Trowstu den wan di e sari

„Yehovah salfu mi . . . fu trowstu ala den wan di e sari.”​—YESAYA 61:1, 2.

1, 2. Suma wi musu trowstu, èn fu san ede?

YEHOVAH, a Gado fu ala trutru trowstu, e leri wi taki wi musu broko wi ede nanga tra sma te den kisi fu du nanga rampu. A e leri wi fu „taki na wan fasi di e trowstu den sma di lasi-ati” èn fu trowstu ala sma di e sari (1 Tesalonikasma 5:14). Te a de fanowdu, dan wi e yepi tra anbegiman na a fasi disi. Wi e sori lobi sosrefi gi den wan dorosei fu a gemeente, srefi te den sma disi no sori lobi gi wi na ini a ten di pasa.​—Mateyus 5:43-48; Galasiasma 6:10.

² Yesus Krestes ben leisi wan profeititori èn baka dati a sori taki a profeititori disi na wan sani di ensrefi ben o du. A profeititori taki so: „A yeye fu a Soeverein Masra Yehovah de na mi tapu, fu di Yehovah salfu mi fu fruteri den safri-ati sma bun nyunsu. A seni mi fu yepi den wan di brokosaka . . . fu trowstu ala den wan di e sari (Yesaya 61:1, 2; Lukas 4:16-19). Langa ten kaba, den disiten salfu Kresten frustan taki densrefi abi fu du a wroko disi tu, èn den „tra skapu” e prisiri fu yepi den nanga a wroko disi.​—Yohanes 10:16.

3. Fa wi kan yepi den sma di e aksi, „fu san ede Gado e gi pasi taki rampu e pasa?”

³ Te rampu e miti sma èn den e firi brokosaka, dan furu tron den e aksi: „Fu san ede Gado e gi pasi taki rampu e pasa?” Bijbel e gi wan krin piki  tapu na aksi dati. Ma gi wan sma di no e studeri Bijbel, a kan teki ten fosi a frustan a tori disi bun. Yepi de fu feni na ini den publikâsi fu Yehovah Kotoigi. * Ma gi son sma a kan de wan trowstu kaba fu leisi wan tekst na ini Bijbel, soleki a di fu Yesaya 61:1, 2, fu di a tekst disi e sori taki Gado wani dati libisma musu kisi trowstu.

4. Fa wan Kotoigi fu Polen ben man yepi wan skoropikin di ben e firi brokosaka? Fa na ondrofenitori disi kan yepi yu so taki yusrefi kan yepi trawan?

⁴ Yongu sma, sosrefi owru sma, abi trowstu fanowdu. Wan tini fu Polen ben firi brokosaka èn a ben aksi rai na wan mati fu en. A mati disi na wan Kotoigi fu Yehovah. Di a poti aksi gi a tini na wan switi fasi, dan a kon sabi taki a tini disi ben abi furu aksi èn a ben e tweifri na furu sani soleki: „Fu san ede so furu ogri de? Fu san ede libisma e pina? Fu san ede a malengri sisa fu mi e pina? Fu san ede mi e siki na mi ati? Kerki e taigi sma dati Gado wani taki sma e pina. Ma efu dati de so, dan mi no o bribi na ini Gado moro!” A Kotoigi begi Yehovah na ini en ati èn a taki: „Mi breiti taki yu aksi mi den sani disi. Mi sa pruberi fu yepi yu.” A kotoigi fruteri a tini taki di a ben de wan pikin ete, ensrefi ben e tweifri na furu sani, ma Yehovah Kotoigi ben yepi en. A fruteri: „Mi leri taki a no Gado e meki sma pina. A lobi sma, a wani taki sani go bun nanga den, èn heri esi, a sa tyari bigi kenki kon na grontapu. Siki, problema di e kon te wan sma e kon owru, nanga dede no sa de moro, èn den sma di e gi yesi na en sa libi fu têgo, leti dyaso na grontapu.” A Kotoigi sori a tini den tekst fu Openbaring 21:3, 4; Yob 33:25; Yesaya 35:5-7 nanga Yesaya 65:21-25. Baka wan langa takimakandra, a ben de krin fu si taki a tini disi kisi frulekti èn a taki: „Now mi sabi fu san ede mi e libi. Mi kan kon luku yu wan tra leisi baka?” Den bigin studeri Bijbel tu leisi wan wiki.

