Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Sortu wini wi kan kisi te wi e leri sani di abi fu du nanga a famiri fu Safan?

Safan ben de wan sekretarsi èn a ben e skrifi sani abra gi Kownu Yosia fu Yuda. Safan ben de wan fu den moro prenspari man na ini a kownukondre. A ben horibaka gi a kownu, di ben meki muiti fu seti a tru anbegi kon bun baka. Tu fu den manpikin fu Safan ben horibaka gi a profeiti Yeremia. Èn wan tra manpikin nanga tu fu den granpikin fu en ben gebroiki a prenspari posisi fu den fu horibaka gi a tru anbegi. Wi sosrefi kan gebroiki den sani noso a wroko di wi abi, fu horibaka gi a tru anbegi.​—15/12, bladzijde 19-22.

• Fa Irene Hochstenbach ben man dini Yehovah aladi a dofu?

Di a ben abi seibi yari, dan a no ben man yere moro. Aladi a dofu, toku a leri fa fu taki nanga trawan. Now a e go makandra nanga en masra fu a wan presi go na a trawan, fu di en masra (wan kringopziener) e fisiti den gemeente na ini Bakrakondre.​—1/1, bladzijde 23-26.

• Sortu tu nyun yepisani fu studeri Bijbel ben tyari kon na doro na den „Fayafaya Kownukondre preikiman” Distrikt Kongres?

Kresten na heri grontapu prisiri fu kisi a buku Aanbid de enige ware God (Anbegi a wan-enkri tru Gado). A buku disi na wan yepisani di wi kan gebroiki spesrutu fu studeri nanga den nyunwan di ben kaba studeri a buku Sabi di e tjari joe go na têgo libi. A tra nyun buku di wi ben kisi na Nader dicht tot Jehovah (Kon krosibei na Yehovah). A buku disi e poti prakseri na den fasi fu Yehovah èn na sortu fasi a e handri. A e sori wi sosrefi fa wi kan waka baka en fu di wi e sori den srefi sortu fasi fu en.​—15/1, bladzijde 23, 24.

• San wi e frustan fu Odo 12:5 di e taki: „Den sani di den regtfardikiwan e prakseri na reti”?

Srefi den sani di bun sma e prakseri na bun sani, èn den sani disi abi fu du langalanga nanga san de reti èn regtfardiki. Den regtfardikiwan lobi Gado èn den lobi tra sma; fu dati ede ala san den wani du na bun sani.​—15/1, bladzijde 30.

• San kan yepi wan sma fu si wroko na a yoisti fasi?

A de wan bun sani fu leri pikin fu si wroko leki wan warti sani. Bijbel e gi wi a deki-ati fu wroko bun èn fu no de lesiman (Odo 20:4). A e gi Kresten a deki-ati tu fu no broko den ede tumusi nanga wroko. Wi sabi taki a diniwroko di wi e du gi Gado musu teki a moro prenspari presi na ini wi libi (1 Korentesma 7:29-31). Boiti dati, tru Kresten abi a dyaranti taki Gado no sa drai en baka gi den.​—1/2, bladzijde 4-6.

• O ten Bijbel e taki fu a fosi leisi fu wan altari?

A fosi altari di Bijbel e taki fu en de na ini Genesis 8:20, di e taki fu na altari di Noa ben bow di a komoto na ini na ark baka a Frudu. Ma kande Kain nanga Abel ben tyari ofrandi sosrefi na tapu altari (Genesis 4:3, 4).​—15/2, bladzijde 28.

• Fa son Kresten kan teki bun bosroiti te sani e kenki na ini den libi?

Son sma ben teki na okasi di sani kenki na den wrokope noso densrefi ben kenki sani na a wroko fu den so taki den ben kan abi moro ten gi a diniwroko. Trawan ben gi moro ten èn ben teki moro frantwortu na ini a diniwroko fu Gado, di den kon abi moro mendri frantwortu na ini den osofamiri fu di den pikin fu den kon bigi èn den trow kande.​—1/3, bladzijde 19-22.

• Fa na eksempre fu Yona nanga na apostel Petrus e yepi wi fu si trawan soleki fa Yehovah e si den?

Soleki fa wi sabi heri bun, dan Yona èn sosrefi Petrus no ben si sani na wan bun fasi èn den no ben handri bun di den ben kisi tesi tapu a bribi fu den èn tapu a fasi fa den musu gi yesi. Toku a de krin fu si taki Yehovah ben si den bun fasi fu den èn fu dati ede a ben tan gebroiki den na ini en diniwroko. Te trawan e hati den firi fu wi, noso te den e meki wi firi sari, dan wi kan poti prakseri na den bun fasi fu den di wi ben lobi na ini a ten di pasa èn wi kan poti prakseri na den bun sani di Gado e si ini den.​—15/3, bladzijde 16-19.

• Fu san ede den nomru fu den kapitel nanga den vers fu a buku Psalm no de a srefi na ini den difrenti bijbelvertaling?

Wan difrenti de na mindri den nomru fu den kapitel nanga den vers fu a buku fu Psalm di skrifi na ini a Hebrew tongo fu fositen, nanga den nomru fu den kapitel nanga den vers na ini a Griki Septuaginta vertaling. Den vertaling na ini a ten disi e difrenti fu di sonwan fu den vertaling komoto fu a Hebrew tekst èn trawan komoto fu a Septuaginta.​—1/4, bladzijde 31.