Na altari—O prenspari a de gi na anbegi fu wi?

YU E si na altari leki wan tumusi prenspari pisi fu na anbegi fu yu? Gi furu sma di e go na den kerki fu Krestenhèit, na altari na a presi pe ala prenspari sani fu na anbegi fu den e pasa. Oiti yu poti prakseri na san Bijbel e taki fu a gebroiki di sma e gebroiki altari na ini na anbegi fu den?

A fosi altari di Bijbel e taki fu en na a wan di Noa ben meki fu tyari meti-ofrandi na a ten di a komoto na ini na ark, baka a Frudu. *—Genesis 8:20.

Baka di Gado ben bruya a tongo fu den sma na Babel, dan a libisma famiri panya go na heri grontapu (Genesis 11:1-9). Fu di libisma meki nanga a firi fu anbegi wan Gado, meki den ben pruberi fu kon krosibei na a Gado di den no ben sabi so bun, den ben e suku Gado neleki breniman di e „firifiri” fu feni wan sani (Tori fu den Apostel 17:27; Romesma 2:14, 15). Sensi den dei fu Noa, furu difrenti pipel meki altari gi den gado fu den. Sma fu difrenti kerki èn difrenti kulturu gebroiki altari fu du falsi anbegi. Fu di sma no ben sabi a tru Gado moro, meki taki son leisi den gebroiki altari gi ogri-ati kerki gwenti pe den ben e kiri libisma, iya, den ben e kiri pikin-nengre srefi. Di son kownu fu Israel drai den baka gi Yehovah, dan den meki altari gi heiden gado, soleki Bâal (1 Kownu 16:29-32). Ma fa a de nanga a gebroiki fu altari na ini a tru anbegi?

Altari na ini a tru anbegi na ini Israel

Baka Noa, tra getrow man ben meki altari sosrefi. Den gebroiki den altari disi na ini na anbegi fu a tru Gado, Yehovah. Abraham ben meki altari na Sikem, na wan presi krosibei fu Bethel, na Hebron, èn na tapu a bergi Moria pe Gado ben gi en wan manskapu fu tyari dati leki ofrandi, na presi fu Isak. Bakaten, na ati fu Isak, Yakob, nanga Moses ben pusu den fu meki altari di den ben e gebroiki na ini na anbegi fu Gado.—Genesis 12:6-8; 13:3, 18; 22:9-13; 26:23-25; 33:18-20; 35:1, 3, 7; Exodus 17:15, 16; 24:4-8.

Di Gado gi a pipel fu Israel a Wet fu en, dan a komanderi den fu bow a tabernakel, di ben de wan prenspari pisi fu den sani di Gado ben seti so taki sma ben kan kon krosibei na en. A tenti disi di den ben kari sosrefi „a tenti fu konmakandra”, ben de wan tenti di sma ben kan tyari fu a wan presi go na a trawan (Exodus 39:32, 40). A tabernakel, noso a tenti, ben abi tu altari. Wán fu den ben de fu tyari bron-ofrandi. A ben meki fu akasia udu èn sma ben poti kopro na tapu. Na altari disi ben de na a mofodoro fu a tabernakel èn den ben e gebroiki en fu tyari meti-ofrandi (Exodus 27:1-8; 39:39; 40:6, 29). Na altari fu bron switismeri ben meki sosrefi  fu akasia udu, ma a ben abi gowtu na en tapu. Na altari disi ben de na ini a tabernakel, na fesi a garden fu a Moro Santapresi (Exodus 30:1-6; 39:38; 40:5, 26, 27). Tu leisi wan dei, namku mamanten nanga mofoneti, den ben e bron wan spesrutu sortu switismeri na tapu na altari disi (Exodus 30:7-9). A tempel di Kownu Salomo ben meki, ben bow akruderi na eksempre fu a tabernakel, èn a ben abi tu altari sosrefi.

„A tru tenti” nanga na agersi altari

Di Yehovah gi Israel a Wet, dan a no gi a pipel fu en markitiki nomo fu sori den fa den ben musu libi, fa den ben musu tyari ofrandi, noso fa den ben musu begi. Furu fu den sani di ben seti na ondro a Wet ben de sani di na apostel Paulus ben kari „wan prenki di de wan eksempre”, „wan eksempre”, noso „wan skaduw fu den sani di de na hemel” (Hebrewsma 8:3-5; 9:9; 10:1; Kolosesma 2:17). Sobun, furu sani fu a Wet no ben abi leki marki nomo fu tiri den Israelsma teleki a ten di a Krestes ben o kon, ma den ben abi leki marki sosrefi fu meki den kon sabi a prakseri fu Gado, di ben o kon tru nanga yepi fu Yesus Krestes (Galasiasma 3:24). Iya, difrenti pisi fu a Wet ben abi fu du nanga profeititori. Prakseri a pikin skapu di den ben gebroiki na a Paskafesa. A brudu fu en di ben de leki wan marki fu a frulusu di den Israelsma ben kisi, ben abi fu du nanga Yesus Krestes. Yesus na „a Pikin Skapu fu Gado di e puru a sondu fu grontapu”, di en brudu ben kanti trowe fu meki wi kon fri fu sondu.—Yohanes 1:29; Efeisesma 1:7.

