San a Memrefesa wani taki gi yu?
San a Memrefesa wani taki gi yu?
„A sma di e nyan a brede noso e dringi fu a beker fu Masra, na wan fasi di no fiti, sa sondu na a skin èn na a brudu fu Masra.”—1 KORENTESMA 11:27.
1. San na a moro prenspari fesa di wi wani hori na ini a yari 2003? Suma seti a fesa dati?
A MORO prenspari fesa di wi wani hori na ini a yari 2003, sa hori tapu 16 april, baka te son dongo. Na a dei dati Yehovah Kotoigi sa kon makandra fu hori a Memrefesa fu a dede fu Yesus Krestes. Soleki fa a tra artikel sori kaba, dan Yesus seti a fesa disi, baka di en nanga den apostel fu en ben hori a Paskafesa tapu 14 Nisan 33 G.T. Wi kon si tu taki a fesa disi abi a nen sosrefi fu a Neti-nyanyan fu Masra. A brede sondro srudeki nanga a redi win di wi e gebroiki na a Memrefesa, e prenki a libisma skin fu Krestes di no ben abi sondu, èn sosrefi a brudu fu en di lon gi a tanbun fu libisma. Disi na a wan-enkri srakti-ofrandi di kan frulusu a libisma famiri fu a sondu nanga a dede di wi kisi fu a fosi tata fu wi.—Romesma 5:12; 6:23.
2. Sortu warskow skrifi na ini 1 Korentesma 11:27?
2 Den wan di e nyan fu a brede èn e dringi fu a win na a Memrefesa, musu du dati na wan fasi di fiti. Na apostel Paulus ben poti krakti tapu a sani disi di a ben skrifi go na a Kresten gemeente na Korente fu owruten, pe den no ben e hori a Memrefesa na wan yoisti fasi (1 Korentesma 11:20-22). Paulus ben skrifi: „A sma di e nyan a brede noso e dringi fu a beker fu Masra, na wan fasi di no fiti, sa sondu na a skin èn na a brudu fu Masra” (1 Korentesma 11:27). San den wortu dati wani taki?
Son sma ben e hori a Memrefesa na wan fasi di no fiti
3. Fa furu Kresten na ini Korente ben e tyari densrefi te den ben de na a Memrefesa?
3 Furu Kresten na ini Korente ben e teki prati na a Memrefesa na wan fasi di no fiti. Pratifasi ben de na den mindri. Wan pisi ten ben de di son sma ben e tyari den eigi neti-nyanyan kon fu nyan dati bifo a konmakandra bigin, noso den ben e nyan aladi a konmakandra ben e hori. Furu tron den ben e nyan èn dringi pasa marki. Den no ben man poti prakseri trutru na a konmakandra, èn den no ben de na ai tu na yeye fasi. Disi ben meki taki den ben e „sondu na a skin èn na a brudu fu Masra”. Den wan di no ben nyan ete ben de nanga angri èn dati ben e puru den prakseri fu a konmakandra. Iya, furu fu den ben e teki prati na a fesa sondro fu sori lespeki. Den no ben e frustan trutru o seryusu a fesa dati ben de. Fu dati ede a no e fruwondru wi srefisrefi taki den ben kisi krutu fu dati!—1 Korentesma 11:27-34.
4, 5. Fu san ede a prenspari taki den wan di abi a gwenti fu nyan na a Memrefesa, e ondrosuku densrefi bun?
4 Ibri yari te a Memrefesa e kon moro krosibei, dan a bun taki den wan di gwenti fu nyan fu a brede èn fu dringi fu a win, ondrosuku densrefi baka. Efu den wani teki prati na a nyanyan disi pe sma e nyan nanga makandra, èn efu den wani du dati na wan fasi di fiti, dan den musu de sma di tranga na yeye fasi. Ibriwan sma di no e sori lespeki, noso di e wisiwasi na ofrandi fu Yesus srefi, kan meki taki den sa abi fu ’koti en puru fu a pipel fu Gado’, neleki fa den ben e du nanga wan Israelsma di ben e nyan a nyanyan disi makandra nanga tra sma, aladi a no ben de krin.—Lefitikus 7:20; Hebrewsma 10:28-31.
