A fasi fa Bijbel e si sani

Fa Gado e si den swakifasi fu wi?

’Mi a no wan ogri sma! Mi e meki muiti fu kaba nanga den takru fasi fu mi, ma mi swaki tumusi!’

DEN wortu disi e sori fa yu, noso wan sma di yu sabi e firi? Furu sma e taki dati wi no man puru den takru swakifasi di rutu dipi na ini wi. Son sma no man libi sondro sopi, tabaka noso drugs. Bigi-ai abi krakti tapu a libi fu furu sma. Dan yu abi den sma di e gi densrefi abra na seks lostu di no fiti, aladi den e taki dati den no man libi sondro seks kwetikweti.

Leki fa Mateyus 26:41 e sori, dan Yesus ben sori na wan switi fasi taki a e frustan den swakifasi di libisma abi. * Fu taki en leti, na ini a heri Bijbel wi e si krin taki Yehovah Gado èn sosrefi Yesus abi sari-ati gi libisma trutru (Psalm 103:8, 9). Ma wi kan fruwakti taki Gado e luku pasa ala den fowtu fu wi?

Moses nanga David

Poti prakseri na a tori fu Moses. Sma ben sabi en leki „a moro safri-ati sma fu ala libisma di ben de na grontapu”, èn a ben meki muiti fu tan hori a bun eigifasi dati (Numeri  12:3). Di den Israelsma ben e teki waka na ini a gran sabana, furu tron den ben handri na wan fasi di no fiti èn den ben sori taki den no ben abi lespeki gi Gado nanga den man di ben teki presi gi En. Ma na ini ala den sani disi Moses ben suku a tiri fu Gado na wan lespeki fasi.—Numeri 16:12-14, 28-30.

Di a langa waka dati di ben e weri den ben de fu kon na wan kaba, dan Moses kisi atibron na fesi a heri nâsi èn a no gi yesi na den rai fu Gado. Gado gi en pardon, ma A ben frigiti san ben pasa? Nôno. A taigi Moses: „Bika yu no sori bribi na ini mi . . . , yu no sa tyari a gemeente disi go na ini a kondre di mi  sa gi den fu tru.” Moses no ben sa go na ini a Pramisi Kondre. Baka di Moses du muiti 40 yari langa fu kisi a moi grani dati, wan seryusu libisma fowtu ben e meki taki a lasi a grani dati.—Numeri 20:7-12.

Kownu David ben de wan tra diniman fu Gado di ben abi wan swakifasi. Na wan okasi a gi ensrefi abra na seks lostu èn a ben abi seks nanga a wefi fu wan tra man. Baka dati a kiri a masra fu na uma, soso fu pruberi fu kibri a tori disi (2 Samuel 11:2-27). Bakaten, a ben abi berow fu den sani di a du trutru, èn Gado gi en pardon. Ma David ben pori wan osofamiri, èn Yehovah no ben kibri en fu den hebi rampu di kon leki bakapisi fu dati. A beibi boi fu David ben kon siki seryusu, èn Yehovah no ben du nowan sani fu yepi en, aladi David ben begi fu a bun fu a pikin fu en. A boi dede èn sensi a ten dati furu ogri sani miti na osofamiri fu David (2 Samuel 12:13-18; 18:33). David ben kisi furu takru bakapisi fu di a gi ensrefi abra na a swakifasi fu du seks hurudu.

Den eksempre disi e sori taki Gado feni taki libisma de frantwortu fu a fasi fa den e tyari densrefi. Den sma di wani dini Gado musu wroko tranga fu basi den swakifasi fu den, so taki den kan kon tranga na yeye fasi èn tron moro bun Kresten. Na ini a fosi yarihondro furu sma ben du dati.

