Yehovah e broko en ede nanga sma di no e si densrefi so prenspari

WI MUSU de sma di man du spesrutu sani noso wi musu de tumusi aparti efu wi wani taki Gado e poti prakseri na wi? Abraham Lincoln, a di fu tinasiksi presidenti fu Amerkankondre, ben taki: „Masra lobi den sma di no e si densrefi so prenspari. Na fu dati ede A e meki so furu fu den.” Furu sma e denki taki den no de so prenspari fu di den no man du wan spesrutu sani. Furu tron den sma disi e si densrefi leki mofina sma noso pôti sma di no warti noti. Wan sma di no e si ensrefi so prenspari, kande no abi den srefi reti nanga grani leki den heiheisma, noso a no abi wan hei posisi na ini a libimakandra. Ma nanga sortu sma yu sa wani abi demakandra? Nanga sma di abi bigifasi, noso nanga sma di abi bigimemre èn di e dwengi trawan fu du san den wani, so taki trawan kan poti prakseri na den? Noso na presi fu dati, yu wani abi demakandra nanga sma di abi switifasi, sakafasi, bun maniri èn di wani sabi trutru fa a e go nanga trawan?

Na ini a grontapu fu disiten a de wan aladei sani taki sma e afrontu, noso e spotu trawan. Fu dati ede son sma no wani bribi taki Gado e broko en ede trutru nanga den. „Mi e kon fu wan famiri pe wi no ben abi a gwenti fu sori lobi gi makandra. Den ben wisiwasi mi, dreigi mi èn den ben e lafu mi. Sobun aladi mi ben yongu ete mi ben firi taki mi no warti noti”, na so wan leisiman fu a tijdschrift disi e taki. „Te now ete mi abi den firi disi fu a ten di mi ben yongu èn dati e broko mi saka te mi e kisi fu du nanga problema.” Ma toku, wi kan bribi taki Gado e poti prakseri trutru na den sma di e firi taki den no warti noti.

Gado e poti prakseri na den mofina sma

Kownu David ben skrifi: „Yehovah bigi èn musu kisi bun furu prèise, èn a bigi di a bigi, dangra fu frustan” (Psalm 145:3). Ma disi no e meki taki Yehovah no sa sorgu wi nanga lobi èn nanga sari-ati (1 Petrus 5:7). Fu eksempre, a psalm skrifiman taki: „Yehovah de krosibei fu den wan di den ati broko; èn den wan di masi na ini yeye, a e frulusu.”​—Psalm 34:18.

Sani di e hari a prakseri fu sma na ini grontapu, na sani soleki te wan sma moi, te a abi barinen, noso te a gudu. Den sani disi no de prenspari gi Gado. A Wet di Gado ben gi den Israelsma, ben sori a sari-ati fu en fu di a ben poti prakseri na pôtisma, pikin sondro papa nanga mama, weduwe, noso trakondre-sma. Den sma fu Egepte ben e handri na wan ogri-ati fasi nanga den Israelsma. Fu dati ede Gado taigi den Israelsma di ben ondrofeni a sani disi: „Yu no musu du ogri nanga wan trakondre-sma noso kwinsi en . . . Yu no musu kwinsi nowan weduwe noso boi di no abi papa. Efu toku yu ben sa kwinsi en, dan efu a bari kari mi, dan sondro misi mi sa yere a babari fu en” (Exodus 22:21-24). Boiti dati, a profeiti Yesaya ben sori taki a ben frutrow dati Gado e broko en ede nanga den mofinawan, fu di a ben taki: „Bika yu tron wan fortresi gi a mofinawan, èn wan fortresi gi a pôtiwan di de na ini banawtu, wan presi fu kibri den gi a sibibusi, wan kowrupresi gi a faya, te a tranga blo fu den ogri-ati sma de leki wan sibibusi di e naki na tapu wan skotu.”​—Yesaya 25:4.

Yesus Krestes, di de „a soifri prenki” fu Gado, tron wan eksempre gi den disipel fu en na ini a fasi fa a ben du en diniwroko fu di a ben poti  prakseri trutru na den mofina sma (Hebrewsma 1:3). Di Yesus ben si den ipi sma di „ben kisi kwinsi èn den ben waka bruyabruya leki skapu sondro skapuman”, dan „a ben firi sari nanga den”.​—Mateyus 9:36.

