Pe wi kan feni trutru trowstu?
Pe wi kan feni trutru trowstu?
„A Gado èn Tata fu wi Masra Yesus Krestes . . . e trowstu wi na ini ala wi banawtu.”—2 KORENTESMA 1:3, 4.
1. Sortu situwâsi kan meki sma firi taki den abi trowstu fanowdu trutru?
TE WAN sma abi wan takru siki di meki a kon malengri, dan a sma disi kan firi taki en heri libi pori. Gronseki, bigi winti, nanga angriten e meki sma kon pôti. Orloku kan abi leki bakapisi taki difrenti sma na ini wan famiri lasi den libi, a kan pori den oso fu sma, noso a kan meki sma lowe gowe libi den oso nanga ala den gudu di den abi, fu go suku kibri na tra presi. Kruktudu kan meki sma firi taki nowan presi no de pe den kan go fu kisi yepi. Den wan di kisi fu du nanga den sortu problema disi abi trowstu fanowdu trutru. Pe den kan feni a trowstu disi?
2. Fu san ede a trowstu di Yehovah e gi, de moro bun leki iniwan tra sortu trowstu?
2 Son sma nanga organisâsi e meki muiti fu trowstu trawan. Sma e warderi en trutru te trawan e taki sani fu trowstu den. Te sma e kisi krosi, nyanyan, nanga tra sani di den abi fanowdu, dan dati e yepi fu wan syatu pisi ten nomo. Ma Yehovah, a tru Gado wawan, kan meki ala sani kon bun baka, èn na en wawan kan gi a yepi di de fanowdu so taki den sortu rampu leki disi no e pasa moro. Disi na san Bijbel e taki fu en: „Blesi fu a Gado èn Tata fu wi Masra Yesus Krestes, a Tata di abi furu sari-ati èn a Gado fu ala trowstu, di e trowstu wi na ini ala wi banawtu, so taki wi kan trowstu den wan di e kisi fu du nanga iniwan sortu banawtu, nanga a trowstu di wisrefi e kisi fu Gado” (2 Korentesma 1:3, 4). Fa Yehovah e trowstu wi?
Yehovah sa puru a rutu fu ala problema
3. San a trowstu di Gado gi, abi fu du nanga a puru di a sa puru a rutu fu ala problema fu libisma?
3 Di Adam sondu, dan a heri libisma famiri kon de sondari fu a sondu fu en ede. Dati meki libisma e kisi bun furu problema di e tyari dede kon te fu kaba (Romesma 5:12). A situwâsi disi kon moro ogri fu di Satan Didibri na „a tiriman fu a grontapu disi” (Yohanes 12:31; 1 Yohanes 5:19). Ma Yehovah du moro leki fu sori wawan taki a e frustan a takru situwâsi fu libisma. A seni en wan-enkri gebore Manpikin leki lusu-paiman fu frulusu libisma, èn A taigi wi taki wi kan kon fri fu den bakapisi fu a sondu fu Adam te wi e bribi na ini En Manpikin (Yohanes 3:16; 1 Yohanes 4:10). Gado ben taki na fesi tu taki Yesus Krestes, di kisi ala makti na ini hemel nanga grontapu, sa pori Satan nanga a heri ogri sistema fu en.—Mateyus 28:18; 1 Yohanes 3:8; Openbaring 6:2; 20:10.
4. (a) San Yehovah du fu meki wi kisi wan tranga bribi na ini den pramisi fu en di abi fu du nanga a frulusu di a sa gi wi? (b) Fa Yehovah e yepi wi fu frustan o ten a frulusu disi sa kon?
4 Gado meki sma skrifi furu sani di A ben taki na fesi, èn bakaten den sani disi pasa trutru. A du disi so taki wi kan kisi wan tranga bribi na ini den pramisi fu en (Yosua 23:14). Na ini Bijbel, a meki sma skrifi sosrefi san a du fu frulusu den futuboi fu en na ini situwâsi pe nowan libisma no ben sa man frulusu den (Exodus 14:4-31; 2 Kownu 18:13–19:37). Èn nanga yepi fu Yesus Krestes, Yehovah sori tu taki a abi na prakseri fu dresi sma fu „ibri sortu mankeri”, èn a sa gi den dedesma wan opobaka srefi (Mateyus 9:35; 11:3-6). O ten den sani disi sa pasa? Leki piki, Bijbel e fruteri fu den lasti dei fu na owru sistema disi, di sa kon fosi a nyun hemel nanga a nyun grontapu fu Gado. Den sani di Yesus ben fruteri fu den lasti dei disi, e fiti a ten fu wi.—Mateyus 24:3-14; 2 Timoteyus 3:1-5.