5 Paulus ben agersi a Memrefesa nanga wan nyanyan pe sma na ini Israel fu owruten ben e nyan nanga makandra. A ben taki dati den sma di ben e teki prati na a Memrefesa, ben e teki prati nanga Krestes. Ne a taki moro fara: „Unu no kan dringi a beker fu Yehovah nanga a beker fu den ogri yeye; unu no kan nyan na ’a tafra fu Yehovah’ èn na a tafra fu den ogri yeye” (1 Korentesma 10:16-21). Efu wan sma di gwenti fu nyan fu a brede èn fu dringi fu a win na a Memrefesa, du wan seryusu sondu, dan a abi fu taki nanga Yehovah fu a pisi tori disi. A musu suku yepi sosrefi na den owruman fu a gemeente (Odo 28:13; Yakobus 5:13-16). Efu a abi berow trutru èn efu dati de fu si sosrefi na ini a fasi fa a e tyari ensrefi, dan a no de so taki a e teki prati na a fesa na wan fasi di no fiti.—Lukas 3:8.
Sma di e sidon luku na wan lespeki fasi
6. Suma na den sma di Gado e gi a grani fu nyan èn dringi na a Memrefesa?
6 Fa a de nanga den sma di e du bun gi a fikapisi fu den 144.000 brada fu Krestes noyaso? A de so taki den musu nyan na a Memrefesa tu? (Mateyus 25:31-40; Openbaring 14:1) Nôno. Gado e gi a grani disi soso na den wan di a salfu nanga santa yeye fu de „kompe erfgenaam nanga Krestes” (Romesma 8:14-18; 1 Yohanes 2:20). Fa a de dan nanga den wan di abi a howpu fu libi fu têgo na ini wan paradijs grontapu na ondro a tiri fu a Kownukondre? (Lukas 23:43; Openbaring 21:3, 4) Fu di den a no kompe erfgenaam fu Yesus di abi a howpu fu libi na ini hemel, meki den de na a Memrefesa leki sma di e sidon luku na wan lespeki fasi fa sani e waka.—Romesma 6:3-5.
7. Fa den fosi yarihondro Kresten ben sabi taki den ben de sma di ben musu nyan fu a brede èn dringi fu a win na a Memrefesa?
7 Den tru Kresten na ini a fosi yarihondro ben e kisi salfu nanga santa yeye. Furu fu den ben kisi wán noso moro fu den wondru presenti fu a yeye, soleki a taki di den ben man taki na ini tra tongo. Fu dati ede a no ben tranga gi den sma dati fu sabi taki den ben de sma di ben kisi salfu nanga santa yeye èn taki den ben musu nyan fu a brede èn dringi fu a win na a Memrefesa. Ma na ini a ten disi, a de a Bijbel di skrifi nanga yepi fu santa yeye, di e sori wi efu wan sma kisi salfu trutru nanga santa yeye. Drape wi e leisi den wortu soleki: „Ala sma di e kisi a tiri fu a santa yeye fu Gado, na manpikin fu Gado. Bika unu no ben kisi wan yeye fu katibo di e meki unu frede baka, ma unu ben kisi wan yeye fu a teki di den teki unu leki manpikin, èn nanga a yeye dati wi e bari: ’Abba, Tata!’”—Romesma 8:14, 15.
8. Mateyus kapitel 13 e taki fu „aleisi” nanga „takru wiwiri”. Suma den sani disi e prenki?
8 Sensi a ten fu a fosi Kresten gemeente, dan den sma di kisi salfu trutru, de leki „aleisi” di e gro na ini wan gron nanga „takru wiwiri”, dati wani taki na mindri falsi Kresten (Mateyus 13:24-30, 36-43). Fu sensi den yari baka 1870, dan na „aleisi” disi kon de krin fu si. Dati meki pikinmoro wan hondro yari baka dati, salfu Kresten owruman ben kisi fu yere: „Den owruman . . . musu sori den wan di e kon makandra [gi a Memrefesa] taki den musu doro den marki disi, namku (1) taki den musu sori bribi na ini a brudu [fu Krestes]; sosrefi (2) taki den musu gi densrefi abra na Masra èn na a diniwroko fu En, teleki den dede srefi. Dan den musu gi wan kari na ala den wan di sori bribi èn di gi densrefi abra na Masra fu dati ede, fu kon makandra fu memre a dede fu Masra.”—Studies in the Scriptures, Pisi VI, The New Creation, bladzijde 473. *
Suku den „tra skapu”
9. Fa a ben kon na krin na ini 1935 suma a „bigi ipi” ben de trutru? Sortu krakti dati ben abi tapu son sma di ben gwenti fu nyan fu a brede èn fu dringi a win na a Memrefesa?
