Na Avondmaal fu Masra de tumusi prenspari gi yu

A DE so taki yu musu si na Avondmaal fu Masra leki wan prenspari sani di yu musu tan memre yu heri libi langa? Fu kon sabi efu disi de so, dan meki wi go luku fosi san a spesrutu okasi disi ben wani taki gi Yesus Krestes srefi.

Na a mofoneti fu 14 Nisan, 33 G.T., Yesus kon makandra nanga den 12 apostel fu en na ini wan tapusei kamra fu wan oso na ini Yerusalem fu hori na alayari Paskafesa. Baka di den nyan a Paska nyanyan, dan a hoigriman Yudas gowe libi a kamra fu go tori Yesus (Yohanes 13:21, 26-30). Makandra nanga den 11 apostel di tan abra, Yesus hori „na Avondmaal fu Masra” fu a fosi leisi (1 Korentesma 11:20). Son sma e kari en a Memrefesa tu, fu di Yesus gi den bakaman fu en a komando disi: „Un mus tan du a sani disi fu memre mi.” Disi na a wan-enkri okasi pe Kresten kisi a komando taki den musu tan memre a sani dati.​—1 Korentesma 11:24, Nyun Testamenti.

Na furu presi, sma e meki wan monumenti noso den e poti wan spesrutu dei fu memre wan prenspari sma noso wan prenspari sani. Yesus seti wan nyanyan di ben o yepi den disipel fu en fu tan memre den tumusi prenspari sani di pasa na a bigi dei dati. Na ini den hondrohondro yari di pasa baka dati, a nyanyan disi ben o memre den wan di ben o go na a Memrefesa, o prenspari den sani de di Yesus ben du na a neti dati, spesrutu den sani di a gebroiki na a okasi dati. San Yesus gebroiki na a neti dati, èn san den sani dati wani taki? Meki wi luku na ini Bijbel san ben pasa na a neti dati na ini 33 G.T.

San den sani di Yesus gebroiki wani taki

„A teki wan brede tu, a taki tangi, a broko en, èn a gi en na den, aladi a taki: ’Disi wani taki mi skin, di sa gi fu a bun fu unu. Tan du disi fu memre mi.’”​—Lukas 22:19.

Di Yesus teki a brede èn a taki, „disi wani taki mi skin”, dan a ben sori taki a brede sondro srudeki e prenki en eigi volmaakti libisma skin, di a gi „so taki grontapu kan kisi libi” (Yohanes 6:51). Na ini son bijbelvertaling skrifi „disi na mi skin” noso „disi de mi skin” [a Griki wortu na es·tinʹ]. Ma a Thayer’s Greek-English Lexicon of the New Testament e taki dati furu tron a wortu disi wani taki „a e sori go na wan sani” noso „a wani taki wan sani” noso „a e prenki wan sani”. A wortu disi e meki sma prakseri fu wan sani di e prenki wan tra sani, noso wan sani di wani taki wan tra sani.​—Mateyus 26:26.

 Na so a de tu nanga a beker nanga a win. Yesus taki: „A beker disi wani taki a nyun frubontu akruderi a brudu fu mi, di sa kanti trowe fu a bun fu unu.”​—Lukas 22:20.

Te wi e leisi a tori disi na ini Mateyus, dan Yesus e taki disi fu a beker: „Disi wani taki mi ’brudu fu a frubontu’, di sa kanti trowe fu a bun fu furu sma fu gi pardon fu sondu” (Mateyus 26:28). Yesus gebroiki a win na ini a beker fu prenki en eigi brudu. A brudu fu en di ben trowe fu wi ede, meki taki „wan nyun frubontu” ben kan seti gi den disipel di salfu nanga santa yeye. Den disipel disi sa tiri leki kownu nanga priester makandra nanga Yesus na ini hemel.​—Yeremia 31:31-33; Yohanes 14:2, 3; 2 Korentesma 5:5; Openbaring 1:5, 6; 5:9, 10; 20:4, 6.