Trowstu gi wan pipel di de na ini nowtu
5. Di Yehovah ben e trowstu Israel fu owruten, dan na san a ben poti den prakseri?
5 Te wi e luku fa Yehovah ben e handri nanga Israel fu owruten, dan wi e si fa a ben e trowstu den te den ben de na ini nowtu. A ben e memre den sortu Gado a de. Disi ben meki taki den ben kisi wan moro tranga bribi na ini den pramisi fu en. Yehovah ben meki den profeiti fu en sori den Israelsma taki wan bigi difrenti de na mindri Yehovah leki a tru èn libi Gado, èn den falsi gado di no man yepi densrefi èn di no man yepi den sma tu di ben e anbegi den (Yesaya 41:10; 46:1; Yeremia 10:2-15). Di Yehovah taigi Yesaya, „Trowstu, trowstu a pipel fu mi”, dan A meki Yesaya gebroiki agersitori, sosrefi den sani di A meki, fu poti krakti tapu a makti fu Yehovah leki a wan-enkri tru Gado.—Yesaya 40:1-31.
6. Fa Yehovah ben sori son tron o ten a ben sa frulusu a pipel fu en?
6 Ten na ten, Yehovah ben trowstu en pipel fu di a ben meki den kon sabi taki a ben o frulusu den na wan spesrutu ten, a ben kan de baka wan syatu pisi ten noso baka wan langa pisi ten. Di a ben o frulusu den Israelsma di ben e kisi kwinsi na ini Egepte, dan a taigi den: „Mi sa tyari ete wán plaag kon tapu Farao nanga Egepte. Baka dati a o seni unu gowe fu dyaso” (Exodus 11:1). Na ini den dei fu Kownu Yosafat, dri nâsi moksi kon na wan fu go feti nanga Yuda. Di den broko kon na ini Yuda, dan Yehovah taigi en pipel taki a ben o du wan sani „tamara” fu frulusu den (2 Kroniki 20:1-4, 14-17). Ma na a tra sei, di den ben o kisi frulusu fu Babilon, dan Yesaya ben skrifi disi pikinmoro 200 yari na fesi, èn pikinmoro wán hondro yari na fesi a profeiti Yeremia ben taki moro fini fu a tori disi. Den profeititori disi, di ben sori den futuboi fu Gado taki a frulusu fu den kon krosibei, ben gi den deki-ati fu tru!—Yesaya 44:26–45:3; Yeremia 25:11-14.
7. Fu san furu fu den pramisi fu frulusu ben e fruteri, èn fa disi ben abi krakti tapu getrow sma na ini Israel?
7 A de wan moi sani fu si taki den pramisi di ben e trowstu a pipel fu Gado, furu tron ben e fruteri sani fu a Mesias (Yesaya 53:1-12). Geslakti baka geslakti, a pramisi disi ben gi getrow sma howpu te den ben kisi fu du nanga tesi. Na ini Lukas 2:25, wi e leisi: „We, wan man di ben nen Simeon, ben de na Yerusalem, èn a man disi ben de regtfardiki èn a ben lespeki Gado; a ben e fruwakti trowstu gi Israel [dati wani taki a kon di a Mesias musu kon], èn santa yeye ben de na en tapu.” Simeon ben abi a howpu taki a Mesias ben o kon fu di den Buku fu Bijbel ben taki na fesi fu dati, èn fu di a ben fruwakti taki den profeititori disi ben o kon tru, meki a ben libi akruderi a howpu dati. A no ben frustan fa ala sani ben o kon tru, èn a no ben libi so langa fu si fa a frulusu ben o kon, ma a ben prisiri di a kon si a Sma di Gado ben o gebroiki fu „tyari frulusu kon”.—Lukas 2:30.
Trowstu nanga yepi fu Krestes
8. San na a difrenti na mindri a yepi di Yesus ben gi sma, èn a yepi di den sma ben denki taki den abi fanowdu?
8 Di Yesus Krestes ben e du en diniwroko na grontapu, dan a no ala ten a ben gi den sma a yepi di den ben denki taki den abi fanowdu. Sonwan fu den ben wani wan Mesias di ben o fri den fu a tirimakti fu Rome. Ma Yesus no ben gi den deki-ati fu opo densrefi teige Rome; a taigi den fu „pai Caesar den sani di de fu Caesar” (Mateyus 22:21). Gado ben abi moro na prakseri leki fu fri sma fu wan politiek tirimakti nomo. Den sma ben wani meki Yesus tron kownu, ma a taki dati a ben o „gi en libi leki wan lusu-paiman gi furu sma” (Mateyus 20:28; Yohanes 6:15). A no ben de a ten gi en ete fu tron kownu, èn na Yehovah ben o gi en tirimakti, a no wan grupu fu sma di no ben de tevrede nanga den tiriman fu den.
