Fu san ede wi musu hori a Memrefesa?

„Bika san mi ben kisi fu Masra, na dati mi gi unu sosrefi.”​—1 KORENTESMA 11:23.

1, 2. San Yesus ben du baka di a hori a Paskafesa na a neti fu 33 G.T.?

A WAN-ENKRI GEBORE Manpikin fu Yehovah ben de drape, makandra nanga 11 man di ben ’tan nanga en di a ben kisi tesi’ (Lukas 22:28). A ben de wan dridewroko neti, 31 maart 33 G.T. Soleki fa a sori, dan wan moi furu mun ben de fu si na loktu, na Yerusalem. Dyonsrode Yesus Krestes nanga den apostel fu en ben kaba hori a Paskafesa. Yesus ben seni Yudas Iskariot gowe fu di a ben de wan toriman. Toku a ten no ben doro ete gi den trawan di ben de drape fu go na oso. Fu san ede? Fu di Yesus ben o du wan sani now di ben de tumusi prenspari. San a ben o du?

² Na Evangelie skrifiman Mateyus ben de drape na a neti dati. Meki ensrefi fruteri wi fu dati ede, san ben pasa. A ben skrifi: „Yesus ben teki wan brede, èn baka di a blesi en, a broko en èn gi dati na den disipel èn a taki: ’Teki, nyan. Disi wani taki mi skin.’ Sosrefi a ben teki wan beker, èn baka di a begi fu taki tangi, a gi den dati, aladi a taki: ’Un alamala dringi fu en; bika disi wani taki mi „brudu fu a frubontu”, di sa kanti trowe fu a bun fu furu sma fu gi pardon fu sondu’” (Mateyus 26:26-28). A sani disi ben o de wan sani fu a dei dati nomo? San a ben wani taki? A de wan prenspari sani gi wi noyaso?

’Tan du disi fu memre mi’

3. Fu san ede a sani di Yesus ben du na a neti fu 14 Nisan 33 G.T. ben de so wan prenspari sani?

³ A sani di Yesus Krestes ben du na a neti fu 14 Nisan 33 G.T., no ben de wan soso sani di ben pasa nomo fu di a ben kisi a firi fu du dati. Na apostel Paulus ben taki fu a tori disi di a ben skrifi den salfu Kresten na ini Korente. Den Kresten dati ben e hori a fesa disi di Yesus ben seti, aladi sowan 20 yari ben pasa kaba sensi di Yesus ben du dati. Aladi Paulus no ben de nanga Yesus nanga den 11 apostel na ini 33 G.T., toku a no de fu taki dati sonwan fu den apostel ben fruteri en san ben pasa na a neti dati. Sosrefi a ben musu de so, taki Paulus ben kon sabi difrenti sani di abi fu du nanga  san ben pasa na a okasi dati fu di a yeye fu Gado ben tyari dati kon na krin gi en. Paulus ben taki: „Bika san mi ben kisi fu Masra, na dati mi gi unu sosrefi, taki a neti di den ben o tori Masra Yesus, a teki wan brede, èn baka di a ben taki tangi, a broko en, dan a taki: ’Disi wani taki mi skin di de fu a bun fu unu. Tan du disi fu memre mi.’ Di den kaba nyan, a teki a beker leki fa a ben du nanga a brede, dan a taki: ’A beker disi na a nyun frubontu di abi krakti fu a brudu fu mi ede. Ibri leisi te unu e dringi fu en, unu musu du dati fu memre mi.’”​—1 Korentesma 11:23-25.