A win na ini a beker e memre wi tu taki a brudu fu Yesus di ben trowe fu wi ede, meki taki sma ben kan kisi „pardon fu sondu”. Dati meki den sma di e nyan fu a brede èn e dringi fu a win, kisi pasi fu go libi na hemel leki sma di o tiri makandra nanga Krestes. Yu kan frustan taki na soso den sma disi, e nyan fu a brede èn e dringi fu a win na a Memrefesa.​—Lukas 12:32; Efeisesma 1:13, 14; Hebrewsma 9:22; 1 Petrus 1:3, 4.

Ma san o pasa nanga ala den tra bakaman fu Yesus di no de na ini a nyun frubontu? Den sma disi na den „tra skapu” fu Masra. Den no abi a howpu fu tiri nanga Krestes na ini hemel, ma den abi a howpu fu libi fu têgo na ini wan paradijs grontapu pe den sa de koloku (Yohanes 10:16; Lukas 23:43; Openbaring 21:3, 4). Leki „wan bigi ipi” fu getrow Kresten di e „du santa diniwroko gi [Gado] dei nanga neti”, den e prisiri fu luku nanga lespeki èn nanga warderi fa a Memrefesa e hori. Nanga den sani di den e taki èn di den e du, a de neleki den e meki bekènti: „Tangi fu wi Gado, di e sidon na tapu a kownusturu, èn tangi fu a Pikin Skapu.”​—Openbaring 7:9, 10, 14, 15.

Omeni leisi a Memrefesa musu hori?

„Tan du disi fu memre mi.”​—Lukas 22:19.

Omeni leisi a Memrefesa musu hori so taki wi tan memre a dede fu Krestes? Yesus no ben taki soifri omeni leisi sma musu hori en. A Memrefesa seti tapu 14 Nisan, a neti fu a Paskafesa di den Israelsma ben e hori ibri yari. A de krin fu si taki Yesus ben abi na prakseri taki a Memrefesa ben musu hori neleki fa a Paskafesa ben e hori. Den Israelsma ben e memre ibri yari baka fa den kon fri fu katibo na ini Egepte. Ma Kresten e memre ibri yari baka fa den kon fri fu a katibo fu sondu nanga dede.​—Exodus 12:11, 17; Romesma 5:20, 21.

Sma gwenti fu memre wan prenspari sani ibri yari baka. Prakseri fu eksempre te wan trowpaar e memre a trowdei fu den ibri yari baka, noso te den sma fu wan kondre e memre ibri yari baka fa wan prenspari sani ben pasa na ini a historia fu den. Furu tron den e memre a sani dati wán leisi wan yari, tapu a dei di a sani ben pasa. A de wan moi sani fu si, taki wan tu hondro yari baka di Krestes dede, furu sokari Kresten ben kisi a nen fu Quartodecimanen, san wani taki „sma fu a di fu tinafo dei”. Den ben kisi a nen disi fu di den ben e memre a dede fu Yesus wán leisi wan yari, tapu 14 Nisan.

Wan seremonia sondro pranpran, ma di de tumusi prenspari

Na apostel Paulus sori taki te den disipel fu Yesus ben o hori a Memrefesa, dan disi ben o gi  den na okasi fu „tan meki a dede fu Masra bekènti” (1 Korentesma 11:26). Dati meki a Memrefesa e poti prakseri na a dede fu Yesus, di de tumusi prenspari fu meki den sani kon tru di Gado abi na prakseri.

Yesus Krestes tan getrow te na dede, èn na so wan fasi a sori taki Yehovah Gado trutru na wan koni, lobi-ati Mekiman èn a wan-enkri regtfardiki Sma di abi a reti fu tiri. Tra fasi leki fa Satan ben taki èn tra fasi leki fa Adam ben du, Yesus sori taki wan libisma man tan getrow na Gado, awinsi sortu hebi tesi e miti en.​—Yob 2:4, 5.

