„Tan meki furu froktu”

’Tan meki furu froktu èn sori taki unu na mi disipel.’​—YOHANES 15:8.

1. (a) San den apostel fu Yesus ben musu du fu man de disipel fu en, soleki fa a ben taigi den? (b) San wi musu aksi wisrefi?

A BEN de a neti bifo Yesus dede. Yesus ben teki ala en ten fu taki seryusu nanga den apostel fu en fu kan gi den deki-ati. A ben musu de pasa mindri neti kaba, ma Yesus ben go doro fu taki nanga den fu di a ben lobi den bun mati fu en. Di a ben taki nanga den wan pisi ten kaba, dan a memre den fu ete wan markitiki di den ben musu doro fu man de disipel fu en. A ben taki: „Te unu e tan meki furu froktu èn e sori taki unu na mi disipel, dan dati o gi mi Tata glori” (Yohanes 15:8). Wi leki disipel na ini a ten disi e du dati tu? San a wani taki fu „meki furu froktu”? Fu kon sabi dati, dan meki wi go luku baka san Yesus ben taki a neti dati.

2. Sortu agersitori di abi fu du nanga froktu, Yesus fruteri a neti bifo a dede?

² A rai di wi e kisi fu meki froktu e komoto fu wan agersitori di Yesus ben fruteri den apostel fu en. A ben taki: „Mi na a tru droifibon èn mi Tata na a gronman. A o puru ibri taki na ini mi di no e meki froktu, èn a o krin ibri taki di e meki froktu so taki den kan meki moro froktu. Un krin kaba, fu den sani ede di mi taigi unu. Tan de wán nanga mi èn mi o tan de wán nanga unu. Neleki fa a taki no man meki froktu fu ensrefi efu a no e tan na a droifibon, na so unu no man meki froktu tu, efu unu no e tan de wán nanga mi. Mi na a droifibon, unu na den taki. Te unu e tan meki furu froktu èn e sori taki unu na mi disipel, dan dati o gi mi Tata glori. Neleki fa a Tata lobi mi èn mi lobi unu, na so unu musu tan na ini a lobi fu mi. Efu unu e du san den komando fu mi e taki, dan unu o tan na ini a lobi fu mi.”​—Yohanes 15:1-10.

3. San den bakaman fu Yesus musu du fu man meki froktu?

³ Na ini na agersitori disi, Yehovah na a Gronman, Yesus na a droifibon, èn den apostel di Yesus ben e fruteri a tori disi na den taki fu a droifibon. Solanga leki den apostel ben e du muiti  fu „tan de wán” nanga Yesus, dan den ben o meki froktu. Ne Yesus fruklari fa den apostel ben o man de wán, èn a sani dati ben de tumusi prenspari srefisrefi. A ben taki: „Efu unu e du san den komando fu mi e taki, dan unu o tan na ini a lobi fu mi.” Bakaten na apostel Yohanes ben skrifi den srefi sortu wortu disi gi den Kresten brada nanga sisa fu en: „A sma di e du san den komando fu [Krestes] e taki, e tan de wán nanga en”  * (1 Yohanes 2:24; 3:24). Sobun, te den bakaman fu Krestes e tan du san den komando fu en e taki, dan den e tan de wán nanga en, èn fu dati ede den kan meki froktu. Sortu froktu wi musu meki?

Wi musu tan du muiti fu go na fesi

4. San wi kan leri fu a pisi fu na agersitori di e sori taki Yehovah „e puru” ibri taki di no e meki froktu?

⁴ Na ini na agersitori fu a droifibon, Yehovah „e puru” wan taki te a taki dati no e meki froktu. San disi e sori wi? Boiti taki a e sori wi taki ala disipel musu meki froktu, a e sori wi sosrefi taki den alamala man du dati, awansi sortu situwâsi den de na ini, noso awansi sortu problema den abi. Fu taki en leti, a no ben o kruderi nanga a lobi-ati fasi fu Yehovah fu ’puru’ wan disipel, noso fu no feni a disipel dati bun te a no man du wan sani di ben muilek tumusi gi en fu du.​—Psalm 103:14; Kolosesma 3:23; 1 Yohanes 5:3.

