’Gado e prisiri nanga wan bun sma’

ALA libi e komoto na Yehovah Gado (Psalm 36:9). Iya, „nanga yepi fu en wi abi libi èn wi e buweigi èn wi de” (Tori fu den Apostel 17:28). Te wi e prakseri den bun sani di wan sma sa kisi te a abi wan banti nanga Gado, dan wi ati no e furu nanga tangi dan? We, te fu kaba „a presenti di Gado e gi, na têgo libi” (Romesma 6:23). Fu dati ede, a de trutru prenspari fu wi suku fu feni bun fu Yehovah!

A psalm skrifiman e gi wi a dyaranti taki ’grani na san Gado e gi’ (Psalm 84:11). Ma suma Gado e gi a grani disi? Furu sma na ini a ten disi e gi grani na tra sma, fu di den tra sma disi kisi bun skoroleri, den abi furu gudu, den abi wan spesrutu skin kloru, den komoto fu wan spesrutu presi noso kondre, èn go so moro fara. Ma na suma Gado e gi grani? Kownu Salomo na ini Israel fu owruten e piki: „Yehovah e prisiri nanga wan bun sma, ma a e krutu wan sma nanga ogri prakseri.”​—Odo 12:2.

A de krin, taki Yehovah lobi bun sma. Den bun sani fu wan bun sma, abi fu du nanga sani soleki taki a e dwengi ensrefi, a e libi bun nanga ala sma, a abi sakafasi nanga sari-ati, èn a abi koni. Den sani di a sma disi e prakseri de regtfardiki, den sani di a e taki e gi sma deki-ati èn den sani di a e du de yoisti èn e gi winimarki. A fosi pisi fu a di fu 12 kapitel fu a Bijbel buku Odo e sori wi fa bunfasi musu abi krakti tapu wi aladei libi, èn a e sori wi den winimarki di wi sa kisi te wi e sori a bunfasi disi. Efu wi e poti prakseri na san skrifi drape, dan dati sa gi wi „koni fu du san bun” (Psalm 36:3). Efu wi e fiti a koni rai di wi e kisi drape, dan dati sa yepi wi fu feni bun fu Gado.

Trangaleri de kefalek prenspari

„A sma di lobi trangaleri, na wan sma di lobi sabi, ma wan sma di no lobi piri-ai, na wan don sma”, na so Salomo e taki (Odo 12:1). Wan bun man e angri fu tan du san bun, dati meki a wani kisi trangaleri nomonomo. A gaw fu gebroiki den rai di a e kisi na den Kresten konmakandra noso den rai di a e kisi te a e taki nanga trawan. Den wortu di a e feni na ini Bijbel èn na ini den Bijbel publikâsi, de gi en neleki tiki nanga srapu penti di sma e gebroiki fu meki wan meti waka a reti pasi. A bun man disi e suku fu kon sabi sani, èn a e gebroiki dati fu meki en pasi reti. Iya, wan sma di lobi trangaleri, na wan sma di lobi sabi sosrefi.

Fu tru, trangaleri de tranga fanowdu gi tru anbegiman, spesrutu a sortu trangaleri pe den musu dwengi densrefi! Wi kan winsi taki wi ben sabi moro fu Gado Wortu. A kan tu, taki wi wani kon moro bun na ini a Kresten diniwroko èn sosrefi taki wi wani tron moro bun leriman fu Gado Wortu (Mateyus 24:14; 28:19, 20). Ma wi sa musu man dwengi wisrefi efu wi wani taki den sortu winsi disi kon tru gi wi. Na ini tra sani fu wi libi, wi musu man dwengi wisrefi tu. Fu eksempre, furu sani de na ini a ten disi fu meki wi kisi lostu di no bun kwetikweti. Sobun, wi sa musu man dwengi wisrefi fu no luku sani di no fiti. A no so? Boiti dati, fu di „den firi di libisma abi na ini en ati, takru fu sensi en yongu yari”, meki a kan pasa nanga wi tu, taki wi e go prakseri takru sani di abi fu du nanga hurudu (Genesis 8:21). Wi sa musu man dwengi wisrefi, so taki wi no tan prakseri so wan sani.

Ma na a tra sei, wan sma di no lobi piri-ai, na  wan sma di no lobi trangaleri, èn a no lobi sabi tu. A sondu libisma skin no lobi kisi piri-ai srefisrefi. Te wan sma e brokokindi gi a firi dati, dan dati e meki taki a e lagi ensrefi fu tron neleki wan meti sondro frustan di no sabi fa fu tyari ensrefi na wan fasi di fiti. Wi musu du ala san wi man fu kakafutu gi a sortu firi dati.