A Memrefesa e meki wi tan memre tu taki Yesus lobi wi so te, taki a ben de klariklari fu dede gi wi; wi musu de nanga tangi na ati taki a ben du so wan sani gi wi. Aladi Yesus ben e kisi hebi tesi, toku a ben tan gi yesi na en Tata na wan volmaakti fasi. Na so wan fasi a ben man gi en eigi volmaakti libisma libi fu pai a bigi paiman fu a sondu fu Adam. Soleki fa Yesus srefi taki, a ben kon „fu gi en libi leki wan lusu-paiman gi furu sma” (Mateyus 20:28). Leki bakapisi fu dati, ala sma di e bribi na ini Yesus, kan kisi pardon fu den sondu fu den èn den kan kisi têgo libi soleki fa Yehovah ben abi na prakseri sensi a bigin.​—Romesma 5:6, 8, 12, 18, 19; 6:23; 1 Timoteyus 2:5, 6. *

Ala den sani disi e sori krin tu taki Yehovah abi bunfasi pasa marki èn a e du bun gi wi so taki wi kan kisi frulusu, aladi wi no abi reti tapu dati. Bijbel e taki: „Na so a lobi fu Gado kon na krin gi wi, fu di Gado ben seni en wan-enkri Manpikin di ensrefi meki, kon na grontapu so taki nanga yepi fu en wi ben kan kisi libi. Lobi no wani taki dati wi lobi Gado, ma taki en lobi wi, èn a seni en Manpikin kon leki wan ofrandi di e tapu den sondu fu wi.”​—1 Yohanes 4:9, 10.

Fu tru, a Memrefesa na wan tumusi moi fesa fu hori! Fu di a de wan fesa sondro pranpran, meki a makriki fu hori en na heri grontapu, na ondro difrenti sortu situwâsi. Ma aladi a de wan fesa sondro pranpran, toku a de wan tumusi prenspari fesa di sma musu tan hori fu memre a dede fu Yesus fu wan langa pisi ten.

San a wani taki gi yu

Na ofrandi dede fu wi Masra Yesus Krestes ben de wan sani di ben aksi furu fu Yesus èn fu en Tata, Yehovah. Leki wan volmaakti man, Yesus  no ben o dede fu sondu, neleki fa a e pasa nanga wi alamala te fu kaba (Romesma 5:12; Hebrewsma 7:26). A ben abi a reti fu libi fu têgo. Awinsi sortu muiti son sma ben sa du, toku nowan sma ben sa man kiri en efu a no ben gi den pasi fu du dati. A taki: „Nowan sma puru [mi libi] na mi anu, ma mi e gi mi libi fu di mi wani.”​—Yohanes 10:18.

Ma toku, nanga en eigi fri wani, Yesus gi en volmaakti libisma libi leki wan srakti-ofrandi, so taki „nanga a dede fu en a kan meki taki a sma di man tyari dede kon, dati na Didibri, kon tron leki noti; a kan fri ala sma tu di ben de na ini katibo den heri libi langa fu di den ben frede fu dede” (Hebrewsma 2:14, 15). Wan tra sani di e sori taki Krestes lobi wi so te, taki a ben de klariklari fu dede gi wi, na a fasi fa a gi pasi taki sma kiri en. A ben sabi heri bun fa a ben o pina èn dede.​—Mateyus 17:22; 20:17-19.