9 Baka wan pisi ten, na organisâsi fu Yehovah bigin poti prakseri na tra sma, boiti den salfu bakaman fu Krestes. Wan prenspari kenki di abi fu du nanga a pisi tori disi ben kon wan tu yari baka 1930. Bifo a ten dati, dan a pipel fu Gado ben e si a „bigi ipi” fu Openbaring 7:9 leki wan grupu fu sma di no ben de so prenspari leki den 144.000 salfuwan di ben o kisi wan opobaka fu libi na ini hemel. Den ben e si a bigi ipi disi leki sma di ben o abi demakandra nanga den 144.000 salfuwan na ini hemel; sma di ben o horibaka gi a trowmisi fu Krestes (Psalm 45:14, 15; Openbaring 7:4; 21:2, 9). Ma tapu 31 maart 1935, wan lezing ben hori na wan kongres fu Yehovah Kotoigi na ini Washington, D.C., Amerkankondre, pe den gebroiki Bijbel fu tyari kon na krin taki a „bigi ipi” („a bigi grupu fu sma”, soleki fa King James Version e taki) ben abi fu du nanga den „tra skapu” di e libi na a ten fu a kaba (Yohanes 10:16). Baka a kongres dati, dan son sma di ben gwenti fu nyan fu a brede èn fu dringi fu a win na a Memrefesa no ben du dati moro fu di den ben kon frustan taki den abi a howpu fu libi na grontapu. Den no ben abi a howpu fu go na hemel.
10. San yu kan taki fu a howpu nanga a frantwortu di sma fu a grupu fu „tra skapu” abi na ini a ten disi?
10 Spesrutu sensi 1935 a wroko bigin fu suku den wan di ben o tron a grupu fu „tra skapu”. Den na sma di abi bribi na ini a lusu-paiman, sma di gi densrefi abra na Gado, aladi den e horibaka gi a salfu fikapisi na ini a Kownukondre preikiwroko (Lukas 12:32). A wán-enkri difrenti na mindri den nanga den salfuwan, na taki den tra skapu disi abi a howpu fu libi fu têgo na grontapu. Ma na ini ala tra sani, den de a srefi leki a disiten fikapisi fu den Kownukondre erfgenaam. Na ini na Israel fu owruten yu ben abi trakondre sma di ben e anbegi Yehovah, sma di ben e gi yesi na a Wet. Na so a de tu nanga den tra skapu na ini a ten disi. Den e tyari a frantwortu fu den leki Kresten, soleki a preiki di den musu preiki a bun nyunsu makandra nanga den memre fu na Israel na yeye fasi (Galasiasma 6:16). Ma neleki fa den trakondre sma no ben man tron kownu noso priester na ini Israel, na so nowan sma kan tron kownu noso priester na ini a hemel Kownukondre, aladi a de wan memre fu den tra skapu.—Deuteronomium 17:15.
11. Fu san ede a kan de so, taki a dei di wan sma teki dopu kan abi fu du nanga a de di wan sma de wan memre fu a salfu fikapisi?
11 Ma na ini den yari baka 1930 a ben e kon na krin safrisafri taki a nomru fu den sma di ben abi a howpu fu go na hemel, ben doro kaba. Fu dati ede, a de pikinmoro 70 yari kaba taki wi e suku den sma di de fu a grupu fu tra skapu, di abi a howpu fu libi na grontapu. Efu a de krin taki wan salfuwan drai en baka gi Gado, dan a no de fu taki dati wan tra sma fu den tra skapu di e dini Gado bun langa kaba, sa kisi salfu na presi fu a trawan di fadon gowe, so taki en e tron wan memre fu den 144.000.
Fu san ede son sma e bribi taki den o go na hemel?