Trowstu trawan nanga a trowstu di Gado e gi

5. Fa wi kan trowstu wan sma trutru te wi wani sori en taki wi e frustan san a e firi?

⁵ Wan bun sani di wi kan du te wi wani trowstu trawan, na fu taki sani di e sori taki wi e frustan san den e firi. Nanga den sani di wi e taki èn nanga a fasi fa wi e taki, wi kan meki muiti fu sori a sma di e sari taki wi e broko wi ede trutru nanga a situwâsi fu en. Wi no kan du disi te wi e taki soso sani. Bijbel e taigi wi taki „nanga a hori di wi e horidoro èn nanga a trowstu fu den Buku fu Bijbel, wi ben sa abi howpu” (Romesma 15:4). Nanga disi na prakseri, wi kan fruteri a sma na wan tra ten, san na a Kownukondre fu Gado, èn wi kan sori nanga yepi fu Bijbel fa a Kownukondre disi sa lusu den problema fu disiten. Baka dati, wi kan taki-go-taki-kon nanga a sma fu san ede wi kan frutrow tapu a howpu disi. Na so fasi wi sa trowstu en.

6. Sortu sani wi musu meki sma frustan, so taki den kan kisi wini fu a trowstu di de fu feni na ini den Buku fu Bijbel?

⁶ Efu wan sma wani kisi wini fu a trowstu di wi e gi en, dan a musu sabi a tru Gado, a musu sabi sortu Sma a de, èn a musu sabi tu taki wi kan frutrow tapu den pramisi fu en. Te wi e suku fu yepi wan sma di no e dini Yehovah ete, dan a bun fu fruteri en den sani disi: (1) A trowstu di de fu feni na ini Bijbel e kon fu Yehovah, a tru Gado. (2) Yehovah na a Almaktiwan, a Sma di  meki hemel nanga grontapu. A de wan Gado fu lobi èn a abi lobi bun-ati nanga waarheid pasa marki. (3) Te wi e kon krosibei na Gado fu di wi e teki soifri sabi fu en Wortu, dan wi sa kisi deki-ati fu man horidoro na ini muilek situwâsi. (4) Bijbel e fruteri fu tori pe difrenti sma ben kisi fu du nanga spesrutu problema.

7. (a) Sortu krakti a kan abi tapu wan sma te wi e sori en taki Gado e gi furu trowstu „nanga yepi fu Krestes”? (b) Fa yu kan trowstu wan sma di e frustan taki a no tyari ensrefi na wan bun fasi?

⁷ Ma son sma di e sari, sabi Bijbel kaba. Toku trawan ben man trowstu den nanga 2 Korentesma 1:3-7. Te den e leisi den tekst disi, dan den poti prakseri spesrutu na den wortu: „Wi e kisi furu trowstu nanga yepi fu Krestes.” A bijbeltekst disi kan yepi wan sma fu frustan taki den sani di skrifi na ini Bijbel e gi trowstu èn taki a musu poti moro prakseri na Bijbel. A tekst disi kan meki taki a sma wani sabi moro fu a tori disi èn disi sa gi yu wan okasi fu taki nanga a sma wan tra leisi baka. Efu wan sma e denki taki den problema di a abi na a bakapisi fu ogri sani di a du, dan sondro fu krutu en, wi kan sori en taki a de wan trowstu fu sabi san skrifi na ini 1 Yohanes 2:1, 2 nanga Psalm 103:11-14. Na so wan fasi wi kan trowstu trawan trutru nanga a trowstu di Gado e gi.

