No libi yu pikin fu gro leki fa a wani!

NA INI den anu fu wan bun patu-bakriman, wan pisi kleidoti di no warti noti kan kon tron wan moi sani. Wan tu patu-bakriman nomo de, di man meki furu moi sani fu wan pikin pisi klei nomo. Dusundusun yari langa, patu-bakriman ben de wan yepi na ini a libimakandra fu di na den ben e meki kan, preti, patu, dyogo, nanga moi vaas.

Papa nanga mama kan de wan bun yepi tu na ini a libimakandra te den e leri den pikin fu den fa den musu tyari densrefi èn te den e leri den bun maniri. Bijbel e agersi ibriwan fu wi nanga kleidoti, èn Gado gi papa nanga mama a tumusi prenspari wroko fu wroko na „a kleidoti” fu den, namku den pikin fu den (Yob 33:6; Genesis 18:19). Neleki fa a no de wan makriki sani fu meki wan moi prapi, na so a no de wan makriki sani tu fu meki wan pikin gro kon tron wan bigisma di man teki frantwortu èn di sma e frutrow. So wan kenki no e pasa somarso.

Furu sani de di kan abi krakti na tapu na ati fu den pikin fu wi. A de wan sari sani taki sonwan fu den sani disi kan pori den pikin fu wi. Sobun, na presi taki papa noso mama e libi a pikin fu den fu gro leki fa a wani, koni papa noso mama sa kweki a pikin fu den „akruderi a pasi gi en” nanga a frutrow taki „te a kon bigi a no sa komoto na a pasi” dati.—Odo 22:6.

Fu kweki wan pikin de wan prisiri sani, ma a de wan prenspari sani tu di e teki wan langa pisi ten. Te koni Kresten papa nanga mama e kweki a pikin fu den, dan den musu meki ten fu puru den sani di kan pori na ati fu a pikin fu den. A lobi fu den sa kisi furu tesi te den e sori pasensi aladi den e „leri a [pikin fu den] fu du san Masra wani”, èn te den e „warskow en leki fa [Masra] wani” (Efeisesma 6:4, Nyun Testamenti). A no de fu taki dati a wroko fu wan papa noso wan mama sa de moro makriki te a e bigin frukufruku kaba fu yepi a yongu pikin fu den.

Bigin frukufruku

Patu-bakriman lobi fu wroko nanga klei di safu èn di de makriki fu masi en kon tron wan sani, ma na a srefi ten a klei musu tranga nofo fu tan na a fasi fa a patu-bakriman masi en poti.  Patu-bakriman e feni en moro bun fu gebroiki a klei na ini den siksi mun baka te den puru ala doti. Na a srefi fasi, a moro bun ten gi papa nanga mama fu bigin wroko na a ati fu a pikin fu den na a pisi ten pe a de moro makriki fu kenki a fasi fa a pikin e denki.

Sabiman di stuka fu sabi sani fu pikin-nengre, e taki dati te wan pikin abi aiti mun, dan a sabi kaba o ten sma e taki a tongo di a o leri bakaten. Na a srefi ten dati, a pikin abi wan krosibei banti nanga en papa nanga mama, a man frustan son sani kaba, èn a e bigin ondrosuku den sani di de lontu en. A moro bun ten fu bigin wroko na a ati fu a pikin na te a yongu ete. Fu tru, yu pikin sa kisi wini neleki Timoteyus, di ’ben sabi den santa buku kaba sensi a ben de wan pikin-nengre’!—2 Timoteyus 3:15. *

Pikin-nengre lobi fu du san den papa nanga mama e du. Den e taki èn e du sani na a srefi fasi leki den papa nanga mama. Te papa nanga mama e sori lobi, switifasi, nanga sari-ati, dan den pikin e leri fu sori den fasi dati tu. Fu dati ede, te wi wani leri wi pikin akruderi den wet fu Yehovah, dan den wet disi musu de na ini wi ati fosi. Te papa nanga mama abi warderi gi a Wortu fu Yehovah, dan disi o pusu den fu taki nanga den pikin doronomo fu Yehovah èn fu a Wortu fu en. Bijbel e gi deki-ati fu „taki fu den [wortu disi] te yu e sidon na ini yu oso èn te yu e waka na pasi èn te yu e go didon èn te yu e opo” (Deuteronomium 6:6, 7). Francisco nanga Rosa e fruteri fa den e du disi nanga den tu yongu pikin fu den. *

„Boiti taki wi abi takimakandra nanga wi pikin ibri dei, dan ibri dei wi e pruberi fu taki nanga den aparti sowan 15 miniti langa. Te wi e si taki wan problema de, dan wi e teki moro ten fu lusu den problema èn mi kan taigi yu, den problema de trutru. Fu eksempre, no so langa pasa, a manpikin fu wi fu feifi yari, kon na oso èn a taigi wi taki a no ben e bribi na ini Yehovah. Soleki fa a sori, dan wan fu den pikin na ini en klas ben dreigi en èn ben taki dati Gado no de.”

