Aksi fu leisiman

Fu san ede Bijbel e taki dati wan sma musu bari te wan trawan e suku fu didon na en nanga tranga?

Wan sma di no ondrofeni taki wan trawan didon na en nanga tranga, noiti no sa man frustan fa a libi fu wan sma kan pori krinkrin fu a sani disi ede. Te so wan sani pasa nanga wan uma, dan sontron a e frede so te taki a sani disi e tan trobi en, en heri libi langa. * Wan tu yari pasa wan man ben didon nanga tranga na wan yongu Kresten uma. Na uma disi e fruteri: „Mi no man fruteri fa mi ben frede na a neti dati. Te now ete a sani disi e moro mi.” Yu kan frustan taki, furu sma no wani prakseri srefisrefi fu a tori disi. Ma na ini na ogri grontapu disi, a suku di sma e suku fu didon nanga tranga na wan trawan, na wan sani di e pasa trutru.

Bijbel no e kibri den tori fu fositen, pe sma ben didon nanga tranga na trawan noso pe sma ben pruberi fu du dati (Genesis 19:4-11; 34:1-7; 2 Samuel 13:1-14). Ma a e sori tu san wan sma musu du te wan trawan e suku fu didon na en nanga tranga. Deuteronomium 22:23-27 e fruteri san a Wet e taki fu a tori disi. A pisi tori disi e taki fu tu situwâsi. A fosiwan abi fu du nanga wan man di ben miti wan yongu uma na ini wan foto èn a ben didon na en. Ma na uma dati no ben bari fu sma yepi en. Fu dati ede, a bosroiti ben teki taki na uma disi ben fowtu „fu di a no ben bari na ini a foto”. Efu a ben bari, dan kande sma na ini a birti ben o man yepi en. Na ini a di fu tu tori, wan man ben miti wan yongu uma na wan boiti presi, pe a „grabu en hori èn a go didon na en”. Na uma „ben bari” fu kisi yepi, „ma nowan sma ben de fu yepi en”. Tra fasi leki na uma fu a fosi tori, dan a de krin taki na uma disi no ben agri nanga den sani di a man ben du. A pruberi fu feti nanga a man, aladi a ben e bari fu  kisi yepi; ma a man ben tranga moro en. A babari fu en ben sori taki a no ben wani du san a man ben wani. Dati meki na uma disi no ben fowtu.

Aladi Kresten na ini a ten disi no de na ondro a Wet fu Moses, toku den srefi gronprakseri di de fu feni ini a Wet, kan de wan yepi gi den. A di fu tu tori e sori taki a de prenspari fu kakafutu èn fu bari fu kisi yepi. Te now ete babari kan yepi wan sma te wan trawan e suku fu didon na en nanga tranga. Wan sabiman di e sori sma san den kan du te ogri miti den, ben taki: „Te wan man e suku fu du ogri nanga wan uma, dan a moro bun sani di na uma kan du fu kibri ensrefi, na fu meki babari.” A babari fu wan umasma kan hari a prakseri fu trawan di kan yepi en na a ten dati, noso a kan skreki na ogriman so taki a lon gowe. Wan yongu Kresten uma di ben kon na ini wan situwâsi pe wan man ben wani didon na en nanga tranga, e fruteri: „Mi ben bari so tranga leki mi man, èn a man ben go nanga baka. Ma di a ben de fu kon na mi tapu baka, dan mi bari èn mi lon gowe. Fosi mi ben e prakseri furu tron: ’Fa babari kan yepi mi te wan bigi tranga man grabu mi hori fu didon na mi nanga tranga?’ Ma now mi kon si taki a sani dati e yepi trutru!”

A de wan sari sani taki son leisi a e pasa taki wan man e didon nanga tranga na wan uma, aladi na uma du ala san a man fu feti teige en. Toku a feti nanga a babari fu na uma disi no de fu soso. Na presi fu dati, a e sori taki a du ala san a man fu kakafutu gi a man (Deuteronomium 22:26). Aladi so wan sani pasa nanga en, toku a kan tan abi wan krin konsensi, a kan tan abi lespeki gi ensrefi, èn a kan abi a dyaranti taki a de krin na ini Gado ai. Na ogri-ati sani disi kan meki taki so wan uma e firi brokosaka srefisrefi, ma te a sabi taki a ben du ala sani fu feti teige a man, dan a prakseri dati sa de wan bigi yepi gi en te a e kisi ensrefi baka safrisafri.

Fu frustan a tori ini Deuteronomium 22:23-27, dan wi musu frustan taki a pisi tori disi no e taki fu ala den sani di kan pasa te wan man e suku fu didon nanga tranga na wan uma. Fu eksempre, a no e taki noti fu wan situwâsi pe wan uma no man bari fu di a babaw, fu di a fadon flaw, noso fu di a e frede so te taki a no man du noti moro. A kan tu taki a man e tapu a mofo fu na uma nanga en anu noso nanga wan tra sani, so taki na uma no man bari. Ma Yehovah sabi ala sani, èn a sabi sosrefi fu san ede sma e du sani. Te so wan sani e miti wan uma, dan Yehovah sabi fa na uma e firi èn a e handri na wan reti fasi, bika „ala den pasi fu en na retidu” (Deuteronomium 32:4). Yehovah sabi san pasa trutru èn a sabi sortu muiti na uma meki fu feti teige a man di du ogri nanga en. Fu dati ede, wan uma di no ben man bari, ma di du ala san a ben man du fu komoto na ini so wan situwâsi, kan libi na afersi disi gi Yehovah.—Psalm 55:22; 1 Petrus 5:7.

Ma toku, a konsensi fu son Kresten uma di ben kon na ini so wan situwâsi, e trobi den fu di den e firi leki den fowtu. Te den e prakseri baka san ben pasa nanga den, dan den e kisi a firi leki den ben musu du moro fu no meki sowan sani pasa nanga den. Ma na presi taki so wan uma e teki a fowtu tapu en taki so wan sani pasa nanga en, dan a kan begi Yehovah, a kan aksi Yehovah fu yepi en, èn a kan frutrow tapu a lobi bun-ati fu Yehovah, di de pasa marki.—Exodus 34:6; Psalm 86:5.

Sobun, den Kresten uma di e firi broko-saka fu di wan man ben didon na den nanga tranga, kan abi a frutrow taki Yehovah e frustan trutru san den e firi. A Wortu fu Gado e gi den a dyaranti: „Yehovah de krosibei fu den wan di den ati broko; èn den wan di masi na ini yeye, a e frulusu” (Psalm 34:18). Den kan kisi moro yepi fu pasa a muilek ten disi, te den e teki a yepi fu tra Kresten na ini a gemeente, di e sori switifasi èn di e sori taki den e frustan fa so wan uma e firi (Yob 29:12; 1 Tesalonikasma 5:14). Boiti dati, te so wan sani miti wan sma, dan a sma kan yepi ensrefi tu, te a e meki muiti fu poti prakseri na sani di e gi en deki-ati. Na so wan fasi a o kisi „a vrede fu Gado di e pasa ala sma frustan”.—Filipisma 4:6-9.

[Futuwortu]