’Loetoe di no sa bewegi’

A no de fu taki dati wan bun man noiti no kan de wan sma di no de regtfardiki noso di no e du san reti. Sobun, efu wan sma wani taki Gado feni en bun, dan a musu de regtfardiki tu. Kownu David ben singi: „Bikasi yusrefi sa blesi ibri regtfardiki sma, O Yehovah; yu sa lontu en fu kibri en neleki nanga bigi fetisani” (Psalm 5:12). Salomo sori taki wan regtfardiki sma de heri tra fasi leki wan ogrisma, di a taki: „Nowan sma sa tan tanapu kánkan te a e du ogridu; ma den rutu fu den regtfardiki sma, no sa degedege kwetikweti.”​—Odo 12:3.

A kan gersi leki a e go bun nanga den ogriwan. Poti prakseri na san ben miti a psalm skrifiman Asaf. „Fu mi sei,” na so Asaf e taki, dan „pikinmoro den futu fu mi ben lasi pasi.” Fu san ede? Asaf e piki: „Mi ben kon dyarusu na tapu den sma di e meki bigi, di moro nanga moro mi ben kon si a vrede fu den ogrisma” (Ps. 73:2, 3). Ma di a ben kon na ini a santa tempel fu Gado, ne a kon frustan taki Yehovah poti den ogriwan na tapu grati gron (Psalm 73:17, 18). Awansi a gersi taki sani e waka bun nanga den ogriwan, toku disi sa de gi wan syatu pisi ten nomo. Dati meki, wi no abi fu dyarusu kwetikweti tapu den ogriwan.

Na a tra sei, a sma di Yehovah feni bun, na wan sma di no e seki. Salomo ben agersi disi nanga a tranga rutu fu wan bon, di a taki: „Ma da loetoe foe da regtvaardiki soema no sa bewegi” (Odo 12:3, Da Bijbel na ini Sranantongo). Den rutu fu wan bigi bon, wi no man si nanga wi ai. Na so yu abi den rutu fu wan bigi bon di den e kari a sequoia-bon na Kalifornia. Den rutu fu a bon disi kan waka moro leki 100 meter moro fara fu a presi pe a bon srefi tanapu. Disi e meki taki a bon tanapu kánkan srefi te wan bun hebi alen fadon, noso te wan bigi winti wai. So wan kefalek hei bon, kan tan tanapu sondro fu fadon, srefi te yu abi wan bigi gronseki.

Neleki fa den rutu fu den bon disi e teki watra nanga tra sani na ini a gron, na so wi ati nanga wi prakseri musu go dipi na ini Gado Wortu fu teki a libiwatra puru fu a Wortu disi. Na so fasi wi bribi e kon moro tranga, aladi wi howpu de kánkan, sondro fu degedege (Hebrewsma 6:19). Wi no sa „degedege neleki fa winti e naki skwala go na ala sei, fu di sma no sa bedrigi wi nanga ala sortu [falsi] leri” (Efeisesma 4:14). A no de fu taki, dati wi sa firi te hebi tesi e kon na wi tapu, kande wi kan beifi srefi te gensman e kon na wi tapu. Ma ’den rutu fu wi no sa degedege’.

„Wan bun wefi na wan kransi gi en masra”

Na ini son tongo sma abi wan odo di e taki: „Te sani e waka bun gi wan man, dan na en baka yu abi wan bun uma.” Salomo ben sori o prenspari a de fu wan man abi wan uma di e yepi en, di a taki: „Wan bun wefi de leki wan kransi gi en masra, ma wan wefi di e meki en masra kisi syen de neleki en bonyo e pori” (Odo 12:4). A wortu „bun” abi fu du nanga furu bun sani di wan sma man du. Den bun sani di wan bun wefi e du, skrifi finifini na ini Odo kapitel 31; drape skrifi fu sani soleki a lobi di a sma lobi fu wroko, a getrowfasi nanga koni di a abi. Te wan uma abi den sani disi, dan a de leki wan kransi gi en masra, fu di a bun fasi fa na uma e tyari ensrefi, e gi grani na en masra, èn dati e meki taki trawan abi moro lespeki gi a masra disi. Noiti a no e suku fu pasa en masra, noso fu strei nanga en. Na presi fu dati, a de wan sma di de wan yepi gi en masra.