A papa nanga mama disi kon si taki pikin musu kisi wan moro tranga bribi na ini a Mekiman fu den. Wan moi fasi fu du disi na fu luku den sani di Gado meki, fu di pikin-nengre lobi fu ondrosuku den sortu sani disi. Pikin-nengre lobi srefisrefi fu fasi wan meti, fu piki moi bromki, noso fu prei nanga a santi na sekanti! Papa nanga mama kan yepi den pikin fu frustan san ala den sani disi abi fu du nanga a Mekiman (Psalm 100:3; 104:24, 25). Na so den o fruwondru èn lespeki den sani di Yehovah meki, èn den o tan abi den firi disi den heri libi langa. A warderi di a pikin kon kisi gi den mekisani o meki taki a e kisi a firi fu plisi Gado èn a o frede fu du wan sani di Gado no lobi. A sani disi o meki taki a ’no du san ogri’.—Odo 16:6.

Aladi moro furu fu den yongu pikin wani sabi sani èn e leri sani esi-esi, toku nofotron den no wani gi yesi (Psalm 51:5). Sontron den de nomonomo fu du san den wani noso fu kisi san den wani. Te papa nanga mama e teki bosroiti, dan den musu tan hori densrefi na a bosroiti dati, den musu abi pasensi, èn den musu gi den pikin trangaleri so taki den no e kisi a gwenti fu du san den wani (Efeisesma 6:4). Na so Phyllis nanga Paul kweki den feifi pikin fu den nanga bun bakapisi.

Phyllis e memre: „Aladi ibriwan fu den pikin ben abi den eigi maniri, toku ibriwan fu den ben wani du san a wani. A no ben makriki, ma safrisafri den kon frustan taki te wi no ben wani wan sani, dan den no ben musu dwengi fu kenki wi bosroiti.” Paul, a masra fu Phyllis, e taki: „Di den  pikin ben owru nofo fu frustan sani, dan furu tron wi ben e fruteri den fu san ede wi teki son bosroiti. Aladi wi ben pruberi fu abi switifasi ala ten, toku wi leri den taki den musu abi lespeki gi wi bika dati na san Gado wani.”

Aladi wan pikin kan gi problema na ini en yongu yari, toku moro furu papa nanga mama e feni taki den moro bigi problema e kon te a pikin de na ini en tini yari, te a yongu ati fu den e kisi furu nyun tesi.

Fa fu doro na a ati fu wan tini pikin

Wan patu-bakriman musu kaba wroko nanga a kleidoti fosi a kon drei. Te a no wani taki a kleidoti e drei ete dan a kan poti pikinso watra gi en, fu a klei kan tan natinati so taki a makriki fu masi en ete. Na a srefi fasi, papa nanga mama musu meki furu muiti fu no meki na ati fu den tini pikin kon tranga. A no de fu taki dati a moro bun sani di kan yepi den, na Bijbel, fu di nanga Bijbel den kan ’gi piri-ai, poti sani kon reti, èn sreka den pikin gi ibri bun wroko’.—2 Timoteyus 3:15-17.

Ma a no ala ten wan tini sa teki a rai fu en papa nanga en mama so makriki leki di a ben de moro yongu. Fu di tini e bigin poti moro prakseri na den speri fu den, meki den kan feni en wan muilek sani fu taki nanga den papa nanga mama na wan fri fasi. Now a de prenspari fu abi moro pasensi nanga koni, fu di a situwâsi fu papa, mama nanga pikin kon kenki. A tini abi fu kon gwenti a fasi fa en skin nanga en firi e kenki. A abi fu bigin teki bosroiti èn poti marki di kan abi krakti tapu en libi na ini a ten di e kon (2 Timoteyus 2:22). Na ini a muilek pisi ten disi, a e kisi fu du nanga wan tra sani di kan pori en ati, namku a druk fu speri.

