Den horidoro aladi den kisi frufolgu

FRIEDA JESS gebore na ini Deinsikondre na ini 1911. Makandra nanga en papa nanga en mama a froisi go tan na ini Husum na a noordsei fu Doisrikondre. Yari baka dati a go wroko na ini a foto Maagdenburg, èn na ini 1930 a dopu èn a tron wan Bijbel Ondrosukuman, soleki fa sma ben sabi Yehovah Kotoigi na a ten dati. Na ini 1933, Hitler kon na a makti, èn a sani disi ben de a bigin fu a pina di Frieda ben o ondrofeni 23 yari langa na a anu fu, a no wán, ma tu ogri-ati tirimakti.

Na ini maart 1933, a Doisri tirimakti hori wan verkiezing. Historia skrifiman Detlef Garbe na a edeman fu a Neuengamme Concentration Camp Memorial (Wan presi pe den e memre a ten fu den strafuman kampu) di ben de krosibei fu a foto Hamburg. A sabiman disi e fruklari: „Den Nazi ben wani taki wan bigi grupu fu sma ben musu stem tapu a man di ben o de a fosi-minister fu a kondre èn sosrefi a fesiman fu a partèi fu den. A man disi ben nen Adolf Hitler.” Yehovah Kotoigi gi yesi na a rai di Yesus ben gi fu no teki prati na politiek afersi èn fu „no de wan pisi fu grontapu”. Fu dati ede den no stem. San ben de a bakapisi fu dati? Den Nazi tapu a wroko fu Yehovah Kotoigi.—Yohanes 17:16.

Frieda tan du a Kresten diniwroko fu en na wan kibri fasi, èn a ben e yepi srefi fu meki a Wachttoren. „Den Kresten brada nanga sisa fu wi di ben de na ini den strafuman kampu ben e kisi wan tu fu den tijdschrift na wan kibri fasi”, na so Frieda e taki. Na ini 1940, den Gestapo srudati kisi Frieda, den poti wan lo aksi gi en, èn baka dati den poti en na strafu-oso pe en wawan ben musu tan na ini wan kamra furu mun langa. Fa a ben man horidoro? A e taki: „A ben de wan yepi gi mi te mi ben e begi. Mi ben bigin begi frukufruku mamanten, èn mi ben e begi wan tu leisi wan dei. Te mi ben e begi, dan dati ben e gi mi krakti èn a ben e yepi mi sosrefi fu no broko mi ede tumusi.”—Filipisma 4:6, 7.

Frieda komoto na strafu-oso, ma na ini 1944, den Gestapo srudati grabu en agen. A leisi disi a kisi seibi yari strafu na ini Waldheim strafu-oso. Frieda e taki moro fara: „Den waktiman fu a strafu-oso ben poti mi fu wroko makandra nanga wan tu tra uma na ini den wasi-oso. Mi ben gwenti fu de makandra nanga wan uma fu a kondre Tyekia, sobun mi ben e taki furu nanga en fu Yehovah èn fu a bribi fu mi. Den takimakandra dati ben yepi mi fu tan abi wan krakti bribi.”

Den lusu mi fu wan syatu pisi ten

Na ini mei 1945, den srudati fu a Sofyet Unie fu fosi lusu den strafuman na ini a Waldheim strafu-oso, èn Frieda ben de fri fu go baka na Maagdenburg èn fu teki prati na a preikiwroko. Ma dati no ben de fu langa. Sma bigin desko den Kotoigi baka, èn disi leisi den tiriman di ben de na ini a pisi fu a kondre pe a Sovyet Unie ben abi makti, ben de  frantwortu gi dati. Gerald Hacke fu a Hannah-Arendt-Institute for Research Into Totalitarianism (wan organisâsi di e ondrosuku fa ogri-ati tirimakti e wroko) e skrifi: „Furu grupu no ben de di ondrofeni frufolgu doronomo fu ala tu ogri-ati tirimakti na ini Doisrikondre soleki fa Yehovah Kotoigi ondrofeni dati.”

Fu san ede den tirimakti ben e desko Yehovah Kotoigi baka? Disi leisi den ben du dati funamku fu di Yehovah Kotoigi no ben e teki partèi na ini politiek afersi, soleki fa Bijbel e leri dati. Na ini 1948, lanti fu Owstu Doisrikondre hori wan algemene verkiezing, èn soleki fa Hacke e fruklari, dan „a prenspari sani di meki taki sma frufolgu Yehovah Kotoigi ben de fu di den no teki prati na a verkiezing dati”. Na ini augustus 1950, a wroko fu Yehovah Kotoigi ben tapu na ini Owstu Doisrikondre. Skowtu grabu hondrohondro Kotoigi, èn Frieda ben de wán fu den Kotoigi disi.