5. (a) Fa den agersitori fu Yesus e sori taki wi kan meki moro froktu? (b) Na sortu tu froktu wi sa poti prakseri?

⁵ Na agersitori di Yesus ben fruteri fu a droifibon e sori sosrefi taki awansi sortu situwâsi wi de na ini, toku wi musu tan du muiti fu go na fesi na ini a diniwroko di wi e du leki wan disipel. Luku fa Yesus e taki dati: „A o puru ibri taki na ini mi di no e meki froktu, èn a o krin ibri taki di e meki froktu, so taki den kan meki moro froktu” (Yohanes 15:2). Na a kaba fu na agersitori, dan Yesus gi den bakaman fu en a rai fu meki „moro froktu” (Vers 8). San disi wani taki? Fu di wi na disipel, meki wi noiti musu abi mi-no-ke fasi (Openbaring 3:14, 15, 19). Na presi fu dati, wi musu suku fu meki moro froktu. Sortu froktu wi musu tan du muiti fu meki? Tu sortu froktu de di wi kan meki, èn dati na (1) „a froktu fu a yeye” èn (2) a Kownukondre froktu.​—Galasiasma 5:22, 23; Mateyus 24:14.

A froktu fu Kresten eigifasi

6. Fa Yesus ben poti krakti na tapu taki a fosiwan fu den froktu fu a yeye na wan tumusi prenspari froktu?

⁶ Wan fu den „froktu fu a yeye” na lobi. Kresten e meki a froktu disi nanga yepi fu Gado en santa yeye, fu di den e gi yesi na a komando di Yesus ben gi den syatu bifo a ben fruteri den na agersitori fu a droifibon di e meki froktu. Yesus ben taigi den apostel fu en: „Mi e gi unu wan nyun komando, taki unu musu lobi makandra” (Yohanes 13:34). Fu taki en leti, di Yesus ben taki nanga den apostel fu en na a lasti neti di a ben de na libi na grontapu, dan a memre den doronomo taki den ben musu lobi makandra.​—Yohanes 14:15, 21, 23, 24; 15:12, 13, 17.

7. Fa na apostel Petrus ben sori taki a meki di wi musu meki froktu abi fu du nanga a sori di wi musu sori taki wi abi den eigifasi fu Krestes?

⁷ Petrus di ben de drape a neti dati, ben frustan taki sma ben musu man si taki tru disipel fu Krestes lobi makandra soleki fa Krestes ben du dati. Sma ben musu man si sosrefi taki den abi tra eigifasi tu di Krestes ben abi. Furu yari baka dati, Petrus gi Kresten a rai taki den ben musu leri fu dwengi densrefi, fu lobi den brada nanga sisa fu den, èn fu lobi tra sma sosrefi. Petrus ben taki sosrefi taki te wi e du den sani dati, dan wi no sa „tron sma di no e du noti èn unu no o tan sondro fu abi bun bakapisi”(2 Petrus 1:5-8). Awansi sortu situwâsi wi de na ini, toku wi man sori taki wi abi den froktu fu a yeye. Fu dati ede, meki wi du muiti fu sori trawan taki wi lobi den, taki wi wani yepi den, èn taki wi abi sari-ati nanga den. Boiti dati, meki wi sori taki wi abi tra eigifasi sosrefi di Krestes abi, bika „nowan wet no de kontrari den sani disi” (Galasiasma 5:23). Iya, meki wi meki „moro froktu”.

 Fa fu meki Kownukondre froktu

8. (a) San a froktu fu a yeye abi fu du nanga a Kownukondre froktu? (b) Na sortu aksi wi musu poti prakseri?