4. Fu san ede Kresten musu hori a Neti-nyanyan fu Masra?

⁴ Na Evangelie skrifiman Lukas ben taki dati Yesus ben gi a komando: „Tan du disi fu memre mi” (Lukas 22:19). Den wortu disi vertaal sosrefi nanga: „Oen moese doe dati, vo membre mi” (Njoe Testament nanga dem Psalm). Te yu luku en bun, dan sma e kari a fesa disi furu tron, a Memrefesa fu a dede fu Krestes. Paulus e kari en sosrefi, a Neti-nyanyan fu Masra. A nen dati fiti, fu di a fesa disi ben seti na netiyuru (1 Korentesma 11:20). Kresten e kisi a komando fu hori a Neti-nyanyan fu Masra. Ma fu san ede a fesa disi ben seti?

Fu san ede a Memrefesa ben seti

5, 6. (a) San na wan sani di meki taki Yesus ben seti a Memrefesa? (b) Kari ete wan sani di meki taki a Neti-nyanyan fu Masra ben seti.

⁵ Wan sani di meki taki a Memrefesa ben seti, ben abi fu du nanga wan fu den marki fu san ede Yesus dede. A ben dede leki wan sma di tan sori taki na en Tata abi a reti fu tiri ala sani. Na a fasi dati Yesus sori krin taki Satan Didibri na wan leiman, fu di Satan ben tyari a falsi kragi kon na fesi taki libisma e dini Gado soso te den kan kisi wini gi densrefi (Yob 2:1-5). A dede fu Yesus leki wan getrow sma ben sori krin taki a falsi kragi disi no ben tru, wan sani di ben prisiri na ati fu Yehovah.​—Odo 27:11.

⁶ Wan tra sani di meki taki a Neti-nyanyan fu Masra ben seti ben de fu memre wi taki di Yesus dede leki wan volmaakti man di no ben abi sondu, a ben „gi en libi leki wan lusu-paiman gi furu sma” (Mateyus 20:28). Di a fosi man ben sondu na Gado, dan a ben lasi a volmaakti libi fu en, nanga ala den sani di a libi dati ben o tyari kon gi en. Ma Yesus ben taki: „Gado ben lobi grontapu so te, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). Iya, „sondu e pai nanga dede, ma a presenti di Gado e gi, na têgo libi nanga yepi fu Krestes Yesus, wi Masra” (Romesma 6:23). Te wi e hori a Neti-nyanyan fu Masra, dan dati e memre wi na a bigi lobi di Yehovah nanga en Manpikin ben sori wi, di Yesus dede gi wi leki wan srakti-ofrandi. Fu tru, wi musu abi bigi warderi gi a lobi dati!

O ten a fesa disi musu hori?

7. Na sortu fasi salfu Kresten e teki prati na a Memrefesa „ibri tron” baka?

⁷ Di Paulus ben e taki fu a Neti-nyanyan fu Masra, dan a ben tyari kon na fesi: „Bika ibri tron te unu e nyan a brede disi èn e dringi fu a beker disi, unu e tan meki a dede fu Masra bekènti, teleki a doro” (1 Korentesma 11:26). Ibriwan fu den salfu Kresten ben o nyan èn dringi fu a brede nanga a win, teleki a dede fu den. Sobun, na fesi Yehovah Gado nanga libisma, den ben o meki bekènti ibri tron baka, taki den e poti bribi na ini den sani di Gado seti nanga yepi fu a frulusu-ofrandi fu Yesus.

8. O langa a grupu fu salfuwan ben musu tan hori a Memrefesa?

⁸ O langa a grupu fu salfu Kresten ben o tan hori a Memrefesa fu a dede fu Krestes? Paulus ben taki: „Teleki a doro.” Soleki fa a sori, dan dati ben wani taki dati den ben o tan hori a fesa dati teleki Yesus ben o doro fu gi den salfu bakaman fu en wan switikon na ini hemel. Disi ben pasa te a ben o gi den wan opobaka na a pisi ten fu a „denoya” fu en (1 Tesalonikasma 4:14-17). A sani disi e kruderi nanga san Yesus ben taigi den 11 apostel fu en di ben tan nanga en: „Te mi gowe, te mi sreka wan presi gi unu, dan mi sa kon baka èn misrefi sa teki unu na mi oso, so taki unu kan de tu pe mi de.”​—Yohanes 14:3.

