Teki bun bosroiti te sani e kenki na ini yu libi

Pum, Jan, Dries nanga Otto, na fo Kresten owruman di e libi na ini Bakrakondre. Na furu fasi den brada disi de a srefi. Ibriwan fu den fo brada disi trow èn den abi pikin. Boiti dati, dan wan tu yari pasa ibriwan fu den ben abi wan furuten grontapuwroko èn den ben e libi na ini bun oso. Ma den ala fo tapu fu wroko èn den bigin fu gi ala den ten nanga krakti fu du moro na ini a Kownukondre diniwroko. San ben meki taki den ben man tyari a kenki disi kon? Den ala fo ben teki bun bosroiti di sani kenki na ini den libi.

FURU fu wi e ondrofeni furu tron taki a fasi fa wi e libi e kenki na a wan noso tra fasi. Furu kenki, soleki te sma e trow, te den e meki pikin, noso te den musu sorgu gi papa nanga mama di kon owru kaba, e tyari moro frantwortu kon. Ma son kenki, e meki wi kisi moro fri ten fu du moro na ini a Kresten diniwroko fu wi (Mateyus 9:37, 38). Fu eksempre, den pikin fu wi di kon bigi kaba kan gowe libi oso, noso wi kan go nanga pensyun.

Moro fara, a tru taki a fasi fa wi e libi kan kenki, efu wi wani noso wi no wani dati. Toku son Kresten ben man seti sani fu kenki den libi na so wan fasi taki den ben man du moro na ini a diniwroko. Dati na san Pum, Jan, Dries nanga Otto ben du. Fa den ben du dati?

Te pikin e gowe libi oso

Pum ben e wroko na wan presi pe sma e meki dresi. A ben e luku den moni afersi fu a wrokope dati. Furu tron en nanga en wefi Anny, ben go na ini a yepi-pionierwroko makandra nanga den tu umapikin fu den. Pum nanga Anny ben seti sani fu den ben kan abi switi demakandra nanga tra pionier. „Disi ben kibri wi gi problema di ben kan opo kon te wi ben o abi tra sortu demakandra”, na so den e fruteri. Ala tu umapikin ben kisi deki-ati fu na eksempre fu den papa nanga mama, èn wantewante di den kaba nanga middelbaar skoro den ben tron gewoon pionier.

Di den pikin gowe libi oso, dan Pum nanga Anny ben kon si taki a libi fu den ben kon kenki, den ben abi moro fri ten nanga moro moni di den ben man gebroiki fu teki waka go na moi presi noso fu du tra sani. Ma na presi fu dati, a trowpaar ben teki a bosroiti fu gebroiki a fasi fa den libi kon kenki fu du moro na ini a Kresten diniwroko. Sobun, Pum ben aksi en basi primisi fu wroko wán dei moro mendri na ini a wiki. Bakaten Pum seti sani so, taki a ben kan bigin wroko seibi yuru mamanten teleki tu yuru bakadina. A no de fu taki, dati fu wroko moro mendri ben wani taki dati den ben musu libi nanga moro mendri moni. Toku den ben man du disi, èn na ini 1991 Pum ben go na ini a gewoon pionierwroko, neleki a wefi fu en.

Baka dati, Pum ben kisi a kari fu go tan na a kongreshal fu Yehovah Kotoigi fu yepi luku a presi drape. Ma dati ben wani taki dati a trowpaar ben musu froisi gowe libi na oso fu den, pe den ben e libi 30 yari langa kaba, fu go libi na ini wan tu kamra di ben de tapu a prasi fu a kongreshal. Dati na san den ben du. A ben muilek gi den fu froisi? Anny e piki taki ala ten te a ben firi  taki a ben wani go baka na a oso pe den ben e libi, dan a ben e aksi ensrefi: ’Mi de neleki a wefi fu Lot?’ Anny ben weigri fu ’drai luku’, noso fu wani go baka na a oso pe den ben libi fosi.—Genesis 19:26; Lukas 17:32.

Pum nanga Anny e firi taki a bosroiti di den teki ben meki den kisi furu blesi. Den e prisiri fu dini na a kongreshal, fu sreka sani gi den distrikt kongres, èn fu miti nanga kringopziener (owruman di e teki waka go na difrenti presi) di e hori lezing na ini a hal, èn moro sani de ete di e gi den furu prisiri. Wanwan leisi te Pum e dini leki wan sma di e teki presi gi a kringopziener, dan den e go na difrenti gemeente.

San meki taki a trowpaar disi ben man du moro na ini a diniwroko? Pum e taki: „Te bigi kenki e kon na ini yu libi, dan yu musu teki a fasti bosroiti fu gebroiki den nyun kenki disi na wan bun fasi.”

