Fu san ede sma e frufolgu trawan di abi wan tra bribi?

YU E feni en wan bun sani taki sma e frufolgu trawan di abi wan tra bribi? Kande yu no e feni en bun. Kande yu e feni taki, solanga den sma disi no e tapu trawan fu du san den abi reti na tapu, dan sma no musu frufolgu den. Toku a de so hondrohondro yari kaba taki sma e frufolgu trawan fu di den abi wan tra bribi, èn a sani disi e pasa ete na ini a ten disi. Fu gi wan eksempre, na ini a di fu twenti yarihondro, a ben de so furu tron taki Yehovah Kotoigi na ini Europa nanga difrenti pisi fu grontapu no ben man anbegi Gado soleki fa den ben wani. Dati ben kon fu di ogri-ati tirimakti ben tapu den fu du so, èn den ondrofeni furu ogri-ati sani sosrefi na den anu fu den tirimakti disi.

Na a ten dati, a Nazi Tiri nanga a Komunist Tiri ben de na ini Europa, èn wan heri pisi ten den tiri disi du ala san den ben man fu frufolgu Yehovah Kotoigi na wan ogri-ati fasi. San den sani di Yehovah Kotoigi ondrofeni e leri wi fu a frufolgu di sma e frufolgu trawan di abi wan tra bribi? San wi kan leri fu den sani di den du na a ten di pina ben miti den?

„Den no de wan pisi fu grontapu”

Yehovah Kotoigi e du ala san den man fu hori densrefi na den wet fu a kondre, fu abi vrede nanga trawan, èn fu tyari densrefi na wan fasi di fiti. Den no e opo densrefi teige tirimakti, èn den no wani kisi problema nanga den. Sosrefi den no e du sani fu espresi so taki sma kan frufolgu den, bika den no wani taki sma e kiri den fu a bribi fu den ede. Den Kresten disi no e teki partei na ini politiek afersi. A sani disi e kruderi nanga den wortu fu Yesus: „[Den bakaman fu mi] no de wan pisi fu grontapu” (Yohanes 17:16). Furu tirimakti e lespeki a fasi fa Yehovah Kotoigi e si a tori disi. Ma tiriman di e kwinsi den kondreman fu den no abi lespeki kwetikweti gi  a Bijbel komando di e taki dati Kresten no musu de wan pisi fu grontapu.

Na ini november 2000, wan konmakandra ben hori na a universiteit fu Heidelberg, na Doisrikondre. Na a konmakandra dati sma ben fruklari fu san ede den sortu tiriman dati no e lespeki a Bijbel komando di e taki dati Kresten no musu de wan pisi fu grontapu. A konmakandra ben abi leki thema „Frufolgu èn fasti overtoigi: Yehovah Kotoigi ondro a Nazi Tiri nanga a Komunist Tiri.” Sabiman Clemens Vollnhals na wan memre fu a Hannah-Arandt organisâsi di e ondrosuku fa ogri-ati tirimakti e wroko. A man disi ben taki: „Ogri-ati tirimakti no e gebroiki a makti fu den na ini politiek afersi wawan. Den wani sosrefi taki sma e gi yesi na iniwan komando fu den.”

Tru Kresten no kan gi yesi na iniwan komando fu wan libisma tiri, fu di den pramisi Yehovah Gado taki den sa de getrow dorodoro na en wawan. Kotoigi di e libi na ini kondre di abi wan ogri-ati tirimakti feni taki son leisi den sani di lanti e aksi fu den no e kruderi nanga den markitiki fu a bribi fu den. San den du di den sortu problema disi miti den? Na ini a ten di pasa, Yehovah Kotoigi furu tron hori densrefi na a gronprakseri di den disipel fu Yesus ben taki fu en: „Wi musu gi yesi na Gado leki tiriman moro leki na libisma.”—Tori fu den Apostel 5:29.

Dusundusun Kotoigi tan getrow na a bribi fu den èn den noiti no teki partèi na ini politiek afersi, aladi sma ben e frufolgu den na wan tumusi ogri-ati fasi. Fa den ben man horidoro? Pe den feni a krakti fu du dati? Meki densrefi gi yu a piki dati. Èn meki wi si san iniwan fu wi kan leri fu den ondrofeni fu den, awansi wi na Kotoigi, noso efu wi a no Kotoigi.

[Prenspari pisi na tapu bladzijde 4]

Na ini a di fu 20 yarihondro, a Nazi tirimakti èn a Komunist tirimakti na ini Doisrikondre frufolgu Yehovah Kotoigi wan heri pisi ten na wan ogri-ati fasi sosrefi.

[Prenspari pisi na tapu bladzijde 4]

„Ogri-ati tirimakti no e gebroiki a makti fu den na ini politiek afersi wawan. Den wani sosrefi taki sma e gi yesi na iniwan komando fu den.”—Datra Clemens Vollnhals

[Prenki na tapu bladzijde 4]

A famiri Kusserow ben musu koti strafu fu di den no ben wani poti a bribi fu den na wan sei

[Prenki na tapu bladzijde 4]

Fu di Johannes Harms ben abi wan tra bribi, meki sma sutu en kiri na ini wan Nazi strafuman kampu