Frieda ben musu go na fesi krutu baka, èn a kisi siksi yari strafu. A e taki: „Disi leisi mi ben de makandra nanga tra Kresten brada nanga sisa, èn a sani dati ben de wan bigi yepi gi mi.” Di den lusu en na ini 1956, dan a froisi go tan na West Doisrikondre. Now Frieda e tan na ini Husum, èn aladi a abi 90 yari, a e dini a tru Gado, Yehovah, ete.

Frieda kisi frufolgu 23 yari langa na den anu fu tu ogri-ati tirimakti. „Den Nazi ben wani kiri mi; den Komunist ben wani broko mi. Pe mi feni krakti fu kakafutu gi den? Mi ben e studeri Bijbel doronomo na a ten di mi ben de fri, mi ben e begi Gado doronomo na a ten di den ben sroto mi wawan na ini wan strafu-oso kamra, èn mi abi demakandra nanga tra Kresten brada nanga sisa ibri leisi te mi ben man du dati. Boiti dati, mi ben e fruteri trawan fu a bribi fu mi ibri leisi te okasi ben de fu du dati.”

Fascisme na ini Hongaria

Wan tra kondre pe sma desko Yehovah Kotoigi furu yari langa, ben de Hongaria. Wan tu Kotoigi ben ondrofeni frufolgu na den anu fu, a no tu, ma dri ogri-ati tirimakti. Wán fu den sma dati na Ádám Szinger. Ádám gebore na ini 1922, na ini a foto Paks, na Hongaria, èn a ben kweki na ini wan Protestant famiri. Na ini 1937, wan tu Bijbel Ondrosukuman kon na Ádám en oso, èn Ádám ben wani sabi moro wantewante. San a ben leri fu Bijbel ben overtoigi en taki den leri fu a kerki fu en no ben e kruderi nanga san Bijbel e taki. Fu dati ede, a gowe libi a Protestant Kerki èn a go preiki makandra nanga den Bijbel Ondrosukuman.

A Fascisme (wan sortu ogri-ati tirimakti) ben e kisi moro makti na ini Hongaria. Wan tu leisi, srudati si fa Ádám ben e preiki oso fu oso èn den kisi en fu dwengi en fu piki wan lo aksi. Den Kotoigi ben e kisi moro nanga moro kwinsi, èn na ini 1939, lanti tapu a wroko fu den. Na ini 1942, skowtu kisi Ádám, den tyari en go na strafu-oso, èn den fon en na wan ogri-ati fasi. San yepi a yonkuman disi di ben abi 19 yari fu kakafutu di a ben e ondrofeni pina èn di a ben de na strafu-oso omeni mun langa? „Di mi ben de na oso ete, dan mi studeri Bijbel finifini èn mi kon frustan den prakseri fu Yehovah heri bun.” Baka di Ádám komoto na strafu-oso, dan now fosi a ben kan teki dopu fu tron wan Kotoigi fu Yehovah. Dati pasa latilati neti na ini wan liba krosibei fu en oso, na ini augustus 1942.

Strafu-oso na ini Hongaria, strafuman kampu na ini Serfia

Na a ten fu a di fu tu grontapufeti, dan Hongaria meki wan frubontu nanga Doisrikondre fu feti teige a Sovyet Unie fu fosi. Leki bakapisi fu dati, Ádám kisi wan kari na a kaba fu 1942, fu tron srudati. A e taki: „Mi taigi den taki mi no ben man tron wan srudati fu di dati no ben e kruderi nanga den sani di mi ben leri na ini Bijbel. Mi taigi den sosrefi taki mi no ben e teki prati na grontapu afersi fu di mi na wan Kresten.” Ádám kisi 11 yari strafu. Ma Ádám no tan langa na ini Hongaria.

Na ini 1943, srudati kisi sowan 60 Kotoigi fu Yehovah, den poti den na ini boto, èn den saka a Donauliba nanga den fu tyari den go na Serfia. Ádám ben de wan fu den Kotoigi disi. Na ini Serfia den strafuman disi ben de na ondro a makti now fu a tirimakti fu Hitler di ben nen a Derde Rijk. Den poti den strafuman disi na ini wan strafuman kampu na ini a foto Bor, èn den dwengi den fu wroko na ini den kopro mijn. Pikinmoro wán yari baka dati, den teki den strafuman disi tyari go baka na Hongaria, èn drape den Sofyet srudati fri Ádám na a bigin fu 1945.