Bigin nanga wan libi sondro furu pranpran

Jan nanga en wefi Woth abi dri pikin. Neleki Pum nanga en famiri, na so Jan ben teki bun bosroiti di sani ben kenki na ini en libi. Yari langa, Jan ben wroko na wan bangi di ben e pai bun èn a ben man sorgu bun gi en osofamiri. Ma dei fu dei a firi di a ben abi fu du moro na ini a diniwroko ben e kon tranga. A e fruteri: „Na ini a waka nanga libi fu mi, a warderi di mi abi gi a waarheid kon moro dipi, èn a lobi fu mi gi Yehovah kon moro tranga.” Sobun na ini 1986, dan Jan tyari kenki kon na ini a fasi fa a ben e libi. A e taki: „Di a wrokopresi fu mi ben e orga sani na wan tra fasi na a kantoro, dan mi teki na okasi dati fu seti sani fu no wroko so langa moro. Den wrokoman na mi wrokope di ben fruwondru fu disi, ben e kari mi Diwodo fu di mi ben e wroko soso tapu dinsdag [tudewroko], woensdag [dridewroko], nanga donderdag [fodewroko]. A moni di mi ben e meki, ben saka nanga 40 procent. Mi ben seri na oso fu wi, èn mi ben bai wan boto di de leki wan oso pe yu kan libi na ini, èn na so wan fasi wi ben kan dini pe a nowtu gi Kownukondre preikiman ben moro bigi. Bakaten, mi ben teki na okasi fu go nanga pensyun moro fruku; a moni san mi ben e meki ben saka ete 20 procent, ma na ini 1993, mi ben man bigin dini leki wan gewoon pionier.”

Tide na a dei, Jan na wan memre fu na Ati-oso Kontakti Komte èn furu tron a e dini leki kongresopziener. Aladi Woth e sikisiki furu, toku ten na ten a e dini leki yepipionier. Now ala dri pikin trow, èn makandra nanga den patna, den na fayafaya dinari fu a Kownukondre.

 Fa Jan nanga Woth ben man fiti densrefi na wan libi pe den no ben abi so furu moni moro? „Na a ten di wi ben abi moro moni”, na so Jan e taki, „dan wi ben sorgu taki wi no ben kon lobi gudu tumusi furu. Tide na a dei, a fruferi pikinso fu abi fu wakti wan pisi ten fosi wi kan bai wan sani, ma den blesi di wi e kisi na yeye fasi nanga den okasi di wi e kisi fu du spesrutu diniwroko, de moro bun leki den tra sani.”

Neleki Jan nanga Woth, dan Dries nanga en wefi Jenny, ben teki a bosroiti sosrefi fu abi wan libi sondro tumusi furu pranpran so taki den man gi moro ten na Kownukondre afersi. Dries nanga Jenny ben dini leki pionier teleki den ben kisi wan pikin. Fu man sorgu gi en osofamiri, dan Dries ben wroko na wan bigi bedrijf pe a ben e wroko leki wan sortu basi. Den wrokobasi fu en ben wani fu gi en moro frantwortu na wrokope, fu di den ben lobi a fasi fa a ben e wroko. Ma Dries no ben teki den frantwortu dati fu di dati ben sa meki taki a no ben o abi so furu ten gi a Kresten diniwroko.

A ben kostu a trowpaar disi furu ten nanga muiti fu sorgu na osofamiri èn fu sorgu sosrefi gi a siki mama fu Jenny. Ma toku, den tan kweki a firi fu de wan pionier trutru. San ben yepi den fu du disi? Jenny e fruteri: „Wi ben abi pionier di ben e tan nanga unu, wi ben e kari pionier fu kon nyan na wi oso, èn wi ben e gi den kringopziener wan presi fu tan.” Dries e taki moro fara: „Wi ben e tan abi wan libi sondro furu pranpran èn wi ben e luku bun fu no meki paiman. Wi ben teki a bosroiti fu no go teki tumusi hebi wroko kon poti na wi tapu noso fu bai wan oso, so taki na ini a ten di ben e kon den sani disi no ben sa tapu wi fu du moro na ini a diniwroko.”

A bosroiti di Dries nanga Jenny ben teki, fu seti den libi na so wan fasi taki den ben kan abi moro ten gi Kownukondre afersi, ben abi bun bakapisi. Ala tu manpikin fu den e dini now leki owruman èn wan fu den e pionier makandra nanga en wefi. Dries nanga Jenny dini leki spesrutu pionier, èn bakaten Jenny go makandra nanga Dries na ini a kringwroko. Now den ala tu na friwani-wrokoman na Bethel, èn drape Dries e dini leki wan memre fu a Bijkantoro Komte.

Go nanga pensyun moro fruku

Neleki Dries nanga Jenny, na so Otto nanga en wefi Judy ben e pionier bifo den kisi den tu umapikin fu den. Di Judy ben de nanga bere fu den fosi pikin, dan Otto feni wroko leki skoromeester.

Di den pikin ben e gro kon bigi, dan furu tron Otto nanga Judy ben kari pionier kon na den oso, so taki den umapikin fu den ben kan si a prisiri di furuten Kresten wrokoman abi. Baka wan pisi ten, a moro owru umapikin fu den go na ini a pionierwroko. Bakaten, a ben go na a Gileadskoro, èn now a e dini makandra nanga en masra leki zendeling na ini wan kondre na Afrika. A moro yongu umapikin fu den  ben bigin pionier na ini 1987, èn Judy ben go makandra nanga en na ini a pionierwroko.