⁸ Te wan bon abi moi switi froktu, dan dati na wan moi sani fu si. Ma a no fu dati ede wawan wan bon e meki froktu. Den froktu fu wan bon de fanowdu sosrefi fu di den siri fu den sa meki taki moro fu den bon disi e kon. Sosrefi, a froktu fu a yeye no e meki taki wi abi moi Kresten eigifasi wawan. Te wi abi eigifasi soleki lobi nanga bribi, dan dati e meki sosrefi taki wi e prati a Kownukondre boskopu di wi kan gersi nanga wan siri, èn di de fu feni na ini Gado Wortu. Luku fa na apostel Paulus ben poti krakti tapu a prenspari tori disi. A e taki: „Wi abi bribi tu [wan fu den froktu fu a yeye] èn fu dati ede wi e taki” (2 Korentesma 4:13). Na a fasi disi, na so Paulus e fruklari moro fara, wi e „tyari wan srakti-ofrandi fu prèise gi Gado, dati wani taki, a froktu fu wi mofobuba”. Disi na a di fu tu sortu froktu di wi musu sori taki wi abi (Hebrewsma 13:15). Wi man meki moro muiti fu go na fesi, iya fu meki „bun furu froktu” leki preikiman fu Gado en Kownukondre?

9. A de so taki a meki di wi e meki froktu wani taki dati wi e meki disipel? Fruklari dati.

⁹ Fu man piki na aksi dati bun, dan wi musu frustan fosi san na Kownukondre froktu. A ben o bun fu taki dati a meki di wi musu meki froktu wani taki dati wi musu meki disipel? (Mateyus 28:19). A de so taki den froktu di wi musu meki abi fu du spesrutu nanga sma di wi e yepi fu tron dopu anbegiman fu Yehovah? Nôno. Efu dati ben de so, dan furu Kotoigi di wi e warderi so te ben o lasi-ati trutru. Den sma disi e preiki a Kownukondre boskopu na wan getrow fasi furu yari kaba na ini kontren pe sma no de klariklari fu arki. Iya, efu a meki di wi e meki Kownukondre froktu ben musu de fu si na nyun disipel wawan, dan den Kresten dati di e wroko so tranga ben o de leki den drei taki na ini na agersitori fu Yesus! A no de fu taki dati a sani dati no tru. Ma san na a moro prenspari Kownukondre froktu fu wi diniwroko?

Wi e meki froktu fu di wi e prati a Kownukondre siri

10. Fa na agersitori di Yesus ben fruteri fu a man di e sai siri èn fu den difrenti sortu gron e sori san na Kownukondre froktu èn san a no Kownukondre froktu?

¹⁰ Na agersitori di Yesus ben fruteri fu a man di e sai siri èn fu den difrenti sortu gron e gi wi a piki dati. A piki dati e gi deki-ati na den wan di e preiki na ini kontren pe sma no de klariklari fu arki. Yesus ben taki dati a siri na a Kownukondre boskopu di de fu feni na ini Gado Wortu, èn a gron na a agersi ati fu libisma. Wan tu siri „ben fadon na tapu bun gron èn baka di den bigin gro, den meki froktu” (Lukas 8:8). Sortu froktu? We, te wan aleisi pransun e gro kon bigi, dan den froktu di a e meki a no pikin aleisi pransun, ma a e gi nyun aleisi siri. Sosrefi, a moro prenspari froktu di Kresten e meki a no nyun disipel, ma dati na nyun Kownukondre siri.

11. San na Kownukondre froktu?

¹¹ Fu dati ede, a Kownukondre froktu a no  nyun disipel, èn a no bun Kresten eigifasi tu. Fu di a siri di Kresten e sai na a wortu fu a Kownukondre, meki a froktu musu de bun furu fu a srefi siri dati. A meki di Kresten e meki Kownukondre froktu abi fu du nanga a taki di den e taki fu a Kownukondre (Mateyus 24:14). Wi man meki den sortu Kownukondre froktu dati? Noso, wi man meki a bun nyunsu fu a Kownukondre bekènti, awansi sortu situwâsi wi de na ini? Iya, wi man du dati! Na ini a srefi agersitori, Yesus e sori fu san ede dati de so.