San wi musu du fu feti teige sondu

Wi kan si na apostel Paulus leki wan sma di ben gi wan bun eksempre fa fu libi wan bun Kresten libi. Ma yu sabi taki a ben feti teige den swakifasi fu en doronomo? Na ini Romesma 7:18-25 a e taki krinkrin fu a feti disi. Paulus ben feti sondro fu rostu fu di a ben sabi taki sondu firi abi krakti na en tapu doronomo.—1 Korentesma 9:26, 27.

Fosi, son memre fu a Kresten gemeente na ini Korente fu owruten ben abi a gwenti fu du san ogri. Bijbel e taki dati den ben e de ’huruman, sutaman, man di e didon nanga man, fufuruman, sma di abi bigi-ai, drunguman’. Ma Bijbel e taki sosrefi taki den ben e „wasi kon krin”(1 Korentesma 6:9-11). Fa? We, den ben e kisi krakti fu tapu nanga den takru gwenti fu den nanga yepi fu soifri sabi, Kresten demakandra nanga a yeye fu Gado. Te fu kaba, Gado ben fruklari den regtfardiki na ini a nen fu Krestes. Iya, Gado ben gi den pardon èn fu dati ede den ben e kisi wan krin konsensi.—Tori fu den Apostel 2:38; 3:19.

Paulus nanga den Kresten na ini Korente no ben du neleki den no ben man yepi densrefi te den ben du sondu. Na presi fu dati den ben feti nanga den sondu firi disi, èn nanga yepi fu Gado den ben abi bun bakapisi. Den anbegiman dati fu a fosi yarihondro ben kon tron sma di ben tyari densrefi na wan fasi di fiti, aladi den ben libi na ini wan kontren pe sma no ben du dati èn aladi den ben abi a firi fu du san ogri fu di den no de volmaakti. Fa a de nanga wi?

Gado e fruwakti taki wi e feti nanga den swakifasi fu wi

Te wi e feti nanga wan swakifasi, dan a kan abi leki bakapisi taki wi no man puru en krinkrin. Aladi wi no musu gi abra na den swakifasi fu wi, toku wi no man puru den krinkrin. Fu di wi no de volmaakti, meki wi abi swakifasi di wi no man puru so makriki. Ma wi no musu gi wisrefi abra na den swakifasi fu wi (Psalm 119:11). Fu san ede disi de so prenspari?

Bika Gado no wani taki den swakifasi fu wi musu de wan sani di e meki taki wi e du ogri doronomo (Yudas 4). Yehovah wani taki libisma musu drai den libi, taki den musu libi akruderi bun gwenti nanga gronprakseri. Bijbel e taki: „Tegu gi san ogri” (Romesma 12:9). Fu san ede Gado e fruwakti taki libisma e hori densrefi na a komando disi?

Wan prenspari sani fu san ede Gado wani dati, na te wi gi wisrefi abra na swakifasi dan wi sa kisi takru bakapisi fu dati. Bijbel e sori dati na Galasiasma 6:7: „San wan sma e sai, na dati a sa koti tu.” Den sma di e gi densrefi abra na takru gwenti, soleki bigi-ai, nanga hurudu furu tron e kisi takru bakapisi di e kon fu dati na ini den libi. Ma wan moro prenspari sani de fu san ede wi no musu gi wisrefi abra.

Sondu e afrontu Gado. A e tyari ’prati’ kon na mindri wi nanga Yehovah (Yesaya 59:2). Fu di den sma di e du sondu no kan kisi a bun-ati fu En, meki a e frumane den fu: „Wasi unsrefi, krin unsrefi; . . . tapu fu du san takru.”—Yesaya 1:16.

A Mekiman fu wi abi lobi-ati èn a abi sari-ati gi wi. „A no wani taki wan sma e kisi pori, ma a wani taki ala sma musu abi berow” (2 Petrus 3:9). Efu wi e gi wisrefi abra na den swakifasi fu wi doronomo, dan wi no sa kisi a bun-ati fu Gado. Fu di Gado no e tapu ai gi den swakifasi fu wi, meki wi no musu du dati tu.

[Futuwortu]