Yehovah e si san yu e du?

FA YU ben o piki na aksi dati? Furu sma ben o taki: ’Mi e bribi taki Gado ben si den wroko fu man soleki Moses, Gideon nanga David, ma mi no sabi efu a o poti prakseri na den sani di mi man du. Trutru mi no de leki Moses, Gideon noso David.’

A de tru taki son getrow man na ini Bijbel ten ben du tumusi aparti sani di ben sori taki den abi bribi. Den ’ben wini kownukondre na ini feti, den ben tapu den mofo fu lew, den ben man tapu a krakti fu faya, èn den ben man lowe gi a srapu fu a feti-owru’ (Hebrewsma 11:33, 34). Ma trawan ben sori taki den abi bribi na wan fasi di no ben de so span, èn Bijbel e gi wi a dyaranti taki Gado ben si den wroko fu den di ben abi fu du nanga bribi tu. Fu gi wan eksempre, poti prakseri na san Bijbel e taki fu wan skapuman, wan profeiti, nanga wan weduwe.

Wan skapuman e tyari wan srakti-ofrandi

San yu e memre fu Abel, a di fu tu manpikin fu Adam nanga Efa? Kande yu kan memre taki a dede gi a bribi fu en, dati na wan sani di furu fu wi no sa ondrofeni. Ma a fosi leisi di Gado poti prakseri na san Abel ben du ben abi fu du nanga wan tra sani.

Wan dei, Abel ben teki wan tu fu den moro bun skapu fu na ipi fu en èn a ben tyari den leki wan srakti-ofrandi na Gado. Na ini a ten disi wi kan si a sani di a pristeri leki wan pikin sani, ma Yehovah ben poti prakseri na san a ben du èn a sori taki a ben feni en bun. Ma dati a no ala. Pikinmoro fo dusun yari baka dati, Yehovah ben meki na apostel Petrus skrifi fu a tori disi na ini a buku Hebrewsma. Aladi someni yari pasa, toku Gado no ben frigiti a pikin srakti-ofrandi dati!​—Hebrewsma 6:10; 11:4.

Fa Abel ben sabi sortu srakti-ofrandi a ben musu tyari? Bijbel no e taki fu a tori disi, ma a musu ben de so taki a ben prakseri seryusu fu san a ben o du. A ben de wan skapuman, dati meki a no de fu fruwondru taki a ben teki wan tu fu en skapu leki ofrandi. Ma luku taki a gi den moro bun skapu di a ben abi​—den „fatu pisi” (Genesis 4:4). A ben kan de so tu dati a ben prakseri dipi fu den wortu di Yehovah ben piki a sneki na ini a dyari fu Eden: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na yu ede èn yu sa masi en na a bakafutu” Genesis 3:15; Openbaring 12:9). Aladi Abel no ben sabi suma ben de „na uma” nanga „en siri”, toku a ben frustan kande taki a ’masi na a bakafutu’ fu na uma en siri ben abi fu du nanga wan ofrandi pe brudu sa musu lon. Fu tru a ben frustan taki nowan tra sani ben kan de moro warti leki wan libilibi mekisani. Awansi fa a no fa, a srakti-ofrandi di a tyari ben fiti trutru.

Neleki Abel, Kresten na ini a ten disi e tyari srakti-ofrandi gi Gado. Na ofrandi di den e tyari a no den fosiwan fu na ipi, ma „wan srakti-ofrandi fu prèise Gado ala ten, dati wani taki, a froktu fu wi mofobuba di e meki [Gado] nen bekènti na publiki” (Hebrewsma 13:15). Den mofobuba fu  wi e meki a nen fu Gado bekènti na publiki te wi e prati a bribi fu wi nanga trawan.

Yu wani meki dati den srakti-ofrandi di yu e tyari kon moro warti? Dan poti bun prakseri na den sani di den sma di e tan na ini a kontren pe yu e preiki, abi fanowdu. Nanga san den e broko den ede? San den abi na prakseri? Sortu tori fu Bijbel sa hari den prakseri? Ala leisi te yu e preiki yu musu ondrosuku ala den gobaka di yu tyari nanga a prakseri fu du a wroko disi moro bun. Èn te yu e taki fu Yehovah, yu musu du dati nanga overtoigi, nanga yu heri ati. Meki na ofrandi di yu e tyari de wan trutru „srakti-ofrandi fu prèise Gado”.