9. San den wortu fu Yesus di skrifi na Markus 14:25 wani taki?

⁹ Di Yesus seti a Memrefesa, dan a taki nanga den apostel di ben tan nanga en fu a beker nanga win. A ben taigi den: „Mi no sa dringi a win moro,  teleki a dei di mi o dringi a nyun win na ini a kownukondre fu Gado” (Markus 14:25). Fu di Yesus no ben o dringi trutru win na ini hemel, meki a win di a e taki fu en abi fu du nanga a prisiri di sma e prisiri furu tron te den e dringi win (Psalm 104:15; Preikiman 10:19). A ben o gi Yesus nanga den bakaman fu en bigi prisiri fu de makandra na ini a Kownukondre, wan sani di den ben e angri fu dati srefisrefi.​—Romesma 8:23; 2 Korentesma 5:2.

10. Omeni leisi wan yari a Memrefesa musu hori?

¹⁰ A de so taki sma musu memre a dede fu Yesus ibri mun, ibri wiki, noso ibri dei srefi? Nôno. Yesus ben seti a Memrefesa na a dei di a Paskafesa ben e hori. Dati ben de a dei sosrefi di den kiri en. Den Dyu ben e hori a Paskafesa „fu memre” fa Israel ben kon fri fu katibo na ini Egepte, na ini 1513 b.G.T. (Exodus 12:14). Den ben e hori a Paskafesa soso wán leisi wan yari, tapu a di fu 14 dei fu a mun Nisan fu a Dyu kalender (Exodus 12:1-6; Lefitikus 23:5). Disi e sori taki wi musu memre a dede fu Yesus someni leisi leki a Paskafesa ben e hori, namku wán leisi wan yari. Wi no musu du dati ibri mun, ibri wiki, noso ibri dei.

11, 12. San a historia e sori wi fu a fasi fa sma fu fositen ben gwenti fu hori a Memrefesa?

¹¹ Sobun, a fiti fu hori a Memrefesa ibri yari, tapu 14 Nisan. Wan buku pe sani skrifi di sma ondrosuku, e taki: „Sma ben e kari den Kresten fu Pikin Asia, Sma fu a di fu tinafo dei, fu di den ben abi a fasti gwenti fu hori a pascha [a Neti-nyanyan fu Masra] soso tapu 14 Nisan . . . A dei dati ben kan fadon tapu wan freida noso tapu iniwan tra dei fu a wiki.”​—The New Schaff-Herzog Encyclopedia of Religious Knowledge, Pisi IV, bladzijde 44.

¹² A historia skrifiman J. L. von Mosheim ben taki fu a gwenti disi. A ben sori taki den Sma fu a di fu tinafo dei, ben e hori a Memrefesa tapu 14 Nisan, bika „den ben si na eksempre fu Krestes leki wan sani di warti so furu taki den teki en neleki wan wet”. Wan tra historia skrifiman e taki: „A fasi fa den Sma fu a di fu tinafo dei ben e du sani na ini den kerki fu den na ini Asia, ben de a srefi leki fa sma ben e du sani na a kerki fu Yerusalem. Na ini a di fu tu yarihondro, den kerki disi ben e hori a Paska tapu 14 Nisan, pe den ben e memre a fasi fa den ben kisi frulusu nanga yepi fu a dede fu Krestes.”​—Studia Patristica, Pisi V, 1962, bladzijde 8.

