O tranga a bribi fu yu de?

„A bribi fu unu e meki taki unu e tanapu.”​—2 KORENTESMA 1:24.

1, 2. Fu san ede wi musu abi bribi? Fa wi kan meki a bribi fu wi kon moro tranga?

DEN futuboi fu Yehovah sabi taki den musu abi bribi. Te yu luku en bun, dan ’sondro bribi wan sma no man plisi Gado’ (Hebrewsma 11:6). Dati meki wi e sori koni te wi e begi fu kisi santa yeye nanga bribi, fu di bribi na wan fu den tumusi moi froktu fu a yeye (Lukas 11:13; Galasiasma 5:22, 23). Te wi e pruberi fu sori a srefi bribi di tra bribiman e sori, dan dati kan yepi wi sosrefi fu meki wi eigi bribi kon moro tranga.​—2 Timoteyus 1:5; Hebrewsma 13:7.

² A bribi fu wi sa kon moro tranga, efu wi du muiti fu tan waka soleki fa Gado Wortu e sori ala Kresten taki den musu waka. Wi kan kisi moro bribi te wi leisi Bijbel ibri dei, èn te wi studeri den Buku fu Bijbel fayafaya nanga yepi fu buku di „a getrow basya” e gi wi (Lukas 12:42-44; Yosua 1:7, 8). Te wi de na den alawiki Kresten konmakandra ala ten, èn sosrefi na den Kongres nanga den tra bigi konmakandra, dan wi kan kisi deki-ati te wi e si a bribi fu trawan (Romesma 1:11, 12; Hebrewsma 10:24, 25). A bribi fu wi e kon moro tranga tu te wi e taki nanga tra sma na ini a preikiwroko.​—Psalm 145:10-13; Romesma 10:11-15.

3. Na sortu fasi lobi-ati Kresten owruman e yepi wi fu meki wi bribi kon moro tranga?

³ Lobi-ati Kresten owruman kan gebroiki Bijbel rai fu gi wi deki-ati. Na a fasi dati den e yepi wi fu meki wi bribi kon moro tranga. Den e denki na a  srefi fasi leki na apostel Paulus di ben taigi den brada na Korente: „Wi e wroko makandra nanga unu, so taki un kan de nanga prisiri, bika a bribi fu unu e meki taki unu e tanapu” (2 Korentesma 1:23, 24). Wan tra bijbelvertaling e taki: „Wi e wroko makandra nanga unu fu gi unu prisiri, bika a bribi fu unu tranga” (Contemporary English Version). Den regtfardikiwan e libi fu di den abi bribi. A no de fu taki dati nowan tra sma kan sori bribi gi wi noso kan meki taki wi tan hori wi soifri retifasi. Na ini na afersi disi ’wi musu tyari wi eigi lai’.​—Galasiasma 3:11; 6:5.

4. Fa den Bijbel tori fu sma di ben dini Gado getrow kan yepi fu tranga a bribi fu wi?

⁴ Bijbel lai nanga tori fu sma di ben abi bribi. Kande wi sabi furu fu den bun sani di den ben du. Ma fa a de nanga a bribi di den sori na ini den aladei libi? Iya, fa den ben sori bribi, den heri libi langa? Te wi e poti prakseri now na a fasi fa den ben sori bribi di den ben e kisi fu du nanga den srefi sortu sani di wi e ondrofeni, dan dati kan yepi fu meki wi bribi kon moro tranga.

Bribi e gi wi deki-ati

5. Fa Bijbel e sori taki bribi e tranga wi fu preiki a Wortu fu Gado nanga deki-ati?

⁵ Bribi e gi wi krakti fu preiki a wortu fu Gado nanga deki-ati. Nanga deki-ati Heinok ben warskow sma taki wan dei ben o kon di Gado ben o krutu sma. A ben taki: „Luku! Yehovah ben kon nanga den dusundusun santawan fu en, fu krutu ala sma èn fu buweisi ala den ogri sma [san na] den ogri di den du, èn ala den takru sani di den ogri sondari ben taigi en” (Yudas 14, 15). A no de fu taki dati den ogri-ati feanti fu Heinok ben wani kiri en di den yere den sani di a ben taki. Toku a tan sori deki-ati nanga bribi te a ben e taki nanga den. Dan Yehovah „puru en” fu di a ben meki Heinok sribi na ini dede. Soleki fa a sori, dan dati pasa na wan fasi pe a no ben abi fu pina fosi a dede (Genesis 5:24; Hebrewsma 11:5). Na ini a ten disi wi no e ondrofeni den sortu wondru disi, ma Yehovah e piki den begi fu wi so taki wi kan tan sori bribi nanga deki-ati, te wi e preiki a wortu fu en.​—Tori fu den Apostel 4:24-31.