9. (a) San ben de a boskopu fu trowstu di Yesus ben meki bekènti? (b) Fa Yesus ben sori o prenspari a boskopu disi ben de gi sma te den ben kisi problema? (c) Sortu sani Yesus ben du, di ben o trowstu sma na ini a ten di e kon?
9 A trowstu di Yesus ben gi, ben de „a bun nyunsu fu a kownukondre fu Gado”. Disi ben de a boskopu di Yesus meki bekènti na ala sei pe a ben e go (Lukas 4:43). A ben sori o prenspari a boskopu disi de gi den aladei problema fu sma, fu di a ben sori san en leki Mesias Tiriman ben sa du gi a libisma famiri. Yesus ben gi sma di ben e pina, wan marki na ini a libi fu di a ben e dresi breni sma, dofu sma (Mateyus 12:22; Markus 10:51, 52), nanga malengri sma (Markus 2:3-12). A ben dresi Israelsma sosrefi di ben abi siki di e meki trawan e fisti gi den (Lukas 5:12, 13), èn a ben dresi sma tu di ben abi tra sortu takru siki (Markus 5:25-29). Papa nanga mama di ben e sari fu a dede fu den pikin fu den, kon breiti srefisrefi di Yesus gi den pikin fu den wan opobaka (Lukas 7:11-15; 8:49-56). Yesus sori tu taki a man basi bigi takru winti èn a man tapu na angri fu bigi grupu fu sma a nyanyan di den abi fanowdu (Markus 4:37-41; 8:2-9). Boiti dati, Yesus leri den gronprakseri di e sori den fa den musu tyari den libi. Disi ben o yepi den fu lusu den problema di den ben abi èn disi ben o gi den a howpu sosrefi fu libi na ondro a regtfardiki tiri fu a Mesias. Sobun, di Yesus ben du en diniwroko, dan a no ben e trowstu den sma wawan di ben e arki nanga bribi, ma den sani di a ben du ben o de wan trowstu gi sma na ini den dusundusun yari di ben de fu kon ete.
10. Sortu sani wi kan kisi, fu di Yesus gi en libi leki wan srakti-ofrandi gi wi?
10 Moro leki 60 yari baka di Yesus gi en libi leki wan srakti-ofrandi èn kisi wan opobaka fu libi na ini hemel, dan na apostel Yohanes skrifi nanga yepi fu santa yeye: ’Mi pikin, mi e skrifi unu den sani disi, so taki unu no du wan sondu. Ma toku, efu wan sma du wan sondu, dan wi abi wan yepiman na a Tata, dati na Yesus Krestes, wan regtfardiki sma. En na wan ofrandi di e meki wi kon bun baka nanga Gado, ma na ofrandi fu en no e tapu den sondu fu wi wawan, ma sosrefi den sondu fu heri grontapu’ (1 Yohanes 2:1, 2). Wi e kisi furu trowstu fu di wi e kisi wini fu a srakti-ofrandi fu Yesus, namku en volmaakti libisma libi. Wi sabi taki wi kan kisi pardon fu wi sondu, wi kan abi wan krin konsensi, wi kan abi wan bun matifasi nanga Gado, èn wi kan abi a howpu fu têgo libi.—Yohanes 14:6; Romesma 6:23; Hebrewsma 9:24-28; 1 Petrus 3:21.
A santa yeye leki trowstuman
11. Soleki fa Yesus ben pramisi fosi a dede, dan sortu tra sani a ben seti di ben o trowstu den bakaman fu en?
11 Di Yesus ben de nanga en apostel na a lasti neti fosi na ofrandi dede fu en, dan a fruteri den fu wan tra sani di en hemel Tata ben seti fu trowstu den. Yesus taki: „Mi o aksi a Tata èn a o gi unu wan tra yepiman [trowstuman; na ini Grikitongo a de pa·raʹkle·tos] fu de nanga unu ala ten, a yeye fu a waarheid.” Yesus gi den a dyaranti disi: „A yepiman, a santa yeye, . . . sa leri unu ala sani èn a sa meki unu memre ala den sani di mi fruteri unu” (Yohanes 14:16, 17, 26). Fa a santa yeye ben trowstu den?
