Leri fu si wroko na a yoisti fasi

A LIBI na grontapu e kon moro hebi. Disi na a bakapisi fu a fasi fa na ekonomia fu grontapu e drai, a fasi fa sma e feti fu meki a bisnis fu den kon moro bun leki di fu trawan, èn sosrefi fu a seti di sma e seti den fabriki na so wan fasi taki den kan meki moro furu sani, na a srefi ten. Den sani disi e meki taki furu tron sma no e angri fu go na wroko. Toku a de so taki wi musu man du a wroko fu wi nanga prisiri. Fu san ede? Bika wi meki akruderi a prenki fu Gado, èn Gado e prisiri nanga a wroko fu en. Leki eksempre, di Gado ben luku san a ben du na a kaba fu den siksi „dei”, noso den langa pisi ten di a teki fu meki sani, dan Genesis 1:31 e taki: „Gado ben si ala san a ben meki èn luku! a ben de heri bun.”

A no de fu taki dati wan fu den sani di e meki taki Yehovah na „a koloku Gado”, na taki a lobi fu wroko (1 Timoteyus 1:11). Yu no e agri dan taki wi sa de moro koloku tu te wi tan teki na eksempre fu Gado? Kownu Salomo di ben de wan kefalek bun bowman di ben sabi fa fu orga sani, ben skrifi fu a tori disi taki: „Ibriwan sma musu nyan èn dringi trutru èn si a bun fu ala en tranga wroko. A de a presenti fu Gado.”​—Preikiman 3:13.

Wi e libi now na ini wan ten pe den wrokope e tan kenki. Fu dati ede a kan de wan tyalensi gi wi fu tan si wroko na wan yoisti fasi. Ma Yehovah Gado e blesi den wan di e gi yesi na a lobi-ati tiri di a e gi den (Psalm 119:99, 100). Fu di den sma dati e tron wrokoman di sma kan frutrow, meki den no sa lasi den wroko so makriki. Den e leri sosrefi fu no prakseri nomo sortu wini den kan kisi fu a wroko fu den na ekonomia sei, ma fu si a wroko fu den soleki fa Gado e si en. Den musu leri fu si a libi fu den sosrefi leki fa Yehovah e si en. Disi e yepi den fu teki koni bosroiti na ini den libi. A e yepi den fu si taki a no a wroko fu den noso a feni di den man feni wroko musu meki taki den de nanga prisiri noso taki den de sondro broko-ede (Mateyus 6:31-33; 1 Korentesma 2:14, 15). A e yepi den fu leri fu si wroko na a yoisti fasi.

Leri fu wroko na wan fasi di e plisi Gado

Son sma e tron srafu fu a wroko fu den. Ibritron baka den e poti a wroko fu den na fesi fu ala tra sani. Trawan e wakti nomo te a yuru doro fu den kan tapu nanga a wroko so taki den kan go na oso. San na a yoisti fasi fu si a tori disi? Bijbel e piki:  „Wan anu di furu nanga rostu betre moro tu anu di furu nanga tranga wroko èn a strei di sma e strei fu kisi a winti” (Preikiman 4:6). Te yu luku en bun, dan fu wroko tumusi tranga noso tumusi langa, kan abi takru bakapisi gi wan sma, na presi taki a sa tyari wini kon gi en. A kan kon de leki wan soso sani, taki a gersi leki a sma „e strei fu kisi a winti” nomo. Fu san ede wi kan taki dati? Bika a kan taki so wan fasi fu du sani kan pori den sani di wi abi so tranga fanowdu fu kan de koloku trutru, namku a banti fu wi nanga wi osofamiri noso wi mati, a yeye fasi fu wi, a gosontu fu wi, èn sosrefi a wani di wi wani libi wan langa pisi ten (1 Timoteyus 6:9, 10). A yoisti fasi fu si sani na taki wi musu prisiri nanga den sani di wi abi èn sosrefi nanga a vrede di wi abi. Wi no musu suku fu du furu tranga wroko nomo di e tyari furu problema noso broko-ede kon.

Aladi Bijbel e leri wi fu si wroko na so wan fasi, toku a no de so taki a e leri wi fu de lesiman (Odo 20:4). Efu wi lesi, dan dati e meki taki wi e lasi lespeki gi wisrefi, sosrefi tra sma kan lasi a lespeki di den ben abi gi wi. San moro ogri srefi na taki a kan pori a banti di wi abi nanga Gado. Soleki fa Bijbel e taki krinkrin, dan a sma di e weigri fu wroko, no abi a reti fu nyan sani di trawan musu gi en (2 Tesalonikasma 3:10). Na presi fu dati a musu kenki a fasi fa a e libi fu di a o wroko tranga, so taki a kan sorgu ensrefi na wan lespeki fasi, aladi a e horibaka sosrefi gi den wan di a musu sorgu. Fu di a o wroko tranga, meki a sa man yepi trawan tu di de na nowtu, bika dati na wan sani di a Wortu fu Gado e gi wi deki-ati fu du.​—Odo 21:25, 26; Efeisesma 4:28.