Wan profeiti di e preiki gi sma di no wani arki en

Poti prakseri now na a profeiti Heinok. Kande a ben de a wan-enkri kotoigi fu Yehovah Gado. Yu de leki Heinok, a wan-enkri sma fu na osofamiri fu yu di e dini Yehovah na wan getrow fasi? Yu na a wan-enkri sma na ini yu klas na skoro, noso a wan-enkri wrokoman na yu wrokope di e hori ensrefi na den gronprakseri fu Bijbel? Efu dati de so, dan kande yu e kisi fu du nanga furu tesi. Kande yu mati, yu famiriman, tra sma di de na ini a srefi klas leki yu, noso tra wrokoman na yu wrokope e dwengi yu fu drai yu baka gi den wet fu Gado. Kande den e taki: „Nowan sma sa kon sabi san yu ben du, wi no sa fruteri nowan sma.” Kande den e taki nomonomo taki a de wan don sani fu broko yu ede nanga den markitiki fu Bijbel di e sori fa yu musu tyari yusrefi, bika Gado no e broko en ede nanga yu. Fu di yu no e denki neleki den èn taki yu no e du san den e du, meki den kan du ala san den man fu meki yu kon swaki so taki yu e broko kindi.

A de tru, taki a no makriki fu kakafutu gi den tesi disi, ma a no de wan sani di yu no man du kwetikweti. Poti prakseri na Heinok, a di fu seibi man na ini a famirilin fu Adam (Yudas 14). Na ini a ten di Heinok ben gebore moro furu fu den sma drape no ben sabi moro san bun noso san ogri. Den ben taki dotitaki; a fasi fa den ben tyari densrefi ben ’takru srefisrefi’ (Yudas 15). Den ben du leki fa furu sma e du na ini a ten disi.

Fa Heinok ben man horidoro? A piki tapu na aksi dati na wan prenspari sani gi wi na ini a ten disi. Aladi Heinok ben kan de a wan-enkri man na grontapu di ben dini Yehovah na ini a ten dati, toku a no ben de en wawan. Heinok ben waka nanga Gado.​—Genesis 5:22.

Fu du san Gado feni bun ben de a moro prenspari sani na ini Heinok en libi. A ben sabi taki fu waka nanga Gado ben wani taki moro leki fu libi wan krin libi nomo. Yehovah ben fruwakti taki a ben musu preiki (Yudas 14, 15). A ben musu warskow a pipel taki Gado ben si den ogri sani di den ben du. Heinok ben tan waka nanga Gado moro leki 300 yari​—dati ben langa moro leki iniwan fu wi e du dati. Teleki a dede a tan waka nanga Gado.​—Genesis 5:23, 24.

Neleki Heinok, wi sosrefi kisi a komando fu preiki (Mateyus 24:14). Boiti taki wi e gi kotoigi oso fu oso, wi e pruberi sosrefi fu taki fu a bun nyunsu nanga famiriman, nanga sma nanga suma wi e du bisnis, èn nanga skoromati. Sontron, kande wi e draidrai fu gi kotoigi sondro frede. Yu abi a problema dati tu? No lasi-ati. Waka baka na eksempre fu den fosi Kresten èn begi Gado fu gi yu deki-ati fu taki sondro frede (Tori fu den Apostel 4:29). Noiti no frigiti taki solanga yu e waka nanga Gado, yu noiti no de yu wawan.

Wan weduwe e sreka nyanyan

Prakseri taki wan weduwe di no kari na nen kisi tu blesi bika a sreka nyanyan! A no ben de wan Israelsma, ma a ben de wan trakondre-sma di ben libi moro leki  2800 yari pasa na ini a foto Sarfat. Pikinmoro na a kaba fu wan langa dreiten nanga angriten, a nyanyan di a weduwe ben abi ben kon kaba safrisafri. Ala nyanyan di a ben abi ete ben de wan pikinso blon nanga nofo oli fu meki wan lasti preti nyanyan gi ensrefi nanga a manpikin fu en.

Tapu a momenti disi wan fisitiman kon na en. A ben de Elia, a profeiti fu Gado, di aksi a weduwe pikinso nyanyan. A nyanyan no ben nofo kwetikweti gi en nanga a manpikin fu en èn fu tru a no ben abi noti moro fu gi a fisitiman. Ma nanga den wortu fu Yehovah Elia gi en a dyaranti, taki efu a e gi en wan pikinso nyanyan dan en nanga a manpikin fu en no ben o de nanga angri. Disi ben meki taki a weduwe di ben de fu wan tra kondre, ben musu poti bribi na ini a Gado fu Israel. Ma a poti bribi trutru na ini san Elia ben taki, èn Yehovah blesi en fu dati. „A bigi kan nanga blon no ben kon leigi, èn a pikin kan nanga oli srefi no ben kon drei, neleki fa Yehovah ben taki nanga yepi fu Elia”. Na uma nanga en manpikin ben abi nofo nyanyan te na a kaba fu na angriten.​—1 Kownu 17:8-16.