Luku sosrefi sortu sma Yesus ben teki fu tron den apostel fu en. Den ben de man di trawan ben fruteri fu den taki den ’no kisi nofo skoroleri èn taki den de leki ala tra sma’ (Tori fu den Apostel 4:13). Baka a dede fu Yesus, dan den bakaman fu en ben gi ala sortu sma wan kari fu arki a Wortu fu Gado. Na apostel Paulus ben skrifi taki „iniwan sma di no de na bribi noso di no e si ensrefi so prenspari” ben kan kon na ini a Kresten gemeente èn ben kan tron wan bribiman (1 Korentesma 14:24, 25). Na presi fu teki den wan di grontapu e lespeki nomo, dan Gado ben suku furu sma di no e si densrefi so prenspari noso den mofinawan, fu du diniwroko gi en. Na apostel Paulus ben taki: „Bika unu e si a kari di a ben kari unu, brada, taki a no furu koniman na skin fasi ben kisi kari, no furu maktiwan, no furu fu hei geborte, ma Gado ben teki den law sani fu grontapu fu meki den koniman kisi syen; èn Gado ben teki den swaki sani fu grontapu, fu meki den tranga sani kisi syen; èn Gado teki den lagiwan fu grontapu nanga den wan di sma e wisiwasi, fu meki den wan di de wan sani tron noti; fu dati ede no wan libisma kan meki bigi na fesi Gado.”​—1 Korentesma 1:26-29.

Sosrefi na ini a ten disi Gado e broko en ede trutru nanga wi. A wani fu Gado na taki „ala sortu sma musu kisi frulusu èn kon kisi wan soifri sabi fu waarheid” (1 Timoteyus 2:4). Efu Gado ben lobi libisma so te taki a seni en Manpikin kon na grontapu fu dede gi wi, dan wi no abi fu firi taki a no lobi wi noso taki wi no warti noti (Yohanes 3:16). Yesus Krestes ben sori den bakaman fu en o prenspari a de fu du sani gi den brada fu en na yeye fasi leki fa den ben o du dati gi Yesus, srefi te den brada disi no e si densrefi leki prenspari sma. A ben taki: „Efu unu du dati gi wán fu den moro mofina brada fu mi dya, dan unu du dati gi mi tu” (Mateyus 25:40). A no abi trobi fa grontapu e si wi, efu wi lobi a waarheid dan wi de warti sma na ini Gado ai.

Na so Francisco, * wan boi fu Brasyonkondre di no abi papa, ben firi di ensrefi kon abi wan matifasi nanga Gado. A e fruteri: „Fu di mi leri sabi Yehovah nanga en organisâsi, meki disi ben yepi mi fu man wini a firi di mi abi taki mi no warti noti èn sosrefi a syen di mi ben syen. Mi kon leri taki Yehovah srefi e broko en ede nanga ibriwan fu wi.” Yehovah tron wan trutru Tata gi Francisco.

A e broko en ede nanga yongusma

Yehovah e broko en ede trutru nanga yonguwan, no leki grupu wawan ma sosrefi nanga ibriwan fu den. A no de fu taki dati awinsi wi owru noso wi yongu, toku noiti wi no wani denki tumusi furu fu wisrefi. Ma toku, wi kan abi koni fu du sani di Gado kan gebroiki na ini a ten di e kon. Yehovah sabi sortu kenki wi musu tyari kon èn sortu leri wi musu kisi ete fu man gebroiki a koni di wi abi fu man du sani. Luku fu eksempre a tori na ini 1 Samuel kapitel 16. Fu di a profeiti Samuel  ben denki taki tra sma ben sa fiti fu tron kownu na ini Israel, meki Yehovah ben taigi en fu san ede A ben frukisi David, a moro yongu manpikin fu Isai, fu tron a kownu fu Israel. A ben taki: „No luku nomo na a fesi fu en, noso na a langa di a langa, bika mi no wani en [a moro owru brada fu David]. Bika Gado no e si sani na a fasi fa libisma e si sani, fu di libisma e si san na ai e si nomo; ma Yehovah fu en sei e si fa na ati de.”​—1 Samuel 16:7.

