A moro prenspari dei di wi musu memre

A BEN de a dei di kenki a tamara fu a heri libisma famiri dorodoro, so taki den ben kan abi a howpu fu kisi têgo blesi. Nowan tra dei na ini a historia ben abi so furu krakti tapu a tamara fu libisma leki a dei disi. A ben de a dei di Yesus du ala sani di a ben musu du na grontapu. Aladi a ben spikri na wan pina-udu, a teki en lasti bro èn a bari: „A kaba!” (Yohanes 19:30) Fu san ede Yesus ben kon na grontapu?

„A Manpikin fu libisma”, na so Bijbel e taki, „no kon fu sma dini en, ma a kon fu dini sma èn fu gi en libi leki wan lusu-paiman gi furu sma” (Mateyus 20:28). Yesus gi en sili, noso en libi, so taki a libisma famiri ben kan kisi frulusu fu sondu nanga dede di den kisi fu Adam nanga Efa. Iya, „Gado ben lobi grontapu so te, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). Fu tru, na srakti-ofrandi fu Yesus na wan tumusi warti sani!

Wan tra reide de ete fu san ede a dei di Yesus dede na a moro prenspari dei di wi musu memre. Tapu a dei dati a Manpikin fu Gado ben leri den apostel fu en wan tu prenspari sani di ben o yepi den fu tan getrow. Den wortu di a taigi den disipel na ini den lasti yuru fosi a dede, ben naki na ati fu den trutru! San ben de den leri fu en? Fa wi kan kisi wini fu san Yesus leri den? Den aksi disi sa kisi wan piki na ini na artikel di e kon now.