Leri pikin fu si wroko leki wan warti sani

Fu tron wan bun wrokoman no e kon fu ensrefi; wan sma musu leri wroko te a yongu ete. Fu dati ede Bijbel e gi papa nanga mama a deki-ati: „Kweki wan boi [noso umapikin] akruderi a pasi gi en; srefi te a e kon owru, a no sa komoto na a pasi [dati]” (Odo 22:6). Boiti taki papa nanga mama srefi musu de wan bun eksempre na ini a fasi fa den e wroko, dan koni papa nanga mama sa bigin leri den pikin fu den frukufruku kaba, fu du difrenti sortu wroko na ini na oso; wroko di a pikin musu man du. A kan de so taki difrenti sortu wroko de fu du na oso di den pikin no lobi fu du. Ma efu den leri fu du den sani dati, dan densrefi o si bakaten taki den na memre fu na osofamiri di warti, spesrutu te mama noso papa e prèise den te den du a wroko fu den bun. Toku a de wan sari sani taki son papa nanga mama e du ala wroko gi den pikin fu den, kande fu di den e denki taki dati na a fasi fa den musu sori switifasi gi den pikin. We, a ben o  fiti srefisrefi efu den papa nanga mama dati ben sa denki fu san skrifi na Odo 29:21, pe skrifi: „Efu wan sma e pori a futuboi [noso pikin] fu en fu sensi en yongu yari, dan te a kon moro owru a sa tron wan sma di de sondro tangi.”

Papa nanga mama di sabi a frantwortu fu den, e du ala san den man fu seni den pikin fu den go na skoro. Den e gi den pikin fu den deki-ati fu leri bun èn fu wroko tranga te den de na skoro. Bakaten den sani disi kan de wan bigi yepi gi den yonguwan, te den o bigin wroko.

Luku bun sortu wroko yu o teki

Bijbel no e taigi wi sortu wroko wi musu teki. Toku a e gi wi bun rai di e yepi wi fu suku wroko di e gi wi na okasi fu tan go na fesi na yeye fasi, fu tan dini Gado, sosrefi fu tyari tra prenspari frantwortu di wi no musu poti na wan sei. Na apostel Paulus ben skrifi leki eksempre: „A ten di tan abra kon syatu. Fu dati ede, meki den wan di . . . e gebroiki grontapu [de] neleki den no e gebroiki en dorodoro; bika a komediprei fu a grontapu disi e kenki” (1 Korentesma 7:29-31). Nowan sani no de na ini a disiten seti fu sani, di e tan a srefi ala ten noso di no e kenki doronomo. Efu wi gi ala wi ten nanga wi krakti na a seti fu sani disi, dan a o de neleki wi teki ala moni di wi kibri wi heri libi langa, fu bai wan oso di bow na ini wan kontren di e sungu ibritron baka te furu alen e fadon. Fu bai so wan oso ben o de wan don sani trutru!

Tra bijbelvertaling e vertaal a pisi „no e gebroiki en dorodoro” nanga, „no moksi yusrefi tumusi furu nanga en”, sosrefi „no gi ala yu krakti na den” (The Jerusalem Bible; Today’s English Version). Koni sma no e frigiti taki a ten di tan abra gi a disiten seti fu sani, „kon syatu”. Den sabi taki a bakapisi sa de taki den sa sari èn taki den sa lasi-ati krinkrin, efu den suku fu „moksi densrefi tumusi” nanga a seti fu sani disi, noso efu den „gi ala den krakti” na en.​—1 Yohanes 2:15-17.

’Gado no sa drai en baka gi yu kwetikweti’

Yehovah sabi moro bun leki wi san wi abi fanowdu. A sabi sosrefi na ini sortu ten wi e libi èn o ten den sani di a abi na prakseri o kon tru. Fu dati ede a e memre wi: „Meki a fasi fa unu e libi de fri fu a lobi fu moni, èn de tevrede nanga den sani fu now. Bika [Gado] taki: ’Mi no sa gowe libi yu kwetikweti, èn noiti mi no sa drai mi baka gi yu’” (Hebrewsma 13:5). Den wortu dati e gi trowstu trutru! Yesus ben teki na eksempre fu Gado na ini a fasi fa A broko en ede nanga a pipel fu en na wan lobi-ati fasi. Dati meki Yesus ben gebroiki wan moi pisi fu a barinen Bergitaki fu en, fu leri den disipel fu en san na a yoisti fasi fa den musu si wroko, nanga gudu.​—Mateyus 6:19-33.

