„Tan du den sani di mi taki”

„Efu unu e tan du den sani di mi taki, dan unu na mi disipel trutru.”​—YOHANES 8:31.

1. (a) San Yesus ben libi na baka na grontapu di a drai go baka na hemel? (b) Na sortu aksi wi sa poti prakseri?

DI Yesus Krestes, a Sma di seti Krestendom, drai go baka na hemel, dan den sani di a ben libi na baka na grontapu no ben de buku di ensrefi ben skrifi, monumenti di a ben bow, noso gudu di a ben tyari kon makandra. Na presi fu dati, a ben libi disipel na baka èn sosrefi spesrutu markitiki di sma ben sa musu doro fu man de wan disipel fu en. Fu taki en leti, na ini na Evangelietori fu Yohanes, wi e si taki Yesus ben taki fu dri prenspari markitiki di iniwan sma musu doro fu man tron wan disipel fu en. San na den markitiki disi? San wi kan du fu doro den? Fa wi kan kon sabi efu wi bun nofo fu de wan disipel fu Krestes na ini a ten disi? *

2. San na wan prenspari markitiki di wan sma musu doro fu man de wan disipel fu Yesus, soleki fa na Evangelietori fu Yohanes e sori dati?

² Sowan siksi mun bifo Yesus dede, dan a go na Yerusalem èn a preiki gi den ipi sma di ben kon makandra drape fu teki prati na a Wiwirikampu-fesa di ben e hori wán wiki langa. A bakapisi ben de taki, di a fesa ben pasa afu kaba, dan „furu sma ben bribi na ini en”. Yesus tan preiki, so taki tapu a lasti dei fu a fesa sosrefi, „furu sma sori taki den ben bribi na ini en” (Yohanes 7:10, 14, 31, 37; 8:30). Na a ten dati, Yesus poti prakseri na den nyun bribiman, èn a taki fu wan prenspari markitiki di sma ben musu doro fu man de wan disipel fu en. Na apostel Yohanes ben skrifi san na a markitiki dati: „Efu unu e tan du den sani di mi taki, dan unu na mi disipel trutru.”​—Yohanes 8:31.

3. San de fanowdu fu man „tan du den sani di [Yesus] taki”?

³ Yesus no ben gebroiki den wortu dati fu sori taki den nyun bribiman no ben abi bribi. Na presi fu dati, a ben e sori taki den ben kan tron tru disipel fu en, efu den ben e tan du san a ben taki, èn efu den ben e sori taki den ben e horidoro. Den ben teki a wortu fu en, ma now den ben musu tan du san a ben taki (Yohanes 4:34; Hebrewsma 3:14). Iya, Yesus ben si en leki wan prenspari sani trutru taki den bakaman fu en ben e horidoro. Dati meki, di a ben abi a lasti takimakandra nanga den apostel fu en, soleki fa na Evangelietori fu Yohanes e skrifi, dan a gi den seryusu rai tu leisi baka makandra. A ben taigi den: „Tan waka na mi baka” (Yohanes 21:19, 22). Furu fosi Kresten ben du soifri san Yesus ben taigi den fu du (2 Yohanes 4). San ben yepi den fu horidoro?

4. San ben meki taki den fosi Kresten ben man horidoro?

⁴ Na apostel Yohanes di ben de wan getrow disipel fu Krestes sowan seibitenti yari langa, ben poti prakseri na wan prenspari sani. A ben gebroiki den wortu disi fu prèise getrow Kresten: „Unu tranga, a wortu fu Gado e tan na ini unu èn unu wini na ogriwan.” Den disipel dati fu Krestes ben horidoro, noso den ben tan du san Gado ben taki, fu di a wortu fu Gado ben tan na ini den. Den ben e warderi a wortu dati nanga den heri ati (1 Yohanes 2:14, 24). Na ini a ten disi, wi musu sorgu tu taki a wortu fu Gado e tan na ini wi, efu wi wani ’horidoro te na a kaba’ (Mateyus 24:13). Fa wi kan du dati? Wan agersitori di Yesus ben fruteri e gi wi a piki tapu na aksi disi.