A Memrefesa e memre wi tu taki noiti nowan sma sori so wan bigi lobi gi wi soleki fa wi Tata na hemel, Yehovah, sori dati. A ben musu fu hati Yehovah srefisrefi, di ’abi dipi lobi firi èn sari-ati’, di a yere èn di a si a ’tranga babari nanga den watra-ai’ fu Yesus di ben de na ini a dyari fu Getsemane. A ben musu hati Yehovah sosrefi di a si fa den ben krawasi Yesus na wan fasi di ben gi en furu skin-ati, fa den ben e spikri en na wan ogri-ati fasi na wan postu, èn fa Yesus ben abi hebi pen di a ben e dede safrisafri (Yakobus 5:11, futuwortu; Hebrewsma 5:7; Yohanes 3:16; 1 Yohanes 4:7, 8). Srefi na ini a ten disi, baka someni hondrohondro yari, a prakseri taki Yesus ben abi fu dede so wan takru dede, e meki furu sma firi sari srefisrefi.

Prakseri nomo: Yehovah Gado nanga Yesus Krestes pai so wan bigi paiman soso fu frulusu wi leki sondu sma! (Romesma 3:23). Ibri dei wi e kisi fu du nanga den bakapisi fu a sondu di wi kisi. Ma te wi e bribi na ini a frulusu-ofrandi fu Yesus, dan wi kan aksi Gado fu gi wi pardon (1 Yohanes 2:1, 2). Disi e meki taki wi no o frede fu taki nanga Gado èn wi kan abi wan krin konsensi tu (Hebrewsma 4:14-16; 9:13, 14). Boiti dati, wi kan abi a howpu fu libi fu têgo na ini wan paradijs grontapu (Yohanes 17:3; Openbaring 21:3, 4). Wi kan kisi den blesi disi nanga furu tra blesi tu, fu di Yesus lobi wi so te, taki a dede gi wi.

Sori taki yu abi warderi gi a Memrefesa

A no de fu taki dati a Memrefesa na a moro moi fasi fa Gado sori en „bun-ati di e pasa ala sani”. Èn a frulusu-ofrandi di Yehovah Gado seti gi wi, trutru na wan „fri presenti fu en di pasa san wi man taki fu en”; èn dati na wan presenti di wi kisi fu di Yesus lobi wi so te, taki a dede gi wi (2 Korentesma 9:14, 15). A no e meki yu de nanga dipi warderi èn nanga tangi na ati taki Gado sori en bun-ati na so wan fasi nanga yepi fu Yesus Krestes?

Wi abi a frutrow taki na so yu e firi trutru. Dati meki wi e gi yu wan switi kari fu kon makandra nanga Yehovah Kotoigi te den o hori a Memrefesa fu a dede fu Yesus. A yari disi, a Memrefesa sa hori tapu dridewroko 16 april, baka te son dongo. Yehovah Kotoigi na ini a birti fu yu sa prisiri fu taigi yu o lati èn pe a moro prenspari fesa disi sa hori.

[Futuwortu]

[Faki/Prenki na tapu bladzijde 6]

SAN YESUS BEN TAKI: „DISI NA MI SKIN” NOSO „DISI WANI TAKI MI SKIN”?

Di Yesus taki: „Mi na a doro” èn „Mi na a tru droifibon”, dan nowan sma prakseri taki Yesus na wan trutru doro noso wan trutru droifibon (Yohanes 10:7; 15:1). Na a srefi fasi, te a Nyun Testamenti e sori dati Yesus taki: „A kan disi na a nyun ferbontu”, dan wi no abi a prakseri taki a kan dati ben de a nyun frubontu trutru. Na so a de tu taki di Yesus taki dati a brede ’na’ en skin, dan a de krin fu si taki a brede ben e prenki, noso ben e agersi en skin. Dati meki Charles B. Williams vertaal a pisi dati nanga: „Disi wani taki mi skin.”​—Lukas 22:19, 20.

[Prenki na tapu bladzijde 5]

A brede sondro srudeki nanga a win na den yoisti sani fu prenki a volmaakti skin fu Yesus nanga a brudu fu en

[Prenki na tapu bladzijde 7]

A Memrefesa e memre wi na a bigi lobi di Yehovah Gado nanga Yesus Krestes sori gi wi