Te sma e kisi fu du nanga den takru bakapisi fu ogridu noso ekonomia problema

8, 9. Fa wi kan gi trowstu na a yoisti fasi na sma di e pina fu ogridu ede?

⁸ A libi fu milyunmilyun sma pori fu ogridu ede, a kan de ogri di du na ini a birti pe den e libi, noso ogri di e du te orloku de. Fa wi kan trowstu den sma disi?

⁹ Te tru Kresten e taki noso e du sani, dan den e luku bun fu no teki sei na ini a feti di difrenti grupu fu sma e feti nanga makandra (Yohanes 17:16). Ma den e gebroiki Bijbel na wan yoisti fasi fu sori taki den ogri sani di e pasa now, no sa tan go doro fu ala ten. Den kan leisi Psalm 11:5 fu sori fa Yehovah e denki fu sma di lobi fu du ogri, noso den kan leisi Psalm 37:1-4 fu sori taki Gado e gi wi a rai fu frutrow tapu en na presi fu pai ogri fu ogri. Den wortu fu Psalm 72:12-14 e sori fa a Moro Bigi Salomo, Yesus Krestes di e tiri now leki Kownu na hemel, e denki fu sma di e pina fu ogridu ede, aladi densrefi no abi noti fu du nanga dati.

10. Efu furu yari langa yu libi na wan presi pe furu feti de, dan fa den bijbeltekst di kari dyaso, kan de wan trowstu gi yu?

¹⁰ Son sma e libi na ini kondre pe sma e feti a wan feti baka a trawan fu kisi makti na ini den kondre dati. Den sma disi abi a denki taki feti nanga den bakapisi di e kon fu dati na sani di musu fu de na ini a libi. A wan-enkri fasi fa den e denki taki den kan kisi wan moro bun libi, na te den e lowe go na wan tra kondre. Ma furu sma no man du disi, èn furu fu den wan di pruberi fu du disi, lasi den libi. Den wan di ben man lowe go na wan tra kondre kon si taki aladi den kon fri fu den problema di den ben abi fosi, toku den kisi tra problema baka. Yu kan gebroiki Psalm 146:3-6 fu yepi den sma disi fu howpu tapu wan sani di moro bun leki fu lowe go na wan tra kondre. A profeititori na ini Mateyus 24:3, 7, 14 noso a di fu 2 Timoteyus 3:1-5 kan yepi den fu frustan a situwâsi fu den moro bun, namku taki wi e libi na ini den lasti dei fu na owru seti fu sani disi. Den tekst soleki Psalm 46:1, 3, 8, 9 nanga Yesaya 2:2-4 kan yepi den fu frustan taki wan trutru howpu de gi wan moro bun tamara pe vrede sa de.

11. Sortu tekst ben trowstu wan uma fu West-Afrika, èn fu san ede?

¹¹ Di sma ben feti nanga makandra na ini West-Afrika fu wan langa pisi ten, dan leti na mindri a feti disi, wan uma lowe gowe libi en oso. A ben kon frede srefisrefi, a ben e sari, èn a ben lasi-ati trutru. Bakaten, di na uma disi nanga en osofamiri ben e libi na ini wan tra kondre, dan en masra bron a trow papira fu den. Aladi na uma ben de nanga bere na a ten dati, toku en masra seni en gowe nanga a boi fu den di ben abi tin yari. A masra du ala den sani disi fu di a ben wani tron wan priester. Di Kotoigi fu Yehovah miti na uma disi, dan den leisi Filipisma 4:6, 7 nanga Psalm 55:22 gi en. Den leisi  sosrefi wan tu artikel fu A Waktitoren nanga Ontwaakt gi en. Disi ben meki na uma kisi trowstu te fu kaba èn a kisi wan marki na ini a libi sosrefi.