Yu no o si krin na wán okasi nomo taki yu pikin e kisi druk fu speri. Nofotron den speri o bigin taki sani na difrenti okasi, di o meki a tini pikin fu yu bigin tweifri na den sani di a e bribi èn na den sani di de prenspari gi en. Den sani di den speri e taki e wroko tapu wan swakifasi di furu tini abi, namku a dipi frede taki tra yonguwan no o feni den bun. Fu di wan tini kan bigin tweifri na a fasi fa a e denki èn fu di a wani taki tra yonguwan e feni en bun, meki a kan taki a e bigin si „den sani fu a grontapu” leki bun sani, neleki fa den tra yonguwan e si den.—1 Yohanes 2:15-17; Romesma 12:2.

Efu dati no sari ete, dan den lostu fu wan ati di no de volmaakti kan meki taki a druk fu speri e kon moro hebi. Wan tini kan kisi rai fu speri taki a musu abi prisiri na ini en libi èn a musu du san a e firi fu du. Gi wan tini, den sortu rai disi kan sori tumusi moi rai. María e memre san ben pasa nanga en: „Mi ben e arki den tini di bribi taki yonguwan abi a leti fu abi prisiri someni leki den man, awinsi sortu bakapisi dati ben o tyari. Fu di mi ben wani du neleki den skoromati fu mi, meki pikinmoro mi kon na ini bigi problema.” Leki papa noso mama, yu wani yepi yu tini pikin fu kakafutu gi a sortu druk disi fu speri. Ma fa yu kan du disi?

 Nanga den sani di yu e taki èn nanga den sani di yu e du, yu musu gi yu pikin a dyaranti ibri tron baka taki yu lobi en. Meki muiti fu kon sabi fa a e si son sani, èn pruberi fu frustan sortu problema a abi, fu di sontron den problema fu en kan bigi moro den wan di yu ben abi di yu ben de na skoro. Spesrutu na ini en tini yari, yu pikin abi fu si yu leki wan sma di a kan frutrow (Odo 20:5). Kande yu kan si na a fasi fa a e du sani noso na en fesi, taki yu pikin abi broko-ede noso taki a no sabi san a musu du. Awinsi yu pikin no e taki fu den problema di a abi, toku yu musu du wan sani fu yepi èn fu ’trowstu en’.—Kolosesma 2:2.

A no de fu taki dati a de prenspari fu tan hori yusrefi na sani di yoisti. Furu papa nanga mama kon si taki ten na ten trobi e kon fu di a tini fu den de nomonomo fu du san a wani. Ma papa nanga mama no musu kenki prakseri te den e si taki a bosroiti fu den yoisti. Na a tra sei, sorgu taki yu sabi soifri san na a tori, fosi yu e bosroiti fu gi a tini trangaleri na wan lobi-ati fasi èn fosi yu bosroiti fa yu o gi en a trangaleri disi efu dati de fanowdu.—Odo 18:13.

Srefi na ini a gemeente a kan kisi tesi

A kan taki wan prapi gersi leki a kaba meki, ma a no kaba meki solanga a no baka na ini wan spesrutu onfu. Disi musu fu pasa fu di efu wan sma ben sa poti watra na ini a prapi dan so wan prapi sa pori. Bijbel e agersi den tesi nanga problema di wan sma e kisi, nanga a baka di wan prapi musu baka na ini wan faya onfu, bika te tesi e miti wan sma, dan fosi a e sori suma a de trutru. A no de fu taki dati te Bijbel e taki fu tesi, a e taki spesrutu fu tesi tapu a bribi fu wi. Ma furu tron den tesi disi kan de tra sortu tesi tu (Yakobus 1:2-4). Kande disi e fruwondru yu, ma son leisi yonguwan e kisi tesi na ini a gemeente srefi.

Aladi a kan gersi taki a tini fu yu gosontu na yeye fasi, toku a kan de so taki a e feti nanga tu prakseri (1 Kownu 18:21). Fu eksempre, Megan ben kisi fu du nanga a fasi fa sma na grontapu e denki, fu di tra yonguwan na ini a Kownukondre zaal ben abi so wan denki.

A e taki: „A fasi fa wan grupu fu yonguwan ben e denki ben abi krakti na mi tapu. Den yonguwan disi ben e si a Kresten bribi leki wan sani di soi èn leki wan sani di e tapu yu fu abi prisiri. Den ben e taki sani soleki: ’A dei di mi e tapu 18 yari, mi e gowe libi a waarheid’, noso ’Mi no man wakti fu komoto na a waarheid’. Den no ben e bumui nanga tra yonguwan di no ben e agri nanga den; den ben e kari den yonguwan disi santa sma.