6. Fa bribi nanga a deki-ati di Gado ben gi Noa, ben yepi en?

⁶ Fu di Noa ben abi bribi meki a ben „bow wan ark fu kibri na osofamiri fu en” (Hebrewsma 11:7; Genesis 6:13-22). Noa ben de „wan preikiman fu regtfardikifasi” sosrefi. Nanga deki-ati a ben preiki den warskow fu Gado gi den sma di ben e libi na ini a ten fu en (2 Petrus 2:5). A musu fu de taki den ben e spotu en te a ben e taki dati wan bigi Frudu ben o kon. Na so a de tu taki sma e spotu wi te wi e sori den na ini Bijbel taki heri esi a seti fu sani disi sa kisi pori (2 Petrus 3:3-12). Fu di Gado e gi wi bribi nanga deki-ati, meki wi man tan preiki a boskopu disi, neleki fa Heinok nanga Noa ben du dati.

Bribi e meki wi hori pasensi

7. Fa Abraham èn sosrefi furu tra sma, ben sori taki den ben abi bribi nanga pasensi?

⁷ Wi abi bribi nanga pasensi fanowdu, spesrutu na a ten disi di a kaba fu na ogri seti fu sani disi de fu kon. Wan fu den sma ’di sa kisi den pramisi fu di a ben sori bribi nanga pasensi’, na a famiri-edeman Abraham; wan man di ben e frede Gado (Hebrewsma 6:11, 12). Fu di a ben abi bribi meki a ben gowe libi a foto Ur nanga ala den bun sani di a ben abi drape, fu tron wan freimde sma na ini wan kondre di Gado ben pramisi en. Isak nanga Yakob ben kisi a srefi pramisi dati. Ma den alamala ’dede na ini bribi, aladi den no ben si a kontru fu den pramisi’. Fu di den ben abi bribi meki den ’suku fu kisi wan moro bun presi, dati wani taki, wan di de fu hemel’. Dati meki Gado „sreka wan foto gi den”  (Hebrewsma 11:8-16). Iya, nanga pasensi Abraham, Isak, Yakob, makandra nanga den wefi fu den di ben e frede Gado, ben wakti tapu a tiri fu a Kownukondre fu Gado. Te a Kownukondre dati sa tiri, dan den sa kisi wan opobaka fu libi na grontapu.

8. A kontru fu sortu pramisi, Abraham, Isak, nanga Yakob no ben si, aladi den tan sori pasensi nanga bribi?

⁸ Abraham, Isak, nanga Yakob no ben lasi bribi. Den no ben kisi a Pramisi Kondre na a pisi ten di den ben de na libi. Sosrefi den no ben si fa ala pipel blesi densrefi nanga yepi fu a siri fu Abraham (Genesis 15:5-7; 22:15-18). Bijbel taki dati Gado ben o ’bow wan foto’. Aladi furu yarihondro ben o pasa bifo Gado ben o seti a foto disi, toku den man disi ben tan sori bribi nanga pasensi den heri libi langa. Sobun, wi musu sori a srefi bribi disi, now di a Mesias Kownukondre dati seti kaba na ini hemel.​—Psalm 42:5, 11; 43:5.

Bribi e meki taki wi e suku fu doro marki di prenspari

9. San bribi abi fu du nanga den marki di wi wani doro na ini a libi?

⁹ Den getrow famiri-edeman noiti no teki a lagi fasi fu libi fu den Kanansma, bika den ben e suku fu doro marki di ben de moro prenspari. Na a srefi fasi bribi e yepi wi fu poti marki gi wisrefi di abi fu du nanga yeye afersi, so taki wi no kon de leki a grontapu disi di de na ini a makti fu na ogriwan, Satan Didibri.​—1 Yohanes 2:15-17; 5:19.

10. Fa wi sabi taki Yosef no ben e feti fu kisi barinen na ini grontapu, ma taki a ben suku fu doro marki di moro prenspari?