Yehovah Kotoigi e du muiti fu gi yesi na den rai dati. Leki eksempre, wan wrokobasi ben aksi wan Kotoigi brada di ben abi leki wroko fu seti stroom sani, fu wroko moro yuru na ini wan dei. A wrokoman disi ben taigi a basi taki a no ben o man du dati. Fu san ede? Bika a no ben wani fu du grontapuwroko na den yuru di a ben poti na wan sei gi en osofamiri èn gi yeye afersi. A basi fu en ben lespeki a fasi fa a e prakseri, fu di a ben de wan tumusi bun wrokoman di a wrokobasi ben kan frutrow. A no ala ten sani e pasa na a fasi dati. Son leisi a kan pasa srefi taki wan sma abi fu go suku wan tra wroko, fu kan tan libi na wan fasi di fiti gi Kresten. Toku a de so furu tron taki den wan di e poti den frutrow tapu Yehovah, e kon si taki a bun fasi fa den e tyari densrefi, sosrefi a fasi fa den e wroko tranga, e meki taki a wrokobasi fu den e feni den bun.​—Odo 3:5, 6.

 A ten te ala wroko sa tyari wini kon gi wi

So langa leki na onvolmaakti seti fu sani disi de, dan ala ten sma sa abi problema fu feni wroko, noso den sa abi broko-ede fu di den no sabi efu den o man tan abi wroko. Te yu luku en bun, dan sani o kon moro ogri srefi te a libi na grontapu e kon moro bruya, èn na ekonomia e tan kenki nomo, noso kande e kon moro takru. Ma den sani disi de fu wan pisi ten nomo. Heri esi, ala sma sa abi wroko. San moro moi srefi, na taki ala wroko di sma o du sa gi sma bigi prisiri; a sa meki den firi bun. Ma fa dati kan? Fa so wan kenki kan kon?

Nanga yepi fu en profeiti Yesaya, Yehovah ben sori go na a ten dati. A ben taki: „Mi e meki nyun hemel nanga wan nyun grontapu; èn sma no sa memre den sani fu fositen moro, èn den no sa kon na ini na ati tu” (Yesaya 65:17). Yehovah ben e taki fu wan nyun tirimakti di ensrefi ben o seti; wan tiri di o seti wan heri nyun libimakandra fu libisma.​—Danièl 2:44.

A profeititori e sori moro fara fa sma o libi èn wroko na ini a ten dati. A e taki: „Den sa bow oso trutru èn libi na ini, èn den sa prani droifidyari trutru èn nyan fu den froktu fu den. Den no sa bow èn wan tra sma go libi na ini; den no sa prani èn wan tra sma go nyan fu en. Bika den dei fu mi pipel sa de leki den dei fu wan bon; èn den sma di mi teki sa gebroiki a wroko fu den eigi anu krinkrin. Den no sa wroko tranga fu soso, èn den no sa meki pikin di e gi problema, bika den na den pikin di de den blesiwan fu Yehovah, èn den bakapikin fu den makandra nanga den.”​—Yesaya 65:21-23.

A nyun grontapu di Gado sa seti sa tyari bigi kenki kon! Yu no ben sa wani libi na ini so wan grontapu; wan grontapu pe yu no sa „wroko tranga fu soso”, ma pe yu sa man nyan bun dorodoro fu den „froktu” fu a wroko fu yu anu? Ma luku suma na den sma di sa man nyan bun fu den sortu blesi dati: „Den na den pikin di de den blesiwan fu Yehovah.” Yu kan de wan fu den „blesiwan” dati, efu yu e tan leri fu Yehovah èn te yu e suku fu du san a wani. Yesus ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Nanga prisiri Yehovah Kotoigi ben sa wani teki ten ibri wiki fu studeri Gado Wortu, Bijbel, makandra nanga yu, so taki yusrefi kan kisi a sabi dati di kan gi wi libi.

[Faki na tapu bladzijde 6]

„SMA WANI KOTOIGI FU WROKO GI DEN”

„Awansi san unu e du, du en nanga un heri sili leki gi Yehovah èn no gi libisma”, na so Bijbel e taki (Kolosesma 3:23). A no de fu taki dati wan sma di e wroko soleki fa a gronprakseri disi e sori, sa de wan wrokoman di ala sma wani. Dati meki J. J. Luna, di skrifi a buku How to Be Invisible, e gi wrokobasi a rai, fu suku wrokoman di de fayafaya bribiman fu son kerki grupu. Ma dan a e taigi den tu: „Na ini na aladei libi a de so furu tron, taki te fu kaba, wi e bosroiti fu teki [Yehovah] Kotoigi leki wrokoman.” Fu san ede? We, wan sani di a e kari na taki sma sabi Kotoigi leki wrokoman di no e bedrigi trawan. A sani dati e meki taki na difrenti sortu wrokope, „sma wani Kotoigi fu wroko gi den”.

[Prenki na tapu bladzijde 5]

Yu sa de koloku te yu seti sani na so wan fasi taki yu e du yu wroko, aladi yu e tan poti ten na wan sei gi yeye afersi èn gi prisiri demakandra