12. Fa furu sma kisi trowstu fu a yepi di a santa yeye ben e yepi den disipel fu Yesus fu memre sani?
12 Den apostel ben kisi furu leri fu Yesus. A tru taki noiti den no ben o frigiti den sani di den ondrofeni di den ben de nanga Yesus. Ma fa a de nanga den sani di Yesus taigi den? Den ben o memre ala den sani dati? A de so taki den ben o frigiti den tumusi prenspari sani di Yesus ben taigi den, fu di den no man memre sani na wan volmaakti fasi? Yesus ben gi den a dyaranti taki a santa yeye ben o ’meki den memre ala den sani di a ben taigi den’. Dati meki sowan aiti yari baka di Yesus dede, Mateyus ben man skrifi a fosi Evangelie. Na ini na Evangelie disi Mateyus ben skrifi fu a tumusi moi Bergitaki fu Yesus, a ben skrifi fu den furu agersitori fu Yesus di ben abi fu du nanga a Kownukondre, èn a ben skrifi finifini tu fu a marki fu a denoya fu Yesus. Moro leki 50 yari baka dati, na apostel Yohanes ben man skrifi sani di wi kan frutrow, di e sori finifini san pasa na ini den lasti dei fu Yesus en libi na grontapu. Fu tru, den tori disi di skrifi nanga yepi fu santa yeye, e gi wi deki-ati te now ete!
13. Fa a santa yeye ben de leki wan leriman gi den fosi Kresten?
13 Boiti taki a santa yeye yepi den disipel fu memre den sani di Yesus taigi den, a ben gi den leri sosrefi èn a ben yepi den fu frustan moro bun san Gado abi na prakseri. Di Yesus ben de nanga den disipel fu en ete, dan a ben taigi den sani di den no ben e frustan so bun na a ten dati. Ma bakaten, nanga yepi fu a santa yeye, Yohanes, Petrus, Yakobus, Yudas nanga Paulus ben skrifi fu sani di ben tyari a prakseri fu Gado kon na krin. Sobun, fu di a santa yeye ben de leki wan leriman gi den disipel, meki den ben kisi a dyaranti taki na Gado ben e tiri den.
14. Na sortu fasi a santa yeye ben yepi a pipel fu Yehovah?
14 A tumusi moi presenti fu a santa yeye ben tyari kon na krin sosrefi taki now Gado ben feni a Kresten gemeente bun, na presi fu a trutru Israel (Hebrewsma 2:4). Wan prenspari marki fu sabi suma na den trutru disipel fu Yesus, na taki den froktu fu a santa yeye ben o de krin fu si na ini a libi fu den disipel disi (Yohanes 13:35; Galasiasma 5:22-24). A santa yeye ben gi den memre fu a gemeente dati deki-ati sosrefi fu gi kotoigi sondro fu frede.—Tori fu den Apostel 4:31.
Yepi te den e kisi hebi tesi
15. (a) Sortu tesi Kresten kisi fositen èn na ini a ten disi? (b) Fu san ede den sma di e gi deki-ati, kan abi deki-ati fanowdu son tron?
15 Ibriwan sma di e dini Yehovah fayafaya èn na wan getrow fasi, e kisi tesi na wán noso tra fasi (2 Timoteyus 3:12). Ma furu Kresten kisi tesi di hebi srefisrefi. Na ini a ten disi, sonwan fu den kisi frufolgu fu grupu ogri-ati sma, sma ben poti den na ini strafuman kampu, strafu-oso, sosrefi tra sortu strafuman kampu pe den ben abi fu wroko bun tranga aladi den ben de na ini tumusi takru situwâsi. Tirimakti frufolgu Kresten, noso den gi pasi meki sma du ogri nanga den, sondro taki den strafu den sma disi fu san den du. Boiti dati, Kresten kisi bigi problema nanga a gosontu fu den, noso den kisi seryusu problema na ini na osofamiri. Wan lepi Kresten kan kisi tesi tu te a e yepi furu Kresten brada nanga sisa te den de na ini problema. Te disi de so, dan a sma di e gi deki-ati, kan abi deki-ati fanowdu sosrefi.
16. Fa David kisi yepi di a ben kisi hebi tesi?
16 Di Kownu Saul ben e suku fu kiri David, dan David suku Gado leki a Yepiman fu en. „O Gado, yere a begi fu mi”, na so a begi. „Na ini a skaduw fu den frei fu yu, mi e suku kibri” (Psalm 54:2, 4; 57:1). David kisi yepi? Iya, a kisi yepi. Na a ten dati, Yehovah meki a profeiti Gad nanga a priester Abiatar sori David san a ben musu du, èn A gebroiki Yonatan, a manpikin fu Saul, fu gi David deki-ati (1 Samuel 22:1, 5; 23:9-13, 16-18). Yehovah ben gi pasi sosrefi meki den Filistiasma go feti nanga Israel, èn na so fasi Saul ben puru en prakseri fu a suku di a ben e suku fu kiri David.—1 Samuel 23:27, 28.