12. (a) Sortu trowstu den Buku fu Bijbel e gi na den wan di abi furu ekonomia problema? (b) Fa wan Kotoigi fu Asia ben man yepi wan klanti fu en?

¹² Ekonomia problema pori a libi fu furu sma. Son tron feti nanga den bakapisi fu feti e meki taki ekonomia problema de. Son leisi den fowtu bosroiti di den tiriman e meki, a gridifasi èn krukafasi fu den, meki taki den e nyan a moni di sma ben kibri, so taki den sma disi lasi ala san den ben abi. Trawan noiti no ben abi furu gudu. A kan de wan trowstu gi den sma disi fu sabi taki Gado e gi sma a dyaranti taki den wan di e frutrow na en tapu kan abi a howpu taki wan regtfardiki grontapu sa kon pe sma sa abi prisiri na ini a wroko di den e du (Psalm 146:6, 7; Yesaya 65:17, 21-23; 2 Petrus 3:13). Di wan Kotoigi fu wan kondre fu Asia, yere fa wan klanti fu en ben e broko en ede nanga na ekonomia situwâsi na ini a kondre, dan a Kotoigi disi fruteri na uma taki den sani di e pasa na ini a kondre, de wan pisi fu wan marki fu sani di ben o pasa na heri grontapu. Baka di den ben abi wan takimakandra fu Mateyus 24:3-14 nanga Psalm 37:9-11, dan na uma disi bosroiti fu teki wan bijbelstudie.

13. (a) Fa wi kan gebroiki Bijbel fu yepi den sma di lasi-ati fu di trawan no du san den ben pramisi? (b) Te sma e denki taki a takru situwâsi fu den e sori taki Gado no de, dan fa wi kan yepi den fu frustan taki dati no de so?

¹³ Son tron sma pina furu yari langa noso den e lasi-ati fu di ibri tron baka trawan no du san den pramisi. Disi kan meki taki den sma disi kan tron neleki den Israelsma di no ben e arki „fu di den ben lasi-ati” (Exodus 6:9). Te disi de so, dan a kan de wan yepi fu sori den sma disi na sortu fasi Bijbel kan yepi den fu kakafutu gi den problema di den abi now èn fu wai pasi gi sani di kan pori a libi fu furu sma fu soso (1 Timoteyus 4:8b). Son sma e denki taki a takru situwâsi fu den e sori taki Gado no de, noso taki Gado no e broko en ede nanga den. Nanga yepi fu difrenti bijbeltekst, yu kan meki den sma disi frustan taki Gado wani yepi sma, ma taki furu sma no wani teki a yepi dati.​—Yesaya 48:17, 18.

Te sma e kisi fu du nanga bigi winti èn nanga gronseki

14, 15. Di wan rampu meki sma skreki srefisrefi, dan fa Yehovah Kotoigi sori taki den e broko den ede nanga sma?

¹⁴ Wan bigi winti, noso wan gronseki kan tyari bigi rampu kon. A kan tu taki wan bigi faya noso wan bom di sutu, e pori wan heri pisi kontren. Te disi de so, dan furu sma e sari srefisrefi. San wi kan du fu trowstu den sma di kisi fu du nanga den sortu rampu disi?

¹⁵ Te den sortu sani disi pasa, dan a de fanowdu fu sori den sma disi taki trawan e broko den ede nanga den. Baka di wan grupu fu sma du ogri-ati sani fu gens a tirimakti fu wan kondre, dan furu sma ben skreki srefisrefi fu a sani di den du. Furu sma ben lasi famiriman, a sma di ben e sorgu na osofamiri, nanga mati. Trawan lasi a wroko di den ben abi èn furu sma lasi tra sani di den ben e frutrow na tapu. Yehovah Kotoigi ben yepi den birtisma fu den, den sori taki den e frustan fa den e firi, èn den gi trowstu nanga yepi fu den wortu fu Bijbel. Furu sma warderi en trutru di wi sori taki wi broko wi ede nanga den.