Fa wan uma kan meki en masra kisi syen? San kan de a bakapisi fu dati? A sani di na uma kan du fu gi en masra syen, kan de taki a lobi fu meki trobi nanga en masra, noso moro ogri srefi, taki na uma e go du hurudu (Odo 7:10-23; 19:13). Te wan wefi e du den sortu sani disi, dan a bakapisi fu dati na taki a e broko a masra fu en. Dati sa meki taki a wefi sa de gi en masra neleki „en bonyo e pori”, fu di „a e pori en, neleki fa wan siki e swaki ala den bonyo fu a skin”, na so wan buku e taki. „Na ini a ten disi wi ben sa kari en wan takru siki soleki ’kanker’; wan siki di safrisafri e puru ala krakti di wan libisma abi”, na so wan tra buku e taki. Meki a de so, taki Kresten wefi e meki muiti fu Gado feni den bun, fu di den e tyari densrefi na wan bun fasi neleki fa wan bun wefi e du dati.

 Den sani di sma e prakseri, e meki taki den e du sani, èn dati baka e meki sani waka bun noso takru gi den

Den sani di sma e prakseri, e meki taki den e du sani, èn dati baka e meki sani waka bun noso takru gi den. Now Salomo e sori taki san sma e denki, e meki taki den e du sani. Salomo e taki dati, fu di a e agersi den regtfardiki sma nanga den ogri sma. Salomo e taki: „Den sani di den regtfardikiwan e prakseri na reti; a fasi fa den ogriwan e tiri, e kori trawan. Den wortu fu den ogriwan na fu didon wakti tapu brudu, ma a mofo fu den reti-ati sma na dati sa frulusu den.”​—Odo 12:5, 6.

Srefi den sani di bun sma e prakseri na bun sani, èn den sani disi abi fu du langalanga nanga san de reti èn regtfardiki. Den regtfardikiwan lobi Gado èn den lobi tra sma; fu dati ede ala san den wani du na bun sani. Ma na a tra sei, den ogrisma e denki densrefi nomo. Dati meki, a fasi fa den wani doro den marki fu den, na fu kori trawan. Den sani di den e du, na fu bedrigi trawan. Den no e draidrai fu seti wan trapu gi sma di no abi noti fu du nanga a tori; disi den e du na fesi krutubangi kande, te den e fruteri leitori fu krutu sma di no du notinoti. Den sani di den ogrisma e taki na „fu didon wakti tapu brudu”, fu di den wani du den sma ogri di no du notinoti. Den reti-ati sma sabi san den ogrisma abi na prakseri èn den abi a koni tu fu luku bun san den e du. Fu dati ede den reti-ati sma kan wai pasi gi den ogri sani disi. Den kan warskow trawan srefi, spesrutu den wan di no sabi den sani disi fu den ogriwan. Na so fasi den reti-ati sma kan frulusu den sma disi fu den ogriwan di e seti krafana gi den fu kan kisi den.

San o pasa nanga den regtfardikiwan èn nanga den ogriwan? „Den e teki den ogri sma trowe so taki den no de moro,” na so Salomo e piki, „ma na oso fu den regtfardikiwan sa tan tanapu” (Odo 12:7). Wan buku e taki dati na oso, „abi fu du nanga na osofamiri nanga ala tra sani di warti gi wan sma; ala den sani di e meki taki a kan libi soleki fa a fiti”. Na oso kan sori go sosrefi na den famiriman nanga den bakapikin fu na regtfardikiwan. Awansi fa a no fa, a sani di na odo disi wani sori wi de krin: A regtfardiki sma sa tan tanapu kánkan te trawan e gens en hebihebi.

Sani sa waka moro bun gi a sma di abi sakafasi

A kownu fu Israel ben poti krakti na tapu o prenspari a de fu abi a koni fu man si sani krin, di a taki: „Wan man sa kisi bun nen te en mofo e taki sani nanga koni, ma den sa teige ibri sma di abi wan takru ati” (Odo 12:8). Wan sma di abi a koni fu man si sani krin, sa luku bun fu no taki sani gawgaw nanga en mofo. A e denki bun fosi a taki wan sani, èn a e libi bun nanga trawan fu di „en mofo e taki sani nanga koni”, èn dati meki a e denki bun sortu sani a o taki. Te tra sma e aksi don sani, dan wan man di abi a koni fu man si sani krin, sa man hori ensrefi ’fu no taki’ (Odo 17:27). Trawan e prèise sowan man èn Yehovah lobi so wan man tu. So wan man de heri tra fasi leki a sma di abi kruktu denki di e komoto fu wan ’takru ati’!