Wi musu du ala san wi man fu gi Gado glori

12. A de so taki ala Kresten man meki Kownukondre froktu? Fruklari dati.

¹² „A siri di sai na tapu a bun doti”, na so Yesus ben taki „e meki nyanyan, a wan disi wan hondro tron, a trawan siksitenti tron èn ete wan trawan dritenti tron” (Mateyus 13:23). Te sma sai siri na ini wan gron, dan difrenti sani kan meki taki a siri dati no e meki so furu froktu. Difrenti sani kan meki tu taki wi no man du so furu fu meki a bun nyunsu bekènti, èn Yesus ben sori taki a ben frustan dati. A kan taki son sma abi moro okasi fu preiki, èn trawan kande abi wan moro bun gosontu èn moro krakti fu wroko. Sobun, a kan taki wi man du moro furu noso moro mendri leki san trawan e du, ma solanga leki wi e du ala san wi man, dan Yehovah feni dati bun (Galasiasma 6:4). Srefi efu na owru-yari noso wan swaki gosontu e meki taki wi no man du furu na ini a preikiwroko, toku a de sondro tweifri taki wi lobi-ati Tata, Yehovah, e si wi leki  wan fu den sma „di e tan meki furu froktu”. Fu san ede dati de so? Fu di wi e gi en ’ala san wi abi’, iya, fu di wi e dini en nanga wi heri sili. *​—Markus 12:43, 44; Lukas 10:27.

13. (a) San na a moro prenspari sani di e meki taki wi musu „go” doro fu meki Kownukondre froktu? (b) San sa yepi wi fu tan meki froktu na ini kontren pe sma no de klariklari fu arki? (Luku a faki tapu bladzijde 21.)

¹³ Awansi o furu wi man du fu meki Kownukondre froktu, toku wi sa du muiti fu „go èn [fu] tan meki froktu doronomo” te wi e hori na prakseri fu san ede wi e du dati (Yohanes 15:16). Yesus ben taki san na a moro prenspari sani di e meki taki wi musu du dati: ’Te unu e tan meki furu froktu, dan dati o gi mi Tata glori’ (Yohanes 15:8). Iya, a preikiwroko fu wi e meki a nen fu Yehovah kon santa na fesi ala libisma (Psalm 109:30). Wan getrow Kresten sisa di nen Honor, èn di abi sowan 75 yari, e taki: „Srefi na ini kontren pe sma no de klariklari fu arki, a de wan grani fu taki na ini a nen fu a Moro Heiwan.” Claudio na wan fayafaya Kotoigi sensi 1974. Di wi aksi en fu san ede a e tan preiki aladi wan tu sma nomo na ini a kontren fu en e arki a boskopu, dan a kari Yohanes 4:34, pe wi e leisi den wortu fu Yesus: „Mi nyanyan na taki mi musu du a wani fu a sma di seni mi kon èn fu klari a wroko fu en.” Claudio ben taki moro fara: „Neleki Yesus, mi no wani bigin nomo nanga a wroko di mi e du leki Kownukondre preikiman, ma mi wani klari a wroko dati tu” (Yohanes 17:4). Kotoigi fu Yehovah na heri grontapu abi a srefi denki disi.​—Luku a faki „Fa fu ’meki froktu fu di wi e horidoro’” tapu bladzijde 21.

Wi musu preiki èn wi musu gi sma leri

14. (a) Nanga sortu tu marki Yohanes a Dopuman nanga Yesus ben e du a wroko fu den? (b) Sortu wroko Kresten na ini a ten disi musu du?

¹⁴ A fosi Kownukondre preikiman di kari na ini den Evangelietori, na Yohanes a Dopuman (Mateyus 3:1, 2; Lukas 3:18). A moro prenspari sani di a ben musu du ben de fu gi „kotoigi”, èn a du dati nanga tranga bribi èn nanga a howpu taki „ala sortu sma ben kan bribi” (Yohanes 1:6, 7). Iya, sonwan fu den sma di Yohanes ben preiki gi ben tron disipel fu Krestes (Yohanes 1:35-37). Sobun, Yohanes ben de wan preikiman èn sosrefi wan sma di ben e meki disipel. Yesus ben de wan preikiman nanga wan leriman tu (Mateyus 4:23; 11:1). Fu dati ede, a no e fruwondru wi taki Yesus ben gi den bakaman fu en a komando fu no preiki a Kownukondre boskopu wawan, ma fu yepi sma sosrefi fu teki a boskopu dati so taki den ben kan tron disipel fu en (Mateyus 28:19, 20). Sobun, na ini a ten disi wi musu preiki èn wi musu gi sma leri sosrefi.