Hongaria na ondro a makti fu den Komunist

Ma Ádám ben de fri fu wan syatu pisi ten nomo. Na a kaba fu 1940, den Komunist tiriman na ini  Hongaria tapu a wroko fu Yehovah Kotoigi, neleki fa den Fascist tiriman ben du dati bifo a feti ben broko. Na ini 1952, den kisi Ádám èn den tyari en go na fesi krutu di a weigri baka fu go du srudatiwroko. Na a ten disi, Ádám ben abi 29 yari, a ben trow, èn a ben abi tu pikin. Ádám taigi den krutuman: „Disi a no a fosi leisi di mi weigri fu du srudatiwroko. Na a ten fu a feti, mi koti strafu gi a sani disi èn den seni mi go koti strafu na ini Serfia gi a srefi sani dati ede. Mi no wani tron wan srudati fu di mi sabi taki Gado no e feni a sani dati bun. Mi na wan Kotoigi fu Yehovah, èn mi no e teki partèi na ini politiek afersi.” Ádám kisi aiti yari strafu, ma bakaten den kenki dati kon tron fo yari.

Sma tan desko Ádám teleki 1975, èn dati ben de moro leki 35 yari baka di den Bijbel Ondrosukuman ben kon na a oso fu en papa nanga en mama fu a fosi leisi. Na ini a pisi ten disi, siksi krutubangi gi en ala nanga ala 23 yari strafu, èn a ben musu koti strafu na ini sowan tin strafu-oso nanga strafuman kampu. A hori doro di a ben kisi frufolgu doronomo na a ten fu dri tirimakti, namku a Fascist tiri na ini Hongaria na a ten bifo a grontapu feti, a Nazi tiri na ini Serfia, èn den Komunist na ini Hongaria na a ten fu a Kowru Orloku.

Ádám e libi ete na ini Paks, a foto pe a gebore, èn a e dini Gado getrow. A de so taki a abi spesrutu krakti di yepi en fu kakafutu nanga bun bakapisi gi den someni problema di ben miti en? Nôno. A e fruklari:

„Den prenspari sani di yepi mi, na a studeri di mi e studeri Bijbel, begi, èn sosrefi demakandra nanga tra Kresten brada nanga sisa. Ma mi wani poti prakseri na tu tra sani sosrefi. A fosi sani, na taki Yehovah e gi wi krakti. A tranga banti di mi abi nanga en hori mi na libi. A di fu tu sani, na taki mi hori na prakseri Romesma kapitel 12, pe skrifi: ’No teki refensi gi unsrefi.’ Sobun noiti mi hori sma na ati. Difrenti leisi mi ben abi okasi fu du wan sani nanga den sma di frufolgu mi, ma noiti mi du dati. Wi no musu gebroiki a krakti di Yehovah e gi wi, fu du ogri baka nanga sma di du dati nanga wi.”

Wan kaba sa kon na ala frufolgu

Frieda nanga Ádám man anbegi Gado fri now. Ma san den sortu ondrofeni disi e leri fu a frufolgu di sma e frufolgu trawan di abi wan tra bribi? Wi e leri taki den sortu sma disi no sa abi bun bakapisi te den e frufolgu tru Kresten. Aladi Yehovah Kotoigi lasi wan lo gudu fu den èn den ondrofeni furu pina fu di sma ben frufolgu den, toku dati no broko den. Na ini a ten disi Yehovah Kotoigi lai na ini Europa pe den tu ogri-ati tirimakti disi ben de fosi.

Fa Kotoigi e si a frufolgu di den ondrofeni? Soleki fa den ondrofenitori fu Frieda nanga Ádám e sori, dan den teki a rai fu Bijbel: „No meki ogri wini yu, ma tan wini ogri nanga bun” (Romesma 12:21). A de so trutru taki bun man wini ogri? Iya, dati kan te wan sma e du bun fu di a abi wan tranga bribi na ini Gado. Te wi e luku taki Yehovah Kotoigi na ini Europa ben man kakafutu nanga bun bakapisi na a ten di sma frufolgu den, dan fu taki en leti, a yeye fu Gado ben abi bun bakapisi. Iya, a sani disi e sori taki Kresten di abi sakafasi man du bun fu di a santa yeye e meki den abi wan krakti bribi (Galasiasma 5:22, 23). Na ini na ogri-ati grontapu fu tide, dati na wan sani di wi alamala musu hori na prakseri.

[Prenki na tapu bladzijde 5]

Frieda Jess (now Frieda Thiele), na a ten di Gestapo srudati kisi en, èn now

[Prenki na tapu bladzijde 7]

Ádám Szinger, na a ten di a ben de na strafu, èn now