12. O ten wan sma musu tapu wantewante fu nyan fu a brede èn fu dringi fu a win na a Memrefesa? Fu san ede?
12 Salfu Kresten sabi taki den kisi a kari fu go na hemel, èn den no e tweifri fu dati. Ma fa a de te sma di no ben kisi a kari disi, ben abi a gwenti fu nyan fu a brede èn fu dringi fu a win na a Memrefesa? Di den kon frustan now taki den noiti no ben abi a howpu fu go na hemel, dan a no de fu taki dati a konsensi fu den sa meki taki den no sa nyan noso dringi fu den sani dati moro. Gado no ben o prisiri nanga nowan sma di e du neleki a de wan fu den sma di o tron kownu èn priester na ini hemel, aladi a sma dati sabi taki a no ben kisi a kari dati trutru (Romesma 9:16; Openbaring 20:6). Yehovah ben kiri Korak, wan Leifisma, fu di a ben prefuru fu suku fu kisi a priesterwroko fu Aron (Exodus 28:1; Numeri 16:4-11, 31-35). Iniwan Kresten man noso uma di kon si taki a no ben musu nyan fu a brede èn dringi a win na a Memrefesa, sa abi fu tapu nanga dati wantewante, aladi a musu begi nanga sakafasi fu aksi Yehovah pardon.—Psalm 19:13.
13, 14. San kan meki taki son sma e bribi taki den kisi a kari fu go na hemel?
13 San kan meki taki son sma e bribi taki den o go na hemel? Te a trowpatna fu wan sma dede, noso te wan tra rampu miti en, dan a kan kisi a firi taki a no wani libi na grontapu moro. Noso a kan taki son sma wani go na hemel tu fu di wan bun mati fu den e taki dati en na wan salfu Kresten. A no de fu taki dati Gado no gi nowan libisma a wroko fu go suku sma di wani a grani disi. Sosrefi a no de so taki Gado e salfu den Kownukondre erfgenaam fu di a e meki den yere sten di e fruteri den taki den kisi salfu.
14 A falsi kerkileri taki ala bun sma e go na hemel, kan meki taki son sma e bribi taki den e go na hemel tu. Fu dati ede wi musu luku bun fu no meki den fowtu sani di wi ben bribi fosi noso tra sani, abi krakti na wi tapu. Son sma kan aksi densrefi fu eksempre: ’Mi e gebroiki dresi di abi krakti tapu a fasi fa mi e firi? A de so taki den firi fu mi abi so furu krakti tapu mi libi, taki den ben kan meki mi bribi taki mi na wan fu den salfuwan, aladi dati no de so trutru?’
15, 16. Fa a du kon taki son sma e bribi kande taki den na salfuwan?
15 Son sma kan aksi densrefi: ’A de so taki mi e angri fu de wan prenspari sma? Mi na wan sma di e feti fu kisi wan prenspari wroko noyaso noso na ini a ten di e kon leki wan fu den kompe erfgenaam fu Krestes?’ Hori na prakseri taki di den Kownukondre erfgenaam na ini a fosi yarihondro kisi wan kari, dan a no den alamala ben e du prenspari wroko na ini a gemeente. Sosrefi a de so taki sma di kisi a kari fu go na hemel no e suku fu kisi barinen, noso den no e meki bigi taki den kisi salfu. Den e sori a sakafasi di yu kan fruwakti fu den wan di „abi a denki fu Krestes”.—1 Korentesma 2:16.
16 A kan taki son sma e bribi taki den kisi a kari fu go na hemel fu di den kon sabi bun furu sani fu Bijbel. Ma te wan sma kisi salfu nanga santa yeye, dan dati no wani taki dati a o frustan sani na wan tumusi aparti fasi, bika Paulus ben abi fu gi rai nanga frumane na difrenti fu den salfuwan srefi (1 Korentesma 3:1-3; Hebrewsma 5:11-14). Gado sreka sani fu gi yeye nyanyan na a heri pipel fu en (Mateyus 24:45-47). Sobun, nowan sma no musu prakseri taki a sa kisi moro koni leki den wan di abi a howpu fu libi na grontapu, efu a de wan salfu Kresten. Te wan sma kisi salfu nanga santa yeye, dan dati no abi noti fu du nanga a man di a man piki aksi di abi fu du nanga Bijbel, nanga a preiki di a man preiki, noso nanga a hori di a man hori lezing di abi fu du nanga Bijbel. Kresten di abi a howpu fu libi na grontapu man fu du den sani disi na wan bun fasi sosrefi.