16. Fu san ede Kotoigi ben man preiki nanga bun bakapisi di wan rampu pasa na El Salvador?

¹⁶ Na ini El Salvador wan bigi gronseki meki ipi-ipi tokotoko fu wan bergi saka kon na ondro, èn a sani disi meki furu sma lasi den libi. Wan Kotoigi lasi en manpikin fu 25 yari na ini dede. Na uma di ben o trow nanga a manpikin fu a Kotoigi disi, lasi tu sisa fu en sosrefi. A mama fu a yongu man disi nanga na uma di ben o trow nanga en, no draidrai fu go na ini a preikiwroko. Furu sma ben taigi den taki na Gado ben teki den wan di dede noso taki na Gado ben wani en so. Den Kotoigi gebroiki Odo 10:22 fu sori taki Gado no wani dati wi musu pina. Den leisi Romesma 5:12 sosrefi, fu sori taki na sondu fu libisma e meki taki wi e dede, a no fu di Gado wani dati. Den sori den sma den boskopu fu trowstu  tu di de fu feni na ini Psalm 34:18, Psalm 37:29, Yesaya 25:8, nanga Openbaring 21:3, 4. Den sma ben de klariklari fu arki, spesrutu fu di den tu uma disi sosrefi ben lasi den famiri na ini a rampu disi, èn furu sma bigin studeri Bijbel.

17. Na sortu fasi wi kan yepi sma di e kisi fu du nanga rampu?

¹⁷ Te wan rampu pasa, dan a kan taki yu miti wan sma di abi yepi fanowdu. Kande disi wani taki dati yu abi fu kari datra gi en, kande yu abi fu tyari en go na ati-oso, noso kande yu abi fu yepi en nanga nyanyan èn nanga wan tanpresi. Na ini 1998, so wan rampu ben pasa na Italiakondre. Wan nyunsuman ben si taki Yehovah Kotoigi ben „seti sani fu man yepi den sma di ben abi fu du nanga a rampu disi, aladi den no ben e luku sortu bribi den sma disi abi”. Den sani di ben o pasa na ini den lasti dei, soleki fa profeititori e sori, e meki taki na son presi furu sma e nyan pina. Na den presi dati, Yehovah Kotoigi e sori sma taki Bijbel ben taki den sani disi na fesi. Den e trowstu sma sosrefi nanga a dyaranti di Bijbel e gi taki a Kownukondre fu Gado sa tyari wan moro bun libi kon gi a libisma famiri, pe den no sa abi nowan broko-ede.​—Odo 1:33; Mika 4:4.

Te wan sma na ini a famiri dede

18-20. San yu kan taki noso du fu trowstu wan sma di lasi wan famiriman fu en na ini dede?

¹⁸ Ibri dei milyunmilyun sma e sari te wan lobiwan fu den dede. A kan taki yu e miti sma di de na row te yu de na ini a preikiwroko noso te yu e du den aladei sani fu yu. San yu kan taki noso du fu trowstu den sma disi?