15. Fa wi kan agersi a fasi fa den sma ben e si a preikiwroko na ini a fosi yarihondro nanga a fasi sma e si en na ini a ten disi?

¹⁵ Na ini a fosi yarihondro, sma ben yere fa Paulus ben e preiki èn ben e gi leri, èn „son sma ben bigin bribi den sani di a ben taki; trawan no ben bribi” (Tori fu den Apostel 28:24). Na ini a ten disi, a de a srefi. A sari fu taki dati bun furu Kownukondre siri e fadon na tapu gron pe den no e gro. Ma sonwan fu den siri e fadon ete na tapu bun gron, den e teki rutu, èn den e gro, soleki fa Yesus ben taki na fesi. Fu taki en leti, ibri wiki fu a yari moro leki 5000 sma na heri grontapu e tron tru disipel fu Krestes! Den nyun disipel disi e „bribi den sani di [a Wortu fu Gado] e taki”, aladi furu tra sma no e du dati. San yepi den sma disi fu teki a Kownukondre boskopu? Furu tron dati e pasa fu di den Kotoigi e meki ten  gi den sma disi. Wi kan gersi a sani dati nanga a watra di wi e gi a siri di no sai solanga ete (1 Korentesma 3:6). Luku tu fu den someni eksempre di de.

A e yepi te wi e meki ten gi trawan

16, 17. Fu san ede wi musu meki ten gi sma di wi e miti na ini wi diniwroko?

¹⁶ Di Karolien, wan yongu Kotoigi na ini Belgia, ben de na ini a preikiwroko, dan a go na wan owru uma. Ma na uma disi no ben wani kon sabi moro fu a Kownukondre boskopu. Wan sani ben e du na uma na en anu, fu di na anu fu en ben tai. Karolien nanga a tra sisa di ben de nanga en ben wani yepi na uma disi, ma na uma no ben wani. Tu dei baka dati den srefi tu Kotoigi disi go na a uma en oso èn den aksi en fa a ben de nanga en. „A sani disi yepi”, na so Karolien ben taki. „Na uma ben fruwondru fu si taki wi ben wani yepi en trutru. A kari wi kon na ini en oso, èn wi bigin studeri Bijbel nanga en.

¹⁷ Sandi, wan Kotoigi na ini Amerkankondre, e meki ten tu gi den sma di a e preiki gi. A e leisi koranti fu si efu wan pikin gebore, èn baka dati a e go na a papa nanga a mama nanga Mi boekoe nanga bijbel tori. * Moro furu a de so taki a mama de na oso èn a e prisiri fu sori sma a beibi fu en. A sani disi furu tron e gi Sandi na okasi fu bigin wan takimakandra nanga a mama disi. „Mi e fruteri a papa nanga a mama o prenspari a de fu leisi gi a beibi fu man kweki wan banti nanga en”, na so Sandi e fruklari. „Bakaten mi e taki fu den problema di e miti papa nanga mama di e kweki wan pikin na ini a disiten libimakandra.” No solanga pasa, wan mama nanga siksi pikin bigin dini Yehovah fu di mi ben go na a mama disi syatu baka di a ben kisi wan pikin. Te wi e du muiti èn te wi e meki ten gi sma, dan dati kan meki taki wi e kisi densrefi sortu moi bakapisi na ini a diniwroko.

18. (a) Fu san ede wi alamala man doro a markitiki di e taki dati wi musu ’meki furu froktu’? (b) Sortu dri markitiki yu sa suku nomonomo fu doro fu man de wan disipel, soleki fa na Evangelietori fu Yohanes e sori dati?