„Yere a wortu”

5. (a) Fu sortu difrenti sortu gron Yesus e taki na ini wan fu den agersitori fu en? (b) San a siri nanga a gron na ini na agersitori fu Yesus e prenki?

⁵ Yesus ben fruteri wan agersitori fu wan man di e sai siri, èn a tori disi skrifi na ini den Evangelietori fu Mateyus, Markus, nanga Lukas (Mateyus 13:1-9, 18-23; Markus 4:1-9, 14-20; Lukas 8:4-8, 11-15). Te yu e leisi den tori disi, dan yu sa si  taki a moro prenspari sani di e kon na fesi na ini na agersitori, na taki a srefi sortu siri e fadon na tapu difrenti sortu gron, èn leki bakapisi fu dati difrenti sani e pasa nanga a siri disi. A fosi sortu gron tranga, a di fu tu gron no dipi nofo, èn a di fu dri gron lai nanga makabon. Tra fasi leki den dri gron, a di fu fo sortu gron na „bun” gron. Soleki fa Yesus srefi fruklari, dan a siri na a Kownukondre boskopu di de fu feni na ini Gado Wortu, èn a gron e prenki den difrenti fasi fa wan sma en ati de. Aladi den difrenti sortu sma disi di a gron e prenki abi wan tu sani di de a srefi, toku den wan di de leki a bun gron abi wan sani di e meki taki den e difrenti fu den trawan.

6. (a) Fa a di fu fo sortu gron na ini na agersitori fu Yesus e difrenti fu den dri trawan, èn san dati wani taki? (b) San na wan prenspari sani di wi musu du fu man horidoro leki disipel fu Krestes?

⁶ A tori di skrifi na Lukas 8:12-15 e sori taki ala den fo difrenti sortu sma ben ’yere a wortu’. Ma den wan di ben abi „wan kefalek bun ati” e du moro leki fu „yere a wortu” nomo. Den sma disi ’e du san a wortu e taki èn den e meki froktu fu di den e horidoro’. A bun gron di safu èn di dipi sosrefi, e meki taki den rutu fu a siri kan boro go dipi na ini, èn leki bakapisi fu dati, a siri e bigin gro èn a e meki froktu (Lukas 8:8). Na so a de tu nanga den sma di abi wan bun ati. Den sma disi e frustan a wortu fu Gado, den e warderi en, èn den e poti prakseri doronomo na a wortu dati (Romesma 10:10; 2 Timoteyus 2:7). Den e tan du san Gado e taki. Leki bakapisi fu dati, den e meki froktu fu di den e horidoro. Fu dati ede a de prenspari taki wi e warderi Gado Wortu nanga wi heri ati, efu wi wani horidoro leki disipel fu Krestes (1 Timoteyus 4:15). Ma fa wi kan kisi a warderi disi gi Gado Wortu?

Wi musu abi wan bun ati èn wi musu prakseri dipi fu sani

7. Sortu sani abi furu fu du nanga wan bun ati?

⁷ Meki wi poti prakseri na wan sani di abi furu fu du nanga wan kefalek bun ati, soleki fa Bijbel e sori dati doronomo. „Na ati fu a regtfardikiwan e prakseri dipi fu sani, so taki a kan gi piki” (Odo 15:28). „Meki den wortu fu mi mofo nanga den dipi prakseri fu mi ati kon de wan prisiri na yu fesi, o Yehovah” (Psalm 19:14). „Mi ati sa prakseri dipi fu koni sani.”​—Psalm 49:3.

8. (a) San wi no musu du te wi e leisi Bijbel, ma san bun fu du? (b) Sortu winimarki wi e kisi te wi e prakseri dipi fu Gado Wortu nanga yepi fu begi? (Taki sosrefi fu san skrifi na ini a faki „Den e tanapu kánkan na ini a waarheid”.)