San a brede e prenki

13. Sortu brede Yesus gebroiki di a seti a Memrefesa?

¹³ Di Yesus seti a Memrefesa, dan a ’teki wan brede, a taki Gado tangi, ne a broko a brede èn a gi en na den apostel’ (Markus 14:22). A brede di a ben abi na a okasi dati ben de a srefi brede di a ben gebroiki fu hori a Paskafesa (Exodus 13:6-10). Fu di a brede dati no ben meki nanga srudeki, meki a ben plata neleki buskutu, so taki yu ben abi fu broko en fu kan prati en gi trawan. Di Yesus ben du wan wondru fu meki brede kon moro furu, so taki a ben kan gi nyanyan na dusundusun sma, dan a brede dati sosrefi ben de leki wan sortu buskutu, fu di a ben broko a brede fu kan prati en gi den sma (Mateyus 14:19; 15:36). Soleki fa a sori, dan a broko di Yesus ben broko a brede no de wan prenspari gwenti di abi fu du nanga a Memrefesa srefi.

14. (a) Fu san ede a fiti taki a brede di wi e gebroiki na a Memrefesa, na brede sondro srudeki? (b) Sortu brede wi kan bai noso meki fu gebroiki dati na a Memrefesa?

¹⁴ Yesus ben e sori go na a brede di a ben gebroiki fu seti a Memrefesa, di a ben taki: „Disi wani taki mi skin di de fu a bun fu unu” (1 Korentesma 11:24; Markus 14:22). A ben fiti taki a brede dati no ben abi srudeki. Fu san ede? Fu di srudeki kan prenki porifasi, ogridu, noso sondu (1 Korentesma 5:6-8). A brede ben e prenki a volmaakti skin fu Yesus di no ben abi sondu, wan skin di ben fiti fu gi leki wan frulusu-ofrandi (Hebrewsma 7:26; 10:5-10). Yehovah Kotoigi e hori disi na prakseri èn den e teki na eksempre di Yesus ben gi den, fu di den e gebroiki brede sondro srudeki na a Memrefesa. Sontron den e gebroiki wan sortu buskutu di den Dyu e meki, fu di a no abi spesrei na ini, soleki ayun nanga eksi. Ma efu dati no de, dan sma kan meki a brede sondro srudeki disi nanga tarwe blon, di moksi nanga pikinso watra. Dan a blon dati musu lolo fu meki en kon plata. Baka dati den kan baka a brede na ini wan pan di abi pikinso oli nomo. A musu baka teleki a kon drei, aladi a musu man broko makriki.

 San a win e prenki

15. San ben de na ini a beker di Krestes ben gebroiki di a seti a Memrefesa fu a dede fu en?

¹⁵ Baka di Yesus ben prati a brede sondro srudeki, dan a ben teki wan beker, ’a taki Gado tangi èn a gi en na den apostel, èn den alamala ben dringi fu en’. Yesus ben fruklari: „Disi wani taki mi ’brudu fu a frubontu’, di sa kanti trowe fu a bun fu furu sma” (Markus 14:23, 24). San ben de na ini a beker? A beker dati ben abi trutru win na ini, a no ben de droifi sap di no ben tron sopi ete. Te Bijbel e taki fu win, dan a no e taki fu a sap fu droifi, di no tron sopi ete. Prakseri taki soso win di tron sopi kan meki taki wan „owru winsaka” kon priti, soleki fa Yesus ben taki. Droifi sap no man du dati. Prakseri tu taki den feanti fu Krestes ben kragi taki a ben de wan man di ben „lobi dringi furu win”. Efu a win di den ben e taki fu en ben de droifi sap, dan a kragi fu den ben de fu soso (Mateyus 9:17; 11:19). Na a pisi ten fu a Paskafesa, sma ben e dringi trutru win, èn Krestes ben gebroiki a srefi win dati fu seti a Memrefesa fu a dede fu en.

16, 17. Sortu win wi kan gebroiki na a Memrefesa? Fu san ede?