Di a libi fu Otto ben kon kenki fu di a no ben abi fu wroko so furu moro na skoro, dan a ben gebroiki en fri ten dati fu pionier. Te fu kaba a ben gowe libi a wroko fu en. Now, Otto na wan kringopziener di e gebroiki a koni di a abi leki wan skoromeester fu gi krakti na yeye fasi na den gemeente.

Sortu rai Otto e gi den wan di e teki pensyun fu den grontapuwroko moro fruku? „Te yu e go nanga pensyun, no bosroiti fu teki a libi safrisafri gi wán yari noso moro langa. A no muilek fu kisi a gwenti fu ’teki a libi safrisafri’. Fosi yu denki, yu sa frigiti a pionierwroko. Na presi fu dati, dan bigin du moro na ini a diniwroko wantewante.”

Gebroiki na ondrofeni di yu kisi na ini a libi, na wan bun fasi

A tru, taki brada leki Pum, Jan, Dries nanga Otto no abi a krakti moro leki di den ben yongu ete. Ma den kon moro owru, èn den abi moro ondrofeni nanga koni (Odo 20:29). Den sabi san a wani taki fu de wan papa, èn fu di den wroko makandra nanga a wefi fu den, meki den sabi tu san a wani taki fu de wan mama. Makandra nanga den wefi fu den, den lusu problema na ini na osofamiri èn den yepi den pikin fu den fu poti marki gi densrefi na ini a diniwroko. Otto e taki: „Na ondrofeni di mi abi fu sorgu mi eigi osofamiri, e meki taki mi kan gi moro bun rai leki kringopziener na ini afersi di abi fu du nanga na osofamiri.” Na a srefi fasi, na ondrofeni di Dries abi leki papa, e meki taki a Bethelfamiri e kisi furu wini fu dati, spesrutu den furu yonguwan di e wroko na Bethel.

Iya, den sani di densrefi ondrofeni, e yepi den fu sorgu gi difrenti sortu nowtu di de na ini den gemeente. Fu taki en so, dan na ondrofeni di den abi e meki taki den e srapu den wrokosani di den e gebroiki. Na so wan fasi den e gebroiki a krakti fu den na wan fasi di e tyari furu wini kon (Preikiman 10:10). Fu taki en leti, dan furu tron den man du sani moro esi leki den wan di abi moro krakti, ma di no abi so furu ondrofeni.

Den brada disi, makandra nanga den wefi fu den, na tumusi moi eksempre gi den yonguwan na mindri a pipel fu Yehovah. Yonguwan e si taki trowpaar leki den disi, ondrofeni furu fu den tyalensi nanga blesi di skrifi na ini den Kresten publikâsi fu wi. A e gi deki-ati fu si man nanga uma di e gi densrefi dorodoro neleki Kaleb, di ben wani fu kisi wan wroko di ben de wan tyalensi gi en, aladi a ben owru kaba.—Yosua 14:10-12.

Waka na baka a bribi fu den

Yu ben sa man sori a srefi bribi di den trowpaar disi sori, noso yu sa man teki a srefi bosroiti di den ben teki? Hori na prakseri taki den ben meki a waarheid kon tron a moro prenspari sani na ini den libi. Den ben kweki wan tranga firi na ini den pikin fu den fu go pionier. Soleki fa Jan e taki, dan den ben du disi fu di den „gi den wan eksempre na ini lobi gi Yehovah nanga en organisâsi, fu di den seti sani fu abi bun demakandra, èn fu di den leri den pikin fu den fu man sorgu densrefi”. Den ben wroko èn den ben prei makandra leki famiri sosrefi. Pum e memre taki: „Te wi ben abi fakansi, dan a ben de a gwenti taki mamanten a heri famiri ben e go na ini a preikiwroko, èn bakadina wi ben abi prisiri demakandra.”

Boiti dati, den Kresten disi ben sreka sani na fesi, so taki di a libi fu den kenki, den ben de klariklari fu teki bun bosroiti. Den ben poti marki gi densrefi èn den ben teki bosroiti di ben yepi den fu doro den marki moro esi. Den ben suku fasi fu no du so furu grontapuwroko èn den ben de klariklari fu libi nanga moro mendri moni (Filipisma 1:10). Den wefi ben horibaka gi den masra dorodoro. Den ben abi a tranga firi fu wroko makandra fu teki a ’bigi okasi di de fu du moro’, èn leki bakapisi fu dati den e nyan bun fu den furu blesi di Yehovah e gi den.—1 Korentesma 16:9; Odo 10:22.

Yu abi a tranga firi sosrefi fu du moro na ini a diniwroko fu yu? Efu dati de so, dan a de prenspari fu teki bun bosroiti te sani e kenki na ini yu libi.

[Prenki na tapu bladzijde 20]

Pum nanga Anny e luku a kongreshal

[Prenki na tapu bladzijde 20]

Jan nanga Woth na ini a preikiwroko

[Prenki na tapu bladzijde 21]

Dries nanga Jenny e dini na Bethel

[Prenki na tapu bladzijde 21]

Otto nanga Judy e sreka densrefi fu fisiti wan tra gemeente