Furu sani fu a tabernakel nanga a diniwroko na ini a tempel ben e prenki trutru sani di abi fu du nanga a fasi fa sani de na ini hemel (Hebrewsma 8:5; 9:23). Iya, Paulus skrifi fu „a tru tenti, di Yehovah ben seti, èn no libisma”. A e taki moro fara: „Krestes ben kon leki granpriester fu den bun sani di ben pasa, dan a pasa go na ini a moro bigi èn moro volmaakti tenti di no meki nanga anu, dati wani taki, a tenti di no de fu a grontapu disi” (Hebrewsma 8:2; 9:11). „A moro bigi èn moro volmaakti tenti” ben de a seti fu a gran yeye tempel fu Yehovah. Soleki fa den Buku fu Bijbel e taki, dan a gran yeye tempel abi fu du nanga den sani di seti, so taki libisma kan kon krosibei na Yehovah nanga yepi fu na ofrandi fu Yesus Krestes di a ben tyari fu tapu den sondu fu wi.—Hebrewsma 9:2-10, 23-28.

Te wi e kon frustan taki a Wortu fu Gado e leri wi taki difrenti seti, noso markitiki di ben de na ondro a wetsistema, e prenki moro bigi èn moro prenspari tori di abi fu du nanga sani di de na ini hemel, dan dati e gi wi wan moro bigi dyaranti taki na Gado ben meki sma skrifi Bijbel. A e meki wi kisi moro warderi sosrefi gi a koni fu Gado, di de fu si na wan aparti fasi na ini den Buku fu Bijbel.—Romesma 11:33; 2 Timoteyus 3:16.

Na altari pe sma ben e bron ofrandi abi fu du nanga profeititori tu. A gersi taki a e prenki a „wani” fu Gado, noso a de di Gado ben de klariklari fu teki a volmaakti libisma ofrandi fu Yesus.—Hebrewsma 10:1-10.

Bakaten Paulus taki wan moi sani na ini a buku fu Hebrewsma. A taki: „Wi abi wan altari di den wan di e du santa diniwroko na ini a tenti no abi a reti fu nyan fu dati” (Hebrewsma 13:10). Fu sortu altari a ben e taki?

Furu Lomsusma di e du vertaalwroko, e fruklari taki na altari di kari na ini Hebrewsma 13:10 na wan altari di sma e gebroiki na ini wan seremonia di den e hori fu meki na srakti-ofrandi fu Krestes kisi krakti baka. Ma den tra tekst na ini a pisi tori disi e sori taki na altari di Paulus ben e taki fu dati ben musu prenki wan sani. Difrenti sabiman e agri taki wi musu si a wortu altari di kari na ini a tekst na wan agersifasi. Giuseppe Bonsirven, wan Lomsu kerki fesiman, e taki dati „disi e kruderi soifri nanga na agersifasi fa furu pisi tori na ini a brifi disi [gi den  Hebrewsma], ben skrifi”. A e taki: „Fosi, te Kresten ben e taki fu a wortu ’altari’, dan den ben e gebroiki en na wan agersi fasi. Ma a ben de baka Irene-us èn moro furu baka Tertullianus nanga St. Cyprianus taki sma bigin gebroiki en [na altari] gi wan seremonia fu meki na srakti-ofrandi fu Yesus kisi krakti baka; a ben abi fu du spesrutu nanga wan sortu tafra di sma ben e gebroiki fu du a seremonia disi.”

Wan Lomsu tijdschrift e taki dati a gwenti di sma abi fu gebroiki wan altari bigin na ini a „ten fu Constantijn” di a „ben bigin bow den fosi Kresten kerki-oso na ini Rome”. Wan tijdschrift di nen, Rivista di Archeologia Cristiana ben taki: „A de krin taki buweisi no de di e sori taki den sma na ini den fosi tu yarihondro ben abi wan spesrutu presi pe den ben e go fu anbegi, ma taki den ben abi a gwenti fu konmakandra na ini kamra noso na ini oso fu sma . . . , [èn] te den ben kaba nanga a seremonia fu den, dan wantewante den ben kan gebroiki a kamra baka leki fa de ben gwenti gebroiki en.”