Yongusma na ini a ten disi kan de seiker taki Yehovah e broko en ede trutru nanga den? Poti prakseri na Ana, wan yongu uma na ini Brasyonkondre. Neleki fa a de nanga furu yonguwan, dan a yongu uma disi ben bruya fu di so furu kruktudu nanga krukafasi de. Dan en papa ben bigin fu tyari en nanga den sisa fu en go na den Kresten konmakandra. Baka wan pisi ten a bigin prisiri nanga den sani di a leri fu Gado Wortu. Ana ben bigin leisi Bijbel nanga tra Kresten publikâsi èn a bigin taki nanga Yehovah Gado na ini begi. Safrisafri a kon kisi wan tranga banti nanga Gado. A e fruteri: „Mi ben e prisiri fu rei mi baisigri go na wan pikin bergi di ben de krosibei fu mi oso èn drape mi ben luku a tumusi moi fasi fa son e dongo. Mi ben taki nanga Yehovah na ini begi èn mi ben taki en tangi fu a bunfasi fu en nanga a fasi fa a lobi fu gi sani. Mi ben pruberi fu sori En o tranga mi lobi en. Di mi ben kon leri sabi Yehovah Gado nanga den sani di a abi na prakseri fu du, dan mi ben firi korostu èn mi ben abi a dyaranti taki sani sa waka bun nanga mi.” Yu e pruberi fu meki ten so taki yu kan denki fu a fasi fa Yehovah e sorgu wi na wan lobi-ati fasi?

A tru taki a kweki di wi kisi kan meki en muilek gi wi fu abi wan krosibei banti nanga Yehovah. Teki na eksempre fu Lidia. Di a ben wani taki nanga en papa fu wan sani di ben gi en broko en ede trutru, dan en papa ben krutu en èn na wan grofu fasi a ben taki: „Dati na wan lawlaw sani.” Aladi a ben frustan taki en papa ben wani taki a ben musu frigiti a problema dati, a ben taki: „Fu di mi studeri Bijbel meki mi kisi ala sani di mi abi fanowdu èn srefi moro leki dati. Den heri moi fasi fu Yehovah hari mi èn dati meki a tron a moro bun mati di mi abi. Now mi abi wan lobi-ati Tata di e frustan mi èn di mi kan fruteri ala den broko-ede fu mi, èn srefi den moro dipi firi di mi abi. Mi man taki furu yuru langa nanga a moro prenspari Sma fu hemel nanga grontapu èn mi sabi seiker taki a sa arki mi.” Bijbeltekst soleki Filipisma 4:6, 7 ben yepi en fu firi taki Yehovah e sorgu en na wan lobi-ati fasi. A tekst dati e taki: „No broko un ede nanga nowan sani, ma na ini ibriwan sani, meki Gado kon sabi san unu wani fu di unu e begi èn e aksi en tangitangi aladi unu e taigi en grantangi tu; èn a vrede fu Gado, di pasa ala suma frustan, sa kibri un ati nanga un frustan nanga yepi fu Krestes Yesus.”

A e yepi yu fu kisi den sani di yu abi fanowdu

Yehovah e broko en ede nanga ibriwan fu den futuboi fu en èn sosrefi nanga a gemeente fu en di de na heri grontapu. Wi kan sori lobi gi wi hemel Tata te wi e meki ten fu taki nanga en. Noiti wi musu si a matifasi di wi abi nanga en leki wan sani di e kon fu ensrefi. David ben sabi heri bun san a matifasi di a ben abi nanga Yehovah wani taki. A ben taki: „Meki mi kon sabi den pasi fu yu, o Yehovah; leri mi den pasi fu yu. Meki mi waka na ini yu waarheid èn leri mi, bika yu na mi Gado fu frulusu. A heri dei mi howpu tapu yu.”​—Psalm 25:4, 5.

A prakseri fu abi wan bun matifasi nanga Gado, na wan nyun sani gi yu kande. Awansi sortu problema yu abi, yu kan de seiker taki ala ten a Moro Heiwan sa man yepi yu, akruderi a wani fu en (1 Yohanes 5:14, 15). Sobun, leri fu taki fu spesrutu  sani na ini yu begi, aladi yu e hori a situwâsi nanga den sani di yu abi fanowdu na prakseri.