17. San e meki taki wan sma kan tron wan salfuwan? Suma na a sma di e bosroiti suma e kisi salfu?
17 Efu wan brada noso sisa aksi moro fini rai ini a tori fu a kari di sma e kisi fu go na hemel, dan wan owruman noso wan tra lepi Kresten kan taki nanga en fu a pisi tori dati. Ma hori na prakseri taki nowan sma no kan bosroiti gi wan trawan efu a kisi a kari fu de wan salfuwan. Wan sma di kisi a kari disi trutru, no abi fu aksi trawan efu den denki taki a abi so wan howpu. Den salfuwan ben ’kon gebore nyun baka, no nanga siri di kan pori, ma nanga siri di no kan pori, nanga yepi fu a wortu fu a libi Gado di e tan fu ala ten’ (1 Petrus 1:23). Gado e gebroiki a yeye nanga a Wortu fu en, fu prani a „siri” dati na ini na ati fu sma. A siri dati e meki taki a sma e tron „wan nyun sani di Gado meki”, a e tron wan sma di abi a howpu fu libi na ini hemel (2 Korentesma 5:17). Yehovah na a sma di e bosroiti suma a e salfu. A kisi di sma e kisi salfu „no e anga fu a sma di e winsi noso fu a sma di e lon, ma fu Gado” (Romesma 9:16). Sobun, fa wan sma kan kon sabi efu en na wan fu den sma di kisi a kari fu go na hemel?
Salfu Kresten no e tweifri taki den o go na hemel
18. Fa a yeye fu Gado e gi kotoigi makandra nanga a yeye fu den salfuwan?
18 A yeye fu Gado e gi salfu Kresten na overtoigi taki den na sma di e go na hemel. Paulus ben skrifi: „Unu ben kisi wan yeye fu a teki di den teki unu leki manpikin, èn nanga a yeye dati wi e bari: ’Abba, Tata!’ A yeye srefi e gi kotoigi makandra nanga a yeye fu wi taki wi na pikin fu Gado. Fu dati ede, efu wi na pikin, dan wi na erfgenaam tu, iya, erfgenaam fu Gado, ma kompe erfgenaam nanga Krestes, ma soso te wi nyan pina makandra, so taki wi kan kisi glori makandra tu” (Romesma 8:15-17). A santa yeye di e wroko na den tapu, e meki taki a yeye noso a sani di e basi a prakseri fu salfuwan, pusu den fu si taki den sani di den Buku fu Bijbel e taki fu den yeye pikin fu Yehovah, na sani di skrifi gi den (1 Yohanes 3:2). A yeye fu Gado e meki den kisi a firi taki den na manpikin fu en, aladi a e gi den wan howpu di trawan no abi (Galasiasma 4:6, 7). Iya, a ben o de wan tumusi moi sani gi den salfuwan disi fu man libi fu têgo leki volmaakti libisma na mindri famiri nanga mati. Ma dati a no a howpu di Gado gi den. Gado e meki a yeye fu en wroko na den tapu na so wan fasi taki den e kisi a howpu fu go na hemel. A howpu dati de so tranga taki den de klariklari fu gowe libi iniwan sma noso iniwan sani di den lobi, nanga iniwan sani di den ben sa wani du na grontapu.—2 Korentesma 5:1-5, 8; 2 Petrus 1:13, 14.
19. O prenspari a nyun frubontu de na ini a libi fu wan salfu Kresten?
19 Salfu Kresten sabi taki den o go na hemel. Den sabi taki den de na ini a nyun frubontu. Den no e tweifri na den sani disi kwetikweti. Yesus ben poti prakseri na a frubontu disi di a seti a Memrefesa. A ben taki: „A beker disi wani taki a nyun frubontu akruderi a brudu fu mi, di sa kanti trowe fu a bun fu unu” (Lukas 22:20). Den sma di de na ini a nyun frubontu, na Gado nanga den salfuwan (Yeremia 31:31-34; Hebrewsma 12:22-24). Yesus de a mindriman. A nyun frubontu bigin wroko trutru di a brudu fu Krestes lon gi libisma. A frubontu disi ben meki taki Dyu, ma sosrefi sma fu den tra pipel fu grontapu, ben kan tron wan pipel gi a nen fu Yehovah èn sosrefi wan pisi fu a „siri” fu Abraham (Galasiasma 3:26-29; Tori fu den Apostel 15:14). A „têgo frubontu” disi e meki taki ala sma di de fu na Israel na yeye fasi, kan kisi wan opobaka fu libi na hemel leki sma di no man dede noiti.—Hebrewsma 13:20.