Wán noso tu yonguwan nomo di abi takru prakseri, nofo kaba fu pori den tra yonguwan. Te wan yonguwan de na ini wan grupu, dan furu tron a e du neleki fa den trawan na ini a grupu e du. Yonguwan e feni en moro prenspari fu handri na wan don fasi èn fu sori wan deki-ati na wan don fasi, leki fu gebroiki den frustan noso fu sori taki den kisi wan bun kweki. A de wan sari sani taki na ini furu kondre, Kresten yonguwan ben kon na ini problema fu di den ben wani du san tra yonguwan e du.

A no de fu taki dati tini musu abi prisiri demakandra  nanga tra yonguwan. Fa yu leki papa noso mama kan yepi na ini a tori disi? No si prisiriten leki wan lawlaw sani. Seti sani nanga na osofamiri noso nanga wan grupu fu yonguwan nanga owruwan, na so wan fasi taki ala sma kan abi prisiri. Leri sabi den mati fu yu pikin. Gi den wan kari fu kon nyan na unu oso, noso fu kon fisiti unu na wan mofoneti (Romesma 12:13). Gi yu pikin deki-ati fu leri fu du wan bun sani na ini en fri ten; a kan leri fu prei poku, a kan leri wan tra tongo noso a kan leri meki moi sani. A kan leri du furu fu den sani disi na oso pe sma no sa abi takru krakti tapu en.

Skoroleri kan kibri en

A skoroleri di wan tini e kisi, kan yepi en tu fu no poti tumusi furu prakseri na prisiriten. Loli, di ben wroko 20 yari na wan skoro pe a ben e luku taki ala sani waka bun, e taki: „Mi si furu yongu Kotoigi na a skoro disi. Furu fu den ben de fu prèise fu a fasi fa den ben e tyari densrefi, ma sonwan fu den ben du neleki den tra studenti. Den wan di ben de fu prèise, ben lobi fu leri. Mi wani gi papa nanga mama a rai disi trutru, taki den musu poti prakseri na a fasi fa den pikin e leri na skoro. Papa nanga mama musu leri sabi den skoromeester nanga skoromisi di e gi den pikin fu den leri èn den musu meki den pikin frustan taki a de prenspari fu wroko bun na skoro. Te papa nanga mama e du den sani disi, dan den o si taki sonwan fu den pikin o leri heri bun na skoro, ma ala pikin kan leri na so wan fasi taki den skoromisi nanga den skoromeester o lespeki den èn o de tevrede nanga san den man du.”

Te pikin e leri na so wan fasi dan dati kan yepi den tu fu go na fesi na yeye fasi. A kan leri den fu kisi a bun gwenti fu studeri, fu dwengi den frustan fu poti prakseri na wan sani, èn fu frustan taki den musu teki frantwortu. A no de fu taki dati te den e leri leisi bun èn te den e leri fu frustan sani, dan dati e gi den deki-ati fu tron moro bun studenti èn leriman fu a Wortu fu Gado (Nehemia 8:8). Te den e du den skorowroko èn te den e studeri Bijbel nanga Bijbel yepisani, dan disi kan yepi den fu abi prisiri na a yoisti ten.

Papa, mama nanga Yehovah e kisi grani

Na tapu furu fu den vaas fu Grikikondre fu owruten, a nen fu a patu-bakriman èn a nen fu a sma di ben poti moimoi sani gi a vaas ben skrifi. Na a srefi fasi tu, furu tron na tu sma e wroko makandra na a ati fu pikin. Papa nanga mama abi wan prati fu wroko na a ati fu a pikin, èn na wan agersi fasi yu kan taki dati a nen fu alatu skrifi na tapu na ati fu a pikin. Neleki wan bun patu-bakriman èn neleki wan sma di sabi fa fu meki moimoi sani gi wan prapi, na so yu leki papa noso mama, kan prisiri nanga a wroko di yu du fu meki wan yongu sma tron wan sma di abi bun maniri èn di trawan e lespeki.—Odo 23:24, 25.

O moro yu e wroko na a ati fu yu pikin, o moro bun bakapisi yu kan kisi. Kande yu sa man taki: „A wet fu en Gado de na ini en ati; den futustap fu en no sa degedege” (Psalm 37:31). Wan pikin de tumusi prenspari fu libi en somarso fu gro leki fa a wani.

[Futuwortu]