Iya, fu tru, den e prèise wan man di abi a koni fu man si sani krin, ma a tra vers fu odo e leri wi o warti a de fu abi sakafasi tu. Na odo e taki: „A wan di trawan e wisiwasi, ma di abi wan futuboi, moro bun leki a wan di e meki ensrefi bigi, ma di e mankeri brede” (Odo 12:9). A gersi leki Salomo wani sori wi dyaso taki a moro bun fu de wan sma di abi sakafasi èn di no abi furu gudu, di abi soso wán futuboi nomo. Dati moro bun leki fu de wan sma di e gi ala san a abi na ini a libi, nomo fu tron wan gudu sma di e kisi biginen na ini a libimakandra. Disi na trutru bun rai gi wi! Meki wi libi nanga den sani di wi abi!

Wi kan leri bunfasi sosrefi fu a libi fu gronman noso sma di e kweki meti

Salomo e leri wi tu sani fu bunfasi fu di a e sori tapu a libi fu gronman noso fu sma di e kweki meti. „A regtfardikiwan e sorgu gi a sili fu en osometi,” na so Salomo e taki, „ma den sari-atifasi fu den ogrisma ogri pasa marki” (Odo 12:10). A regtfardiki man abi switifasi gi den meti fu en. A sabi san den meti fu en abi fanowdu èn a e sorgu taki sani e go bun nanga den. Wan ogrisma kan taki dati a e broko en ede nanga meti, ma a no e firi taki a musu du sani fu sorgu den trutru. Den sani di a e du, a e du nomo fu kisi wini gi ensrefi, èn fu dati ede a e luku den meti so taki a kan meki moni nanga den bakaten. Kande so wan ogri sma e denki  taki a e sorgu bun gi den meti fu en, ma te yu luku en bun, dan a e du den meti ogri.

A gronprakseri fu sorgu meti bun, wi kan gebroiki sosrefi gi den osometi. A no ben o bun kwetikweti fu teki meti na oso, èn dan meki den pina! Disi kan pasa te wan sma no ben o sorgu den meti disi, noso a ben o gi den meti disi mankeri. A kan pasa taki wan meti siki hebi noso taki a kisi hebi mankeri, so taki a e pina srefisrefi. Fu abi switifasi gi so wan meti, wani taki kande fu kiri en, so taki a no e pina moro langa.

Salomo e taki fu wan tra sani now, namku fu wroko gron. Disi a e du te a e taki: „A sma di e wroko en gron sa abi brede nofo.” Na so a de trutru, taki te wan sma e wroko tranga, dan a sa kisi wini fu dati. „Ma a sma di e feti baka sani di no warti notinoti, e mankeri ati” (Odo 12:11). Fu di a sma di „e mankeri ati” no man krutu sani na wan bun fasi noso no man frustan sani bun, meki a e feti baka soso sani, noso a e tyari en libi kon ini kefar fu meki moro moni, aladi a no de seiker srefi efu sani sa waka bun nanga so wan bisnis afersi. A sani di wi kan leri fu den tu vers disi de krin: Wi musu abi sari-ati èn wi musu wroko tranga.

Den regtfardikiwan e meki froktu

„Na ogriwan lostu den sani di takru sma fanga na ini den tyasnet”, na so a koni kownu e taki (Odo 12:12a). Fa na ogriwan e du dati? A e du dati fu di a wani sani di trawan fufuru na wan takru fasi.

San wi kan taki fu wan bun sma? So wan sma lobi trangaleri, dati meki a rutu steifi na ini a bribi. So wan sma de regtfardiki èn a e du san reti, a koni èn a abi sakafasi, a abi sari-ati èn a de nanga faya. Salomo e taki moro fara, „ma a rutu fu den regtfardikiwan”, „e meki froktu”, noso a e „gi froktoe” (Odo 12:12b; Da Bijbel na ini Sranantongo). Wan tra Bijbel na ini Ingrisitongo e taki dati ’a rutu fu a regtfardikiwan sa tan fu têgo’ (An American Translation). So wan sma e tanapu kánkan, sondro fu degedege. Fu tru, ’wan bun sma sa feni bun fu Gado’. Fu dati ede, meki wi „frutrow tapu Yehovah èn du bun”.​—Psalm 37:3.

[Prenki na tapu bladzijde 31]

Neleki fa wan bun èn tranga bon abi bun steifi rutu, na so a de tu nanga a bribi fu a regtfardikiwan