20. Sortu frubontu Krestes meki nanga den salfuwan?
20 Den salfuwan no e tweifri taki den o go na hemel. Den sma disi de na ini ete wan tra frubontu, namku a Kownukondre frubontu. Yesus ben sori taki den ben o de na ini a frubontu disi tu, di a ben taki: „Unu na den wan di tan nanga mi di mi kisi tesi; èn mi e meki wan frubontu nanga unu, soleki fa mi Tata meki wan frubontu nanga mi, fu wan kownukondre” (Lukas 22:28-30). A frubontu disi fu Krestes nanga den wan di o tiri makandra nanga en leki kownu, na wan frubontu di e tan fu têgo.—Openbaring 22:5.
A pisi ten fu a Memrefesa na wan ten fu prisiri
21. Fa wi kan kisi furu wini na a pisi ten di a Memrefesa e hori?
21 A pisi ten fu a Memrefesa na wan ten pe furu sani e pasa di e gi prisiri. Wi kan kisi wini fu den sani di seti gi wi fu leisi Bijbel na a pisi ten dati. A de wan tumusi moi ten sosrefi fu begi, fu denki dipi fu a libi fu Yesus na grontapu èn fu a dede fu en. Boiti dati, a de wan moi ten tu fu teki prati na a Kownukondre preikiwroko (Psalm 77:12; Filipisma 4:6, 7). A fesa srefi e memre wi na a lobi di Gado nanga Krestes sori gi wi di Yesus gi en libi leki wan frulusu-ofrandi (Mateyus 20:28; Yohanes 3:16). A sani disi e gi wi howpu nanga trowstu èn a musu gi wi deki-ati fu tan sori a fasti bosroiti fu wi fu libi leki fa Krestes ben e libi (Exodus 34:6; Hebrewsma 12:3). San prenspari tu na taki a Memrefesa musu tranga wi fu tan libi leki sma di gi densrefi abra na Gado leki futuboi fu en, èn fu de sma di e tan waka baka a lobi Manpikin fu Gado na wan getrow fasi.
22. San na a moro bigi presenti di Gado gi libisma? San na wán fasi fa wi kan sori warderi gi dati?
22 Fu tru, Yehovah e gi wi furu bun presenti! (Yakobus 1:17) Wi abi a Wortu fu en fu tiri wi, sosrefi wi abi a santa yeye fu yepi wi. Boiti dati wi abi a howpu fu libi fu têgo. A moro bigi presenti di Gado gi libisma na a srakti-ofrandi fu Yesus, fu pai a sondu fu den salfuwan, èn sosrefi a di fu ala den tra sma di e poti bribi na ini en (1 Yohanes 2:1, 2). Sobun, o prenspari a dede fu Yesus de gi yu? Yu sa de na mindri den wan di e sori warderi gi dati? Yu sa kon makandra nanga den sma disi, baka te son dongo tapu 16 april 2003, fu hori a Memrefesa?
[Futuwortu]
^ paragraaf 8 Yehovah Kotoigi ben tyari en kon na doro, ma a no e meki moro.
San yu ben o piki?
• Suma kan nyan fu a brede èn dringi fu a win na a Memrefesa?
• Fu san ede den „tra skapu” e go na a Memrefesa soso leki sma di e sidon luku na wan lespeki fasi?
• Fa den salfu Kresten sabi taki den musu nyan fu a brede èn dringi fu a win te den de na a Memrefesa fu Krestes dede?
• Sortu moi sani wi kan du na a pisi ten fu a Memrefesa?
[Aksi fu a tori disi]
[Schema/Prenki na tapu bladzijde 18 di e tyari sani kon na krin]
(Efu yu wani si pe den sani disi skrifi, luku a tijdschrift)
Sma di ben de na a Memrefesa
DEN NOMRU DE NA INI MILYUN
15.597.746
15
14
13.147.201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Prenki na tapu bladzijde 18]
Yu sa de na a Memrefesa a yari disi?
[Prenki na tapu bladzijde 21]
A pisi ten fu a Memrefesa na wan tumusi bun ten fu leisi Bijbel moro furu, èn fu teki prati na a Kownukondre preikiwroko