¹⁰ Gado ben tiri sani na so wan fasi taki Yosef, a manpikin fu Yakob, ben kan dini leki edeman fu nyanyan afersi na ini Egepte. Ma a no ben de a marki fu Yosef fu tron wan prenspari man na ini a grontapu disi. Yosef, di ben kon abi 110 yari, ben abi bribi na ini a kontru fu den pramisi fu Yehovah. Fu dati ede a ben taigi den brada fu en: „Mi e dede; ma mi sabi taki Yehovah sa poti en prakseri na un tapu. A no abi misi taki a sa puru unu na ini a kondre disi fu tyari unu go na a kondre di a ben sweri fu gi na Abraham, Isak, nanga Yakob.” Yosef ben aksi den fu beri en na ini a pramisi kondre. Di a dede, dan den sreka a dedeskin fu en so taki a no pori. Baka dati, den poti en na ini wan dedekisi na ini Egepte. Ma di den Israelsma ben kon fri fu katibo na ini Egepte, dan a profeiti Moses ben meki sma teki den bonyo fu Yosef fu go beri den na ini a Pramisi Kondre (Genesis 50:22-26; Exodus 13:19). Efu wi abi a srefi bribi leki Yosef, dan dati sa pusu wi fu suku fu doro marki na ini wi libi di moro prenspari leki fu kisi barinen na ini grontapu.​—1 Korentesma 7:29-31.

11. Fa Moses sori taki a ben e suku fu doro marki na yeye fasi?

¹¹ Moses ben de wan memre fu na kownu famiri fu Egepte, èn a ben kisi bun skoroleri. Toku „a ben frukisi fu nyan pina nanga a pipel fu Gado na presi fu prisiri nanga wan sondu libi di de fu wan syatu pisi ten nomo” (Hebrewsma 11:23-26; Tori fu den  Apostel 7:20-22). A ben lasi na okasi fu kisi barinen na ini grontapu. A ben lasi na okasi sosrefi taki sma poti en na ini wan tumusi moi kisi fu beri en nanga furu pranpran, na wan fu den moro prenspari presi fu Egepte. Ma sortu wini den sani disi ben o abi, te yu teki den gersi nanga a grani di Moses ben kisi, fu de wan „man fu a tru Gado”, a mindriman fu a Wet frubontu, wan profeiti fu Yehovah, sosrefi wan Bijbel skrifiman? (Esra 3:2) Fa a de nanga yu? Yu e suku nomo fu go na fesi fu kisi barinen na ini a libimakandra, noso a de so taki a bribi fu yu meki taki yu e suku fu doro moro prenspari marki?

Bribi e meki taki wi libi no de fu soso

12. Fa a libi fu Rakab kon kenki fu di a ben abi bribi?

¹² Bribi e meki sma suku fu doro den yoisti marki na ini a libi, èn a e meki tu taki den no e libi fu soso. A no de fu taki dati a hurulibi fu Rakab fu Yerikow, no ben e tyari wini kon gi en. Ma dati ben kon kenki trutru, di a ben sori bribi! Gado ben fruklari Rakab ’regtfardiki fu di a ben du wroko di ben e sori taki a abi bribi, baka di a ben teki den boskopuman fu Israel na en oso, na wan switi fasi’. Dati meki den feanti fu a kondre Kanan no ben man kisi den (Yakobus 2:24-26). Rakab ben frustan taki Yehovah na a tru Gado, èn dati meki a ben sori bribi tu, fu di a ben tapu nanga a hurulibi fu en (Yosua 2:9-11; Hebrewsma 11:30, 31). A ben trow nanga wan futuboi fu Yehovah. A no trow nanga wan Kanansma di no ben e bribi na ini Yehovah (Deuteronomium 7:3, 4; 1 Korentesma 7:39). Rakab ben kisi a bigi grani fu tron wan fu den afo fu a Mesias (1 Kroniki 2:3-15; Rut 4:20-22; Mateyus 1:5, 6). Neleki furu trawan di ben drai den baka gi wan doti fasi fu libi, na so na uma disi sa kisi ete wan bigi blesi, namku wan opobaka fu libi na ini wan paradijs grontapu.