17. Pe Yesus suku yepi di a ben kisi hebi tesi?
17 Syatu bifo a libi fu en na grontapu ben kon na wan kaba, dan Yesus Krestes srefi ben kisi hebi tesi tu. A ben sabi heri bun taki a fasi fa a ben o tyari ensrefi, ben kan abi krakti tapu a nen fu en hemel Tata èn sosrefi tapu a tamara fu a heri libisma famiri. A ben begi fayafaya, „a ben kon firi hebi banawtu” srefi. Gado sorgu taki Yesus kisi a yepi di a ben abi fanowdu na ini a muilek ten dati.—Lukas 22:41-44.
18. Fa Gado ben trowstu den fosi Kresten di ben e kisi hebi frufolgu?
18 Kresten ben kisi kefalek hebi frufolgu baka di a gemeente ben seti na ini a fosi yarihondro. A frufolgu disi ben de so hebi taki ala Kresten, boiti den apostel, ben lowe gowe libi Yerusalem. Nanga tranga, sma ben e srepi man nanga uma puru na ini den oso fu den. Sortu trowstu Gado gi den? Na ini en Wortu, Gado gi den a dyaranti taki den ben abi „wan moro bun gudu di e tan fu ala ten”; wan gudu di no sa lasi noiti na ini hemel makandra nanga Krestes (Hebrewsma 10:34; Efeisesma 1:18-20). Aladi den ben tan preiki go doro, den ben e si taki a yeye fu Gado ben de nanga den, èn den sani di den ben ondrofeni ben e prisiri den trutru.—Mateyus 5:11, 12; Tori fu den Apostel 8:1-40.
19. Fa Paulus ben si a trowstu di Gado gi en, aladi a ben e kisi hebi frufolgu?
19 Te fu kaba, Saulus (Paulus) srefi ben kisi frufolgu di a tron wan Kresten, aladi fosi ensrefi ben e frufolgu den Kresten na wan ogri-ati fasi. Na tapu na èilanti Siprus, wan obiaman ben de di ben e gens a diniwroko fu Paulus fu di a ben gebroiki bedrigifasi nanga kruktufasi fu tapu a wroko fu Paulus. Na ini Galasia, sma ben trowe ston na tapu Paulus teleki den ben denki taki a dede (Tori fu den Apostel 13:8-10; 14:19). Na ini Masedonia, sma ben fon en nanga tiki (Tori fu den Apostel 16:22, 23). Baka di wan grupu fu sma ben du ogri-ati sani nanga en na ini Efeise, dan Paulus skrifi: „Wi ben de na ondro bun furu kwinsi di pasa a krakti fu wi, so taki wi no ben de seiker srefisrefi efu wi ben o tan na libi. Fu taki en leti, na ini wisrefi, wi ben abi a firi taki wi ben kisi dedestrafu” (2 Korentesma 1:8, 9). Ma na ini a srefi brifi dati, Paulus ben skrifi den wortu fu trowstu di de fu feni na ini paragraaf 2 fu na artikel disi.—2 Korentesma 1:3, 4.
20. San wi sa luku na ini na artikel di e kon?
20 Fa yu kan gi trowstu na so wan fasi tu? Furu sma na ini a ten disi abi trowstu fanowdu te den e sari, kande fu di wantronso wan rampu miti bun furu sma noso fu di den abi problema di e kwinsi den. Na ini na artikel di e kon, wi sa luku fa wi kan trowstu den sma di abi fu du nanga den sortu problema disi.
Yu e memre disi ete?
• Fu san ede a trowstu di Gado e gi de moro warti leki iniwan tra sortu trowstu?
• Sortu trowstu wi e kisi nanga yepi fu Krestes?
• Fa a santa yeye de wan trowstuman?
• Gi eksempre fu a trowstu di Gado gi te den futuboi fu en kisi hebi tesi.
[Aksi fu a tori disi]
[Prenki na tapu bladzijde 15]
Bijbel e sori wi taki Yehovah ben e trowstu en pipel fu di a ben e frulusu den
[Prenki na tapu bladzijde 16]
Yesus ben e trowstu sma fu di a ben e gi den leri, a ben e dresi den, èn a ben e gi den dedesma wan opobaka
[Prenki na tapu bladzijde 18]
Yesus ben kisi yepi fu tapusei