A fasi fa Krestenhèit e gebroiki na altari

Wan Lomsu tijdschrift di nen La Civiltà Cattolica e taki: „Na altari na a moro prenspari sani, no wawan na ini a kerki-oso, ma sosrefi na ini a libi fu den sma fu a Kerki.” Ma te yu luku en bun, dan Yesus noiti no seti wán seremonia srefi pe sma ben abi fu du sani na tapu wan altari; a no ben gi den disipel fu en nowan komando fu du sani pe den ben musu gebroiki wan altari. Di Yesus ben e taki fu na altari na ini Mateyus 5:23, 24 noso na tra presi na ini Bijbel, dan a ben e taki fu wan gwenti di furu Dyu ben abi, ma a no sori na nowan presi taki den bakaman fu en ben abi fu anbegi Gado nanga yepi fu wan altari.

George Foot Moore (di libi fu 1851 te go miti 1931), wan Amerkan historia skrifiman, ben skrifi: „Den prenspari sani fu a Kresten fasi fu anbegi ben tan a srefi. Ma baka wan pisi ten, den pikin seremonia fu san Justinus ben taki na a mindrisei pisi fu a di fu tu yarihondro ben kenki tron seremonia nanga furu opo-opo èn nanga bun furu pranpran.” Den Lomsu kerkigwenti de so furu èn den fromu so te, taki den tron wan spesrutu pisi fu a Lomsu bribi di wan sma musu leri efu a wani frustan den. Moore e taki moro fara: „A gwenti di sma abi fu e du den seremonia nanga furu opo-opo èn nanga furu pranpran ben kon moro tranga nanga yepi fu na Owru Testamenti, spesrutu na a ten di sma ben bigin si den Kresten kerki fesiman leki wan grupu fu sma di ben kon na presi fu den priester na ondro a wetsistema fu den Dyu. A moi fasi fa a Granpriester ben e weri, den spesrutu krosi di den tra priester ben e weri fu du a wroko fu den, a santa fasi fa den ben e waka fu du wan sani, den grupu fu Leifisma di ben e singi psalm, a smoko fu a switismeri na ini den smoko patu di sma e buweigi go kon, ala den sani disi sma ben e si leki wan eksempre di Gado ben gi sma fu sori den fa den ben musu anbegi en. Disi ben pusu den sma fu a kerki fu go pruberi fu du densrefi sani di sma ben gwenti fu du fositen.”

A e fruwondru yu kande fu yere taki furu fu den gwenti, den seremonia, den krosi, sosrefi furu fu den wrokosani di son kerki e gebroiki na ini na anbegi fu den, a no sani di abi fu du nanga den Kresten leri di de na ini den Evangelietori, ma taki den na gwenti fu den Dyu èn fu den heiden. Wan Lomsu buku di nen Enciclopedia Cattolica e taki dati a gwenti di a Lomsu bribi abi fu „gebroiki na altari, na wan gwenti fu a Dyu bribi èn sosrefi fu a bribi fu den heiden”. Minucius Felix, na wan man fu a di fu dri yarihondro fu wi gewoon teri. A man disi di ben opo taki gi a Kresten bribi, ben skrifi taki den Kresten no ben abi ’nowan tempel noso altari’. A buku Religioni e Miti, di na wan sortu wortubuku, e taki: „Den fosi Kresten no ben e gebroiki na altari kwetikweti, fu sori krin taki a fasi fa den ben e anbegi Gado ben e difrenti fu a di fu den Dyu èn sosrefi fu a di fu den heiden.”

A Kresten bribi ben abi fu du na a fosi presi nanga gronprakseri di sma ben musu agri nanga den. Sma ben musu fiti den na ini den aladei libi, awinsi na sortu kondre den ben e libi. Dati meki a no ben de fanowdu moro fu abi wan santa foto na grontapu, noso wan tempel di ben abi altari noso libisma priester di ben e weri spesrutu krosi fu du difrenti wroko. Yesus ben taki: „A yuru e kon te no na tapu a bergi disi, no na Yerusalem unu sa anbegi a Tata. . . . Den tru anbegiman sa anbegi a Tata nanga yeye èn nanga waarheid” (Yohanes 4:21, 23). A fromu fasi fa furu kerki gwenti seti èn a gebroiki di son kerki e gebroiki altari, e sori krin taki furu sma no e anbegi a tru Gado na a fasi di Yesus leri wi.

[Futuwortu]