13. Fa David sondu nanga Batseiba, ma fa a ben tyari ensrefi baka dati?

¹³ Baka di Rakab ben drai baka gi a sondu libi fu en, dan neleki fa a sori, a tan waka na wan reti fasi. Toku a de so taki son sma di ben dini Gado na wan getrow fasi wan heri pisi ten kaba, ben du bigi sondu. Kownu David ben du sutadu nanga Batseiba, a ben meki sma kiri a masra fu en na ini feti èn baka dati a teki Batseiba leki en wefi (2 Samuel 11:1-27). Fu di David ben e sari srefisrefi meki a ben begi Yehovah: „O grantangi, no meki yu santa yeye komoto na mi tapu.” David no ben lasi a santa yeye fu Gado. A ben sabi taki Yehovah abi sari-ati. Dati meki a ben bribi taki Yehovah no ben o wisiwasi  „wan ati di broko èn di masi” fu sondu ede (Psalm 51:11, 17; 103:10-14). Fu di David nanga Batseiba ben sori bribi, meki den kisi a grani fu de na ini a famirilin pe a Mesias ben o komoto.​—1 Kroniki 3:5; Mateyus 1:6, 16; Lukas 3:23, 31.

Bribi di kon tranga fu di Gado ben gi yepi

14. Sortu dyaranti Gideon ben kisi? Fa a tori disi kan yepi fu meki a bribi fu wi kon moro tranga?

¹⁴ Aladi wi e waka na ini bribi, toku a de fanowdu ten na ten fu kisi a dyaranti taki Gado e yepi wi. Na so a ben de tu nanga Krutuman Gideon; wan fu den sma di ’ben wini kownukondre na ini feti fu di a ben abi bribi’ (Hebrewsma 11:32, 33). Di den Midiansma nanga den kompe fu den, ben broko go na ini Israel, dan a yeye fu Gado ben de nanga Gideon. Ma fu di a ben wani a dyaranti taki Yehovah ben de nanga en, meki Gideon ben aksi Gado fu gi en wan marki. A ben o gebroiki wan pisi skapububa di a ben o libi wan heri neti na tapu a gron na wan presi pe sma ben e masi sani. A fosi leisi a skapububa wawan ben kisi dow, ma a gron lontu en ben tan drei. Na a di fu tu okasi a skapububa tan drei aladi a gron lontu en ben nati krinkrin. Den sani disi, ben gi Gideon a dyaranti taki Gado ben de nanga en. Dati meki a man disi di ben handri nanga koni, ben du spesrutu sani fu sori taki a abi bribi èn a ben wini den feanti fu Israel (Krutuman 6:33-40; 7:19-25). Efu wi e suku fu kon sabi efu wan bosroiti di wi o teki na wan bun bosroiti, dan dati no wani taki dati wi no abi bribi. Na presi fu dati wi e sori taki wi abi bribi te wi luku fosi san Bijbel noso tra Kresten publikâsi e taki, noso te wi begi fu kisi a tiri fu a santa yeye te wi musu teki bosroiti.​—Romesma 8:26, 27.

15. Fa a kan de wan yepi gi wi te wi prakseri bun fu a fasi fa Barak ben sori bribi?

¹⁵ A bribi fu Krutuman Barak ben kon moro tranga fu di wan sma ben gi en deki-ati. A deki-ati di a ben kisi ben de leki wan dyaranti gi en. Na umaprofeiti Debora ben gi Barak deki-ati fu opo du wan sani fu fri den Israelsma fu a kwinsi di Kownu Yabin fu Kanan, ben kwinsi den. Barak ben abi bribi. Sosrefi a ben abi a dyaranti taki Gado ben o yepi en. Dati meki a ben teki fesi fu tyari wan legre fu 10.000 man go feti, aladi den srudati disi no ben abi bun fetisani. Toku den ben man wini a kefalek bigi legre fu Yabin di ben de na ondro a tiri fu Sisera. Debora nanga Barak ben singi wan tumusi moi singi di e taki fu a tori disi (Krutuman 4:1–5:31). Debora ben gi Barak deki-ati fu teki fesi leki a sma di Gado poti fu tiri Israel. Barak ben de wan fu den futuboi fu Yehovah di ben ’yagi den legre fu den doroseisma fu di a ben abi bribi’ (Hebrewsma 11:34). Son ten wi kan frede pikinso fu du a diniwroko fu Yehovah, spesrutu efu wi kisi fu du nanga situwâsi di de wan tyalensi gi wi. Na den momenti dati wi kan prakseri baka fa Gado ben blesi Barak di a tyari ensrefi na wan fasi di ben sori taki a ben abi bribi. Dati kan gi wi deki-ati trutru.

