Yonguwan di e prisiri na ati fu Yehovah

Den studie-artikel disi de spesrutu gi yonguwan na mindri Yehovah Kotoigi. Dati meki wi e gi den yonguwan deki-ati fu studeri den artikel disi finifini, èn fu gi furu piki te a Waktitoren-studie sa hori na ini a gemeente.

„Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi.”​—Odo 27:11.

1, 2. (a) Fruklari fu san ede a no abi fu de so taki yu no bun nofo fu de wan Kresten soso fu di den sani fu grontapu e hari yu (Romesma 7:21). (b) San yu e leri fu na eksempre fu Asaf? (Luku a boksu tapu bladzijde 13.)

PRAKSERI taki yu de na ini wan wenkri fu bai krosi. Aladi yu e luku lontu, dan wantronso yu ai e fadon tapu wan krosi di e hari yu trutru. A kloru nanga a fasi fa a meki de soifri san yu ben e suku, èn te yu e luku a prijs, dan yu e si taki a no diri srefisrefi. Ma now yu e luku en moro bun. Yu e fruwondru fu si taki a krosi priti na ondrosei èn a no nai bun sosrefi. Aladi a krosi na wan moi krosi, toku a kwaliteit fu en no bun. Yu o bai so wan krosi di no bun srefisrefi?

² Teki a tori disi gersi nanga wan situwâsi di kan miti yu leki wan Kresten yonguwan. Neleki a krosi, na so den sani fu grontapu kan sori so moi na a bigin èn den kan hari yu trutru. Fu eksempre, den skoromati fu yu e go na bigi dansi noso fesa, den e gebroiki drugs, den e dringi sopi, den e meki mofo fu hori nanga wan boi noso meisje sondro taki den e si en leki wan seryusu sani, èn den abi seks fosi den trow. A de so taki ten na ten a fasi fu libi disi e hari yu? A de so taki yu wani teki wan pikin tesi nomo fu a sokari fri fasi fu libi fu den? Efu dati na a fasi fa yu e firi, dan no prakseri wantewante taki yu na wan ogri sma èn taki yu no bun nofo fu de wan Kresten. Te yu e luku en bun, dan Bijbel srefi e taki dati a grontapu kan kori wan sma trutru, srefi wan sma di wani plisi Gado.​—2 Timoteyus 4:10.

3. (a) Fu san ede a de wan soso sani fu feti baka den sani fu grontapu? (b) Fa wan Kresten uma e sori taki a de wan soso sani fu feti baka den sani fu grontapu?

³ Grantangi, luku den sani fu grontapu now neleki fa yu ben sa luku wan krosi di yu wani bai. Efu yu ben sa agersi den sani fu grontapu nanga wan pisi krosi, dan aksi yusrefi: „Fu sortu kwaliteit den sani disi de? Bijbel e taki dati „grontapu e pasa gowe” (1 Yohanes 2:17). Iniwan prisiri di e kon fu grontapu, de fu wan syatu pisi ten nomo. Boiti dati, na ogri fasi fa sma e tyari densrefi, na wan tumusi diri prijs fu pai. Trutru, a grontapu disi no warti fu pai so wan diri prijs gi en. Wan Kresten uma di kisi takru bakapisi fu a fowtu fasi fa a  ben e libi na ini en yongu yari, e taki: „A grontapu disi kan gersi wan tumusi moi sani èn a kan hari yu trutru. A e meki yu denki taki yu kan abi iniwan prisiri sondro fu kisi takru bakapisi. Ma disi no de so kwetikweti. A grontapu sa gebroiki yu na ala sortu fasi, èn te a kaba nanga yu, a sa trowe yu gowe.” * Fu san ede yu musu pori yu yongu yari nanga so wan soso fasi fu libi?

Yu kan kisi kibri gi „na ogriwan”

4, 5. (a) San Yesus aksi Yehovah na ini begi, syatu fosi a dede? (b) Fu san ede a ben de fanowdu fu Yesus aksi a sani disi?

⁴ Fu di yonguwan na mindri Yehovah Kotoigi e frustan taki a seti fu sani disi no abi nowan bun sani gi den, dati meki den no wani tron mati fu a grontapu disi (Yakobus 4:4). Yu na wan fu den getrow yonguwan disi? Efu dati de so, dan wi wani prèise yu. Fu tru, a no makriki fu kakafutu gi a krakti di speri abi na yu tapu èn fu de tra fasi leki den, ma yu kan kisi yepi.

