O prenspari a de fu sori lobi bun-ati?

„A MOI fasi fu wan libisma, na en lobi bun-ati”, na so Bijbel e taki (Odo 19:22). Fu tru, a de wan tumusi moi sani te sma e sori switifasi fu di den lobi trawan. Ma na ini Bijbel a wortu „lobi bun-ati” e sori go na a switifasi di wan sma e sori gi wan tra sma di de wan mati fu en kaba, fu di a trawan ben sori en switifasi na ini a ten di pasa. Fu dati ede, lobi bun-ati abi fu du nanga a getrowfasi di wan sma e sori gi wan tra sma.

Kownu Yoas fu Yuda no ben sori a moi fasi disi. A ben musu sori furu tangi gi en tanta èn gi en omu Yoyada. Di Yoas ben de moro yongu leki wán yari, dan en ogri granmama ben poti ensrefi leki kownu èn a ben kiri ala den brada fu Yoas di ben musu tron kownu. Ma a no ben man kiri Yoas, fu di en tanta nanga en omu ben kibri en bun. Den ben leri Yoas a Wet fu Gado sosrefi. Di Yoas ben abi seibi yari, dan en omu ben gebroiki a makti di a ben abi leki granpriester fu kiri na ogri uma-kownu èn fu poti Yoas leki kownu.​—2 Kroniki 22:10-23:15.

A yongu Kownu Yoas ben e tiri na wan bun fasi teleki na omu fu en dede. Baka dati a bigin anbegi kruktu gado. Gado seni Sakaria, a manpikin fu Yoyada, fu warskow Yoas fu di a ben fadon komoto na bribi. Yoas meki sma ston Sakaria kiri. Dati ben de wan ogri sani trutru di ben sori taki a no ben de getrow na a famiri di ben e du so furu gi en!​—2 Kroniki 24:17-21.

Bijbel e taki: ’Yoas, a kownu, no ben memre a lobi bun-ati di a papa fu [Sakaria] ben sori en, fu di a ben kiri en manpikin.’ Di Sakaria ben de fu dede, a ben taki: „Meki Yehovah si disi èn meki a krutu yu.” Den wortu fu Sakaria ben kon tru. Yoas ben kon tron wan man di ben siki tranga èn wan tu fu den futuboi fu en ben kiri en.​—2 Kroniki 24:17-25.

Na presi taki wi e tron sma di e tyari densrefi na wan ogri fasi neleki Kownu Yoas, dan wi sa kisi blesi na ini a ten di e kon te wi e teki a rai disi: „Meki lobi bun-ati nanga trufasi no libi yu. . . . Èn na so fasi feni a bun, nanga a koni fu man si sani krin ini na ai fu Gado èn fu libisma.”​—Odo 3:3, 4.