Bribi e meki taki vrede de

16. Sortu tumusi moi eksempre Abraham gi wi ini a fasi fa a suku fu abi vrede nanga Lot?

¹⁶ A kan taki a diniwroko di wi e du gi Yehovah de wan tyalensi gi wi. Ma neleki fa bribi e yepi wi fu man du wi diniwroko, na so bribi e meki taki wi abi vrede, èn sosrefi wan bun banti nanga trawan. Di den skapuman fu Abraham nanga den di fu Lot ben kisi trobi nanga densrefi, dan na owru Abraham ben abi fu prati nanga Lot, en brada pikin di ben yongu moro en. Ne a ben gi Lot na okasi fu teki den moro bun weigron di ben de (Genesis 13:7-12). A musu de taki a bribi fu Abraham ben meki taki a begi Gado fu yepi en fu lusu a problema dati. Na presi fu poti en eigi wani na a fosi presi, a ben seti na afersi disi sondro dyugudyugu. Efu a de so taki wi kisi trobi nanga wan Kresten brada noso sisa, dan meki wi sori bribi fu di wi o begi fu kan „suku vrede” nanga tra sma, aladi wi e memre a lobi-ati fasi fa Abraham ben tyari ensrefi.​—1 Petrus 3:10-12.

17. Fu san ede wi kan taki dati a trobi di ben de na mindri Paulus, Barnabas, nanga Markus ben tapu sondro dyugudyugu?

¹⁷ Kon meki wi luku fa bribi kan yepi wi fu libi na ini vrede nanga trawan te wi e hori wisrefi na Kresten gronprakseri. Di Paulus ben de fu bigin nanga a di fu tu preikiwaka fu en, dan Barnabas ben agri fu go nanga en fu fisiti den gemeente na ini Siprus nanga Pikin Asia ete wan leisi. Ma Barnabas ben wani tyari en neef Markus go tu. Paulus no ben wani dati, fu di Markus ben gowe libi den di den ben de na ini Pamfilia. Ne „wan bigi atibron ben kon”. A trobi dati ben meki taki den prati fu makandra srefi. Barnabas ben tyari Markus go nanga en na Siprus, aladi Paulus ben teki Silas fu go nanga en „na Siria nanga Silisia, pe den tranga den  gemeente” (Tori fu den Apostel 15:36-41). Baka wan pisi ten a sori leki den tu man disi ben meki vrede baka, fu di Markus ben de nanga Paulus na ini Rome, èn Paulus ben e taki bun fu en (Kolosesma 4:10; Fileimon 23, 24). Di Paulus ben de leki wan strafuman na ini Rome wan sani fu 65 G.T., dan a ben taigi Timoteyus: „Tyari Markus kon nanga yu, bika a kan yepi mi bun nanga a wroko” (2 Timoteyus 4:11). A no de fu taki dati Paulus ben sori bribi di a taki nanga Gado na ini begi fu a matifasi fu en nanga den tu man, Barnabas nanga Markus. A bakapisi ben de taki a ben meki vrede baka nanga den, so taki a kisi „a vrede [di e kon] fu Gado”.​—Filipisma 4:6, 7.

18. Soleki fa a sori, dan san pasa te fu kaba nanga Eodia nanga Sintike?

¹⁸ A no de fu taki dati wi leki sma di no de volmaakti ’e naki futu furu tron’ (Yakobus 3:2). Problema ben kon na mindri tu Kresten uma. Paulus ben skrifi fu den taki: „Mi e frumane Eodia èn mi e frumane Sintike fu abi a srefi denki na ini Masra. . . . Tan yepi den umasma disi, di strei sei na sei nanga mi gi a bun nyunsu” (Filipisma 4:1-3). A musu de taki den tu uma disi di ben abi frede gi Gado, ben lusu a problema fu den na ini vrede. A kan taki den gebroiki rai soleki san skrifi na ini Mateyus 5:23, 24. Te wi sori bribi fu di wi e fiti Bijbel gronprakseri na ini wi libi, dan dati sa yepi wi fu libi na ini vrede nanga trawan na ini a ten disi.