⁸ Neleki den Bijbel skrifiman disi, wi musu prakseri dipi tu fu Gado Wortu èn fu den sani di a e du, èn wi musu du dati nanga warderi èn nanga yepi fu begi. Te wi e leisi Bijbel noso Bijbel publikâsi, dan wi no musu du dati neleki wi na trakondre-sma di e lonlon fu a wan presi go na a trawan fu meki fowtow fu ala sortu sani, aladi den no e teki ten fu luku bun san de na den lontu. Na presi fu dati, te wi e studeri Bijbel, dan wi musu teki ten fu luku den bijbeltekst bun. * Te wi e teki ten fu prakseri dipi fu den sani di wi e leisi, dan a wortu fu Gado sa abi krakti tapu wi ati. A sa abi krakti tapu den firi fu wi, èn a sa meki wi kisi wan yoisti denki fu sani. Boiti dati, wi sa prati den dipi prakseri fu wi nanga Gado te wi e taki nanga en na ini begi. Leki bakapisi fu dati, wi e kisi wan moro tranga banti nanga Yehovah, èn a lobi di wi abi gi En sa meki taki wi e tan waka baka Yesus, awansi problema e miti  wi (Mateyus 10:22). A de krin taki wi musu prakseri dipi fu den sani di Gado e taki, efu wi wani tan getrow te na a kaba.​—Lukas 21:19.

9. Fa wi kan sorgu taki a wortu fu Gado e tan gro na ini wi ati?

⁹ Na agersitori fu Yesus e sori tu taki sani de di kan tapu a siri, noso a wortu fu Gado, fu gro. Sobun, fu man tan getrow leki disipel fu en, dan wi musu (1) kon sabi sortu problema a takru gron e prenki, soleki fa na agersitori e sori dati, èn (2) wi musu du san de fanowdu fu puru den problema disi na pasi, noso fu wai pasi gi den. Na so fasi, wi sa sorgu taki a Kownukondre siri e tan gro na ini wi ati, èn taki a e tan gi froktu.

A siri „na seipasi” abi fu du nanga sma di no e poti prakseri na a wortu

10. Taki fu a fosi sortu gron na ini na agersitori fu Yesus, èn fruklari san dati wani taki.

¹⁰ A fosi sortu gron di a siri e fadon na tapu, na gron „na seipasi”, pe sma e „waka na tapu” a siri disi (Lukas 8:5). A gron na sei wan pasi di e koti pasa na ini wan karugron kon tranga, fu di furu sma e waka na tapu a gron dati (Markus 2:23). Na so a de tu nanga den wan di e gebroiki tumusu furu fu den ten nanga krakti gi a bruya grontapu libi disi. Den sma disi kan kon si taki den no abi ten fu kisi trutru warderi gi a wortu fu Gado. Den e yere a wortu, ma den no e prakseri dipi fu en. Fu dati ede, a wortu no abi krakti tapu na ati fu den. Bifo den e kon lobi a wortu disi, dan „Didibri e kon èn a e puru a wortu na ini den ati, so taki den no ben o bribi èn kisi frulusu” (Lukas 8:12). Fa wi kan sorgu taki a sani disi no e pasa nanga wi?

11. Fa wi kan sorgu taki wi ati no e kon de leki tranga gron?

¹¹ Furu sani de di wi kan du fu sorgu taki wi ati no e tron leki a gron na sei pasi di e meki taki a siri no man gro. Gron di sma waka na tapu èn di kon tranga, kan kon safu baka fu meki siri gro te  sma e drai a doti èn te den no e waka moro na en tapu. Te wi e meki ten fu studeri èn fu prakseri dipi fu Gado Wortu, dan dati kan meki tu taki wi ati e kon de leki bun gron di e meki siri gro. A prenspari sani di wi musu du, na taki wi no musu poti tumusi furu prakseri na den aladei sani fu a libi (Lukas 12:13-15). Na presi fu dati, wi musu sorgu taki wi e teki ten fu poti prakseri na „den moro prenspari sani” na ini a libi.​—Filipisma 1:9-11.