¹⁸ A e gi wi deki-ati trutru fu sabi taki wi man doro a markitiki fu Gado di e taki dati wi musu „tan meki furu froktu”! Awansi wi yongu noso owru, awansi wi abi wan bun gosontu noso wi swaki, awansi wi e preiki na ini wan kontren pe sma e arki wi noso na ini wan kontren pe sma no de klariklari fu arki, toku wi alamala man meki furu froktu. Fa wi man du dati? Fu di wi e du moro muiti fu sori taki wi abi a froktu fu a yeye, èn fu di wi e du ala san wi man fu prati a boskopu fu Gado Kownukondre. Na a srefi ten, wi e du muiti tu fu ’tan du san Yesus taki’ èn fu tan ’lobi makandra’. Iya, te wi e doro den dri prenspari markitiki disi fu man tron wan disipel, soleki fa na Evangelietori fu Yohanes e sori, dan wi e sori nanga dati taki wi „na disipel fu [Krestes] trutru”.​—Yohanes 8:31; 13:35.

[Futuwortu]

Aksi fu luku baka san wi leri

• Sortu froktu wi musu tan meki?

• Fu san ede wi alamala man „meki furu froktu”?

• Sortu dri prenspari markitiki wi musu doro fu man de wan disipel, soleki fa na Evangelietori fu Yohanes e sori dati?

[Aksi fu a tori disi]

[Faki/​Prenki na tapu bladzijde 21]

FA FU ’MEKI FROKTU FU DI WI E HORIDORO’

SAN e yepi yu fu tan preiki a Kownukondre boskopu na wan getrow fasi na ini kontren pe sma no de klariklari fu arki? Disi na wan tu moi piki tapu na aksi disi.

„Fu di wi sabi taki Yesus e horibaka gi wi, meki wi e tan abi wan bun denki èn wi e tan horidoro, awansi fa sma na ini a kontren e si a boskopu fu wi.”​—Harry, wan brada di abi 72 yari; a teki dopu na ini 1946.

„A tekst fu 2 Korentesma 2:17 e gi mi deki-ati ala ten. A e taki dati wi e teki prati na ini a diniwroko aladi ’Gado e luku wi, èn aladi wi de makandra nanga Krestes’. Te mi de na ini a preikiwroko, dan mi e prisiri fu di mi de makandra nanga den bun mati fu mi.”​—Claudio, wan brada di abi 43 yari; a teki dopu na ini 1974.

„Fu taki en leti, mi musu du furu muiti fu man teki prati na a preikiwroko. Toku mi e ondrofeni taki den wortu di skrifi na Psalm 18:29, na tru wortu. Drape skrifi: „Na fu mi Gado ede mi kan kren wan skotu.’”​—Gerard, wan brada di abi 79 yari; a teki dopu na ini 1955.

„Efu mi kan leisi wán tekst nomo gi sma te mi de na ini a preikiwroko, dan mi e prisiri kaba taki wan sma ben meki Bijbel ondrosuku na ati fu en.”​—Eleanor, wan sisa di abi 26 yari; a teki dopu na ini 1989.

„Mi e tan pruberi na difrenti fasi fu bigin wan takimakandra nanga sma. Someni difrenti fasi de fu du dati, taki mi no sa man gebroiki den alamala na ini den yari di mi sa de na libi ete.”​—Paul, wan brada di abi 79 yari; a teki dopu na ini 1940.

Mi no e mandi te sma no wani arki a boskopu. Mi e pruberi fu abi wan switi takimakandra nanga sma, mi e taki nanga den, èn mi e arki den fu kon sabi fa den e si sani.”​—Daniel, wan brada di abi 75 yari; a teki dopu na ini 1946.

„Mi miti sma di no dopu so langa ete di taigi mi taki den tron Kotoigi, tangi fu a preikiwroko fu mi. Aladi mi no ben sabi dati, wan tra sma ben studeri Bijbel bakaten nanga den èn a yepi den fu go na fesi. A e gi mi prisiri fu sabi taki a diniwroko fu wi na wan wroko di wi e du makandra leki wán man.”​—Joan, wan sisa di abi 66 yari; a teki dopu na ini 1954.

San e yepi yu fu „meki froktu fu di yu e horidoro”?​—Lukas 8:15.

[Prenki na tapu bladzijde 20]

Te wi e sori taki wi abi a froktu fu a yeye, èn te wi e meki a boskopu fu a Kownukondre bekènti, dan wi e meki furu froktu

[Prenki na tapu bladzijde 23]

San Yesus ben wani taki di a taigi den apostel fu en: „Tan meki furu froktu”?