⁵ Syatu fosi Yesus dede, a aksi Yehovah na ini begi fu „kibri” den disipel fu en „gi na ogriwan” (Yohanes 17:15). A no somarso Yesus aksi a sani disi. A ben sabi taki a no ben o makriki gi den bakaman fu en fu tan hori den soifri retifasi, awinsi sortu yari den abi. Fu san ede a no ben o makriki? Wan sani, na taki Yesus ben sabi taki den disipel fu en ben o kisi fu du nanga wan makti feanti di den no man si, namku „na ogriwan”, Satan Didibri. Bijbel e taki dati na ogri yeye disi e „waka lontu leki wan krasi lew, di e suku fu nyan wan sma”.​—1 Petrus 5:8.

6. Fa wi du sabi taki Satan no abi sari-ati gi yongu sma?

⁶ Na ini ala den hondrohondro yari di pasa, Satan prisiri fu du den moro ogri-ati sani fu pina sma. Prakseri fu den ogri-ati sani di a du nanga Yob nanga en osofamiri (Yob 1:13-19; 2:7). Kande yu leki yonguwan e memre nyunsu fu wan sani di pasa, pe yu man si den ogri-ati fasi fu Satan. Soleki fa wi ben si kaba, Didibri de leki wan krasi lew di e wakawaka lontu na wan kibri fasi, aladi a e suku fu nyan wan sma. A no abi sari-ati nanga yonguwan. Fu eksempre, na a bigin fu a fosi yarihondro G.T., Herodus ben meki wan takru plan fu kiri ala boi na ini Betlehem di ben abi tu yari noso moro yongu (Mateyus 2:16). A kan taki na Satan meki Herodus du so wan sani, fu di a ben e pruberi fu kiri a pikin di ben o tron a Mesias di Gado ben pramisi èn di ben o tyari a krutu fu Gado kon tapu Satan!  (Genesis 3:15) Disi e sori krin taki Satan no abi sari-ati gi yongu sma. A wan-enkri prakseri fu en, na fu nyan someni sma leki a man. Disi de so spesrutu na ini a ten disi, fu di den ben fringi Satan komoto fu hemel kon na grontapu èn a abi „bigi atibron, fu di a sabi taki a abi wan syatu pisi ten nomo”.​—Openbaring 12:9, 12.

7. (a) Fa Yehovah de heri tra fasi leki Satan? (b) Fa Yehovah e feni en te yu abi prisiri na ini yu libi?

⁷ Heri tra fasi leki Satan di abi „bigi atibron”, Yehovah abi „trutru sari-ati” (Lukas 1:78). Yehovah na ala sani san lobi wani taki. Fu taki en leti, a tumusi moi fasi disi e sori krin suma na a Mekiman fu wi. Dati meki Bijbel e taki: „Gado na lobi” (1 Yohanes 4:8). Fu tru, wan bigi difrenti de na mindri a gado fu a seti fu sani disi nanga a Gado di yu abi a grani fu dini en! Aladi Satan e suku fu nyan sma, Yehovah „no wani taki wan sma e kisi pori” (2 Petrus 3:9). Yehovah e si a libi fu ibri libisma, yu libi sosrefi, leki wan warti sani. Te Yehovah e gi yu a rai nanga yepi fu en Wortu fu no de wan pisi fu grontapu, dan a no e pruberi fu tapu yu fu abi prisiri noso fu skotu yu so taki yu no man libi na wan fri fasi (Yohanes 15:19). Na presi fu dati, a wani kibri yu gi na ogriwan. Yu hemel Tata wani taki yu kisi wan moro warti sani leki den prisiri fu grontapu di de fu wan syatu pisi ten nomo. A wani taki yu kisi „a trutru libi”, namku têgo libi na tapu wan paradijs grontapu (1 Timoteyus 6:17-19). Yehovah wani taki yu abi wan bun libi, èn a e gi yu deki-ati fu suku a bun libi dati (1 Timoteyus 2:4). Boiti dati, Yehovah e gi yu wan spesrutu kari. Sortu kari na dati?

„Prisiri mi ati”

8, 9. (a) Sortu kado yu kan gi Yehovah? (b) Fa Satan e spotu Yehovah, soleki a tori fu Yob e sori?

