„Tan hori wan bun konsensi”

FURU sma e firi taki den musu arki den konsensi te den e teki wan bosroiti. Ma efu wi wani frutrow tapu wi konsensi dan wi musu leri a konsensi san bun èn san fowtu. Baka dati wi musu du san wi konsensi e taigi wi fu du.

Luku na ondrofenitori fu a man di nen Sakeyus, soleki fa a skrifi na ini Bijbel. Sakeyus di ben e libi na ini Yerikow, ben de wan edeman fu den belastingman èn a ben de wan guduman. Soleki fa ensrefi ben fruteri dan a ben kon gudu fu di a ben e bedrigi sma. A no de fu taki dati a sani disi ben meki taki furu sma ben e pina. Sakeyus ben kisi konsensi fonfon fu den sani di a ben du? Efu a ben e kisi konsensi fonfon srefi, dan kande a no ben e arki en konsensi.​—Lukas 19:1-7.

Ma wan sani ben pasa di ben meki Sakeyus prakseri fu a fasi fa a ben e libi. Yesus ben kon na Yerikow. Sakeyus ben wani si Yesus, ma a no ben man si en na mindri a bigi ipi fu sma di ben de drape fu di a ben syatu. Sobun Sakeyus lon go na fesi èn a kren go ini wan bon so taki a ben man si moro bun. Yesus ben fruwondru fu si taki Sakeyus ben wani sabi moro trutru, fu dati ede a ben taigi Sakeyus taki a ben o fisiti en na en oso. Nanga prisiri Sakeyus ben sori switifasi gi a prenspari fisitiman fu en.

Den sani di Sakeyus si èn yere di a ben de nanga Yesus, ben naki en ati so taki a kenki a fasi fa a ben e libi. A ben taki: „Masra, mi o gi den pôtisma afu fu den sani di mi abi, èn efu mi fufuru wan sma fu di mi ben bedrigi en, dan mi o pai en fo tron moro furu.”​—Lukas 19:8.

Sakeyus en konsensi ben kisi leri. A ben arki èn a ben du san en konsensi ben taigi en. Disi ben abi tumusi bun bakapisi. Prakseri fa Sakeyus ben firi di Yesus ben taigi en: „Tide na osofamiri disi kisi frulusu!”​—Lukas 19:9.

Disi na wan eksempre di e gi deki-ati trutru! A e sori taki awinsi sortu fasi wi ben libi na ini a ten di pasa, toku wi man kenki. Neleki Sakeyus, wi kan arki den wortu fu Yesus di skrifi na ini Bijbel, èn na so wan fasi wi sa man sabi san bun èn san fowtu. Dan soleki fa na apostel Petrus taki, wi sa man „tan hori wan bun konsensi”. Wi sa man arki a konsensi fu wi di kisi leri èn wi sa man du san bun.​—1 Petrus 3:16.