„Kon krosibei na Gado, èn a sa kon krosibei na unu”

Fosi nanga now—En libi kenki dorodoro

MATSEPANG ben abi wan libi di no ben switi srefisrefi èn a no ben abi wan marki na ini a libi. A ben de wan yongu umapikin na ini Lesoto, wan kondre mindrisei fu Zuid-Afrika. Matsepang ben kweki leki wan Lomsusma. Ma na presi taki den non ben e yepi en fu kon krosibei na Gado, dan furu yari langa den ben e du ogri nanga en fu di den ben e gi en moni fu kori en so taki a ben o abi seks nanga den.

Leki bakapisi fu dati, Matsepang no ben wani sabi noti fu kerki èn a no ben man bribi taki wan lobi-ati Mekiman de di lobi libisma trutru. Fu di nowan sma no ben e broko den ede nanga en èn fu di sma ben e du ogri nanga en, meki Matsepang ben e firi broko-saka srefisrefi èn a ben e firi leki a no ben warti noti. A gro kon bigi leki wan sma di ogri srefisrefi èn di e atibron esi-esi. Disi ben meki taki a go du ogridu.

Te fu kaba, Matsepang tron wan memre fu wan grupu fu ogri sma di ben e fufuru den sani fu sma te den ben e go nanga loko fu a wan presi go na tra presi. Skowtu kisi en èn den sroto en na ini wan strafu-oso na Zuid-Afrika. Bakaten, den seni en go na en mamakondre Lesoto baka pe a ben tan du ogridu, a ben e drungu ibri tron baka èn a ben e libi wan yayo libi.

Na wan tumusi muilek ten na ini en libi, Matsepang begi Gado fayafaya fu yepi en. A begi: „Gado, mi e pramisi yu taki efu mi e tan na libi, mi sa du ala san mi man fu dini yu.”

No so langa baka dati, tu zendeling fu Yehovah Kotoigi miti Matsepang. Den ben aksi en efu a ben wani studeri Bijbel. Di a ben e studeri, a kon frustan taki Gado lobi wi èn taki a e broko en ede nanga wi trutru. Fu taki en leti, dan a kon frustan taki Satan, „a tata fu lei”, e gebroiki ala sortu triki èn bedrigi fasi fu kweki a firi na ini sma taki den no warti noti èn a e meki den bribi taki Yehovah no kan lobi den noiti.—Yohanes 8:44; Efeisesma 6:11.

Ma na presi fu dati, Matsepang ben kisi furu trowstu di a kon sabi taki wi kan abi lespeki gi wisrefi te wi abi berow fu den sondu di wi ben du, wi kan suku fu kisi pardon fu Gado, èn wi kan meki muiti fu plisi en! Den Kotoigi yepi en fu frustan taki „Gado bigi moro wi ati” èn a e si wi na wan heri tra fasi leki fa wi e si wisrefi kande.—1 Yohanes 3:19, 20.

Matsepang ben breiti srefisrefi fu leisi den wortu fu a psalm skrifiman David: „Yehovah de krosibei fu den wan di den ati broko; èn den wan di masi na ini yeye, a e frulusu” (Psalm 34:18). Leki wan sma di ’masi na ini yeye’, a kon frustan taki Yehovah no e gowe libi en futuboi, awinsi sonwan fu den e sari noso awinsi den e firi leki den no warti noti. A ben  prisiri srefisrefi fu kon sabi taki Gado e sorgu gi ala en skapu èn a e gi den tranga na ini muilek ten (Psalm 55:22; 1 Petrus 5:6, 7). Spesrutu den wortu di e kon now ben naki en ati trutru: „Kon krosibei na Gado, èn a sa kon krosibei na unu.”—Yakobus 4:8.

Baka wan syatu pisi ten, a ben de fu si na a libi fu Matsepang taki a Wortu fu Gado, Bijbel, abi furu krakti. A bigin go na den Kresten konmakandra doronomo èn a tapu fu du den sani di no de akruderi Bijbel. San ben de a bakapisi? A no e firi moro leki a no warti fu kisi a lobi èn a bun-ati fu Gado. Sensi a teki dopu leki wan Kotoigi fu Yehovah, a wroko dusundusun yuru na ini a Kresten diniwroko leki wan preikiman fu a bun nyunsu fu a Kownukondre. Aladi Matsepang ben du so furu ogri na ini a ten di pasa, toku a e libi wan koloku libi now èn a abi wan marki na ini a libi. Disi na wan tumusi moi eksempre di e sori taki Bijbel abi krakti trutru fu meki a libi fu wan sma kon moro bun!—Hebrewsma 4:12.

[Prenspari pisi na tapu bladzijde 9]

„Gado, mi e pramisi yu taki efu mi tan na libi, mi sa du ala san mi man fu dini yu”

[Faki na tapu bladzijde 9]

Bijbel gronprakseri di e yepi sma

Te ogri e miti sma dan den kan kisi trowstu fu Bijbel gronprakseri leki disi:

„Te den prakseri fu mi di e trubu mi ben kon furu na inisei fu mi, dan mi sili ben kon firi korostu fu di yu ben trowstu mi” (Psalm 94:19). Den wortu fu Yehovah di wi e feni na ini en Wortu e gi wi furu trowstu. Te wi e denki dipi fu den wortu disi èn te wi e begi, dan disi o meki wi firi korostu èn a o meki wi kisi moro frutrow tapu Gado leki wan Mati di e broko en ede nanga wi.

„A [Yehovah] e dresi den wan di broko-saka, èn a e tai den soro fu den” (Psalm 147:3). Efu wi abi warderi gi a sari-ati fu Yehovah èn gi den sani di a seti fu puru den sondu fu wi nanga yepi fu a frulusu-ofrandi fu Yesus, dan wi sa man kon na fesi Gado sondro fu abi konsensi fonfon. Disi sa meki wi kisi trowstu nanga wan korostu firi di wi no kan gersi nanga nowan tra sani.

„Nowan sma kan kon na mi [Yesus Krestes], boiti efu a Tata, di ben seni mi kon, e hari en kon; èn mi sa gi en wan opobaka na tapu a lasti dei” (Yohanes 6:44). Nanga yepi fu en santa yeye èn nanga yepi fu a Kownukondre preikiwroko, Yehovah srefi e hari wi go na en Manpikin èn a e gi wi a howpu taki wi sa kisi têgo libi.