wan têgo tamara makandra nanga Yehovah en organisâsi!

Baka dati, yu ben kisi a Bijbel drama „Tanapu kánkan na ini muilek ten”, di ben hari wi prakseri srefisrefi. A drama ben sori fa Yeremia ben wroko leki profeiti fu sensi en yongu yari te go miti a ten di Yerusalem kisi pori. Nanga faya a ben taki sani na fesi fu a pori disi. Yeremia ben feni taki a no ben bun nofo fu du a wroko di a ben kisi fu du, ma toku a ben du disi aladi a ben kisi gens, èn Yehovah frulusu en.—Yeremia 1:8, 18, 19.

Baka a drama yu ben abi a lezing „De leki Yeremia—Meki a Wortu fu Gado bekènti sondro frede”. Na ini a ten disi sma e fruteri furu lei nanga ogri-ati sani fu Kownukondre preikiman (Psalm 109:1-3). Ma neleki Yeremia, wi kan sorgu taki wi no e lasi-ati fu di wi e feni prisiri na ini a Wortu fu Yehovah. Èn wi abi na overtoigi taki den sma di e gens wi, no sa wini kwetikweti.

A publikitaki, di ben abi leki nen „A grontapu disi e tan kenki” ben kon na a yoisti ten trutru. Bigi kenki pasa na ini a ten disi. Bijbel ben taki na fesi taki den situwâsi disi, sosrefi a bari di sma ben o bari taki „vrede nanga seikerfasi” de, ben o kon fosi a krutudei fu Gado di e meki sma frede (1 Tesalonikasma 5:3). A krutudei disi sa tyari tumusi moi kenki kon, namku a kaba fu orloku, ogridu, ogri di e du nanga tranga, èn siki srefi. Na presi taki wi e poti wi frutrow tapu a disiten seti fu sani, dan disi na a ten fu meki muiti fu dini Gado fayafaya èn fu tan tyari wisrefi na wan fasi di fiti.

Baka di wan brada ben taki syatu fu a Waktitoren di wi ben musu studeri na ini a wiki dati, dan a lasti lezing fu a kongres ben hori. A lezing disi ben abi leki nen „Du furu bun wroko leki fayafaya Kownukondre preikiman”. A takiman ben sori fa a programa ben tranga wi na yeye fasi èn a ben gi wi deki-ati fu frutrow tapu Yehovah. Na a kaba, wi ben kisi a deki-ati fu de krin, lobi-ati, èn fayafaya Kownukondre preikiman.—1 Petrus 2:12.

Neleki den futuboi fu Yehovah na ini a ten fu Nehemia, wi tu ben drai go baka na oso nanga prisiri fu di wi ben kisi blesi na yeyefasi na den „Fayafaya Kownukondre preikiman” Distrikt Kongres (Nehemia 8:12). A kongres disi gi wi deki-ati trutru. A gi yu prisiri èn a meki yu kisi wan fasti bosroiti fu tan go doro leki wan fayafaya Kownukondre preikiman, a no so?

[Faki/Prenki na tapu bladzijde 23]

Wan nyun yepisani fu studeri nanga sma!

Na a kaba fu a fosi dei fu a kongres, dan den wan di ben de drape ben prisiri srefisrefi fu yere taki wan nyun buku kon na doro, di abi leki nen Aanbid de enige ware God (Anbegi a wan-enkri tru Gado). A buku disi ben meki fu studeri nanga den sma di ben kaba studeri a buku Sabi di e tyari joe go na têgo libi. A sa tranga a bribi fu den sma di abi a „yoisti denki fu a têgo libi”.—Tori fu den Apostel 13:48.

[Sma di abi a reti fu a prenki]

A prenki na tapu a kafti fu a buku: US. Navy photo

[Faki/Prenki na tapu bladzijde 24]

Yepi trawan fu kon krosibei na Gado

A lasti takiman fu a di fu tu dei fu a kongres ben meki bekènti taki wan nyun buku kon na doro di abi a nen Nader dicht tot Jehovah (Kon krosibei na Yehovah). A buku disi prati na ini fo prenspari pisi. Ibri pisi e taki fu wan fu den moro prenspari fasi fu Yehovah, namku makti, retidu, koni, èn lobi. Ibri pisi fu a buku abi wan kapitel di e sori fa Yesus Krestes yepi wi fu si krinkrin fa Gado de trutru. A moro prenspari marki fu a buku disi na fu yepi wi èn den bijbelstudie fu wi, fu kisi wan moro krosibei banti èn wan moro tranga matifasi nanga Yehovah Gado.

[Faki/Prenki na tapu bladzijde 26]

Rai di kan meki yongu sma gro na yeye fasi

A heimarki fu a di fu dri dei fu a kongres ben de di wan nyun traktaat ben kon na doro, di abi leki nen Yonguwan—San unu o du nanga un libi? A traktaat disi ben meki fu yepi yongu Kotoigi teki bun bosroiti na ini den libi gi a ten di e kon. Dati meki a traktaat disi e gi Bijbel rai fu sori fa yonguwan kan meki a furuten diniwroko gi Yehovah, tron a libiwroko fu den.