Aksi fu leisiman
Aksi fu leisiman
Sani kan seti fu yepi wan salfu Kresten di siki èn di no man go te a gemeente e hori a Memrefesa?
Iya. Wan sani kan seti èn wan sani musu du fu yepi wan salfu Kresten di no man go te a gemeente e hori a Memrefesa fu a dede fu Krestes, fu di a siki noso fu di a no man opo fu en bedi. Te disi de so, dan a skin fu owruman kan seti sani so taki wan owruman noso wan tra lepi Kresten brada kan tyari a brede nanga a win gi a Kresten brada noso sisa fu wi a srefi neti fu a Memrefesa bifo son opo.
Na owruman noso a brada di e go luku a sma kan abi wan syatu takimakandra nanga a salfu brada noso sisa disi èn a kan leisi wan tu bijbeltekst di fiti, aladi a e hori a situwâsi fu a sma na prakseri. A kan du den sani san Yesus ben du di A seti a Memrefesa. Fu eksempre, kande a kan leisi Mateyus 26:26 èn pristeri a brede baka te a begi. Baka dati, a brada kan leisi Mateyus kapitel 26, vers 27 nanga 28, èn pristeri a win baka te a begi. A kan taki syatu san a brede nanga a win wani taki èn a fiti fu tapu a takimakandra nanga wan begi.
A no de fu taki dati wan sma musu du ala san a man fu go te a gemeente e hori a Memrefesa. Ma sortu sani musu seti gi wan salfu Kresten di siki seryusu, di de na ini ati-oso, noso di abi wan seryusu problema so taki a no man go na a Memrefesa tapu 14 Nisan baka te sondongo? So wan salfu brada noso sisa kan teki a rai soleki fa dati skrifi na ini a wet fu Moses èn hori a Memrefesa gi ensrefi baka 30 dei.—Numeri 9:9-14.