Den siri „na tapu a ston-gron” abi fu du nanga sma di frede

12. San e meki trutru taki a pransun e dede gowe na ini a di fu tu sortu gron di kari na ini na agersitori fu Yesus?

¹² Te a siri e fadon na tapu a di fu tu sortu gron, dan a no e tan didon nomo na tapu a gron dati, soleki fa a ben de nanga a siri di fadon na tapu a fosi sortu gron. A siri disi e kisi rutu èn a e gro. Ma te son opo, dan a faya fu a son e bron a sproiti so taki a e dede gowe. Ma poti prakseri na a prenspari pisi tori disi. Te yu e luku en bun, dan a pransun no e dede gowe fu di a son faya. Fu taki en leti, a pransun di e gro kon na ini a bun gron e kisi son tu, ma a no e dede gowe. Fu taki en leti, a prani dati e gro bun. Fu san ede dati de so? Yesus e fruklari taki a pransun e dede gowe „fu di a gron no ben abi furu doti” èn fu di a „no ben abi watra” (Mateyus 13:5, 6; Lukas 8:6). Te wan „ston-gron” de leti na ondro a doti, dan dati e meki taki a siri no man boro en rutu go dipi nofo fu feni watra èn fu man gro bun. A pransun e dede gowe fu di a gron no dipi nofo.

13. Sortu sma de leki gron di no dipi, èn san e meki trutru taki den e frede?

¹³ A pisi disi fu na agersitori abi fu du nanga sma di „e teki a wortu nanga prisiri” èn e waka fayafaya baka Yesus „wan pisi ten” (Lukas 8:13). Te a faya son fu „banawtu noso frufolgu” e kon tapu den sma disi, dan den e frede so te taki den e lasi a prisiri nanga a krakti fu den, èn den e tapu fu waka baka Yesus (Mateyus 13:21). Ma a sani di e meki trutru taki den frede, a no a gens di den e kisi. Te yu e luku en bun, dan milyunmilyun fu den disipel fu Krestes e kakafutu gi difrenti sortu banawtu, ma toku den e tan getrow (2 Korentesma 2:4; 7:5). A trutru sani di e meki taki sonwan fu den e kon frede èn e fadon komoto fu a tru anbegi, na fu di na ati fu den de leki wan ston, èn dati e meki taki den no man prakseri dipi nofo fu bun sani èn fu yeye afersi. Leki bakapisi fu dati, a warderi di den e kisi gi Yehovah èn gi a wortu fu en no dipi nofo èn a swaki tumusi. A sani disi e meki taki den no man kakafutu te den e kisi gens. Fa wi kan sorgu taki dati no e pasa nanga wi?

14. San wan sma musu du fu sorgu taki en ati no e kon de leki gron di no dipi nofo?

¹⁴ Wan sma musu luku bun taki a no abi nowan sortu firi na ini en ati di wi kan teki gersi nanga ston di e tapu pasi gi sani fu gro. Den agersi ston dati ben kan de bita firi di wan sma abi dipi na ini en ati, a prakseri di a sma e prakseri ensrefi nomo sondro taki sma kan si dati, noso tra sortu firi. Efu a sma abi den sortu firi disi kaba, dan a krakti di e komoto fu Gado wortu kan puru den na ini na ati fu en (Yeremia 23:29; Efeisesma 4:22; Hebrewsma 4:12). Baka dati, te a sma e prakseri dipi fu den sani disi nanga yepi fu begi, dan dati sa meki taki ’a wortu sa prani’ dipi na ini na ati fu a sma dati (Yakobus 1:21). A sani disi sa gi wi a krakti fu kakafutu na ten te wi lasi-ati, èn wi sa kisi deki-ati fu tan getrow awansi tesi e miti wi.