¹⁹ A de fu si na a sma taki a e sari? Na oso lai nanga famiri di de na row? Kande yu wani taigi den furu sani, ma a de prenspari fu abi koni fu man si fa a situwâsi de (Preikiman 3:1, 7). A kan de wan bun sani fu sori den sma taki yu e sari taki den lasi wan lobiwan. Yu kan libi wan Bijbel publikâsi gi den di e taki fu a tori disi (a kan de wan brochure, wan tijdschrift, noso wan  traktaat), èn baka wan tu dei yu kan go baka na den fu luku efu yu kan yepi den moro fara. Na wan tra ten, yu kan go baka fu aksi den efu yu kan sori den wan tu sani na ini Bijbel di sa gi den deki-ati. Disi kan meki den firi korostu èn kande den no o sari so furu moro (Odo 16:24; 25:11). Yu no man gi sma wan opobaka neleki fa Yesus ben du disi. Ma yu kan sori den san Bijbel e taki fu a situwâsi fu den dedewan, aladi yu e hori na prakseri taki kande disi a no a ten fu sori den taki den abi wan fowtu prakseri fu a situwâsi fu den dedewan (Psalm 146:4; Preikiman 9:5, 10; Esekièl 18:4). Yu kan leisi makandra nanga den a pramisi fu Bijbel di abi fu du nanga na opobaka (Yohanes 5:28, 29; Tori fu den Apostel 24:15). Yu kan fruteri den san a sani disi wani taki, èn kande yu kan gebroiki wan eksempre fu wan opobaka na ini Bijbel (Lukas 8:49-56; Yohanes 11:39-44). Yu kan poti prakseri tu na den fasi fu a lobi-ati Gado di e gi wi so wan howpu (Yob 14:14, 15; Yohanes 3:16). Fruteri den fa den leri disi yepi yu tu èn fu san ede yu e bribi den leri disi.

²⁰ Te yu e gi a sma di e sari, wan kari fu kon na a Kownukondre zaal, dan disi kan yepi en fu kon leri sabi sma di lobi trawan trutru èn di sabi fa fu gi makandra deki-ati. Wan uma na ini Sweden kon si taki disi na san a ben e suku en heri libi langa.​—Yohanes 13:35; 1 Tesalonikasma 5:11.

21, 22. (a) San wi musu du te wi wani gi trowstu? (b) Fa yu kan trowstu wan sma di abi furu sabi fu Bijbel kaba?

²¹ Son tron yu sabi taki wan sma na ini a Kresten gemeente noso dorosei fu a gemeente, e sari fu di a lasi wan lobiwan. A de so taki son leisi yu no sabi san fu du noso san fu taki na ini so wan situwâsi? A Griki wortu di e vertaal nanga „trowstu” na ini Bijbel, wani taki „fu kari wan sma na yu sei”. Te yu wani gi trutru trowstu na den sma di e sari, dan disi wani taki dati yu o abi fu de klariklari fu yepi den sma dati.​—Odo 17:17.

²² San yu kan du efu a sma di yu wani trowstu, sabi kaba san Bijbel e taki fu dede, a frulusu paiman, nanga na opobaka? A sma di e sari kan kisi trowstu kaba, te wan mati di abi a srefi bribi leki en, de drape nanga en. Efu a sma disi wani taki, dan arki en bun. No firi taki yu abi fu taigi en wan lo sani. Te unu e leisi Bijbel, dan sori taki den tekst disi na sani di Gado taki, sani di e trowstu unu alatu. Taki fu a tranga bribi di unu alatu abi taki den pramisi fu Bijbel sa kon tru. Te yu e sori taki yu e frustan san trawan e firi neleki fa Gado e du disi èn te yu e taki fu den moi tru tori di skrifi na ini Gado Wortu, dan yu kan yepi den wan di e sari. Yu kan yepi den fu kisi trowstu nanga deki-ati fu „a Gado fu ala trowstu”, Yehovah.​—2 Korentesma 1:3.

[Futuwortu]

San na a piki fu yu?

• Te rampu e pasa, dan suma e kisi a fowtu furu tron? Fa wi kan yepi sma fu frustan a tori disi?

• San wi kan du fu yepi trawan so taki den kan kisi wini dorodoro fu a trowstu di Bijbel e gi?

• Sortu sani e meki sma sari na ini a birti pe yu e tan? Fa yu kan trowstu den?

[Aksi fu a tori disi]

[Prenki na tapu bladzijde 23]

Gi wan boskopu fu trutru trowstu te sma de ini nowtu

[Sma di abi a reti fu a prenki]

Wan loweman kampu: UN PHOTO 186811/J. Isaac

[Prenki na tapu bladzijde 24]

A sma di e sari kan kisi trowstu kaba, te wan mati fu en de drape nanga en