⁸ Yu bai wan kado gi wan bun mati fu yu wanten? Yu no si fa a bigin lafu fu prisiri èn fa a ben de nanga tangi di a kisi a kado? Kande yu teki yu ten fu prakseri sortu kado ben o de a moro bun kado gi a sma dati. Now prakseri fu na aksi disi: Sortu kado yu kan gi yu Mekiman, Yehovah Gado? Biginbigin, a prakseri fu gi Yehovah wan kado, kan gersi wan law sani. Sortu sani na Almaktiwan kan abi fanowdu fu wan libisma di no de noti? Sortu sani yu kan gi en di a no abi ete? Bijbel e gi a piki na ini Odo 27:11: „Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi.”

⁹ Soleki fa yu sabi kande fu di yu e studeri Bijbel, dan a sma di e spotu Yehovah, na Satan Didibri. Didibri taki dati iniwan sma di e dini Gado, no e du disi fu di a lobi Gado, ma a e du disi fu di a e kisi wini fu dati. Satan taki dati te libisma e nyan pina, dan heri esi den o gowe libi a tru anbegi. Luku fu eksempre san Satan ben taigi Yehovah fu a regtfardiki man Yob: „A no yusrefi poti wan skotu lontu en èn lontu en oso èn lontu ala san a abi? Yu blesi a wroko fu en anu, èn den meti fu en srefi kon furu na grontapu. Ma fu kenki sani, grantangi, langa yu anu, èn fasi ala san a abi èn luku efu a no sa fluku yu leti na ini yu fesi.”​—Yob 1:10, 11.

10. (a) Fa wi du sabi taki Satan ben taki fu Yob, sosrefi fu ala tra sma, dati den no ben o tan getrow na Gado? (b) San yu abi fu du nanga a strei fu suma na a Moro Hei Tiriman?

¹⁰ Soleki fa Bijbel e sori, dan Satan taki dati Yob no ben o tan getrow na Gado èn a e taki dati fu ala tra sma di e dini Gado. A e taki dati fu yu sosrefi! Fu taki en leti, dan na disi Satan taigi Yehovah fu ala libisma: „Ala san wan libisma abi [a no Yob wawan, ma ala tra sma], a sa gi fu en sili ede” (Yob 2:4). Yu e si o prenspari yu de na ini a strei disi? Soleki fa Odo 27:11 e sori, dan Yehovah e taigi yu taki wan sani de di yu kan gi en; yu kan meki Yehovah gebroiki yu fu piki a sma di e spotu en, namku Satan. Prakseri nomo, a Moro Hei Tiriman fu hemel nanga grontapu, e aksi yu fu gi wan piki di e sori sortu sei yu e teki na ini a moro bigi strei fu ala ten. Fu tru, yu abi wan tumusi bigi frantwortu èn wan tumusi bigi grani! Yu man du san Yehovah e aksi fu yu? Yob ben du disi (Yob 2:9, 10). Yesus nanga furu trawan, furu yonguwan sosrefi di ben e libi na ini ala den hondrohondro yari di pasa te nanga now, ben du disi tu (Filipisma  2:8; Openbaring 6:9). Yu kan du a srefi sani tu. Ma no denki taki yu no abi fu teki sei na ini a strei disi. Nanga den du fu yu, yu sa sori efu yu e teki a sei fu Satan di e spotu Yehovah, noso efu yu e teki a sei fu Yehovah so taki a man gi wan piki na Satan. Sortu sei yu sa teki?

Yehovah e broko en ede nanga yu!

11, 12. A de prenspari gi Yehovah efu yu e bosroiti fu dini en noso fu yu no e dini en? Fruklari fu san ede.

¹¹ A prenspari gi Yehovah sortu bosroiti yu e teki? A no so taki nofo sma tan getrow so taki a man gi wan bun piki na Satan? A tru taki furu sma sori taki Satan na wan leiman di a taki dati nowan sma e dini Yehovah fu di a lobi en. Ma toku, Yehovah wani taki yu teki en sei na ini a strei fu suma na a Moro Hei Tiriman, fu di a e broko en ede nanga ibriwan sma aparti, sobun nanga yu tu. Yesus taki: „Mi Tata na hemel no wani kwetikweti taki wan fu den pikinwan disi musu lasi libi.”​—Mateyus 18:14.