¹⁶ A sani di ben de na ini a beker e prenki a brudu fu Yesus di lon gi libisma. Fu dati ede redi win na a wán-enkri sani di kan prenki a brudu dati na wan yoisti fasi. Ensrefi ben taki: „Disi wani taki mi ’brudu fu a frubontu’, di sa kanti trowe fu a bun fu furu sma.” Na apostel Petrus ben skrifi sosrefi: „Unu [salfu Kresten] sabi taki a no ben de nanga sani di e pori gowe, nanga solfru noso gowtu, taki unu ben kon fri fu a soso fasi fa unu ben tyari unsrefi, èn di unu ben kisi fu un fositen tata. Ma a ben de nanga diri brudu, leki a di fu wan pikin skapu di no doti èn di no flaka, iya, a brudu fu Krestes srefi.”​—1 Petrus 1:18, 19.

¹⁷ A no de fu taki dati Yesus ben gebroiki redi droifi win di a ben seti a Memrefesa. Ma wi musu hori na prakseri taki son redi win di sma e meki na ini a ten disi, wi no kan gebroiki fu di sma moksi den nanga tra sortu sopi noso nanga difrenti sortu spesrei. A brudu fu Yesus ben bun dorodoro. A no ben abi nowan tra sani fanowdu fu meki a kon moro warti. Fu dati ede wi no kan gebroiki win di sma moksi nanga difrenti sortu sani. A win di de na ini a beker na a Memrefesa musu de soifri redi win sondro sukru èn sondro tra sortu sopi na ini. Efu a de fanowdu, dan yu kan gebroiki redi win sondro sukru, di sma meki na oso, noso yu kan gebroiki redi win di meki na ini a kontren fu Burgundy noso Bordeaux na ini Fransikondre, noso na tra presi.

18. Fu san ede a no de so taki Yesus ben du wan wondru nanga a brede èn nanga a win di a gebroiki gi a Memrefesa?

¹⁸ Di Yesus seti a spesrutu nyanyan disi, dan a no ben du wan wondru fu di a ben kenki a brede nanga a win fu tron skin nanga brudu trutru. A no ben o fiti kwetikweti fu nyan libisma skin noso fu dringi brudu fu di dati ben sa de kontrari den wet fu Gado (Genesis 9:3, 4; Lefitikus 17:10). Na a momenti dati Yesus ben abi en heri skin ete èn ala en brudu ben de na ini en skin tu. A tru taki a skin fu en ben gi leki wan volmaakti srakti-ofrandi, aladi a brudu fu en ben kanti trowe gi libisma, ma dati ben pasa na a tra bakadina fu a srefi dei dati fu den Dyu, namku tapu 14 Nisan. Sobun, a brede nanga a win di Yesus ben gebroiki na a Memrefesa de na wan agersi fasi, den e prenki a skin nanga a brudu fu Krestes. *

 A Memrefesa​—Wan fesa pe sma e nyan nanga makandra

19. Fu san ede wi kan gebroiki moro leki wán preti noso beker te wi e hori a Memrefesa?

¹⁹ Di Yesus ben seti a Memrefesa, dan a ben aksi den getrow apostel fu en, fu dringi makandra nanga en komoto fu a srefi beker. Na Evangelie fu Mateyus e taki: „[Yesus] ben teki wan beker, èn baka di a begi fu taki tangi, a gi den dati, aladi a taki: ’Un alamala dringi fu en’” (Mateyus 26:27). A no ben de wan problema gi en fu gebroiki wán „beker” nomo fu di soso 11 sma ben de na a fesa èn neleki fa a sori, dan den ben de na a srefi tafra. Na so fasi a ben makriki fu pasa a beker fu a wan sma go na a trawan. A yari disi milyunmilyun sma na heri grontapu, sa kon makandra na ini moro leki 94.000 gemeente fu Yehovah Kotoigi, fu de na a Memrefesa. A no de fu taki dati te so furu sma sa kon makandra na a wán neti dati fu memre a sani disi, dan wán beker nomo no sa sari kwetikweti gi den alamala. Ma srefi pe furu sma kon makandra, dan toku a win e tan prenki a brudu fu Yesus, awinsi wi e gebroiki difrenti beker so taki a no abi fu teki tumusi langa fu meki a win pasa na ala den arkiman. Na so a de tu taki wi kan gebroiki moro leki wan preti gi a brede. Nowan sani na ini Bijbel no e sori taki a de fanowdu fu gebroiki wan spesrutu sortu beker noso grasi. Toku a de so taki a grasi, noso a beker nanga a preti sosrefi musu de sani di fiti fu gebroiki na a okasi dati. A de wan koni sani fu no lai a beker te na a lanki, so taki a win no abi fu abra a lanki te a wan sma e langa en gi wan trawan.