Den siri di fadon „na mindri den maka” abi fu du nanga sma di abi wan ati di prati

15. (a) Fu san ede wi musu poti spesrutu prakseri na a di fu dri sortu gron di Yesus ben taki fu en? (b) San e pasa te fu kaba nanga a di fu dri sortu gron, èn fu san ede dati e pasa?

¹⁵ Wi musu poti spesrutu prakseri na a di fu dri sortu gron, namku a wan nanga den makabon, fu di wan tu sani fu a gron disi èn fu a bun gron na a srefi. Neleki a bun gron, a gron di lai nanga makabon e  meki den siri teki rutu, èn den e gro sosrefi. Na ini a bigin, a nyun pransun disi e gro na a srefi fasi na ini den tu sortu gron disi. Ma baka wan pisi ten, wan sani e pasa di e tyokru a pransun kiri te fu kaba. Tra fasi leki a bun gron, a gron disi e kon lai nanga makabon. Te a yongu pransun e opo kon na ini a gron disi, dan a musu feti fu tan na libi na mindri den ’makabon di e gro nanga en’. Wan pisi ten ibriwan fu den tu sortu pransun disi e feti fu kisi nyan, leti, èn sosrefi nofo presi fu gro, ma te fu kaba, den makabon e kon lai lontu a pransun, èn den e ’tyokro en kiri’.​—Lukas 8:7.

16. (a) Sortu sma de leki a gron di lai nanga makabon? (b) San den makabon e prenki, soleki fa den dri Evangelietori e sori dati?​—Luku a futuwortu.

¹⁶ Sortu sma wi kan agersi nanga a gron di lai nanga makabon? Yesus e fruklari: „Disi na den sma di yere, ma den broko-ede nanga den gudu nanga den prisiri fu a libi e meki den lasi pasi, èn den sani disi e tyokro den kiri krinkrin èn den no man du noti nanga bun bakapisi” (Lukas 8:14). Neleki fa a siri fu a man di sai den e gro makandra nanga den makabon na ini a srefi gron, na so son sma e pruberi fu poti prakseri na a wortu fu Gado, ma na a srefi ten den wani gi densrefi abra na den „prisiri fu a libi disi” tu. A waarheid fu Gado wortu sai na ini na ati fu den, ma a waarheid disi musu strei nanga tra sani di den e feti na baka. Na agersi ati fu den sma disi prati (Lukas 9:57-62). A sani disi e meki taki den no man teki nofo ten fu poti bun prakseri na Gado wortu nanga yepi fu begi. Den sma disi no man frustan Gado wortu dorodoro, èn fu dati ede den no man warderi en nanga den heri ati. Leki bakapisi fu dati den no man horidoro. Safrisafri den no e poti prakseri moro na yeye afersi, fu di den e feti baka grontapu sani, teleki den sani dati e „tyokro den kiri krinkrin”. * Dati na trutru wan sari fasi fa den sma di no lobi Yehovah nanga den heri ati sa lasi den libi!​—Mateyus 6:24; 22:37.

17. San wi musu du fu sorgu taki den agersi makabon no e tyokro wi kiri, soleki fa na agersitori fu Yesus e sori?

¹⁷ Te wi e poti moro prakseri na yeye afersi na presi taki wi e poti prakseri na gudu nomo, dan wi sa sorgu taki den problema nanga den prisiri fu a grontapu disi no e tyokro wi kiri (Mateyus 6:31-33; Lukas 21:34-36). Wi musu si en leki wan seryusu sani ala ten fu leisi Bijbel èn fu prakseri dipi fu den sani di wi leisi. Te wi e du ala muiti fu libi na wan fasi di no e gi tumusi furu broko-ede, dan wi sa abi moro ten fu poti bun prakseri na Gado wortu nanga yepi fu begi (1 Timoteyus 6:6-8). Futuboi fu Gado di du dati, e ondrofeni den blesi fu Yehovah. Fu taki en leti, den sma disi hari den makabon puru na ini a gron, so taki a pransun di e meki froktu kan kisi nyan, leti, nanga nofo presi fu gro bun. Sandra, wan uma di abi 26 yari, e taki: „Te mi e prakseri dipi fu den blesi di mi kisi na ini a waarheid, dan mi e si taki grontapu no kan gi mi den sortu sani dati srefisrefi!”​—Psalm 84:11.