¹² A de krin fu si, taki a de prenspari gi Yehovah sortu sei yu e teki. Ma san de moro prenspari, na taki a bosroiti fu yu abi krakti tapu Yehovah. Bijbel e sori krin taki Yehovah abi dipi firi èn den sani san libisma e du abi krakti tapu den firi fu en. Fu eksempre, di den Israelsma ben e trangayesi Yehovah ibri tron baka, dan den ben e „hati” den firi fu en (Psalm 78:40, 41). Fosi a Frudu fu den dei fu Noa, di „na ogridu fu libisma ben kon furu na grontapu”, dan den ogridu fu den sma „ben hati [Yehovah] na ini en ati” (Genesis 6:5, 6). Prakseri san disi wani taki. Efu yu e du sani di no bun, dan yu e hati den firi fu a Mekiman fu yu. Disi no wani taki dati Gado swaki noso dati a e meki den firi fu en basi en. Na presi fu dati, a lobi yu èn a wani taki sani musu waka bun nanga yu. Ma na a tra sei, te yu e du san bun, dan yu e meki Yehovah ati prisiri. A no e prisiri wawan fu di a man gi wan piki na Satan, ma a e prisiri sosrefi fu di a man tron a Sma di e blesi yu. Èn dati na wan sani di Gado lobi fu du. (Hebrewsma 11:6) Yehovah Gado na yu lobi-ati Tata fu tru!

Yu kan kisi furu blesi nownow kaba

13. Fa yu kan kisi blesi nownow kaba te yu e dini Yehovah?

¹³ A no na ini a ten di e kon wawan yu sa kisi blesi te yu e dini Yehovah. Nownow kaba, yonguwan na mindri Yehovah Kotoigi e kisi a blesi fu abi wan bun libi di e gi den prisiri. Fu dati ede, a psalm skrifiman e skrifi nanga leti: „Den komando fu Yehovah de reti, den e meki na ati  prisiri” (Psalm 19:8). Moro leki iniwan libisma, Yehovah sabi sortu sani bun gi wi. Nanga yepi fu en profeiti Yesaya, Yehovah taki: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka. O efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba, èn a regtfardikifasi fu yu leki den skwala fu se.”​—Yesaya 48:17, 18.

14. Fa Bijbel gronprakseri kan yepi yu fu wai pasi gi den pen nanga sari di e kon te yu abi bigi paiman?

¹⁴ Te yu e gi yesi na den gronprakseri fu Bijbel, dan disi sa yepi yu fu wai pasi gi furu sani di e gi pen nanga sari. Fu eksempre, Bijbel e taki dati den sma di e kweki wan lobi gi moni „ben tyari wan lo sari nanga pen kon gi densrefi” (1 Timoteyus 6:9, 10). A sari sani disi pasa nanga wan fu den speri fu yu? Son yongu man nanga yongu uma abi bigi paiman soso fu di den musu abi den moro nyun merk krosi noso den moro nyun wrokosani, soleki computer, cellulair, nanga tra sortu sani. Na wan hati sani fu tron wan srafu fu bigi paiman di e teki furu rente fu wan langa pisi ten soso fu di yu wani sani di yu no man bai!​—Odo 22:7.

15. Fa Bijbel gronprakseri e kibri yu gi den takru bakapisi fu hurudu?

¹⁵ Luku sosrefi a tori fu hurudu. Ibri yari na heri grontapu, bun furu tini di no trow, e kisi bere. Sonwan e meki wan pikin, aladi den no wani a pikin èn den no man kweki a pikin tu. Trawan e puru a bere èn leki bakapisi den e kisi konsensi fonfon. Yu abi yongu man nanga uma tu di e kisi siki di sma kan kisi te den abi seks, siki soleki AIDS. A no de fu taki dati a moro takru bakapisi gi wan sma di sabi Yehovah, na taki a matifasi fu en nanga Yehovah e pori. * (Galasiasma 5:19-21) A no fu soso Bijbel e taki: „Lowe gi hurudu.”​—1 Korentesma 6:18.

Dini „a koloku Gado”

16. (a) Fa wi du sabi taki Yehovah wani taki yu abi prisiri na ini yu yongu yari? (b) Fu san ede Yehovah gi yu markitiki so taki yu man gi yesi na den?