20, 21. Fu san ede wi kan taki dati a Memrefesa na wan fesa pe sma e nyan nanga makandra?

²⁰ Aladi a de so taki wi kan gebroiki moro leki wán preti noso beker, toku a Memrefesa na wan okasi pe sma e nyan nanga makandra. Na ini a ten fu Israel, wan man ben kan seti wan nyanyan pe difrenti sma kan nyan nanga makandra. Ma dan a ben abi fu tyari wan meti go na a santapresi fu Gado, fu sma ben kan srakti en. Wan pisi fu a meti den ben e bron na tapu na altari, wan tra pisi ben de gi a priester di ben bron na ofrandi. Ete wan tra pisi ben gi na den priester manpikin fu Aron, aladi a sma di ben e pristeri na ofrandi ben e nyan fu a meti dati tu, makandra nanga en osofamiri (Lefitikus 3:1-16; 7:28-36). A Memrefesa sosrefi na wan nyanyan pe sma e nyan nanga makandra fu di difrenti sma e nyan fu a srefi sani, na a srefi momenti.

²¹ Yehovah de na ini a nyanyan disi tu leki a Sma di meki a seti disi. Yesus na a srakti-ofrandi, den salfu Kresten e nyan fu a brede nanga a win leki sma di e teki prati sosrefi na a nyanyan dati. A nyan di den sma disi e nyan na a tafra fu Yehovah, e sori taki den de na ini vrede nanga en. Fu dati ede Paulus ben skrifi: „Te wi e taki tangi gi a beker di ben blesi, dan wi e teki prati na a brudu fu Krestes, a no so? A brede di wi e broko, e sori taki wi e teki prati na a skin fu Krestes, a no so? Aladi wi de nanga furu sma, toku wi na wán skin fu di wán brede nomo de, èn wi alamala e nyan fu a wán brede dati.”​—1 Korentesma 10:16, 17.

22. Sortu aksi di abi fu du nanga a Memrefesa wi musu luku ete?

²² A Memrefesa na a wan-enkri alayari fesa di Yehovah Kotoigi e hori. A fiti taki den e du dati fu di Yesus ben gi den bakaman fu en a komando: „Tan du disi fu memre mi.” Na a Memrefesa wi e memre a dede fu Yesus. A dede fu en sori krin taki na Yehovah abi a reti fu tiri ala sani. Soleki fa wi si ini a tori fu a nyanyan pe difrenti sma ben e nyan makandra, dan a brede e prenki a skin fu Krestes di a gi leki wan srakti-ofrandi, aladi a win e prenki a brudu fu en di ben lon fu wi ede. Toku a de so taki wan tu sma nomo e nyan fu a brede èn e dringi fu a win. Fu san ede dati de so? San a Memrefesa wani taki trutru gi den milyunmilyun sma di no e nyan èn dringi fu a brede nanga a win? Iya, san a Memrefesa wani taki gi yu?

[Futuwortu]

San yu ben o piki?

• Fu san ede meki Yesus ben seti a Memrefesa?

• Omeni leisi wan yari a Memrefesa musu hori?

• San a brede sondro srudeki di sma e gebroiki na a Memrefesa e prenki?

• San a win di sma e gebroiki na a Memrefesa e prenki?

[Aksi fu a tori disi]

[Prenki na tapu bladzijde 15]

Yesus ben seti a Memrefesa fu a dede fu en