Bribi e yepi wi fu horidoro

19. Sortu situwâsi di ben de wan tesi gi Isak nanga Rebeka, no ben pori a bribi fu den kwetikweti?

¹⁹ Bribi kan yepi wi sosrefi fu pasa hebi ten. Kande wi e sari fu di wan sma fu wi osofamiri di dopu, trangayesi Gado di a go trow nanga wan sma di no de na bribi (1 Korentesma 7:39). Isak nanga Rebeka ben pina fu di Esau, a manpikin fu den, ben trow nanga uma di no ben abi frede gi Gado. Den uma fu en di ben de Hètsma „ben e meki Isak nanga Rebeka sari srefisrefi”. Den ben e meki Rebeka sari sote dati a ben taki: „Mi kon weri srefisrefi nanga a libi disi fu mi, fu den umapikin fu Hèt ede. Efu Yakob ben sa teki wan uma na mindri den umapikin fu Hèt neleki den umapikin disi fu a kondre, dan fu san ede mi musu tan na libi moro langa?” (Genesis 26:34, 35; 27:46) Aladi a situwâsi dati ben de wan tesi gi Isak nanga Rebeka, toku a no ben pori a bribi fu den kwetikweti. Sobun, meki wi tan sori tranga bribi te wi miti hebi ten di de wan tyalensi gi wi.

20. Na sortu fasi wi kan teki wan eksempre na a bribi fu Rut nanga Naomi?

²⁰ Na owru uma Naomi ben de fu a kondre Yuda. Na uma dati ben sabi taki son uma fu Yuda, ben o meki manpikin di ben o tron fositata fu a Mesias. Den manpikin fu en ben dede sondro fu meki pikin, èn ensrefi ben owru tumusi fu meki pikin. Dati meki a no ben gersi leki a famiri fu en ben sa man abi a grani fu de na ini a famirilin fu a Mesias. Toku a de so taki Rut, a weduwe fu wan fu den manpikin fu Naomi, ben tron a wefi fu na owru man, Boas. Dati meki a ben man kisi wan manpikin di ben tron wan fu den fositata fu Yesus, a Mesias! (Genesis 49:10, 33; Rut 1:3-5; 4:13-22; Mateyus 1:1, 5) Naomi nanga Rut ben tan sori bribi, srefi na ini tranga ten. Na so fasi den ben kisi bigi prisiri. Wisrefi kan kisi bigi prisiri tu, efu wi tan sori bribi, srefi na ini tranga ten.

21. San bribi e du gi wi? San musu de a fasti bosroiti fu wi?

²¹ A tru taki wi no man sabi san a tamara sa tyari kon gi wi. Toku a de so taki bribi kan yepi wi fu pasa iniwan sani di de wan tyalensi gi wi. Bribi e meki taki wi abi deki-ati; a e meki wi hori pasensi. A e meki taki wi e suku fu doro den moro bun marki di wi man doro na ini wi libi. Sosrefi a e yepi wi fu libi wan libi di e tyari wini kon gi wi. Bribi kan yepi wi fu kisi wan bun banti nanga trawan, èn a e yepi wi sosrefi fu pasa tranga ten. Sobun, meki a de so taki wi „na den [sortu] sma di abi bribi, san e meki a sili tan na libi” (Hebrewsma 10:39). Iya, meki a de so taki a krakti fu wi lobi-ati Gado, Yehovah, tan yepi wi fu sori tranga bribi, so taki wi kan gi Yehovah glori.

San yu ben sa piki?

• Sortu buweisi de na ini Bijbel di e sori taki bribi kan gi wi deki-ati?

• Fu san ede wi kan taki dati bribi e meki wi libi wan libi di e tyari wini kon gi wi?

• Fa bribi e yepi wi fu abi vrede nanga tra sma?

• Sortu buweisi de taki bribi e meki taki wi man pasa tranga ten?

[Aksi fu a tori disi]

[Prenki na tapu bladzijde 16]

Bribi ben gi Noa nanga Heinok a deki-ati fu meki den boskopu fu Yehovah bekènti

[Prenki na tapu bladzijde 17]

Bribi leki a di fu Moses e pusu wi fu suku fu doro marki na yeye fasi

[Prenki na tapu bladzijde 18]

A bribi fu Barak, Debora, nanga Gideon ben kon moro tranga di Gado ben gi den a dyaranti taki a ben e horibaka gi den