18. Fa wi kan tan du san a wortu fu Gado e taki, èn fa wi kan horidoro leki Kresten?

¹⁸ We, a krin fu si taki wi alamala, yonguwan nanga owruwan, sa tan du san Gado e taki, èn wi  sa horidoro leki disipel fu Krestes, solanga leki a wortu fu Gado e tan na ini wi. Fu dati ede, meki wi sorgu taki a gron fu wi agersi ati noiti e kon tranga, taki a noiti e mankeri doti, èn taki noiti takru wiwiri e kon lai na ini. Na presi fu dati a musu tan safu èn dipi. Na so fasi, wi sa man frustan a wortu fu Gado bun èn wi sa man „meki froktu fu di wi e horidoro”.​—Lukas 8:15.

[Futuwortu]

San yu e piki?

• Fu san ede wi musu ’tan du san Yesus e taki’?

• Fa wi kan meki Gado wortu tan na ini wi ati?

• Nanga sortu sma wi kan agersi den fo difrenti sortu gron di Yesus ben taki fu den?

• Fa yu kan feni ten fu prakseri dipi fu Gado wortu?

[Aksi fu a tori disi]

[Faki/​Prenki na tapu bladzijde 10]

„DEN E TANAPU KÁNKAN NA INI A WAARHEID”

FURU sma di de disipel fu Krestes wan langa ten kaba e sori yari go yari kon, taki den e „tanapu kánkan na ini a waarheid” (2 Petrus 1:12). San e yepi den fu horidoro? Luku san wan tu fu den sma disi e taki.

„Na a kaba fu ibri dei mi e leisi wan pisi fu Bijbel èn mi e begi Gado. Baka dati mi e prakseri fu a pisi di mi leisi.”​—Jean, a teki dopu na ini 1939.

„Te mi e prakseri dipi fu a bigi lobi di Yehovah abi gi wi, aladi a hei so te, dan dati e gi mi a dyaranti taki sani sa waka bun nanga mi, èn a e gi mi a krakti sosrefi fu tan getrow.”​—Patricia, a teki dopu na ini 1946.

„Fu di mi e studeri Bijbel doronomo, èn fu di mi e poti prakseri doronomo na ’den dipi sani fu Gado’, meki mi man tan dini Yehovah.”​—1 Korentesma 2:10; Anna, a teki dopu na ini 1939.

„Mi e leisi Bijbel èn sosrefi den Bijbel publikâsi fu di dati e yepi mi fu ondrosuku mi ati, èn fu kon sabi fu san ede mi e du spesrutu sani.”​—Zelda, a teki dopu na ini 1943.

„A sani di e gi mi moro furu prisiri, na te mi kan go koiri fu man abi na okasi fu taki nanga Yehovah na ini begi, so taki mi kan taigi en nomo fa mi e firi trutru.”​—Ralph, a teki dopu na ini 1947.

„A fosi sani di mi e du te a dei opo, na taki mi e luku a deitekst èn mi e leisi wan pisi fu Bijbel. Na so fasi mi kan prakseri dipi fu wan nyun sani a heri dei.”​—Marie, a dopu na ini 1935.

„Mi e kisi deki-ati trutru te mi e leisi wan pisi tori di e taki finifini fu ibri vers fu wan Bijbel buku.”​—Daniel, a teki dopu na ini 1946.

O ten yu e teki ten fu prakseri dipi fu Gado wortu nanga yepi fu begi?​—Danièl 6:10b; Markus 1:35; Tori fu den Apostel 10:9.

[Prenki na tapu bladzijde 13]

Te wi e poti yeye afersi na a fosi presi na ini wi libi, dan wi sa man „meki froktu fu di wi e horidoro”