Ma a weduwe ben o kisi wan tra blesi. Wan pisi ten baka di a wondru sani dati pasa, a lobi manpikin fu na uma disi kon siki èn a dede. Fu di Elia ben abi sari-ati gi en, meki a begi Yehovah fu gi a boi en libi baka (1 Kownu 17:17-24). A sani disi ben o meki taki wan wondru musu pasa di noiti no ben feni presi ete. Nowan enkri buweisi de taki wan sma ben kisi wan opobaka bifo! Yehovah ben sa abi sari-ati ete wan leisi nanga a weduwe disi di ben de fu wan tra kondre? Iya a du dati. Yehovah ben gi Elia a krakti fu gi a boi en libi baka. Bakaten, Yesus ben taki fu a grani di na uma disi kisi: ’Na ini Israel furu weduwe ben de . . .Toku Gado ben seni Elia go . . . na Sarfat na ini a kondre Sidon na wan weduwe’.​— Lukas 4:25, 26.

Na ini a ten disi, na ekonomia situwâsi na grontapu no bun srefi na ini gudu kondre. Son bigi korporâsi seni wrokoman go na oso, sosrefi getrow wrokoman di ben wroko someni tenti yari kaba. Kande wan Kresten di e si taki a kan lasi en wroko, kan kori ensrefi fu gebroiki tumusi furu ten na wroko nanga a howpu taki a presi pe a e wroko sa tan hori en. Te a du disi a no sa abi nofo ten fu go na den Kresten konmakandra, fu go na ini a preikiwroko, noso fu sorgu gi ala den sani di na osofamiri fu en abi fanowdu. Ma a e firi taki awansi fa a no fa, toku a musu tan hori a wroko fu en.

Wan Kresten di de na ini so wan problema na ekonomia sei abi a reti fu broko en ede nanga dati. A de muilek fu feni wroko na ini den dei disi. Furu fu wi no e pruberi fu kon gudu, ma neleki a weduwe fu Sarfat, wi abi sani fanowdu fu tan na libi. Ma na apostel Paulus e memre wi san Gado ben taki: „Mi no sa gowe libi yu kwetikweti, èn noiti mi no sa drai mi baka gi yu.” Nanga ala frutrow wi kan taki: „Yehovah na mi yepiman; mi no sa frede. San wan sma kan du mi?” (Hebrewsma 13:5, 6) Paulus ben frutrow tapu a pramisi dati so te, taki a ben de klariklari fu gi en libi srefi èn Yehovah ben sorgu en ala ten. Gado sa du a srefi gi wi efu wi no e drai wi baka gi en.

Wi kan abi a firi taki wi noiti no ben kan du den sani di sma du di ben tranga na yeye fasi, soleki Moses, Gideon nanga David. Ma wi kan abi a srefi bribi leki den. Èn wi kan memre den sani di Abel, Heinok nanga a weduwe fu Sarfat ben du fu di den ben abi bribi. Yehovah e poti prakseri na ala den wroko di abi fu du nanga bribi​—sosrefi den pikinwan. Te wan studenti di abi frede gi Gado e weigri fu teki drugs fu wan speri fu en, te wan Kresten wrokoman e kakafutu gi a tesi di a kisi na en wrokope ini a tori fu seks hurudu, noso te wan owru Kotoigi e go na den gemeente konmakandra na wan getrow fasi aladi a  weri èn a gosontu fu en no bun, Yehovah e si dati. Èn a e prisiri!​—Odo 27:11.

Yu e si san trawan e du?

Iya, Yehovah e si san wi e du. Sobun, wi leki sma di e waka baka na eksempre fu Gado musu de na ai fu si a muiti di trawan e du. (Efeisesma 5:1). Fu san ede yu no e luku moro fini sortu problema den Kresten brada nanga sisa fu yu abi soso fu go na den gemeente konmakandra, fu go na ini a preikiwroko, èn sosrefi fu libi den aladei libi?

Sobun, meki den Kresten brada nanga sisa fu yu kon sabi taki yu e warderi a muiti di den e du. Den sa breiti dati yu poti prakseri na den, èn a fasi fa yu e broko yu ede nanga den e gi den a dyaranti taki Yehovah e poti prakseri na den tu.