A de prenspari fu sabi san na den sani di wi abi fanowdu. Disi tyari kon na krin na ini a begi fu Kownu Salomo di a ben gi a tempel abra na Yehovah: „Efu angriten kon na ini a kondre, efu pestsiki kon, efu faya son nanga buku, sprenka nanga kakalaka kon, efu den feanti fu den lontu den na ini a kondre fu den portu fu den ​—iniwan sortu plaag nanga iniwan sortu siki​—o sortu begi, o sortu grani di iniwan sma noso yu heri pipel Israel ben sa aksi, bika ibriwan fu den sabi en eigi plaag nanga den eigi sari . . . Dan yu fu yu sei sa yere na ini hemel, . . . èn yu musu gi pardon èn gi ibriwan sma akruderi ala den pasi fu en.” (2 Kroniki 6:28-30). A no de fu taki dati yu wawan ’sabi yu eigi plaag nanga yu eigi sari’. A de tumusi prenspari fu dati ede fu sabi den nowtu fu yu nanga den sani di yu wani. Efu yu e du disi, dan „[Yehovah] sa gi yu san na ati fu yu e aksi”.​—Psalm 37:4.

Meki a matifasi di yu abi nanga Yehovah kon tranga

Yehovah e prisiri fu abi wan krosibei matifasi nanga sma di no e si densrefi so prenspari. A Wortu fu En e gi wi a dyaranti: „’Mi sa de wan tata gi unu, èn unu sa de manpikin nanga umapikin gi mi’, Yehovah na Almaktiwan, e taki.” (2 Korentesma 6:18). Fu tru, Yehovah nanga en Manpikin wani taki wi e horidoro èn kisi têgo libi. A e gi wi deki-ati trutru fu sabi dati Yehovah e yepi wi fu sorgu gi den frantwortu di wi abi na ini na osofamiri, na wrokope, èn na ini a Kresten gemeente!

Ma toku, wi alamala e kisi fu du nanga muilek ten. Sani soleki siki, problema na ini na osofamiri, na abi di wi no abi nofo moni, noso iniwan tra sani kan meki taki wi e sari. Kande wi no sabi san fu du te wi e kisi fu du nanga tesi. Na a wan noso a tra fasi wi e kisi tesi moro nanga moro fu na ogri kragiman Satan Didibri, di e feti wan feti na yeye fasi nanga a pipel fu Gado. Ma wan sma de di e frustan wi èn a e yepi wi fu tan abi wan bun matifasi nanga Yehovah. A sma disi na Yesus Krestes, di de na ini a hei posisi fu en na ini hemel. Wi e leisi: „Wi no abi leki granpriester, wan sma di no kan firi nanga wi na ini den swakifasi fu wi, ma wan sma di den ben tesi neleki wi na ini ala fasi, ma sondro sondu. Fu dati ede, meki wi go nanga fri fu taki na fesi a kownusturu fu bun-ati, so taki wi kan kisi sari-ati èn kan feni bun-ati leki yepi na a yoisti ten.”​—Hebrewsma 4:15, 16.

A e gi wi trutru trowstu fu sabi taki wi no abi fu de sma di abi barinen noso sma di gudu fu kisi a bun-ati fu Gado! Srefi efu wi de na ini wan situwâsi di e gi wi furu broko-ede, dan wi musu de leki a psalm skrifiman di ben begi: „Mi mofina èn pôti. Yehovah srefi e prakseri mi. Yu na mi yepiman èn a Sma di gi mi frulusu” (Psalm 31:9-14; 40:17). Yu kan abi a dyaranti taki Yehovah lobi den sma di abi sakafasi, di no e si densrefi so prenspari. Fu tru, ’wi kan trowe ala wi broko-ede na en tapu bika a e sorgu gi wi’.​—1 Petrus 5:7.

[Futuwortu]

[Prenki na tapu bladzijde 29]

Furu fu den bakaman fu Yesus no ben kisi nofo skoroleri èn den ben de leki ala tra sma

[Prenki na tapu bladzijde 30]

Kresten e du muiti fu abi wan tranga bribi

[Prenki na tapu bladzijde 31]

Wi no abi fu de prenspari sma fu kisi a bun-ati fu Gado