¹⁶ Bijbel e taki dati Yehovah na „a koloku Gado” (1 Timoteyus 1:11). A wani taki yu de koloku tu. Fu taki en leti, en eigi Wortu e taki: „Prisiri na ini joe jongoe jari; en meki joe hati gi joe prisiri na dem dei foe joe jongoe tem”  (Preikiman 11:9, Da Bijbel na ini Sranantongo). Ma Yehovah man si na fesi san o pasa èn a man si sortu bakapisi wan sma e kisi efu a tyari ensrefi na wan bun fasi noso na wan takru fasi. Dati meki a e gi yu a rai: „Memre now yu Gran Mekiman na ini den dei fu yu yongu yari, bifo den muilek dei sa kon, noso den yari doro pe yu sa taki: ’Mi no e prisiri nanga den.’”​—Preikiman 12:1.

17, 18. Fa wan yongu Kresten sori taki a e prisiri fu dini Yehovah, èn fa yu kan abi a srefi prisiri disi?

¹⁷ Na ini a ten disi, furu yonguwan kisi bigi prisiri fu di den e dini Yehovah. Fu eksempre, Lina di abi 15 yari, e taki: „Mi no abi fu syen gi misrefi. Mi abi wan gosontu skin fu di noiti mi no smoko èn noiti mi no gebroiki drugs. Na ini a gemeente, mi e kisi tumusi prenspari rai di e yepi mi fu feti nanga den hebi tesi fu Satan. Mi fesi e brenki fu prisiri fu di mi abi demakandra nanga trawan di e gi mi deki-ati na a Kownukondre zaal. Ma a moro prisiri sani, na taki mi abi a moro bun howpu fu libi fu têgo na grontapu.”

¹⁸ Neleki Lina, furu Kresten yonguwan e feti wan tranga feti gi a bribi fu den, èn disi e gi den prisiri. Den e frustan taki aladi den e kisi furu problema na ini den libi ten na ten, toku den libi abi wan trutru marki èn den abi wan trutru howpu gi a ten di e kon. Fu dati ede, tan dini a Gado di wani taki yu abi wan bun libi. Meki en ati prisiri, èn a sa meki yu prisiri nownow èn fu têgo!​—Psalm 5:11.

[Futuwortu]

Yu e memre disi ete?

• Sortu tesi yu kan kisi fu „na ogriwan”, Satan?

• Fa yu kan prisiri na ati fu Yehovah?

• Fa Bijbel e sori taki Yehovah e broko en ede nanga yu?

• Sortu blesi yu kan kisi te yu e dini Yehovah?

[Aksi fu a tori disi]

[Faki/Prenki na tapu bladzijde 13]

Pikinmoro wan regtfardiki man naki futu fadon

Asaf ben de wan prenspari Leifisma di ben e prei poku na ini a tempel fu Yehovah na ini Israel fu owruten. A meki wan tu singi srefi di den Israelsma ben e gebroiki na ini na anbegi fu den. Ma aladi a ben abi den tumusi moi grani disi, toku na ogri fasi fa den speri fu en ben tyari densrefi, ben hari en fu wan pisi ten. Den speri fu en ben e pasa den wet fu Gado èn a ben gersi leki den no ben kisi takru bakapisi fu dati. Baka wan pisi ten, Asaf srefi taki: „Pikinmoro den futu fu mi ben lasi pasi. Pikinmoro den futu fu mi ben grati. Mi ben kon dyarusu tapu den sma di e meki bigi, di mi kon si a vrede fu den ogri sma.”​—Psalm 73:2, 3.

Bakaten, Asaf go na a santa presi fu Gado èn a begi Gado fu yepi en. A kon si a tori disi na wan yoisti fasi. A kon frustan taki Yehovah no wani si takrudu na ai èn taki te fu kaba, den regtfardikiwan, sosrefi den ogriwan sa koti san den sai (Psalm 73:17-20; Galasiasma 6:7, 8). Fu tru, den ogriwan de na tapu grati gron. Te fu kaba, den sa grati fadon te Yehovah sa pori na ogri sistema disi.​—Openbaring 21:8.

[Prenki na tapu bladzijde 15]

Yehovah wani taki yu abi wan bun libi, ma a marki fu Satan na fu nyan sma

[Prenki na tapu bladzijde 16]

Furu yonguwan abi bigi prisiri fu dini Yehovah makandra nanga den Kresten brada nanga sisa fu den